Read idoma AYISÁYA 52 Bible Online

AYISÁYA 52 - idoma bible

AYISÁYA 52

¹Ācɛ kú Usáyɔn, aá cāŋjɛ, cɛ́ɛ́ kú lɔfú tīyē igbɔhá kpɔ́ ɛ́ɛ́ Ācɛ kú Ujerúsālɛm, igelī kú Ɔwɔicō ā, aá kwú īlī kú aá nōo tū ɛgahi nɛ̄hi ā í kpó wiiyē. Aílɔ́wá nēe wā í nyíla ɔlɛ́ ā í gáā bēhé wā ipú igelī nɛ̄hi kú ɔlɛ́ aá wā í junwalu lɛ aá gɛ ŋ́.

²Ācɛ kú Ujerúsālɛm, cāŋjɛ ŋmá ipú úmúlá cɛ́ɛ́ kú aá lɛ úmúlá gwōbónū ŋmá iyē. Kú aá lɛ agbá nōo kwu aá ā wi cɛ́ɛ́ kú aá nyīliyē tá.

³Ohígbū ka Óndū ā nōo wɛ Ɔwɔicō ā kahíníī, “Eko nēé je aá pīya aɔ́fiyɛ ā, é gbā ije dúúmā ikpɛ̄yí kú aá ŋ́, ɛ́gɔ́ɔmā nēé gáā gbā ije dúúmā ikpɛ̄yí kú aá eko nēé lɛ aá hɛ́tá ŋ́ má.

⁴Eko īkée, nɛ̄ aá nyɔ̄ gáā lā bɛ̄ɛka aúgbɔga ajɛ Íjīpiti ā, aá nyɔ̄ abɔ̄yī aá ā, Amáŋ igbīhāajɛ nyā, ācɛ Asírīya gaá lɛ aá kwú abɔfú, é kē gbā ɔdā dúúmā ikpɛ̄yí kú aá ŋ́.

⁵Ɔwɔicō ka ɔdī nɛ̄ anúɔ yɔ̄ ī má yɔ̄ āa? Eko nyā ɛ́ɛ klla le ɔdā ékpónū nēe yá Asírīrya ā yá Ubábīlɔn dúú ɛ́ɛ́. É le aá kpó nyɔ̄ ī cɔ̄fiyɛ abɔ̄fú. É kē gbā ɔdā dúúmā ikpɛ̄yí kú aá ŋ́ kpɔ́. Ācɛ nēe gē yá ōwē ā, gē gwō klla ī leyī gwū um bónū

⁶Eko nōo gē wā ā, ācɛ ɔlɛ́ um géē jé ka ami wɛ Ɔwɔicō á. É klla í jé ɔ̄cɛ nōo yɔ̄ ī kɛlā lɛ uwá ā, ohígbū ka n kē yɔ̄ amānyā.”

⁷Ɔ̄kā nɛ̄ ɔ̄cocɛ̄hɔ̄ nōo wā ŋmá ɔlɛ́ kú aɛ́fu wā í kā ka ɛbɔ́ ɔ́ɔ gā ɛɛ́ mā lɔhi nɛ̄hi. Ó wā í ka tɛ́ɛ́cɛ ka Ɔwɔicō ɔ́ɔ le ācɛ kú Ujerúsālɛm nyatá ɛɛ́. Ó klla ka ka Ɔwɔicō abɔ̄yīnū ɔ́ɔ kwú pīya ɔcɛ́ kú uwā ɛɛ́.

⁸Aá jāhɔ kú aá pó. Ācɛ nēe ī gbō igelī kú ɔlɛ́ aá ā bá ī gwéeyē, yɔ̄ ī tɔ́ɔga tɔ̄há. É géē bī īkpēyī kú abɔ̄yī uwā í má Óndú ā abɔ̄ ó í pīyɛyí wā Ujerúsālɛm ā.

⁹Igelī nɛ̄hi kú Ujerúsālɛm nōo tá alácɛ̄ ā, gwéeyē ká ā tɔ́ɔga bɛ̄ɛka ācɛ ɔlamu ā mɛ́ɛnɛ, ohígbū ka Óndú ā lɛ ācɛ ɔlɛ́ nū nyatá, klla le igelī nɛ̄hi kú ɔlɛ́ nū hɛ́tá ɛɛ́.

¹⁰Óndú ā géē bī ɔfú kú nū, nɛ̄ ɔfú ɔhá dúúmā í tōō le gbla anú ŋ́ mā le nya ācɛ ɔlɛ́ nū tá. Odúúdú ācɛ kú ɛcɛ kē í má ɔ̄.

¹¹Odúúdú aá nēe bī iyúklɔ́ kú Agblīihɔ-nɛ̄hi ā, aá nyɛ̄ɛ̄ ŋmá Ubábīlɔn Aá lɛ abɔ̄ kwu ɔdēelihɔ dúúmā ŋ́. Aá nyɛ̄ɛ̄ cɛ́ɛ́ ká aá lɛ īyī a tū yēŋēē.

¹²Amáŋ igbɛ́nyā ā, aá gáā nwúleyīkwū kwinya ŋmá abɔ́ɔ gɛ ŋ́. Ɔwɔicō nōo wɛ Óndú ā géē gbō aá ŋmá áklō dóódu. Ó klla í bī aá jé ɔwɛ.

¹³Ayisáya klla ka ka Óndú ā ɔ́ɔ kahíníī, “Ɔ̄cocɛ̄hɔ̄ kú um á gēe jɛ̄ gɔbū. É klla géē je ɔ́ gicō klla í lɛ ojīlīma ce ɔ́ nɛ̄hi.

¹⁴Ó yá ācɛ alɛwa eyījii, eko nēé má ɔ́ ā. É lɛ ɔ́ yá agbe, lɛ ɔ́ eyī tū mi ɛbɛɛbɛ, nōó kōō gbla ɔlɛɛcɛ fúlufúlu ŋ́.

¹⁵Amáŋ abālɔbányā, aéwo alɛwa géē hídáagó eko nēé lɛ ɔ́ má Okónu í klla gáā hɛ́ aɔ́cɛ́ kú aéwo ā ŋ́. Ohígbū kéē géē má, klla í jɛ́yí ɔdā nēé tɛtɛ jé ŋ́ mā.”