Read idoma AYISÁYA 53 Bible Online

AYISÁYA 53 - idoma bible

AYISÁYA 53

¹Ɔnyɛ cɛ̄ɛ̄lā nɛ̄ alɔ pó ā? Ɔnyɛ nɛ̄ Ɔwɔicō kē í ma ɔfú nɛ̄hi kú nū nōó gē le yúklɔ́ ā fú lɛ ɔ́ āa?

²Ɔ̄cocɛ̄hɔ kú Óndú ā kē bū wɛ̄ɛcɛ ipéyī nū bɛ̄ɛka ɔcí nɛ̄ŋcɛ́. Ó klla lɛbɛ̄ɛka ɔcí nōo tá ɛgba ga ipú ajɛ íkpakplla ā. Ó jóklōbīya ŋ́. Ó klla lɛ ojīlīmā ɛ́ɛ́ nɛ̄ alɔ kōō gē má ɔ̄ kú alɔ̄ jé ɔ̄ ŋ́. Ó lɛ ɔdā dúúmā nōo lɔhi ō má iyē kú nū ɛ́ɛ́, nōo í cɛ̄ lɛ ɔ́ he alɔ ɔtū ŋ́.

³Ācɛ tá ɔ̄, klla le eyī gwō ɔ̄ bónū. Ó wɛ ɔ̄cɛ nɛ̄ ɔtū í he ɔ́ ŋ́ eko dóódu, nɛ̄ ōwē le jé ɔ̄ iyē. Alɔ kwú eyī tónū ŋmá ɛgiyí nū klla kwú igbīhi í cē kwu ɔ́ klla kwú eyī gwō ɔ̄ bónū bɛ̄ɛka ɔda nōó wɛ ɔdā dúúmā ŋ́ mā.

⁴Amáŋ ɔnɔ kú ɔkpíyē nɛ̄ alɔ cíkā ō jé ā nōó je ce iyīnū á. Ōwē mɛ́mla ɔtūnōbí kú alɔ nōó je ce iyīnū á. Nááná alɔ bá ī gbɛlá ka ohígbū ɔ́bíipú kú nu nɛ̄ Ɔwɔicō yá ɔ̄ italā á.

⁵Amáŋ é le ɔ́ yáágbe ohígbū ɔbíipú nɛ̄ alɔ bī ā. É le ɔ́ iyē ca tāpū ohígbū ucē obɔ̄bí kú alɔ. Italā nēé yá ɔ̄ ā, yá ɛ́ɛ́ nɛ̄ alɔ lɛ ɛbɔ́ á. Itali nēé gɔ́ ā yá ɛ́ɛ́ nēé kē hɛ́ alɔ tá ŋmá ōcē á.

⁶Odúúdú alɔ gebí bɛ̄ɛka aálá ā, Ɔnyɔɔnyɛ kú alɔ kwú eyī ú pīya kwu ɔwɛ kú abɔ̄yīnū yɔ̄ ī nyɔ̄. Amáŋ Óndú ā kwú ɔ́bíipú kú odúúdú alɔ í kpó ce ɔ́ ɛyí.

⁷ É pīya anú tū, klla yá ɔ̄ ōwē nááná ó nwūla okónu ka ɔdā dúúmā ŋ́, bɛ̄ɛka ɔyí álá nēé bī nyɔ̄ gáā hɛ́ ɔ̄ ɔkɔ ā. Ámāŋ bɛ̄ɛka álá nōo klá iyɔbu ācɛ nēé gáā wá ɔ̄ ɔnwū ā.

⁸É lɛ ɔ́ kwú, lɛ ɛpɔ̄ ɛ̄kɛ̄mgbɛ̄ ka tū ɔ̄, kwú ɔ̄ ú nyɔ̄ kéē ŋmó icííci. Ɔ̄cɛ dúúmā í kē lɛɛlá wu ɔdā nōo gáā yá ɔ̄ ā ŋ́. Ohígbū íne nɛ̄ ācɛ ɔlɛ́ um bīya ā.

⁹É kwú ɔ̄ ú nyi ipú únóji éékpó mɛ́mla ācobɔ̄bíipú nēe lɛ ɔdu ā. Nááná nōó yá ɔdōbɔ̄bí dúúmā, ɛ́ɛ́ nōó kē kɛ̄ɛ̄mgbɛ̄ dúúmā ŋmá okónu ŋ́ mā.

¹⁰Náaná ó wɛ ɔtū kú Óndú ā ka ōwē nēé í yá ɔ̄cocɛ̄hɔ̄ kú nū ā kóō kwú pīya ɛya nēé í gwó nōo í yá kú Ɔwɔicō kóō kwú íne nɛ̄ alɔ bīya ā í yá alɔ ɛhi. Ohígbū ɔ́ɔmā ó géē má ayááyí nū, ó géē yēeyī ligbó, ó kē í yá ɔdā nɛ̄ Óndú ā miya ā lɔhi.

¹¹Ó géē má ile kú ōwē mɛ́mla ɔnɔ kú nū ā, ɔtū kē í he ɔ́. Ɔ̄cocɛ̄hɔ̄ kú um nɛ̄ ɛlā nū kē he um ɔtū ā, géē móōwē ohígbū ācɛ alɛwa, cɛ́ɛ́ ohígbū nū ā, n géē je odōbɔ̄bí nɛ̄ ācɛ alɛwa yá ā yá uwā ɛhi.

¹²Ohígbū ɔ́ɔmā, n géē je āhɔ̄ kú ojīlīma lɛ ɔ́ ipú ācɛ o lɔdu ā. Ó kē ī lɛ ukpɛ̄ mɛ́mla ācɛ olɔfú nɛ̄hi ā. Ohígbū koó kwú oyēēyī kú nū ú tónū klla mīyɛ italā nɛ̄ ācobīyíne cíkā ō má ā í ce iyīnū. Ó gē gbɔ̄ɔkɔ lɛ Ɔwɔicō ohígbū ācobīyíne.