Read idoma AYISÁYA 54 Bible Online

AYISÁYA 54 - idoma bible

AYISÁYA 54

¹ Awɔ nōó mɔyí jééjéē ɛ́ɛ́ ŋ́ mā, gwííje ká ā klla dɛ̄gba kú éeyē gbōmgbōm. Awɔ nōó jé ɔma kú ɔyí ō ma jééjéē ɛ́ ŋ́ mā, gbɔɔ́ ō gwíjē ká ā tɔ́ɔga mɛ́ɛnɛ. A géē ma ayí alɛwa eko nyā fíyɛ́ ɔnyā nōo húmáyī yɔ̄ ɔlɛ́ ɔbá, yɔ̄ ī ma ayí ā.

²Lɛ áklɔ̄kpɛ īlī kú uwɔ nɛ̄ a lā ipú nū ā nyīlɔwá, cɛ́ɛ́ a lɛ ɔ́ túkwaajɛ lɔfú.

³Ohígbū ka a géē nyīla glá ɛjī kú ajɛ ɔlɛ́ uwɔ ɔ́kíkā dóódu. Ayí kú uwɔ géē mīyɛ ajɛ kú aéwɔhá, é klla géē wā í lā ipú aígelī nɛ̄hi kú uwā nēe tá alácɛ̄ ā.

⁴Ā yúúfi ŋ́, uwēyī í gáā kwú uwɔ ŋ́. É kē gáā je uwēyī gā uwɔ gɛ ŋ́. A híí gbɛlá kwu ɔdōbɔ̄bí nɛ̄ a yá eko nɛ̄ a wɛ ɔyípɔ̄ŋcɛ́nyā ā gɛ ŋ́. Ā híī gbɛlá kwu uwēyī nōo kwú uwɔ eko ɔ́ɔmā ā gɛ ŋ́. Kwú uwēyī nōo kwú uwɔ eko nɛ̄ a yɔ̄ ōfōōfū uwɔ bɛ̄ɛka ɔnyōkwū nɛ̄ ɔbá nū gekwú ā ú ŋmá ipú ɔtū kú uwɔ.

⁵Óndú ā nōo wɛ Ɔwɔicō, nōo yá uwɔ ā wɛ ɔbá uwɔ á. Anú wɛ Ɔwɔicō kú Ísrɛ̄lu, nɛ̄ ɔ̄cɛ dóódu í tōō le gbla anú ŋ́ má. Anú kē wɛ Ɔwɔicō nōo ī gbō odúúdú ɛcɛ á.

⁶Ísrɛ̄lu, a lɛbɛ̄ɛka ɔncɛ́nyā nɛ̄ ɔtū le bīya lɛ ɔ́ nɛ̄hi ohígbū ka ɔbá nū tá ɔ̄. Amáŋ, Óndú ā lɛ uwɔ hīgwú cīgbīhi wā ɛgiyí nū yɔ̄ ī ka kahíníī,

⁷“Eko kpií nōo yɛ ā, nɛ̄ n nyɛ̄ɛ̄ hɛ̄ uwɔ tá á, amáŋ oŋmá lɛ ihɔtū nɛ̄hi nɛ̄ n lɛ gā uwɔ ā, n géē je uwɔ kwucē wā ɔlɛ́.

⁸N cɔ̄nū je igbīhi cē kwu uwɔ eko kpií nɛ̄ n. Amáŋ n géē yíihɔtū uwɔ klla ī méyīnyinyi uwɔ piyóo.” Abɔ̄ Óndú ā nōo gē nya uwɔ tá ā ka lɛ á.

⁹“Eko kú Unówa ā, n le okónu ce ka ń gáā bī éŋkpɔ̄ je ɛcɛ yíifi gbóógbóō ɛ́ɛ́ gɛ ŋ́. Ɛ́gɔ́ɔ́mā nɛ̄ n cokónu ícɛ ka ń gáā cɔ̄nū mla uwɔ igbɔhá ɛ́ɛ́ gɛ ŋ́ má. N gáā dɛ̄gba tū uwɔ, ɛ́ɛ́ nɛ̄ n gē yá uwɔ ōwē ɛ́ɛ́ gɛ ŋ́.

¹⁰Aɛ́fu nɛ̄hi mɛ́mla aɛ́fu nɛ̄ŋcɛ́ lɔfú kwú kpó wúlatāajɛ glá, ihɔtū kú um lɛyíkwu uwɔ í gáā mɛ gbóógbóō ŋ́. N géē le okónu nɛ̄ n ce mɛ́mla awɔ ka n géē je ɛbɔ́ ga uwɔ ā tū piyóo.” Ɛlā nɛ̄ Óndú ā, nōo yíihɔtū uwɔ ā ka ā yɔ̄ á.

¹¹Ayisáya ka Óndú ā ɔ́ɔ klla kahíníī, “Kpái! Ujerúsālɛm, awɔ igelī nɛ̄hi nōo yɔ̄ ī móōwē nɛ̄hi, nɛ̄ ɔ̄cɛ nōo í tá uwɔ ɔtūlé dúúmā í yɔ̄ ŋ́ má. N géē bī ɛcɔ̄ ogbɔɔ́lá nɛ̄hi le ikpó kú ɔlɛ́ uwɔ táajɛ klla í gwó uwɔ kpɔ́ ɛ́ɛ́.

¹²N géē bī ɛcɔ̄ ɔtángbéde le gwó inɔ̄ɔda kú ɔlɛ́ uwɔ nɛ̄ ācogbāajɛ gē ce ā. N klla ī bī ɛcɔ̄ nōo gē fíyajɛ bɛ̄ɛka ɔlá, í le yá aókompinu kú ɔlɛ́ uwɔ. N klla ī bī ɛcɔ̄ ogbɔɔ́lá le gwó ɔdɔ kú ɔlɛ́ uwɔ ā.

¹³Ami, abɔ̄yī um ā gē nwū ācɛ ɔlɛ́ uwɔ ɛlā N klla géē cē abahi klá uwá, klla í yá kú aá bá ɛbɔ́.

¹⁴Ɔdā olɔhi nɛ̄ a gē yá ipéyī Ɔwɔicō ā géē cɛ̄ gā uwɔ lɔfú iyē. A klla gáā yúúfi gɛ ŋ́ ohígbū ka ācɛ nēe gē pīya awɔ tū ā kwú ligbó gā awɔ ɛɛ́. É klla gáā lɛ abɔ kwu uwɔ glá gɛ ŋ́.

¹⁵Ó wɛ ami tū ɔ̄cɛ dúúmā nōo í wā gáā kpɛ́fú tú uwɔ ā ɛhɔ̄ ā ŋ́. Ɔ̄cɛ dúúmā nōo kē wā í nuunu tá uwɔ géē cɔ̄nyā gā uwɔ.

¹⁶Ami yá onɔwá nōo gē yá ojúgā, ī nā aíyɛ́fú nɛ̄ ācɛ gē bī le kpɛ́fú ā á. Ami kē yá aícɔ́ɔja nēe gē bī aíyɛ́fú ā lɛ ŋmó ācɛ ā á.

¹⁷Amáŋ ó lɛ íyɛ́fú dúúmā nēé bī wā gaá le nuunu tá uwɔ nōo géē lɔfú yá uwɔ ɔdā dúúmā glá ŋ́. Odúúdú ācɛ nēe gē kpɛlāce uwɔ ā, a géē má ohi nɛ̄ a géē tú uwā. Ɔdā nōo wɛ ukpɛ̄ kú ācocɛ̄hɔ kú um ā yɔ abɔ́ɔ á, n kē í cɛ̄pɔ̄ ācocɛ̄hɔ̄ kú um klla í cɛ̄ lɛ uwá yálé.”