Read idoma AYISÁYA 55 Bible Online

AYISÁYA 55 - idoma bible

AYISÁYA 55

¹Óndú ā kahíníī, “Ɔ̄cɛ dúúmā nɛ̄ ijēēnyi gē ŋmó ɔ̄, kóō wā gaá gwá éŋkpɔ̄. Ɔ̄cɛ dúúmā nōó lɛ ijē ŋ́ nááná, kóō wā í lá, cɛ́ɛ́ kóō lé. Wā ī lá ejé, mɛ́mla enyāamɛ̄. Á gáā gbā ije dúúmā ŋ́, ɛ́ɛ́ nēé kōō ī hɛ́ uwɔ ɔ́lá nū ŋ́.

²Ɔdíyá nɛ̄ aá gē ŋmó ije kú aá tū ɔdā nōó wɛ ɔdōlé abɔyī nū ŋ́ mā ā? Ɔdíyá nɛ̄ aá bá ī yúklɔ́ ohígbū ɔdā nōó gáā nū aá ipú ŋ́ mā ā? Aá jāhɔ̄ gā um lɔhi lɔhi kú aá yá ɔdā nɛ̄ n ka ā, cɛ́ɛ́ aá í lé aɔ́dōlé nōo lɔhi fíyé dúú ā.

³Aá jāhɔ̄ gā um, kú aá wā ɛgiyí um. Aá wā ɛgiyí um, cɛ́ɛ́ kú aá géē yēeyī. N géē cokónu nōó gáā tōō bīya ŋ́ gā uwɔ. Cɛ́ɛ́ n klla géē yá aɔ́dā olɔhi nɛ̄ n cokónu kú nū lɛ Udédīdi ā gā uwɔ.

⁴N kwú Udéfīdi ú pīya otrɛ̄yí kú aéwo alɛwa, cɛ́ɛ́ kóō gbō uwā. N kē bī ɔ̄ le ma ɔfú kú um fú lɛ ācɛ.

⁵Ɛ́gɔ́ɔ́mā nɛ̄ aá géē hī aéwo nɛ̄ aá jé jéjéē ɛ́ ŋ́ mā igwú á, aéwo nēé jé aá jéjéē ɛ́ɛ́ ŋ́ ɔ́ɔmā géē kwinya wā ɛgiyí aá, í lɛyítáajɛ lɛ aá. Ó í lɛ ā ohígbū ka ami, Ɔwɔicō, nōo wɛ Óndú, nɛ̄ aá ī gbā ā, nōo klla wɛ Ɔwɔicō kú Ísrɛ̄lu nɛ̄ ɔwɔ ɔhá dúú í tōō le gbla um ŋ́ mā, kwú ojīlīmā mɛ́mla ɛgahi kú ɔcɛ́ í lɛ aá ɛɛ́.”

⁶Aá tíne Óndú ā, eko nɛ̄ aá géē lɔfú má ɔ̄ glá ā. Aá hī ɔ̄ igwú, eko nōó kwu aá ajaajɛ ā.

⁷Ɔ̄cobɔ̄bíipú nɛ̄hi ā, kóō kwúcē ŋmá ucē ɔ́bíipú kú nū ɔ́ɔmā. Ɔ̄cɛ nōó gē yá ucē okpaakpa ŋ́ mā, kóō kwúcē ŋmá ɛlá icííci nōó gē gbo ɔ́ɔmā. Cɛ́ɛ́ kéē kwúcē wā ɛgiyí Óndú ā nōo wɛ Ɔwɔicō kú alɔ ā. Ó kē í méyīnyinyi uwā klla í je ɔdōbɔ̄bí nɛ̄ ɔ̄cɛ yá ā yá ɔ̄ ɛhi fíyaa.

⁸Ayisáya klla ka Óndú ā ɔ́ɔ kahíníī, “Ɔda nɛ̄ n gē gbɛlá nū wɛ ɛyɛ́ɛ́yí gwū ákú aá tá, ɔwɛ nɛ̄ n gē yá odée kú um ā kē wɛ ɛyɛ́ɛ́yí gwú ákú aá tá.”

⁹Ohígbū ka ɛ́gɛ́nɛ̄ ɔkpáncō ligbó ŋmá ɛcɛ lɛ ā, ɛ́gɔ́ɔ́mā nɛ̄ ɔwɛ kú um ligbó hɛ̄ ɔwɛ kú aá tá lɛ ā á. Ɛ́gɔ́ɔ́mā nɛ̄ ɛlá nɛ̄ n gē gbo ā ligbó ŋmá ákú aá lɛ ā á.

¹⁰Ɔwɔ mɛ́mla ébú gē yā ŋmá ɔkpāncō wā ajɛ. É kē ī kwúcē gicō gɛ ŋ́ jāā gbéeko nēé lɛ éŋkpɔ kpó tāajɛ klla cɛ̄ lɛ ácí, ēpū mɛ́mla ɔcí le bū ŋmá ajɛ wɛ̄ɛcɛ. É klla í yá ikpɔdɛ̄hɔ̄ lɛ ɔ̄cɛ nōo ī nyi ɔ́ tū ipú ajɛ ā. Ó klla ī je ɔdōlé lɛ ācɛ.

¹¹Ɛ́gɔ́ɔmā nɛ̄ ɛlā kú um nōo gē bɛ̄cɛ ŋmá okónu kú um wɛ̄ɛcɛ ā lɛ á. Ó gáā kwúcē wā ɛgiyí um áncā ŋ́ amáŋ ó géē yá ɔdā nɛ̄ n tíne ā, klla ī yá ɔdā nɛ̄ n tū ɔ̄ ɛhɔ̄ kóō yá ā ā piíí.

¹²Eko nēé lɛ aá hɛ́tá ŋmá Ubábīlɔn, aá géē bá ī gwéeyē. É kē ī kpó aá wɛ̄ɛcɛ ɛbɔ́. Ɔkɔ kú ɔga nɛ̄ aá géē yɔ̄ ī tá ā géē cɛyí ɛfu nɛ̄hi mɛ́mla aɛ́fu nɛ̄ŋcɛ́ nēe bá iyɔ̄bū aá ā. Aɔ́cí kē ī bá ī mīyɛ ɔkɔ kú abɔ̄ nɛ̄ aá gē yɔ̄ ī gwō ā.

¹³Ɔcí ulóko géē jɛ̄ kwu ɛga nɛ̄ ɔcí ujē kwu tɛtɛ ā. Ɔ̄cí upi géē jɛ̄ kwu ɛga nɛ̄ ánagbáagwu kwu tɛtɛ ā. Aɔ́cí nēe bá ā géē wɛ ɔdā ō bī le blakwu ɔfú mɛ́mla ɛgahi kú ami, Ɔwɔicō kú aá piyóó. Ó géē wɛ ɔdōcābɔ̄ nɛ̄ ɔ̄cɛ dúúmā í kē gáā hɛ́ ɔ̄ ŋmá ajɛ ŋ́.”