Read idoma AYISÁYA 56 Bible Online

AYISÁYA 56 - idoma bible

AYISÁYA 56

¹Ɔwɔicō ka lɛ ācɛ ɔlɛ́ nū kahíníī, “Aá yá ucē okpaakpa, aá klla yá ucē ɔkwɛ̄yi. Ohígbū ka n géē wā gaá nya aá tá ānāānā.

²N gē hɔ́hā ce ɔ̄cɛ dúúmā nōo gē yá íne nɛ̄ n tū lɛyíkwu ɛ̄cī nēé cíkā ō yúklɔ́ ŋ́ mā, í klla ī nyílá anú ŋ́ mā, mɛ́mla ācɛ nēe tá ka aá yá ɔdōbɔ̄bí ŋ́ mā.”

³Ɔ̄cɛ éwɔhá dúúmā nōo kwú īyī nū ú lɛ Óndú ā, kóō híī ka ka anɔ́ɔ jé ka Óndú ā ɔ́ɔ gáā cɛ̄ lɛ anúɔ wɛ ipú éyi kú ācɛ ɔlɛ́ nū ŋ́ nɛɛ ŋ́. Ɔ̄cɛ nēé le búdá ā kóō híī ka, ka anúɔ ɔ́ɔ lɛbɛ̄ɛka ɔcí nōo le ŋmó ā ŋ́.

⁴Ohígbū ka Óndú ā da ācɛ nēé le búdá ā kahíníī, Ɔ́dāŋ ka aá lɛ ojīlīma ce um ŋmá lɛ ō yá íne nɛ̄ n tū lɛyíkwu ɛ̄cī nɛ̄ ācɛ í cíkā ō yúklɔ́ ŋ́ mā, nɛ̄ aá klla gē yá ɔdā nōo he um ɔtū ā, nɛ̄ aá klla lɛ ɛka kú um ā tū kpaakpa,

⁵n géē tá iyē kú aá tū ɔdɔ kú ipú Agblīihɔ-nɛ̄hi kú um. É géē blakwu aá piyóó ipú ācɛ ɔlɛ́ um, fíyɛ́ ācɛ nēe ma ayí. E gáā je mlanyī iye aá ŋ́.”

⁶Anɔ́ɔ Óndú ā klla da ācɛ éwɔhá nēe kwú īyī uwā í lɛ ɔ́, gē gbā ɔ̄ ɛ̄gbā, gē yíhɔtū nū, gē cɛ̄ ɔ̄ ɛhɔ ā, klla ī lɛ ɛka kú nū tū ā kahíníī,

⁷“N géē bī aá wā Usáyɔn, ɛyí ɛfu nōo wɛ ákú abɔyī um ā. N klla géē yá ka ɔtū kóō he aá ipú inu nēé ī gbɔ̄ɔkɔ gā um ā. N klla í mīyɛ ɛya nɛ̄ aá gē gwó gā um ɛyí ede kú um ā. É géē hī Agblīihɔ-nɛ̄hi kú um ā ka, inu nɛ̄ ācɛ kú odúúdú aéwo géē gbɔ̄ɔkɔ gā um.”

⁸Óndú ā nōo wɛ Ɔwɔicō ā, nōo kē bī ācɛ ɔlɛ nū wā ɔlɛ́ ŋmá ajɛ éwɔhá ā ka anúɔ lɛ okónu ce ka anúɔ géē bī ācɛ ɔhá wā í kwu uwá ɛɛ́.

⁹Óndú ā ka lɛ aéwɔhá ā kahíníī, “Aá wā bɛ̄ɛka aɛ́bɛ́ ipácí mɛ́mla aɛ́bɛ́ kú ipú ūpū, aá wā í kwú ācɛ ɔlɛ́ um lé!

¹⁰Odúúdú ācogbāājɛ kú ācɛ ɔlɛ́ um, nēe cíkā ō pi ācɛ ɔlɛ́ um ahɔ̄ ā, le kpó peyī ɛɛ́. É lɛbɛ̄ɛka ewō nōo cíkā ō bá gē gbāajɛ, amáŋ é gwutá ajɛ icííci nēé fɔnū glá ŋ́. É bá ī gbiyɔlā, bá ī nɔ̄na. Iyɔlā he uwá ɔtū fíyɛ́ á.

¹¹É lɛbɛ̄ɛka aéwō nēe yúnwū ɔdōlé nɛ̄hi, nɛ̄ ɔdōlé dúúmā í gē jɛ̄ uwā ŋ́ mā. Odúúdú uwā lɛbɛ̄ɛka ācogbāálá nēé jé ɔdā dúúmā ŋ́ mā. Ɔdā dúúmā nēe he uwá ɔtū ā, nēé gē yá á. Ile kú īyī uwā ofōōfūnū nēé gē tíne á.”

¹²É bá ī ka kahíníī, “Ālɔ̄ lɛ ejé tíne cɛ́ɛ́ kú alɔ̄ gwá gáā kwu ɛga dóódu nɛ̄ alɔ gwá kwu glá ā. Óócí kē í lɔhi fíyɛ́ ícɛ ɛ́ɛ́ má.”