Read idoma AYISÁYA 57 Bible Online

AYISÁYA 57 - idoma bible

AYISÁYA 57

¹Ācɛ oyá ɔdōlɔhi ā bá gē kwú, ācɛ nōo le ɔtū tá ɛlā Ɔwɔicō ā bá gē pékwú gbɔbū lɛ eko kú uwā icííci, ɔ̄cɛ dúúmā í kē lɛ ɛlá wu ɔ̄ ŋ́. Ɔ̄cɛ dúúmā í kē jé ɛyí nū ŋ́. É ké yɔ̄ gē je ācɛ o yá ɔdā okpaakpa ā ŋmá ipú ōwē mɛ́mla ámíya.

²Ācɛ nēe gē yá ucē okpaakpa ā gē nyɔ̄ ɔlékwu ɛbɔ́. É í lɛ omlɛ́nyɔ́ eko nēé gekwū.

³Amáŋ aá túblá wā amānyā, aá nēe wɛ ayí kú ācogwɛ́ɛbā, ācɛ ō cikpó ɔnyā nōó wɛ ɔnyā uwā ŋ́ mā mɛ́mla ayí kú aákwuna.

⁴Ɔ̄nyɛ nɛ̄ aá gē yɛ́ɛ́bɛ́ āa? Ɔ̄nyɛ nɛ̄ aá gē cōkónu gbɛdɛɛ tá ɔ̄ āa? Aá wɛ ayí kú ācobɔ̄bíipú mɛ́mla ayí kú ācokɛ̄mgbɛ̄.

⁵Aá gē cikpɔ́nyā ɔkwu ɔcí nēé hī ka óoku ā dóódu, ɛga nɛ̄ aá gē pɛ̄cí ā. Aá lɛ ayí aá kpó ŋmó gwɛ́ɛya ɛyí ede kú ɔpɛ́ kú ɛháajɛ kú aápátɛ́cɔ̄ ā.

⁶Aɛ́cɔ̄ mlɛ̄mlē kú ɔpɛ́ ā wɛ ɛcí nɛ̄ aá ī pā á. Aɛ́cɔ̄ ɔ́ɔmā nɛ̄ aá kpó ŋmá ajɛ abɔ́ɔ ā, nɛ̄ aá gē bī ejé wā í ce klá uwá, nɛ̄ aá klla ī kpó īkpɔdɛ̄hɔ̄ kú aá le gbā uwā ɛ̄gbā á. Aá gbɛlá ka odúúdú ucē kú aá ɔ́ɔmā he um ɔtū nɛɛ?

⁷Ɛyí aɛ́fu ā nɛ̄ aá lɛ agōdō kú aá tá gē gwutá mɛ́mla aákwuna á. Abɔ́ɔ ā nɛ̄ aá kē ī nyɔ̄ ī gwɛ́ɛya, gē gbɔ̄ɔkɔ dúú á.

⁸Aá kwú úkpɛ̄cí kú aá ā ú háyi igbīhi odūngwɔwɛ kú ɔlɛ́ aá. Aá kwú mlanyī um, kwú īlī kú aá í plla, le icō agōdō olɔwá kú aá ā tū mɛ́mla anyā nɛ̄ aá ī gbā ije lɛ uwā kú aá cikpó uwā ā. Abɔ́ɔ ā nɛ̄ aá gē yá ɔdā nɛ̄ unwū kú aá da aá á.

⁹Cɛ́ɛ́ aá lɛ anɔ̄ mɛ́mla ɔtūlalī kú aá kpó tū iyē nyɔ̄ gaá pɛ̄cí nēé hī ka Umolɛ̄ki ā. Aá gē tíne ɛcí nɛ̄ aá géē pā ga ɛga dóódu, jāā kwu ɔlékwū dúú.

¹⁰Ɛ̄jɛ̄ le jɛ̄ aá ŋmá lɛ ō yɔ̄ ī tíne ɛcí nɛ̄ aá í pā ɛɛ́. Náaná aá kē gáā mlɛ́nyɔ̄ ŋ́. Aá gē gbɛlá ka aɛ́cí kú aá ɔ́ɔmā gē je ɔfú lɛ aá á. Ohígbū ɔ́ɔmā ɛ̄jɛ̄ í gē jɛ̄ aá ŋ́.

¹¹Ɔwɔicō kahíníī, “Ɔdí nɛ̄ aɛ́cí nyā wɛ ɛ́ɛ́ nɛ̄ aá gē yúúfi uwā, nɛ̄ aá gē kɛ̄mgbɛ̄ gā um, klla í je mlanyī um dúúdú āa? Abɔ̄ n yɔ̄ cíí kú um í ka ɔdā dúúmā gɛ ŋ́ gbojī ā, nɛ̄ aá klla le ojīlīmā ce um gɛ ŋ́ mā nɛɛ?

¹²Aá gbɛlá ka ɔdā nɛ̄ aá gē yá ā le kpaakpa, amáŋ n géē je ɔkwu kú ucē kú aá ɔ́ɔmā tɛ́ɛcɛ. Aɛ́cí kú aá ɔ́ɔmā í kē gáā tá aá abɔ̄ glá ŋ́.

¹³Eko dúúmā nɛ̄ aá gē tíne otábɔ̄, aɛ́cí kú aá ɔ́ɔmā í gáā tá aá abɔ̄ glá ŋ́. Owu nōo ī tá fɛɛlɛ ā géē cē uwá gwōnū glá. Amáŋ ācɛ nēe kpɔ́tūce um ā géē lā ipú ajɛ ā, klla í lɛ ukpɛ̄ ɛyí ɛfu nōo wɛ ákú abɔyī um mā ā.”

¹⁴Ayisáya klla ka ka Óndú ā ɔ́ɔ kahíníī, “Lɛ ɔwɛ ā túglāyá cɛ́ɛ́ ká ā lɛ aɔ́dōgbájí tū ācɛ ikpó kpó ŋmá ɔwɛ gbēyī ācɛ ɔlɛ́ um nēe í pīyɛyí wā ɔlɛ́ ā.”

¹⁵Ayisáya klla ka kpɔ́ ka Ɔwɔicō nɛ̄ ɔdā dúúmā í tōō le gbla anú ŋ́, nōo lā ɔkpáncō ɛga nōo licō fíyɛ́ dúú, nōo klla yēeyī piyóó ā ɔ́ɔ kahíníī, “N lā ɛga nōo tīihɔ klla licō fíyɛ́ dúú ā, amáŋ n lā mɛ́mla ācɛ nēe tú īyī uwā wāajɛ, klla ī pīyabɔ̄ ā, cɛ́ɛ́ ká n̄ géē lɛ ɔfú ɛyīpɛ̄ tū uwā iyē, ká n̄ klla tū uwá ɔtū kwú ɔtū.

¹⁶Ń gáā yɔ̄ ī kpɛ́lāce ācɛ ɔlɛ́ um, klla yɔ̄ ī cɔ̄nū mla uwá piyóó gɛ ŋ́. Ó le lɛ ā ŋ́, ɛ́nyɔ́ géē hɛ́ ɛjɛ̄ɛ̄jī ācɛ nɛ̄ n yá ā abɔ̄.

¹⁷N tɛtɛ cɔ̄nū mla uwá, ohígbū ɔ́bíipú mɛ́mla eyī ō le kwɔdā kú uwá. Ɔ́ɔmā yá ɛɛ́ nɛ̄ n yá uwā ōwē, je igbīhi ce kwu uwá á. Nááná é kē bá yɔ̄ ī yá īkpɛ̄yí olɔfú klla bá yɔ̄ ī yá ucē nōo he uwá ɔtū ā kpɔ́.

¹⁸“N le ucē nēé gē yá ā má ɛɛ́, nááná n géē hɛ́ uwá tá kpɔ́. N géē bī uwá jé ɔwɛ, klla í tá uwā abɔ̄. N klla í tá ācɛ nēe yēekwu ā ɔtū lé.

¹⁹Ɛbɔ́ kóō yɔ̄ lɛ odúúdú ācɛ, kwu ācɛ nēe bá ɛga oligbó mɛ́mla ācɛ nēe kwu ajaajɛ ā. N géē hɛ́ ācɛ ɔlɛ́ um tá

²⁰Amáŋ ācobɔbíipú ā lɛbɛ̄ɛka ísu nɛ̄hi nōo gē tá úgbagwú ā. Ɛ́gɛ́nɛ̄ úgbagwú kú ísu nɛ̄hi í gē yɔ̄ cíí ŋ́, gē kpó ɔ́tɔ mɛ́mla imū wɛ̄ɛcɛ ā, ɛ́gɔ́ɔmā nɛ̄ ācobɔ̄bíipú ā lɛ dúú á.”

²¹Ayisáya ka Ɔwɔicō nɛ̄ anúɔ ī gbā ā ɔ́ɔ kahíníī, “Ɛbɔ́ dúúmā í yɔ̄ lɛ ɔ̄cobɔ̄bíipú ā ŋ́.”