Read idoma AYISÁYA 58 Bible Online

AYISÁYA 58 - idoma bible

AYISÁYA 58

¹Óndú ā klla kahíníī, “Aá dɛ̄gba gbōmgbōm, ɛ́gɛ́nɛ̄ aá dɛ̄ glá ā. Aá lɛ okónu klá ŋ́. Aá jɔkɔ gicō bɛ̄ɛka ɛ́gɛ́nɛ̄ é ī tá opo tāāā ā. Aá ka ɔ́bíipú nɛ̄ Ísrɛ̄lu, ācɛ ɔlɛ́ um bī tū um ā tɛ́ɛcɛ lɛ uwá.

²É bá ī gbā um ɛ̄gbā ɛ̄cī dóódu, klla bá ī yá bɔ̄ɔdā nēé gē yɔ́tū kpoókpoó kéē jé ɔdā nɛ̄ n tíne ā, cɛ́ɛ́ kéē lɛ aíne kú ami nōo wɛ Ɔwɔicō kú uwā tū. É da um ka ami ɔ́ɔ̄ nwū aá ɛlā ɔkwɔɔkwɛ̄yi. É ka ɔ́ɔ klla he aá ɔtū kú aá kwu um ajaajɛ nɛ̄hi.

³É da um kahíníī, ‘Ɔdíyá nɛ̄ alɔ gwōkónu, nɛ̄ á cēē má alɔ ŋ́ mā mɛ́ɛ̄? Alɔ yéyīnyinyi í cēē lé ɔdōlé ŋ́, nááná á cēē lɛ ɛlá wu ɔ́ ŋ́.’ N gē tá uwā ohi kahíníī, “Ɔdā nōo yá ā wɛ ka ɛ̄cī nɛ̄ aá ī gwōkónu ā, aá gē yá ɔdā nōo he aá ɔtū ā. Aá klla í lɛ abɔ̄ da ācoyúklɔ́ lɛ aá ɛyí tū ajɛ.

⁴Aá gē bī okónu nɛ̄ aá ī gwū ā le yíkpɛ́lā klla gē nuunu. Aá gbɛlá ka ɛdɔ kú okónu ō kwū ɛ́gɛ́nyā géē yá ká n pó ɔkɔ nɛ̄ aá gē gbā ā nɛɛ?

⁵Eko nɛ̄ aá gē gwōkónu, aá le ɛyí cē gbaajɛ bɛ̄ɛka ēpū ácí ā. Aá klla gē nā īlī ekwu klá ajɛ gē fú ewo klá anú kú aá gwutá ɛyí nū. Ɛdɔ okónu nɛ̄ aá ī gwū nyā í he um ɔtū á nɛɛ?

⁶Ɛdɔ okónu nɛ̄ aá ī gwū nɛ̄ n géē mīyɛ ā yɔ̄ á. Aá lɛ agbá kú ɔ́bíipú wī ŋmá ācɛ ikpó mɛ́mla abɔ̄. Aá kē kwú ɔ́ŋgbá nɛ̄ aá le gbō ācɛ gē pīya uwá tū ā ū hɛ́, cɛ́ɛ́ ka ācɛ nēé yɔ̄ ī pīyatū ā kéē le hɛ́tá.

⁷Aá je ɔdōlé kú aá lɛ ācɛ nɛ̄ ɛmiyɛ gē ŋmó uwā ā. Aá mīyɛ aólɛhɔ́cɛ nēé lɛ ɔlɛ́ ŋ́ mā wā ɔlɛ́ aá kéē lā mɛ́mla aá. Aá je īlī lɛ ācɛ nēé má īlī dúúmā le wiiyē ŋ́ mā. Aá kē híī tá ō tá aɔ́máapú aá abɔ̄ ŋ́.

⁸Eko nɛ̄ aá le yá lɛ ā, cɛ́ɛ́ n géē wā í nya aá tá bɛ̄ɛka ɛ́gɛ́nɛ̄ ɛnɔ kú ɔ̄cɔ̄ɔ̄cī géē fíyájɛ klá aá ā. É géē nya aá tá fíyaa. Ɔdā olɔhi nɛ̄ aá gē yá ā géē cījáalí lɛ aá iyɔ̄bū um. N géē yɔ̄ pī aá, géē gbō aá ŋmá ɔ́kíkā dóódu.

⁹Eko dúúmā nɛ̄ aá lɛ ɔkɔ gbā, n géē tá aá ohi. Eko dúúmā nɛ̄ a hī um igwú kú um tá aá abɔ̄, n géē cɛ̄. Ɔ́dāŋ ka aá habɔ̄ ōwē nɛ̄ aá gē yá ācɛ ā tá, nɛ̄ aá kē kpɛ́lāce uwá gɛ ŋ́, nɛ̄ aá klla kē kɛlā kú ɔ́bíipú lɛyíkwu ācɛ ā gɛ ŋ́.

¹⁰Aá je ɔdōlé lɛ ācɛ nɛ̄ ɛmiyɛ gē ŋmó uwā ā. Aá klla yá ɛgbá kú ācɛ nēe cɛgbá otábɔ ā. Cɛ́ɛ́ ɔlá géē gbɔɔ́ ō fíyajɛ ipú obū nōo klá aá ā bɛ̄ɛka ɛ́gɛ́nɛ̄ ɛnɔ o yɛ̄ɛyí gē fíyajɛ lɛ ā.

¹¹N géē bī aá jɔ́ɔwɛ eko dóódu, klla í kpó aɔ́dōlɔhi le yá ɛgbá kú aá eko dóódu. N géē yá kú aá lɛ ɔbɔ́lā cɛ́ɛ́ kú aá lɔfú iyē. Aá géē lɛbɛ̄ɛka ɛhɔ̄ nɛ̄ éŋkpɔ̄ í ŋmó ŋmá anú ŋ́ mā ā. Aá klla í lɛbɛ̄ɛka njɔɔlɔ kú éŋkpɔ̄ nōó gē ŋmó ŋ́ mā.

¹²Ācɛ ɔlɛ́ aá gē tū aɔ́lɛ́ aá nēe húmáyī tá alácɛ̄ ā gwó. É klla í gwó inu kú uwā ce ɛyí aíkpínū nɛ̄ncɛ̄ nēé tɛtɛ le tá ajɛ ŋmá ikííkée ā. É kē í jé aá, ka aá wɛ ācɛ nēe gwó aínu nēe catāajɛ ā. É klla kē í jé aá ka aá wɛ ācɛ nēe glá úláyi kú igelī nɛ̄hi ā gwó.

¹³Aá kóō lɛ ɛ̄cī nɛ̄ n le íne ce ɔ́ kú aá kóō híī yúklɔ́ anú ŋ́ mā tū kóō wɛ ɛ̄cī otīihɔ. Aá yá ɔdā abɔ̄yī aá ɛ̄cī ɔ́ɔmā ŋ́. Aá kóō jé ile kú ɛ̄cī ō tīihɔ kú um ā, ka aá kē lɛ ojīlīmā ce ɔ́ oŋmá lɛ o klá ɛgéégée cíí, í ga iyāwu ŋ́, ka aá yúúklɔ́ dúúmā ŋ́, ka aá kē gwó abɔ̄ waagada yɔ̄ ī kɔ̄ɔ̄kā icííci ɛ̄cī ɔ́ɔmā ŋ́,

¹⁴Aá le yá lɛ ā, ɔtū géē he aá ka aá le Óndú ā jé. N géē yá kú odúúdú ācɛ kú ipú ɛcɛ nyā kéē lɛ ojīlīmā ce aá. Aá klla gē lé olɔhi kú ajɛ nɛ̄ n je lɛ Ujékɔ̄pu nōo wɛ aádáádā aá ā. Ami nōo wɛ Uyáwe ā le ka ɛɛ́.”