Read idoma AYISÁYA 59 Bible Online

AYISÁYA 59 - idoma bible

AYISÁYA 59

¹Ayisáya klla kɛlā kahíníī, “Aá híī gbɛlá ka ɔfú kú Óndú ā le nyɛ́ ō nya aá tá ŋ́. Ámāŋ koó pāhɔ̄ lɔhi nōó gē pó ɔkɔ nɛ̄ aá gē gbā kóō wā í tá aá abɔ̄ ŋ́ nɛɛ ŋ́.

²Amáŋ ɔ́bíipú kú aá lɛ aá hɛ́ ŋmá egiyí Ɔwɔicō kú aá, íne nɛ̄ aá ī bīya ā, í klla cɛ̄ lɛ ɔ́ kwú eyī kú nū ú tónū ŋmá ɛgiyí aá. Ɔ́ɔmā yá ɛ́ɛ́ nōó ī pō ɔkɔ nɛ̄ aá yɔ̄ ī gbā ā gɛ ŋ́ má.

³Abɔ̄ kú aá le nyílá ohígbū ācɛ nɛ̄ aá ī ŋmó ā. Ɛ̄kɛ̄mgbɛ̄ nɛ̄ aá ka ā klla cɛ̄ lɛ okónu kú aá kwú nyílá dúú.

⁴Ɛjɛ̄ɛ̄jī aá gē kpɛ́pɔ̄ ɛ̄kɛ̄mgbɛ̄ ce ɔ́mpā aá. Ɔ̄cɛ dúúmā ī bī ɔkwɔ̄ɔ̄kwɛ̄yi le kɛpɔ̄ mɛ́mla ɔ́mpānū ŋ́. Aá klla gē miya ɛlā obɔ̄bí ipú kú aá klla gē lɛ ɔ́ yá tɛ́ɛcɛ eyīgēdēē.

⁵Ojuju obɔ̄bí nēé gé tū ā lɛ ɛ́fa nōo lɔfú ŋmɔ́cɛ glá bɛ̄ɛka ákú aáyi kú ogwiji ā. Ɛ́gɛ́nɛ̄ ɔ̄cɛ le ayi kú ogwiji lé, nōó le hɛ́ ipú kú nū nɛ̄ ɔ̄cɛ ɔ́ɔmā lɔfú kwú glá ā, ɛ́gɔ́ɔ́mā nōó lɛ lɛ o pīya ɔyí wɛ̄ɛcɛ kú ojuju obɔ̄bí á.

⁶Ɛ́gɛ́nɛ̄ ɔlákápá í gáā tíīlī nɛ̄ ɔcɛ ī le klá iyē glá ŋ́ mā, ɛ́gɔ́ɔ́mā nɛ̄ ɔdā nēé gē yá ɔ́ɔmā í gāa tīile dúúmā lɛ uwá ŋ́ má.

⁷Aá gē nwúleyīkwū kú aá nyɔ̄ í yá ɔdōbɔ̄bí piyóo. Aá gē hágágā kú aá nyɔ̄ gáā ŋmó ācɛ nōó yá aá ɔdā dóódu ŋ́ mā. Ɛlá kú ɔ́bíipú ō nyɔ̄ í bī nɛ̄ aá gē gbo piyóó á. Ɛga dóódu nɛ̄ aá le yɛ, aá gē je ācɛ mɛ́mla aɔ́dā nēe bá abɔ́ɔ ā kpó yíifi klla gē kpó uwā catāajɛ dúúdú

⁸É jé ɛ́gɛ́nɛ̄ é gē lā ɛbɔ́ mɛ́mla ācɛ ɔhá ɛ́ɛ́ nēé ī yá ucē ɔkwɔɔkwɛ̄yi ŋ́. Odúúdú ɔdā nēé ī yá ā í le kpaakpa ŋ́. Ɔ̄cɛ dúúmā nōo yɛce ɛ́gɛ́nɛ̄ é gē yá ucē ā, í kē gáā lɛ ɛbɔ́ ŋ́.

⁹Ohígbū aɔ́dōōbɔbí ɔ́ɔmā, nɛ̄ Ɔwɔicō í nya alɔ tá ŋmá abɔ̄ kú ācɛ̄ nēe bá gē yá alɔ ŋmó ā ŋ́ má. Alɔ leyīce ka alɔ í má ɔlá ofíyajɛ kú alɔ̄ mɛ́ɛbɛ, amáŋ obū nɛ̄ alɔ bá ipú nū á.

¹⁰Alɔ bá ī yɛ lɛ abɔ̄ ma ɔdɔ bɛ̄ɛka opeyī ā. Alɔ bá ī tíne ɔwɛ bɛ̄ɛka opeyī nōó mɛ́ɛbɛ ŋ́ mā. Alɔ bá ī lɛ ikpó gbaajɛ ī hɛ́ gadágadá ɔlɛ́ɛnɔ péee bɛ̄ɛka ɔdā nɛ̄ alɔ bá ī yɛ ajoodobū ā. Ācɛ kú ipú alɔ nēe cíkā ō lɔfú kpɔ́cíí ā bá bɛ̄ɛka aókwū cɛyí ā.

¹¹Odúúdú alɔ bá ī gbaflɔ bɛ̄ɛka ɔgwú nɛ̄ ɛmiyɛ ī ŋmó ɔ̄ ā. Alɔ leyītáajɛ ka Ɔwɔicō í wā í tá alɔ abɔ̄ ŋmá ɛgiyí ācɛ nēe bá ī lɛ abɔ̄ da alɔ ɛyítāajɛ ā, alɔ í kē má ɔdā ɔhá dúúmā yá ŋ́.

¹²Óndú, alɔ gē bīya íne kú uwɔ ojigógó, alɔ klla kwú igbīhi í cē kwu uwɔ. Ɔbíipú kú alɔ le alɔ ŋmɛ́pɔ̄bí. Alɔ jé ɔdōbɔ̄bí nɛ̄ alɔ yá á.

¹³Alɔ le īkpɛ̄yí olɔfú yá tá uwɔ klla tá ō gbā uwɔ ɛ̄gbā. Alɔ klla tá ka alɔ í yɛce uwɔ nōo wɛ Ɔwɔicō kú alɔ ā ŋ́. Alɔ bá í yá kéē pīya ācɛ tū, klla yá kú ācɛ kéē híī yɛce uwɔ ŋ́. Ɛlá nɛ̄ alɔ gē gbo ā í wɛ ɔkwɛ̄yi ŋ́. Alɔ ī kɛ̄mgbɛ̄ ŋmá okónu piyóó.

¹⁴Alɔ í gē hɛ́pɔ̄ okpaakpa ɛga okɛpɔ kú alɔ, ɛ́ɛ́ nɛ̄ alɔ kōō gē cɛ̄ lɛ ācɛ o yá ɔdā okpaakpa ā túbla abɔ́ɔ ŋ́. Ɔ̄cɛ nōo ī kɛlā ɔkwɛ̄yi ā gē lé ɛpɔbí ɔɔ́pu á. É kōō cɛ̄ lɛ ɔ̄cɛ o yá ɔdā okpaakpa ā wā abɔ́ɔ ɛ́ɛ́ nōó ī kɛlā ŋ́.

¹⁵Ācɛ nēe ī yá ucē ɔkwɛ̄yi ā í kpɔ ŋ́. Ɔ̄cɛ dúúmā nōo nyɛ̄ɛ̄ ŋmá ɔdōbɔ̄bí ō yá, kwú pīya ɔ̄cɛ nɛ̄ ācɛ gē gbɔɔ́ ō tíne ō yá ɔ̄ ɔdōbɔ̄bí. Óndú ā le má kéē gē hɛ́pɔ kpaakpa ŋ́.

¹⁶Ó le hɛ́ Óndú ā idáagó ɛ́gɛ́nɛ̄ ɔ̄cɛ dúúmā í yɔ̄, nōo gē tá ācɛ nēé gē pīyatū ā abɔ̄ ŋ́ mā. Ohígbū ɔ́ɔmā, ó bī ɔfú kú nū ā le uwá nyatá abɔ̄yī nū. Ó klla le ɛpɔ̄hi hɛ́ lɛ uwá ŋmá lɛ ɔwɛ olɔhi nōó gē yá ɛlā kú nū ā.

¹⁷Ó géē lɛ ucē okpaakpa ō yá wiiyē bɛ̄ɛka úwé ɔkplɛ́fú kú oje ā. Ó kē í lɛ ɔfú ō nya ācɛ tá kwɛyí bɛ̄ɛka ɔkpú ā. Ó kē ī lɛ ɔ́ci mɛ́mla ícɔ̄nū wiiyē bɛ̄ɛka úwé mɛ́mla īlī wuulu ā.

¹⁸Ó géē cɔ̄nū tū aólɛlā kú nū, klla í yá uwā italā ɛ́gɛ́nɛ̄ ɔdā nēé yá ā lɛ ā, ó kōō kwu aɛ́nɛ̄ e lā ogbeé kú ísu ɛga oligbó ā dúú.

¹⁹Oŋmá ɛnɔ̄ɔ̄cī ga ɛnɔ̄ɔnɛ̄, ācɛ gē bá ī yúúfi nū klla í bá gē lɛ ojīlīmā ce ɔfú nɛ̄hi kú nū ā. Ó géē wā kwūūū bɛ̄ɛka ísu nōo le cēenyi yɔ̄ ī pɛ́ wā ā, nɛ̄ owu nɛ̄hi yɔ̄ ī kpó ā[5]

²⁰Óndú ā da ācɛ ɔlɛ́ nū ka, anúɔ nɛ̄ ɔ́ɔ ī nya uwá tá ā, géē wā Ujerúsālɛm gáā nyā odúúdú ācɛ kú ɔlɛ́ uwā nēe ma ínoōbīya kú uwā tá ā tá.

²¹Anɔ́ɔ Óndú ā klla kahíníī, “N le okónu ce lɛ aá ka n géē je owu mɛ́mla ɛlā nōo í yɔ̄ mɛ́mla aá piyóó ā lɛ aá. Oŋmá eko nyā gɔbū ā, ɛlā kú um nɛ̄ n nwū aá í cíkā ō nyɛ̄ɛ̄ ŋmá okónu kú aá ŋ́. Aá nwū ayááyí kú aá, kú ɛlā ā kóō híī nyɛ̄ɛ̄ ŋmá okónu kú uwā ŋ́ piyóó.”