Read idoma AYISÁYA 6 Bible Online

AYISÁYA 6 - idoma bible

AYISÁYA 6

¹Iháyí nɛ̄ Usíya, ɔcɛ́ kú Ujúda kwú ā, obócádēde kwú um anɔ́ɔ n le Óndú ā má cīce akpa kú ɔcɛ́ kú nū icō kú ipú Agblīihɔ-nɛ̄hi ā á. Anɔ́ɔ aflɛ́tɛ́ kú awulú kú nū mīyɛ ɛga dóódu kú ipú Agblīihɔ-nɛ̄hi ā tābɔ̄.

²Anɔ́ɔ n má aɔ́dōōyēeyī nēe lɛbɛ̄ɛka ɔlá ō cɛ̄ ā bá pīyɛ̄ ɔ̄. Ɔnyɔɔnyɛ kú uwā lɛ acá ɛhīlī. Ó bī acá ɛpa le klá eyī kú nū, ó klla bī acá ɛpa ɔhá ā le klá agada kú nū, ó klla bī acá ɛpa ohile ā gē wu.

³Anɔ́ɔ é bá ī ka lɛ ɔ́mpa uwā kahíníī, “Óndú ā, anú ōfōōfūnū, anú ōfōōfūnū nɛ̄, ɔ̄cɛ dúú í lɛbɛ̄ɛka anú ŋ́. Anú lɔfú fíyɛ́ dúú á. Ɛ̄jɛ̄ɛ̄jī ācɛ kú ɛcɛ bá yɔ̄ ī cɛ̄tra ɛgahi mɛ́mla ojīlīmā nōó lɛ ā.”

⁴Anɔ́ɔ uya kú ɔkɛ̄lā kú uwā ā, gbɔɔ́ ō jíla etikpa kú Agblīihɔ-nɛ̄hi ā iyē, anɔ́ɔ ódūdū le mu ipú odúúdú Agblīihɔ-nɛ̄hi ā,

⁵anɔ́ɔ n kahíníī, “Éléélelé! Ákú um mɛ ɛ́ɛ, n gebí ɛɛ́, ohígbū ka n wɛ ɔ̄cɛ nōo gē kɛlā obɔ́bí ŋmá okónu kú um, n klla kē lā ipú ācɛ nēe gē kɛlā obɔ̄bí ŋmá okónu kú uwā. Anɔ́ɔ n bī ikpēyī ābɔ̄yī um le ɔcɛ́, Óndú ā, nōo lɔfú fíyɛ́ dúú ā má!”

⁶Anɔ́ɔ éyi kú aɔ́dōōyēeyī nēe lɛbɛ̄ɛka ɔlá ō cɛ̄ ā, le wu wā ɛgiyí um, bī ahɔ̄lá nōó jē ŋmá ipú ɔlá kú ede kú Agblīihɔ-nɛ̄hi ā.

⁷Anɔ́ɔ ó le ahɔ̄lá nyā bá um okónu, anɔ́ɔ ó ka amíyɔ̄ má ɔ̄ ɔhɔ̄lá ā ɔ́ɔ má bá um ákpókónu ɛɛ́. Ó ka ka Óndú ā ɔ́ɔ ka anúɔ kwú ɔdōbɔ̄bí nɛ̄ amiyɔ̄ yá ā í yá um ɛhi ɛɛ́. Ó ka amiyɔ̄ í lɛ́pɔ̄bí gɛ ŋ́.

⁸Ayisáya klla kɛlā gɔbū kpɔ́ ka anúɔ pó ɔkɔ kú Óndú ā kahíníī, “Ɔ̄nyɛ nɛ̄ n géē tɛ̄hɔ̄ ā? Ɔ̄nyɛ géē nyɔ̄ kwɛyí alɔ āa?” Anɔ́ɔ n tá ɔ̄ ohi ka, “Ágábáidu, ami yɔ̄ á, tū um ɛhɔ̄ mɛ́ɛnɛ.”

⁹Anɔ́ɔ ó da um kahíníī, “Nyɔ̄ ká ā gaá ka lɛ ācɛ nēe bá nyā ka, “Ɛ́gɛ́dúú nɛ̄ aá pi ahɔ̄ lɛ cɛ́ɛ́ ká āá pó ɛlā, aá gáā jɛ́yí ɔdā nɛ̄ aá gē pó ā ŋ́. Ɛ́gɛ́dúú nɛ̄ aá pléyī lɛ cɛ́ɛ́ ká āá mɛ́ɛbɛ, aá gáā má ɔdā dúúmā glá ŋ́.”

¹⁰Óndú ā klla da um ka amiyɔ̄ lɛ ɔtū kú ācɛ nēe bá ā yá lɔfú ká. Ó ka amíyɔ̄ lɛ uwá yá cɛ́ɛ́ kéē híī bī ahɔ̄ kú uwā le pó ɔdā dúúmā ŋ́. Ó ka amiyɔ̄ lɛ uwá eyí kpó pu, ohígbū nɛ̄ ɛ́ɛ géē bī ikpēyī ā lɛ mɛ́ɛbɛ ámāŋ jɛ́ɛyí ɔdā dúúmā. O yá ɛ́ɛ́ kéē híī kwúcē wā ɛgiyí anúɔ cɛ́ɛ́ kú anúɔ lɛ uwá nyatá ŋ́.

¹¹Anɔ́ɔ n da Óndú ā kahíníī, “Eko nyā nɛ̄ n gēe yá ɛ̄nyā í kwu āa?” Anɔ́ɔ Óndú ā tá um ohi kahíníī, “Jāā gbéeko nɛ̄ aígelī nɛ̄hi ā kwú kpó tá alácɛ̄, nɛ̄ ɔ̄cɛ dúúmā í lā ipú uwā ɛ́ɛ́ gɛ ŋ́.” Ó klla ka eko nɛ̄ ɔ̄cɛ dúúmā ɔ́ɔ́ lā ipú ɔlɛ́ dúúmā ɛ́ɛ́ gɛ ŋ́, jāā gbéeko nɛ̄ odúúdú ajɛ ā kwú tá alácɛ̄.

¹²Ó klla ka ka o jāā gbéeko nɛ̄ anúɔ, Óndú ā, ɔ́ɔ lɛ ācɛ ā kpó nyɔ̄ ga ɛga oligbó nɛ̄hi, nōo géē yá kú ɔlɛ́ uwā kóō kwú tá alácɛ̄.

¹³Ó ka nááná nɛ̄ ɔ́ɔ kōō wɛ ācɛ igwó piyóo hile ipú ajɛ ā á nɛɛ, é klla í je ajɛ ā kpó yɔlá igbɔhá ɛ́ɛ́. Ó klla ka ka ɔ́ɔ géē hile kwaajɛ bɛ̄ɛka ikpaŋkini ɔcí nōo hile kwaajɛ kpɔ́ ā. (Ikpaŋkini ɔcí ā kwɛyí ohútu ŋmáajɛ kú ācɛ ɔlɛ́ Ɔwɔicō.)