Read idoma AYISÁYA 60 Bible Online

AYISÁYA 60 - idoma bible

AYISÁYA 60

¹Ujerúsālɛm, aá cāŋjɛ, kú aá fíyajɛ bɛ̄ɛka ɛnɔ ā. Eyī ɛ̄yīpɛ̄ kú aá le nyā ɛɛ́. Ɛgahi kú Óndú ā kē yɔ̄ ī fíyájɛ ce aá ɛ́gɛ́nɛ̄ ɔlá gē fíyajɛ ce odée ā.

²Aá mɔ́ɔ̄, ɛcɛ géē je doobū, odúúdú ācɛ kē í bá ipú obū nɛ̄hi kpímm. Amáŋ ojīlīmā mɛ́mla ɛgahi kú Óndú ā géē cɛ̄ klá aá bɛ̄ɛka ɛnɔ ā.

³Aéwo géē wā gaá kwū ɔlá ofíyajɛ kú aá ā, aɔ́cɛ́ kē í wā gaá má ɔdā ɛ̄yīpɛ̄ nōo yɔ̄ gē yá Ujerúsālɛm ā.

⁴Aá pīyeyī biílí kú aá má ɔdā nōo yɔ̄ ī yá ā. Odúúdú ācɛ ɔlɛ́ aá le túbá tɔ̄há gbɔɔ́ ō pɛ́ wā ɔlɛ́ ɛɛ́. Ayí aá nɔnyīlɔ ā géē ŋmá ɛga oligbó wā, é kē géē kpó ayí aá nɔnyā ce abɔ̄ bɛ̄ɛka ayípɛ̄nɛ́ŋcɛ́ wā.

⁵Aá géē má uwá, ɔtū kē í he aá nōo kē í cɛ̄ lɛ aá gwéeyē. Ohígbū kéē géē kpó agbénú nɛ̄ aúgbéenyi ī kpó bū eyī aísu nɛ̄hi ā gé lɛ aá. É kē í kpó agbénú kú aéwɔhá ā wā gé lɛ aá.

⁶Aígwu kú aínyankwūlūmī alɛwa nɛ̄hi géē wā ŋmá ajɛ Umídiya mɛ́mla ajɛ Ɛ́fa. É géē wā ŋmá ajɛ Ussɛ́ba dúú. É kē í kpó ugóolu mɛ́mla ɔtulalī nēé hī ka ufránkinsɛ̄nsi ā wā. Ācɛ í bá ī cɛ̄tra Óndú ā kú aɔ́dā nōó yá ā.

⁷É géē kpó odúúdú aálá kú ajɛ Ukɛ́da mɛ́mla aómlede kú ajɛ Unɛ́báyɔ̄tu ā, gaá le gbā aá ɛ̄gbā. Aá klla í lɛ uwá gwɛ́ɛya ɛyí ede kú Óndū ā nɛ̄ é í he ɔ́ ɔtū. Óndú ā klla í lɛ ojīlīmā ce Agblīihɔ-nɛ̄hi kú nū nōo tū ɛgahi nɛ̄hi ā.

⁸Aɔ́dí bá gē pɛ́ wā wuuu bɛ̄ɛka ojuja yɔ̄ ā dúú? Ó lɛbɛ̄ɛka aókóohō nēe bá ī pɛ́ wā ɔlɛ́ ā nɛɛ?

⁹Aúgbéenyi nēe bá ī pɛ́ wā ŋmá ajɛ okónu ísu nɛ̄hi kú ɛga oligbó. Aúgbéenyi nēe ŋmá ajɛ Utássissi ā gbɔbū á. É yɔ̄ ī kpó ācɛ ɔlɛ́ Ɔwɔicō wā ɔlɛ́. É kē yɔ̄ ī pɛ́ wā ɔlɛ́ mɛ́mla oje nɛ̄hɛ́ mɛ́mla ugóolu. Ó kē í bī ojīlīmā nɛ̄hi gé lɛ Óndú ā nōo wɛ Ɔwɔicō kú aá ā. Anú Uyáwe, nɛ̄ ɔdā dúú í tōō lɛ kpla anú ŋ́ mā, yá ɛ̄nyā cɛ́ɛ́ kú aéwo kéē lɛ ojīlīmā ce ācɛ ɔlɛ́ nū.

¹⁰Ayisáya klla ka Óndú ā da ācɛ Ujerúsālɛm kahíníī, “Aéwɔhá ā géē tú ɔdɔ kú igá kú ɔlɛ́ uwɔ ā gwó. Aɔ́cɛ́ kú uwá ā kē í wā í gbā uwɔ ɛ̄gbā. N le cɔ̄nū tū uwɔ, le italā yá uwɔ, amáŋ abālɔbányā, n géē méyīnyinyi uwɔ ohígbū ka n gbonɛnɛ.

¹¹Odūngwɔ̄wɛ kú igelī nɛ̄hi kú uwɔ géē nwūla tɔ́ɔtɛ́ kwu otú kwu ɛnɔ, cɛ́ɛ́ kú ācɛ kú aéwo ā mɛ́mla aɔ́cɛ́ kú uwā kéē kpó agbénú kú uwá gé lɛ uwɔ.

¹²Éwo dúúmā nōó gbā uwɔ ɛ̄gbā ŋ́, géē je yíifi dúúdú.

¹³É géē kpó wā ipú uwɔ, Ujerúsālɛm, aɔ́cí nēé hī ka Upáyin, Ujúnīpa, mɛ́mla Usáyiprɛ̄si, nēe tū ɛgahi fíyɛ́ dúú ipú ūpū kú Ulɛ́bānɔn ā. É kē í lɛ uwá yá Agblīihɔ-nɛ̄hi kú um ā kóō le héyīfuú, cɛ́ɛ́ ka ɛga nɛ̄ um gē lɛ ikpó ce ā kóō kwú tū ɛgahi.

¹⁴Ayí kú ācɛ nēe gē yá uwɔ ŋmó ā, géē wā í túkpɛɛ́ ga awɔ, kéē lɛ ojīlīma ce uwɔ Odúúdú ācɛ nēe tɛtɛ lɛ eyī gwó uwɔ bónū ā, géē wā í gbā Óndú ā ɛ̄gbā iyɔ̄bū uwɔ. É géē hī uwɔ ka “Igelī kú Óndú ā.” “Usáyɔn, nōo wɛ igelī nɛ̄hi kú Uyáwe, Ɔwɔicō kú Ísrɛ̄lu nɛ̄ ɔdā dúú í tōō le gbla anú ŋ́ mā.”

¹⁵É tɛtɛ le igbīhi cē kwu uwɔ, klla wɔ́tū uwɔ. Ɔ̄cɛ dóódu í kōō gē bū ipú uwɔ ŋ́. Amáŋ n géē yá ká ā kwú héyifuú nɛ̄hi. A kē géē wɛ ɛga nɛ̄ éeyē géē yɔ̄ eko dóódu piyóó.

¹⁶Aéwo mɛ́mla aɔ́cɛ́ géē kpó agbénú kú uwā leyīkwu uwɔ cɛ́ɛ́ kú ɔdā dúúmā kóō kpla aá ɛhá ŋ́. A kē í jé ka ami nōo wɛ Óndú ā, nya uwɔ tá, klla hɛ́ uwɔ tá á. A klla kē í je ka ami ɔ́ɔ kē wɛ Ɔwɔicō kú Ísrɛ̄lu nɛ̄ o lɔfú nɛ̄hi ā á.

¹⁷N géē je oje ɔdɔ (ugóolu) gā uwɔ ikɔkɔ oje udɔ. N géē je oje nɛ̄hɛ́ gā uwɔ ikɔkɔ oje ɔlamu. N géē je oje udɔ gā uwɔ ikɔkɔ ɔcí. N géē je oje ɔlamu ga uwɔ ikɔkɔ ɛcɔ̄. Aɔ́cɛ́ mɛ́mla aótrɛ̄yi nēe ī gbō uwɔ ā, géē bī ɛbɔ́ mɛ́mla okpaakpa le gbō uwɔ.

¹⁸É gáā kpɛ́fú ŋ́, ɛ́ɛ́ nēé gē kpó ācɛ yíífi gɛ ŋ́, ɛ́ɛ́ nēé gē je odée wúlatāajɛ ipú igelī nɛ̄hi kú uwɔ igbɔhá ɛ́ɛ́ gɛ ŋ́. A géē lɛ iyē ce igá kú uwɔ ka Onyatá. A klla í hī aókónu igá kú uwɔ ka Ocɛ̄tra.

¹⁹Ɛnɔ mɛ́mla ɔyā í gáā wɛ ɔlá ofíyajɛ nɛ̄ a ī bī le mɛ́ɛbɛ ɔlɛ́ɛnɔ mɛ́mla otú ā ɛ́ɛ́ gɛ ŋ́. Ami nōo wɛ Óndú ā gáā lɛbɛ̄ɛka ɔlá ofíyajɛ nɛ̄ a géē bī le mɛ́ɛbɛ piyóó á. Ami kē gáā wɛ ɛgahi mɛ́mla ojīlīma kú uwɔ á.

²⁰Ɛnɔ kú uwɔ í gáā gaajɛ ŋ́, ɔyā kú uwɔ í kē gáā gɔɔkpá ŋ́. Ohígbū ka ami nōo wɛ Óndú ā géē lɛbɛ̄ɛka ɔlá ofíyajɛ nɛ̄ a géē bī yɔ̄ ī lɛ mɛ́ɛbɛ piyóó á. Ɛ̄cī kú ɔtūnobí kú uwɔ ā géē mɛ.

²¹Odúúdú ācɛ ɔlɛ́ uwɔ géē yá ɔdā nōo le kpaakpa ā. É kē í lā ajɛ ā, ó kē í wɛ ákú uwá piyóó. Ohigbū ka ami yá uwá, klla kē bū uwá tū ipú ajɛ ɛ́gɛ́nɛ̄ é gē bu ɔcí tū ajɛ ā, cɛ́ɛ́ kéē ma ɛgahi kú um fú á.

²²Ipɔ́ɔ́nū kú aá nōo nyɛ́ fíyɛ́ dúú ā, géē nyīla í je pīya ipɔ́ɔma. Ipɔ́ɔma kú uwɔ nōo nyɛ́ fíyɛ́ dúú ā géē nyīla í je pīya éwo nɛ̄hi. Ami wɛ Óndú ā á. Eko nɛ̄ eko le yá, n géē yá ka odúúdú ɔdā nyā kóō le yá fíyaa.”