Read idoma AYISÁYA 61 Bible Online

AYISÁYA 61 - idoma bible

AYISÁYA 61

¹ Alelékwū kú Óndú ā, Ɔwɔicō, yɔ̄ ipú um Ohígbū ká Óndú ā lɛ um fu ce, ká n̄ kɔ̄ɔ̄kā olɔhi ā tɛ́ɛcɛ lɛ aólɛhɔ́ɔ̄cɛ ā. Ó lɛ um tɛ̄hɔ ká n lɛ ācɛ nɛ̄ ɔtū le bīya lɛ uwá ā ɔtū tú kwɔɔhá. Ká n tɔ́ɔna lɛ ācɛ nēé kwú ā, kéē le uwá hɛ́tá ɛɛ́. Ká n̄ kē tɔ́ɔna lɛ ācɛ nēe bá agbá ā, kéē lɛ ɔwɛ agbá ā nwūla tɔ́ɔtɛ́ lɛ uwá kéē bɛ̄cɛ ɛɛ́.

²Ó le n tɛ̄hɔ ká n̄ klla tɔ́ɔna ka iháyí nɛ̄ Óndú ā géē méyīnyinyi ācɛ ɔlɛ́ nū ā, mɛ́mla eko nōó géē gwō aólɛlā kú nū ɔ́ci ā, gā ɛɛ́. Ó le n tɛ̄hɔ̄ ká n̄ tá ācɛ nēe yɔ̄ ekwu ā ɔtūlé.

³Ká n̄ lɛ ɔfulā ohéyīfuú je lɛ ācɛ nēe yēekwu ipú Ujerúsālɛm ā, ikɔkɔ ewo nēé fú klá ɛyí ā. Ká n̄ yá kéē gwéeyē ikɔkɔ ɔtūnōbí nēé bá ī yá ā. Ká n̄ yá kéē bá ī gwíijē ī cɛ̄tra Óndú ā, ikɔkɔ ɔtū nōó he uwá ŋ́ mā. Ó géē lɛ ā o yá kéē le pīya ācɛ nɛ̄ Óndú ā yá, nēe ī yá ucē okpaakpa bɛ̄ɛka aɔ́cí nēe le gbagwu nɛ̄hi nɛ̄ odúúdú ācɛ í má ā. Cɛ́ɛ́ ka ācɛ kéē cɛ̄tra Ɔwɔicō, ohígbū ɔdā nōó yá ā.

⁴É géē tú aɛ́ga nēé catāajɛ nēe húmáyī tá alácɛ̄ ā gwó. É klla géē tú aígelī nēé wúlatāajɛ ŋmá īkííkée ā gwó.

⁵Óndú ā klla kahíníī, “Ācɛ ɔlɛ́ um, aéwɔhá géē cɛ̄ aá ɛhɔ̄. É géē gbo aálá kú aá, é í hɛ́hɔ̄ lɛ aá, klla í leyīkwu ɛhɔ̄ ɔcí ufáyin kú aá.

⁶É kē í jé aá, ka aá wɛ ācogwɛ́ɛya kú Óndú ā, ka aá klla wɛ ācocɛ̄hɔ kú Ɔwɔicō. Aá géē jɔ́ɔnyɛ agbénú kú aéwɔhá ā, klla í yɔ̄ ī gɔ̄ ohígbū nū.

⁷Ikɔkɔ uwēyī nēé je lɛ aá ā mɛ́mla ɛyí okwaajɛ kú aá ā, aá géē lɛ ukpɛ̄ ɛga ɛpa klla í lā, í má abahi ipú ajɛ kú abɔyī aá.” Óndú ā klla kahíníī, “Ɛ́gɔ́ɔmā nɛ̄ ācɛ ɔlɛ́ um í lɛ ukpɛ̄ ɛga ɛpa ipú ajɛ ɔlɛ́ uwā dúú á. É kē í gwéeyē piyóó.

⁸Ohígbū ka ami, nōo wɛ Óndú ā gē tíne ō hɛ́pɔ kpaakpa. Ɔtū kē ī wú um lɛyíkwu uwī o wī mɛ́mla ɔ́bíipú[6] N géē cílá ācɛ ɔlɛ́ um ulé kpaakpa, klla í cokónu nōo í yɔ̄ piyóó mla uwá.

⁹Eyī dóódu géē jé ayááyi uwā ipú ɛjɛ̄ɛ̄ji aéwo dúúdu. Ɔ̄cɛ dúúmā nōo le uwá má, géē jé kéē wɛ ācɛ nɛ̄ ami nōo wɛ Óndú ā hɔ́há ce uwá ā nɛ.”

¹⁰Ujerúsālɛm géē gwéeyē nɛ̄hi ohígbū ɔdā nɛ̄ Óndú ā yá ā. Ɔtū kē he um nwunééné ohígbū ɔdā nɛ̄ Ɔwɔicō kú um yá ā. Ohígbū ka onyatá nōó nya um tá ā wu um iyē bɛ̄ɛka ɛ́gɛ́nɛ̄ ɔ̄cɛ gē lɛ īlī yíifa ā. Ɛpɔ̄hi nōó hɛ́ gā um ā kē wu um iyē bɛ̄ɛka ɛ́gɛ́nɛ̄ ɔ̄cɛ gē lɛ úwé wuulu wiiyē ā. Ó lɛ um yíifa bɛ̄ɛka ɔyípōklóbīya nōo yɔ̄ ī lɛ ɔnya ɛ̄pɛ̄pɛ̄, nōo ī lɛ ɔdōōkwɛyí yíifa kwɛyí bɛ̄ɛka ācogwɛ́ɛya ā, mɛ́mla ɔyípɔ́ncɛ́nyā nōo yɔ̄ ī lɛ ɔbá nōo ī kpó aɔ́dōleyíifa pla iyē ā.

¹¹Ɛ́gɛ́nɛ̄ ó wɛ opiíí ka īkpō dúú nēé nyi tū ajɛ géē bū klla gē jɛ̄ ā, ɛ́gɔ́ɔmā nɛ̄ Óndú ā, nōo wɛ Ɔwɔicō ā géē yá kú ācɛ kéē yá ɔdā okpaakpaá. Cɛ́ɛ́ odúúdú ācɛ kú aéwo kú ipú ɛcɛ ā géē cɛ̄tra anú.