Read idoma AYISÁYA 62 Bible Online

AYISÁYA 62 - idoma bible

AYISÁYA 62

¹Ń gáā klá okónu ŋ́ ohígbū Ujerúsālɛm. Ń gáā yɔ̄ cíí ŋ́ jāā gbéeko neé lɛ Ujerúsālɛm nyatá nōó má yɔ̄ ɛbɔ́, gbɔɔ́ ō fíyajɛ bɛ̄ɛka ɔlá nēé hɛ́ kwu ɛmu otú nōo yɔ̄ ī cɛ̄ ā.

²Ujerúsālɛm, aéwo ā géē má ɛpɔ̄hi nɛ̄ um géē hɛ́ ga uwɔ ā. Odúúdú aɔ́cɛ́ kú uwā kē ī má ojīlīma kú uwɔ. Óndú ā abɔyī nū kē í lɛ iyē ɛ̄yīpɛ̄ ce uwɔ.

³Óndú ā nōo wɛ Ɔwɔicō kú uwɔ ā géē bī uwɔ abɔ̄ kú nū bɛ̄ɛka ɔfulā kú ɔcɛ́ nōo tū ɛgahi nɛ̄hi ā.

⁴É klla gáā hī uwɔ kahíníī, “É nyɛ̄ɛ̄ hɛ̄ ɔ̄ tá” ɛ́ɛ́ gɛ ŋ́. Ɛ́ɛ́ nēé kōō gē hī ajɛ kú ɔlɛ́ uwɔ ka “Alácɛ̄” ɛ́ɛ́ gɛ ŋ́. Amáŋ iyē uwɔ géē wɛ “Ɔtū nū he Óndú ā.” É kē í hī ajɛ ɔlɛ́ uwɔ ka “Ɔnyā nōo he ɔbá nū ɔtū.” Ohígbū ka ɔtū uwɔ he Óndú ā. Ó kē í lɛbɛ̄ɛka ɔbá ā lɛ ajɛ ɔlɛ́ uwɔ.

⁵Ɛ́gɛ́nɛ̄ ɔyípōklóbīya gē lɛ ɔyípɔ́ncɛ́nyā nōo jé ɔ̄cɛnyīlɔ jéjée ɛ́ɛ́ ŋ́ mā, ɛ́gɔ́ɔmā nɛ̄ ayí uwɔ géē mīyɛ uwɔ klla leyíkwu uwɔ á. Ɛ́gɛ́nɛ̄ ɔbá ɔnyā gē gwéeyē ce ɔnyā nōó lɛ ɛ̄yīpɛ̄ ā, ɛ́gɔ́ɔmā nɛ̄ Ɔwɔicō kú uwɔ géē gwéeyē ohígbū uwɔ á.

⁶Ujerúsālɛm, n lɛ ācɛ kpó gbāajɛ ɛyí ɔdɔ kú igá kú ɔlɛ uwɔ ɛɛ́. Úklɔ́ nɛ̄ uwá géē bá ī yá ā wɛ kéē géē bá ī blatū Óndú ā okónu nōó ce ā. Kwu otú kwu ɛnɔ, é gáā klá okónu gbógbóōō ŋ́. Aá nēe gē blatū Óndú ā, okónu nōó ce ā, kóō híī mlɛ́nyɔ́ ŋ́.

⁷Aá kē híī je omlɛ́nyɔ́ lɛ Óndú ā ŋ́ jāā gbéeko nōó kwú Ujerúsālɛm ú tú glayá klla kwú ɔ̄ ú pīya igelī nɛ̄hi nɛ̄ odúúdú ācɛ kú ɛcɛ géē cɛ̄tra anú.

⁸Óndú ā bī ɔfú kú nū lɛ okónu ce, klla le ɔkpá gbo lɛ Ujerúsālɛm ɛɛ́. Ó kahíníī, “Aólɛlā kú aá í gáā wā í mīya ajɛ kú aá tābɔ̄ kéē kpó aíkpɔ̄dɛ̄hɔ̄ kú aá lé, klla kpó ejé kú aá gwá ɛ́ɛ́ gɛ ŋ́.

⁹Amáŋ aá nēe nyi aíkpɔ̄dɛ̄hɔ̄ klla cē ā, gáā lé aíkpō uwā klla í tá Óndú ā ahínyá á. Aá nēe kē nyī ikpō kú ufáyin klla lɛ ɛlá kwu uwā ā, gáā gwé ejé nēé í yá ŋmá anú ipú Agblīihɔ-nɛ̄hi kú um ā mɛ́ɛ̄ á.

¹⁰Ācɛ kú Ujerúsālɛm, aá ga eyīyɛ̄ɛcɛ kú igelī ā kú aá lɛ ɔwɛ túgllayá lɛ ācɛ ɔlɛ́ aá nēe bá ī pīyɛyí wā ɔlɛ́ ā. Aá lɛ aɛcɔ̄ kpó tá bónū, ká aá lɛ ikpāŋdrā yá. Cɛ́ɛ́ aá kwú otúta ú kwu icō ká aéwo ā kéē má,

¹¹ɔdā nɛ̄ Óndú ā gē tɔ́ɔna nū lɛ odúúdú ɛcɛ ā. Ó kahíníī “Aá le ka lɛ ācɛ kú Ujerúsālɛm kahíníī, ‘Óndú ā yɔ̄ ī wā í nya aá tá ɛɛ́. Ó klla bī ulé nōó í cílā ɔnyɔ̄ɔ̄nyɛ ā wā mɛ́mla īyī nū.’

¹²É géē hī aá ka, ‘Ācɛ kú Ɔwɔicō abɔ̄yī nū,’ ‘Ācɛ nɛ̄ Óndú ā le uwá nyatá ā.’ É kē ī hī Ujerúsālɛm ka, ‘Igelī nɛ̄hi nōo he Óndú ā ɔtū, ‘Igelī nɛ̄hi nōo he ācɛ ɔtū kéē lā,’ mɛ́mla ‘Igelī nɛ̄hi nɛ̄ ācɛ í gē ŋá ŋmá anú ŋ́.’