Read idoma AYISÁYA 63 Bible Online

AYISÁYA 63 - idoma bible

AYISÁYA 63

¹Ayisáya dɔɔ̄kā kahíníī, “Ɔ̄nyɛ yɔ̄ ī wā ŋmá igelī nɛ̄hi nēé hī ka Ubósra ipú ajɛ kú Ɛ́dɔm ā yɔ̄ ā? Ó le īlī nōo tū ɛgahi nɛ̄hi wiiyē nɛ̄ odée nɔ̄wá le ɔ́ kwú ɛbɛɛbɛ yōōō. Ó kē yɔ̄ ī nɔwɔ wā mla ɔfú nɛ̄ɛ̄nɛ̄hi nōó lɛ ā.” Anɔ́ɔ Óndú ā tóohi kahíníī, “Ami nōo wɛ Óndú ā, nōo lɔfú nɛ̄hi ō nya ācɛ tá ā nɛ. N yɔ̄ ī tɔ́ɔna ka n le ɛfú ā yálé ɛɛ́.”

²Ayisáya klla dɔɔ̄kā kahíníī, “Ɔdíyá nōo odée nɔ̄wá hɛ́ kwú uwɔ īlī ɛbɛɛbɛ yōōō lɛbɛ̄ɛka ákú ɔ̄cɛ nōo ī da aíkpɔ̄cí kú ufáyin kóō yá ejé āa?”

³Anɔ́ɔ Óndú ā tóohi kahíníī, “Ó lɛ ā ohígbū ka n le aéwo ā kpó ŋmó lɛbɛ̄ɛka ɛ́gɛ́nɛ̄ ɔ̄cɛ gē da aíkpɔ̄cí kú ufáyin ā. Ami ōfōōfū um kē da uwá tāajɛ á. Ɔ̄cɛ dóódu í kē tá um abɔ̄ ŋmá ipú aéwo ā ŋ́. N bī ícɔ̄nū nɛ̄hi le da uwá tāajɛ. Ɔ́ɔmā yá nɛ̄ oyī kú uwā kē tá klá odúúdú īlī kú um ɛbɛɛbɛ lɛ ā á.

⁴N yá lɛ ā ohígbū ka n ka eko gā nɛ̄ n tíne ō gwɔ̄ɔ́ci kú ɔdā nēé yá ācɛ ɔlɛ́ um ā ɛɛ́. Ká n̄ kē lɛ ācɛ ɔlɛ́ um hɛ́tá ŋmá abɔ̄ aólɛlā kú uwā.

⁵Ó yá um eyījii nɛ̄hi abɔ̄ um lɛ eyī yɛ ajɛ nɛ̄ um má ɔ̄cɛ dúúmā ō tá um abɔ̄ ŋ́ mā. Abɔ̄ ó le lɛ ā, ícɔ̄nū kú um nōo le ɔfú tū um iyē ā cɛ̄ ga um le yálé ōfōōfū um.

⁶Ohígbū ícɔ̄nū kú um, n le aéwo ā catāajɛ, klla cɛ̄ lɛ uwá bá ī túgagá bɛ̄ɛka ɔ̄cɛ nōo le ejé gwá le ɔ́ kwú ā. Oyī kú uwā le pɛ́ klá ajɛ ɛbɛɛbɛ.”

⁷Ayisáya klla kɛlā kahíníī, “N géē kɔ̄kā kú ɔdōōlɔhi nɛ̄ Óndú ā gē yá lɛ ācɛ Ísrɛ̄lu ohígbū keé he ɔ́ ɔtū piyóó. N géē cɛ̄tra anú kú ɔdōōlɔhi nɛ̄hi nōo yá lɛ ācɛ Ísrɛ̄lu ohígbū kóō ī méyīnyinyi uwā mɛ́mla ihɔtū nōo ī mafú lɛ uwá piyóó ā.

⁸Óndú ā nya uwá tá kahíníī, “É wɛ ācɛ ɔlɛ́ um ɔkwɔ̄ɔ̄kwɛ̄yi nɛ. N kē jé cāā keé gáā já um tá ŋ́.”

⁹Odúúdú unwalu nēe yá uwā ā gē kwú ɔ́ iyē nɛ̄hi. Ohígbū ɔ́ɔmā anú abɔ̄yī nū hɛ́ uwá tá á. Abɔ̄ uwá he ɔ́ ɔtū, nōó klla ī méyīnyinyi uwā ā, ó lɛ uwá nyatá. Ó kē húmáyī leyīkwu uwá ŋmífī íkée bɛ̄ɛka ɛ́gɛ́nɛ̄ ɛ́nɛ́ gē leyīkwu ɔyí nōó bī abɔ̄ ā.

¹⁰Amáŋ é le īkpɛ̄yí olɔfú yá tū ɔ̄, klla le anú abɔ̄yī nū[7] ɔtū bīya. Ohígbū ɔ́ɔmā, ó kwú pīya olɛlā kú uwā klla gbɔɔ́ ō nuunu tū uwā.

¹¹Anɔ́ɔ é le blakwu íkée eko nɛ̄ Umósīsi, ɔ̄cocɛ̄hɔ̄ kú Óndú ā, kpó ācɛ Ísrɛ̄lu trɛ̄yí bɛ̄cɛ ŋmá Íjīpiti ā. Anɔ́ɔ é dɛ̄ kahíníī, “Iní nɛ̄ anú nōo kpó aótrɛ̄yí kú ācɛ ɔlɛ́ nū bēhé ísu nɛ̄hi ā ɛbɔ́ ā yɔ̄ āa? Iní nɛ̄ anú nōo tū alelékwū kú nū ɛhɔ̄ wā ipú ācɛ ɔlɛ́ nū ā yɔ̄ āa?

¹²Iní nɛ̄ anú nōo bī ɔfú nɛ̄hi kú nū ā le hɛ́ ísu nɛ̄hi ā ɛpa eko nɛ̄ Umósīsi jé abɔ̄ gicō ā yɔ̄ āa? Ó kē lɛ ɔwɛ tá yɛ ɔtāhɛ̄ ísu ā le ācɛ ɔlɛ́ nū.

¹³Ó klla lɛ uwā kpó bū ipú ísu nɛ̄hi ā bēhé. É yɛ ipú nū, é kē gwonū ŋ́ bɛ̄ɛka ɛ́gɛ́nɛ̄ ɔnyā gē kwinya ipácí ā.

¹⁴Alelékwū kú Óndú ā le uwā kpó ga ipú abahi bɛ̄ɛka ɛ́gɛ́nɛ̄ é gē kpó aɛ́na ŋmá ɛyí ɛfu ga ɔpɛ́ ā.

¹⁵Óndú, pīyeyī má ajɛ ŋmá ɔkpáncō. Cɛ́ɛ́ ká ā má alɔ ŋmá ɔlɛ́ uwɔ nōo tīihɔ klla lɛ ojīlīmā nɛ̄hi ā. Á pi ɔtū alɔ ká ā bī ɔfú kú uwɔ le cɛ̄ɛpɔ̄ alɔ gɛ ŋ́ nɛɛ? Á lɛ ɛlá wu alɔ ká ā klla méyīnyinyi alɔ gɛ ŋ́ nɛɛ?

¹⁶Awɔ kē wɛ ádā alɔ ɔkwɔ̄ɔ̄kwɛ̄yi á. Ɔdāŋ nɛ̄ ádáádā alɔ nēe lé ka Ébrahām mɛ́mla Ayísīki ā í kōō jé alɔ ŋ́, kē tá ka alɔ í wɛ ayí uwā ŋ́ nááná, awɔ ā kē wɛ ádā alɔ abɔ̄yī nū á. Awɔ kē húmáyī hɛ́ alɔ tá ŋmá īkííkée á.

¹⁷Woó, Óndú, ó lɛ ā abɔ̄ ó gbo nɛ̄ a cɛ̄ lɛ alɔ nyíleyī ŋmá ɔwɛ kú uwɔ āa? Ɔdíyá nɛ̄ a cɛ̄ lɛ ɔtū kú alɔ lɔfú nɛ̄ alɔ í cɛ̄ ō lɛ ojīlīmā ce uwɔ gɛ ŋ́ mā āa? Kóocōō, le odo kú uwɔ pīyabɔ̄ lɛyíkwu alɔ ohígbū ka alɔ wɛ ācocɛ̄hɔ̄ kú uwɔ nɛ̄ a kpó kú alɔ wɛ ákú abɔ̄yī uwɔ ā nɛ.

¹⁸Agblīihɔ-nɛ̄hi kú uwɔ ā wɛ ákú alɔ nēe wɛ ācɛ ɔlɛ́ uwɔ ā eko kpií nōo yɛ ā. Anɔ́ɔ aólɛlā kú alɔ kē kwú ɔ̄ ú catāajɛ á.

¹⁹Abālɔbányā a gē yá alɔ bɛ̄ɛka ɔdā nɛ̄ á wɛ ɔcɛ́ kú alɔ jéjéē ɛ́ɛ́ ŋ́ mā. Bɛ̄ɛka ɔdā nɛ̄ á jé alɔ ka ācɛ ɔlɛ́ uwɔ jéjéē ɛ́ ŋ́ mā.