Read idoma AYISÁYA 64 Bible Online

AYISÁYA 64 - idoma bible

AYISÁYA 64

¹Anɔ́ɔ Ayisáya kɛlā lɛ Óndú ā kahíníī, “Kpái! Óndú, a géē yɛ í lɛ ɔkpáncō yíla kú ā ga ajɛ. Cɛ́ɛ́ aɛ́fu kéē gbɔɔ́ ō jíliyē iyɔ̄bū uwɔ.

²Aéwɔhá ā géē yɛ í bá ī fīyɛ̄gbúlú abɔ̄ a géē yɔ̄ ī wā ā, ɛ́gɛ́nɛ̄ ɔlá gē yi ɛfú gē yá ká éŋkpɔ̄ kóō wú á. Wā ká ā gaá lɛ ɔfú kú uwɔ mafú lɛ aólɛlā kú uwɔ̄.

³Ó lɛ eko éyi gaá yɛ nɛ̄ a wā ajɛ gaá yá ɔdā nɛ̄hi nōo túufi nɛ̄hi, nɛ̄ alɔ í leyīce ŋ́. Aɛ́fu kē bá ī jíliyē abɔ̄ a wā ā.

⁴Ɔ̄cɛ dúúmā í pó ɔdā dúúmā lɛyíkwu Ɔwɔicō ɔhá, ámaŋ má Ɔwɔicō ɔhá dúúmā gwū uwɔ tá nōo gē yá ɛdɔ kú ɔdā nɛ̄ a gē yá lɛ ācɛ nēe kpɔ́tūcē uwɔ ā ŋ́.

⁵A gē mīyɛ ācɛ nɛ̄ ɔtū gē he uwá kéē yá ɔdā nōo le kpaakpa mɛ́mla ācɛ nēe gē lā oyēeyī kú uwā ɛ́gɛ́nɛ̄ a tíne kéē lā ā bɔ́ɔtū. A le cɔ̄nū da alɔ ohígbū ka alɔ lɛ íne kú uwɔ bīya. Nááná nɛ̄ a yɔ̄ ī cɔ̄nū tū alɔ ā, alɔ kē bá yɔ̄ ī bɔ̄bíipú eko dóódu ŋmífī īkée. Ó lɛ ā, é nya alɔ tá gbóógbóō glá āa?

⁶Odúúdú alɔ kwú pīya ācobīyíne. Odúúdú ucē olɔhi fíyɛ́ dúú nɛ̄ alɔ ī yá ā í tīile dóódu ŋ́ bɛ̄ɛka áhinglí nōo le blínyī eyī dóódu ā. Ohígbū ɔ́bíipú kú alɔ, alɔ kwu yíífi ŋmá ajɛ bɛ̄ɛka aépū nēe ī ŋmókókó eko nɛ̄ aɔ́cí gē ga ɔlɔ́ɔwɔ eko ɔ̄nɔ̄ ā, nɛ̄ owu gē gwu bónū ā.

⁷Ɔ̄cɛ dúúmā í gbɔ̄ɔkɔ ga uwɔ ɛ́ɛ́ gɛ ŋ́. Ɛ́ɛ́ nɛ̄ ɔ̄cɛ dúúmā ī nya kóō tú abɔ̄ bī uwɔ ŋ́. Ohígbū ɔ́bíipú kú alɔ, a kwú igbīhi ú cē kwu alɔ, klla cɛ̄ lɛ alɔ le kpó yíífi.

⁸Amáŋ Óndú, awɔ wɛ ádā alɔ á. Alɔ lɛbɛ̄ɛka ɔmɛ ā, a kē lɛbɛ̄ɛka ɔ̄cɛ nōo ī ma ɔmɛ a. Awɔ yá alɔ á.

⁹Ohígbū ɔ́ɔmā ā, a híī cɔ̄nū tū alɔ piyóó ŋ́. Ā híī yɔ̄ ī gbɛlá kwu ɔ́bíipú kú alɔ piyóó ŋ́. Kóocōō, leyī yɛ ɔ́ lɛ alɔ kú ā ményinyi alɔ. Alɔ wɛ ācɛ ɔlɛ́ uwɔ nɛ.

¹⁰Aígelī kú ɔlɛ́ uwɔ abɔ̄yī uwɔ ā tá cákpáá bɛ̄ɛka ígbíli ā. Ujerúsālɛm le yíífi má tá alácɛ̄ ɛɛ́.

¹¹Agblīihɔ-nɛ̄hi kú uwɔ nōo tū ɛgahi nɛ̄hi, nɛ̄ aádáádā alɔ gē cɛ̄tra uwɔ ipú nū ā, ɔlá kwú ɔ̄ ú yi tāajɛ ɛɛ́. Odúúdú aɛ́ga nōo he alɔ ɔtū ā, má tá alácɛ̄ dúúdú ɛɛ́.

¹²Óndú, ɛlā dóódu nōo yɔ̄ ī yá alɔ nyā, í kwú uwɔ iyē ŋ́ nɛɛ? Á gáā yá ɔdā dúúmā lɛyíkwu ɔ́ ŋ, cɛ́ɛ́ ká ā mā alɔ tá kú ālɔ̄ bá ī móōwē fíyɛ́ ɛ́nyɔ́ kú alɔ nɛɛ?