Read idoma AYISÁYA 65 Bible Online

AYISÁYA 65 - idoma bible

AYISÁYA 65

¹Ayisáya ka Óndú ā ɔ́ɔ kahíníi, “N le tútū ō tá ācɛ nēé dɔɔ̄kā um ŋ́ mā ohi ɛɛ́. N kē le tútū ō ma iyī um fú lɛ ācɛ nēé tíne um ŋ́ mā. Éwo nōó hī um igwú ŋ́ mā, n cɛ̄ uwā igwú kahíníī, ‘Ami yɔ̄ á. Ami yɔ̄ á.’

²N le tútū ō mīyɛ ācɛ ɔlɛ́ um ā eko dóódu, nááná nēé bá yɔ̄ ī yíīkpɛ̄yí olɔfu piyóó, klla bá ī yá ucē ōbɔ̄bí klla bá ī yá ɔdā ɔtū uwā ā.

³É bá ī yá um cɔ̄nū ipéyī um cāā eko dóódu. É bá ī pā ɛcí ipú ɛhɔ̄ nēé le tū ō pā ɛcí ā. É klla bá ī gwɛ́ɛya ɛyí aéde nēé bī ublɔ́ɔku le gwó ā.

⁴É gē ga ipú aúnóji mɛ́mla aúnóji kú ɔgɛ̄cɔ̄ otú kéē da aálekwū kú ācɛ nēe gekwú ɛɛ́ mā ɔ̄kā. É gē lé ɛbɛ́ okóome, klla í mū enyɛ̄bɛ́ nēé le gwɛ́ɛya lɛ ɛcí ā.

⁵Cɛ́ɛ́ é gē da ācɛ ɔhá ka, ‘Aá híī túblá alɔ ŋ́, ɛ́ɛ́ nɛ̄ aá gē lɛ abɔ̄ kwu alɔ ŋ́. Ohígbū ka alɔ tīihɔ fíyɛ́ ɔdā nɛ̄ aá gē lɛ abɔ̄ kwu alɔ.’ Ɛlā kú ācɛ ɛ́gɔ́ɔmā gē wú um ɔtū bɛ̄ɛka ɛ́gɛ́nɛ̄ ódūdū gē pɛ́ ga ɔ̄cɛ ɛnwū ā. Ícɔ̄nū kú um lɛyíkwu uwá lɛbɛ̄ɛka ɔlá nōo yɔ̄ ī yi nōó gē nyí ŋ́ mā.

⁶N le italā nɛ̄ n gáā yá uwā ā miya táajɛ dúú ɛɛ́. N kē klla le ɔ́ tá táajɛ ɛɛ́. Ń gáā lɛ eyī gwō ɔdā nēé yá ā tá ŋ́. N géē cíla uwá ulé

⁷kú ɔ́bíipú kú uwā mɛ́mla ákú aádáádā uwá ā piíí. É lɛ aɛ́cí pā ɛyí aɛ́fu klla lɛ āflūmā yá um ɛɛ́. Ohígbū ɔ́ɔmā ā, n géē yá uwā italā kú ɔdā nēé yá ā.”

⁸Ayisáya ka Óndú ā ɔ́ɔ klla ka gɔbū kahíníī, “Ɛ́gɛ́nɛ̄ ācɛ í gē je īkpɔ̄cí kú ufáyin ō gwā lɔhi cúkpɔ́ɔ́ yíífi ŋ́, nɛ̄ ikoko ɔ́ɔmā nēé gē je ɔ́ yá ejé ā, ɛ́gɔ́ɔmā nɛ̄ ń gáā je odúúdú ācɛ ɔlɛ́ um yíífi ŋmáajɛ ŋ́ lɛ á. Amáŋ n géē nya ācɛ nēe gē gbā um ɛ̄gbā ā tá.

⁹N géē lɛ ācɛ kú Ísrɛ̄lu ōhī mɛ́mla ācɛ ōhī kú ipɔ́ɔma kú Ujúda tū nēe í lé úgwū ajɛ kú ɛyí aɛ́fu kú um. Ācɛ nɛ̄ n fu, nēe gē gbā um ɛ̄gbā ā géē lā abɔ́ɔ.

¹⁰Ajɛ kpátáá kú Ussárɔn géē wɛ ɛga nɛ̄ aálá mɛ́mla aɛ́wu kú ācɛ ɔlá um géē lúlé. Ɔpɛ́ kú Unwalu ā klla géē wɛ ɛga nɛ̄ aɛ́nā kú uwā géē lúlé dúú.[8]

¹¹Amáŋ ó géē bɔ̄bí lɛ aá nēe cīgbīhi kwú um, í klla lɛ ɛlá wu Usáyɔn, ɛfu otīhɔ kú um ŋ́ mā. Aá klla gē nyɔ̄ ī pā aɛ́cí nēé hī ka Ugádi mɛ́mla Uméni ā. Aá gbɛlá ka ɛcí kú aflɛ́yí ɔ́ɔmā géē je ɛyí olɔhi lɛ aá. Ka ɔ́mpā ā ɔ́ɔ kē ī miya ɛ́gɛ́nɛ̄ oyēeyī kú aá géē lɛ ɛ̄cɔbū ā.

¹²N géē miya tū kú ɛfú kóō lɛ aá lé. Ohígbū ka aá cɛ̄ um igwú eko nɛ̄ n hī aá igwú ā ŋ́. Aá klla kē jāhɔ̄ pó ɛlā kú um eko nɛ̄ n kɛlā lɛ aá ā ŋ́. Aá jégēdēē bá ī yá aɔ́dōōbɔ̄bí nɛ̄ aá jé cāā keé he um ɔtū ŋ́ mā.

¹³Ohígbū ɔ́ɔmā, n da aá ka ācɛ nēe gē gbā um ɛ̄gbā ā, géē má odée lé klla ī má odée gwá lɔɔlɔhi. Amáŋ aá ā, ɛmiyɛ mɛ́mla ijēēnyi géē ŋmó aá. Ɔtū géē he ācɛ nēe ī cɛ̄ um ɛhɔ̄ ā, amáŋ uwēyī géē kwú aá ā.

¹⁴É géē bá ī gwéeyē klla bá ī gwíjē, amáŋ aá ā, ɔtū géē bīya lɛ aá nōo í yá kú aá géē bá ī jikwu.

¹⁵Ācɛ nɛ̄ um fu ā géē bī iyē kú aá le tókónu. Ami, Ɔwɔicō nōo wɛ Óndú ā klla géē kpó aá ŋmó. Amáŋ n géē lɛ iyē ɛ̄yīpɛ̄ ce ācɛ nēe gē gbā um ɛ̄gbā ā.

¹⁶Ɔ̄cɛ dúúmā kú aá nēe lā ipú ajɛ ā gē tíne kéē yá ɔdā olɔhi lɛ ɔ́, ɔ̄cɛ ɔ́ɔmā kóō da ami nōo wɛ Ɔwɔicō nōo tōō lɔtūce ā, ká n yá ɔdā olɔhi ɔ́ɔmā lɛ ɔ́. Ɔ̄cɛ dúúmā nōo kē ī gbo ɔkpá ā géē bī iyē kú ami nōo wɛ Ɔwɔicō nōo tōō lɔtūce géē le gbo ɔkpá ɔ́ɔmā. Unwalu nēe tɛtɛ yá aá ā mɛ ɛ, n kē kwú mlanyī kpɛ́mm ɛɛ́.”

¹⁷Ayisáya klla ka Óndú ā ɔ́ɔ kahíníī, “N yɔ̄ gē yá ɔkpáncō ɛ̄yīpɛ̄ mɛ́mla ɛcɛ ɛ̄yīpɛ̄. É kōō gáā gbɛlá kwu aɔ́dā nēe bá gbɔbū ā, ɛ́ɛ́ nēé í blakwu uwá ŋ́.

¹⁸Ɔtū kóō he aá, ká aá gwéeyē piyóó ohígbū ɔdā nɛ̄ n yɔ̄ ī yá ā. Odúúdú ācɛ nēe gáā lā Ujerúsālɛm ɛ̄yīpɛ̄ nɛ̄ n yɔ̄ ī yá ā géē gwéeyē, ɔtū kē ī he uwá.

¹⁹Ami abɔ̄yī um géē gwéeyē ohígbū Ujerúsālɛm, ɔtū klla í he um ohígbū ācɛ ɔlɛ́ um. Ɔ̄cɛ dúúmā í gáā jikwū Ujerúsālɛm ɛ́ɛ́ nɛ̄ ācɛ gē dɛ̄gba kú unwalu abɔ́ɔ gɛ ŋ́.

²⁰Ayí obene í gáā kwú ɛ́ɛ́ gɛ ŋ́. Odúúdú ācɛ í lɛ́ɛcɛ lɔɔlɔhi. Ɔ̄cɛ dúúmā nōo gekwú iháyí ofɛhɔ̄, é géē jé ɔ́ ka ɔ́ɔ kwú agbaagbɔ. Ɔ̄cɛ nōó kē gekwú gbɔbū lɛ eko ɔ́ɔmā géē je ɔ́ ka abɔ̄ ɔ́ɔ wɛ ɔ̄cobɔ̄bíipú ā yá nɛ̄ um tókónu lɛ ɔ́ á.

²¹Ācɛ ɔlɛ́ um géē gwó aínu klla í lā ipú nū. É géē tū aɔ́cí ufáyin klla í lé aíkpō nū.

²²É gáā gwó inū ka ācɛ ɔhá kéē wā ī lā anú ŋ́! É kē gáā nyi ɔcí ufáyin lɛ ācɛ ɔhá kéē wā í lé ɛ́ɛ́ gɛ ŋ́. Ācɛ ɔlɛ́ um ā géē lɛ́ɛcɛ bɛ̄ɛka ɛ́gɛ́nɛ̄ ɔcí gē lɛ́ɛcɛ ā. Ācɛ nɛ̄ n fu ā, ī jɔ́ɔnyɛ aɔ́dā nēé yúklɔ́ kú uwā ā.

²³É gáā yúklɔ́ áncā ŋ́. É kē gáā ma ayí nēe í lɛyí olɔnɔ ŋ́. Ohígbū ka uwá géē wɛ ayí nɛ̄ ami, Óndú ā le ɔdā olɔhi yá lɛ uwá mɛ́mla ayí uwā.

²⁴Gbɔbū ɛ́ɛ́ kéē gbɔ̄ɔkɔ gā um, n géē tá uwā ohi. Abɔ̄ uwá bī ɛla okónu bá ī ka gā um ā, n géē pó ɔkɔ kú uwā í tú uwā ohi.

²⁵Ɔgwú mɛ́mla ɔyí álá géē lúlé tɔ̄há. Ágábá mɛ́mla ɛna géē bá ī lé ácí tɔ̄há. Ajɛ géē wɛ ɔdōlé kú aɛ́gwā á. É gáā yá ɔ̄cɛ ɔdā dúúmā ɛ́ɛ́ gɛ ŋ́. Ɔdā dúúmā í gáā yá ɔ̄cɛ dúúmā ɔdōbɔ̄bí, ɛ́ɛ́ nōo gē je ɔ̄cɛ yíífi ɛyí ɛfú kú um ā ŋ́.” Ami nōo wɛ Uyáwe ā kɛlā nyā á.