Read idoma AYISÁYA 66 Bible Online

AYISÁYA 66 - idoma bible

AYISÁYA 66

¹ Ayisáya ka Óndú ā ɔ́ɔ kahíníī, “Ɔkpancō wɛ akpa kú ɔcɛ́ kú um á. Ɛcɛ kē wɛ ɔdā olɛ ikpó ce ɔ́ kú um á. Ɛdɔ inu nyā nɛ̄ aá gáā gwó gā um glá āa? Ɛdɔ kú inu nyá nɛ̄ aá í gwó glá nɛ̄ n lɔfú lā anú glá āa?

²Ami abɔ̄yī um yá odúúdú aɔ́dā nēe bá ipú ɔkpáncō mɛ́mla ipú ɛcɛ nyā á. Ákú um nēé kē wɛ á. Ācɛ nēe he um ɔtū ā wɛ ācɛ nēe gē pīya odo kú uwā abɔ̄ ŋmá ɔ́bíipú, gē tá īyī uwā wā ajɛ, klla gē yúúfi um gē lɛyítáajɛ lɛ ɛlā nɛ̄ um ka ā.

³Amáŋ n le okónu tá lɛ ācɛ nēe bá ī yá ɔdā nōo he uwá ɔtū ā, nɛ̄ ɔ́bíipú nɛ̄ uwā gē bī ā gē he uwā ɔtū ā. Ɔ́dāŋ ka ācɛ ɛ́gɔ́ɔmā lɛ ɛna ŋmó kwú ɔ̄ ú gwɛ́ɛya gā um, ó lɛbɛ̄ɛka ɔlɛɛcɛ nēé ŋmó ā tū um ā. Ɔ́dāŋ nēé bī ɔyí álá le gwɛ́ɛya gā um, ó lɛbɛ̄ɛka ɔdā nēé bī ewō le gwɛ́ɛya gā um ā. Ɔ́dāŋ nēé lɛ ikpɔ̄dɛ̄hɔ̄ bī wā gaá gbā um ɛ̄gbā, ó lɛbɛ̄ɛka oyī kú ókóome nēé bī wā í gbā um ɛ̄gbā ā. Ɔ́dāŋ kéē lɛ ɔtulalī fú tū ɔlá gā um, ó kē lɛbɛ̄ɛka ɔdā nɛ̄ ɛcí nēé bá ī pā ā.

⁴Ohígbū ɔ́ɔma, n géē cɛ̄ lɛ uwá má ɛ́kɛma ɛdɔ nēé gē yúufi nū piíí ā. Ohígbū ka ɔ̄cɛ dúúmā kú uwá í tóohi eko nɛ̄ n hīīgwú ā ŋ́, ɛɛ́ nēé gē pó ɛlā kú um eko nɛ̄ n kɛlā lɛ uwá ā ŋ́. Amáŋ é jégēdē bá ī yá ɔdōbɔ̄bí nēé he um ɔtū ŋ́ mā.

⁵Aá jāhɔ̄ lɛ ɛlā nɛ̄ Óndú ā ka ā, aá nēe gē yúufi Óndú ā klla ī lɛyítáajɛ lɛ ɔ́ ā. Ācɛ ōhī kú ācɛ ɔlɛ́ aá gē wɔ́ɔtū aá ohígbū ka aá gē yɛce um kpaakpa. É gē yá aá ɛbɛ́ ī da aá ka, ‘Ka Óndú ā kóō bī ɔfú kú nū le nya uwá tá mɛ́ɛnɛ. Cɛ́ɛ́ ká aá gwéeyē ká alɔ mɔ́ɔ̄.’ Amáŋ uwá abɔ̄yī uwā nɛ̄ uwēyī gáā kwú á.”

⁶Aá jāhɔ̄! Aá pó uya nɛ̄hi nōo yɔ̄ ī yá igelī ā mɛ́mla ipú Agblīihɔ-nɛ̄hi ā āa? Uya ɔ́ɔmā wɛ ɛgba nɛ̄ Óndú ā yɔ̄ ī dɛ̄ abɔ̄ yɔ̄ ī yá aólɛlā kú nū italā nōo cíkā lɛ uwá ā nɛ.

⁷“Ujerúsālɛm lɛbɛ̄ɛka ɔnyā nōo yīipú, je ɔyí ma acígilí nōó yɔ́ɔma dúúmā ŋ́ mā

⁸Ɔ̄cɛ dúúmā má, klla pó ɔdā oyéyījii ɛ́gɛ́nyā jéjée ɛɛ́ ɛ̄ɛ̄? É ma éwo dúúdú dúúmā ɛ̄cī ékpónú ámāŋ igbeékpó jéjée ɛɛ́ ɛ̄ɛ̄? Amáŋ Usáyɔn í lɛbɛ̄ɛka ɛ́nɛ́ nōo gbo ɔma bōōbū kwú ɔyí ma ā. Éwo ā géē gbɔɔ́ igbeékpó bōōbū.

⁹Ami nōo yá ɛ́ɛ́ nɛ̄ ɔnyā nōo yīipú ā gbɔɔ́ ō yɔ́ɔma ā géē yá kóō lɛ ɔyí ā ma piíí. Ɛ́gɔ́ɔmā nɛ̄ n géē yá ká ācɛ ɔlɛ́ um kéē le pīya éwo á.”

¹⁰Aá nɛ̄ Ujerúsālɛm he aá ɔtū ā, aá gwéeyē mɛ́mla anú, ká ɔtū kóō he aá ohígbū nū. Odúúdú aá nɛ̄ igelī nɛ̄hi ɔ́ɔmā he aá ɔtū ā, aá gwéeyē mɛ́mla anú ícɛ. Odúúdú aá nēe tɛtɛ bá ī yá ɔtūnōbí ohígbū nū ā, aá gwéeyē nɛ̄ɛ̄nɛ̄hi mɛ́mla anú.

¹¹Ó géē bī aá klla géē tá aá ɔtū lé ɛ́gɛ́nɛ̄ ɛ́nɛ́ gē leyīkwu ɔyí nū gē je amɛ̄ lɛ ɔ́ gwá jāā gbéeko nōó le ipú nū ā. Aá géē jɔ́ɔnyɛ agbénú kú nū ā.

¹²Óndú ā kahíníī, “N géē kpó agbénú kú aéwɔhá gé lɛ aá láyíí bɛ̄ɛka éŋkpɔ̄ kú ísu nōó gē ŋmó ŋ́ mā ā. N klla ī kpó agbénú kú aéwɔhá ā gé lɛ aá cabácabá ɛ́gɛ́nɛ̄ ɔkpá gē cēenyi klá okónu nū ā. Aá géē lɛbɛ̄ɛka ɔyípɛ̄ obene nɛ̄ ɛ́nɛ́ nū le bī abɔ̄ klla í lɛ aá ce ikpó.

¹³N géē tá aá ɔtū le Ujerúsālɛm ɛ́gɛ́nɛ̄ ɛ́nɛ́ gē já ɔyí nū ā.

¹⁴Eko nɛ̄ aá lɛ ɛ̄nyā má gbɔɔ́ ō yá, cɛ́ɛ́ ɔtū géē he aá. Ó ī yá aá ka iyē kóō lɔfú lɛ aá nɛ̄hi. Cɛ́ɛ́ ācɛ géē jé ka ami nōo wɛ Óndū ā gē tá ācɛ dóódu nēe gē gbā um ɛ̄gbā ā abɔ̄. N kē ī cɔ̄nū tū aólɛlā kú um.”

¹⁵Óndú ā géē wā ajɛ mɛ́mla úgbɔ́ɔnya kú ɔlá bɛ̄ɛka ofúlutu ā. Ó géē cɔ̄nū nɛ̄ɛ̄nɛ̄hi klla kē í bī ɔlá le yá aólɛlā kú nū italā.

¹⁶Óndú ā géē bī ɔlá mɛ́mla ɔkpacaŋgelī le kɛ̄pɔ̄ tū odúúdú ācɛ kú aéwo kú ipú ɛcɛ ā. Ó kē í kpó ācɛ alɛwa ŋmó.

¹⁷Óndú ā kahíníī, “Ācɛ ōhī kú aá gē tú īyī aá tū, gē kwu ɔgba ga ipú ɛhɔ̄ ɛga nēé ī pɛ̄cí ā. Aá klla ī lé ɛbɛ ókóome, ɛbɛ́ ifú, mɛ́mla ɛbéelihɔ ɔhá. N géē kpó odúúdú aá yíífi tɔ̄há.

¹⁸N jé[9] ohílīpú nēé ī gbo ā mɛ́mla ucē nēé ī yá ā. Ohígbū ɔ́ɔmā n gē wā[10] í tá ācɛ kú odúúdú aéwo mɛ́mla ucē ā bá. Eko nēé le túbá, é géē má ɔdā nɛ̄hi nɛ̄ n bī ɔfú kú um yá glá ā.

¹⁹Ɔ́ɔmā kē ī wɛ ɔdōōcābɔ̄ lɛ uwá. Amáŋ n géē ma ācɛ ōhī kú uwá tá yēeyī klla í tū uwá ɛhɔ̄ nyɔ̄ ga ajɛ kú éwɔhá nēe bá ɛga oligbó nēe pó ofu um ámāŋ nēé má ɛ́gɛ́nɛ̄ n lɔfú lɛ ā jéjée ɛ́ɛ́ ŋ́ mā. N gēe tū uwá ɛhɔ̄ ga ajɛ Uspéni, Ulíbīya [11] mɛ́mla Ulídīya nɛ̄ ācɛ kú nū gē tɔyī nɛ̄hi ā, mɛ́mla Utúbal klla mɛ́mla Ugríísi. É géē bī ɛ́gɛ́nɛ̄ n lɔfú lɛ ā le tɔ́ɔna ipú aéwo nēe bá nyā.

²⁰É géē kpó odúúdú ācɛ ɔlɛ́ aá wā gé um ŋmá ipú ajɛ aéwɔhá ā bɛ̄ɛka ɔdā ɛhi nēé gē bī gé um ā. É géē kpó uwá ce ɛyí aɔ́nya ɛdɔ ɛyɛ́ɛyɛ́yí, aínyankwūlūmī mɛ́mla aúgbɔ́ɔ́nya ɛdɔ ɛyɛ́ɛyɛ́yí wā ɛyí ɛfu kú um, nōo wɛ Ujerúsālɛm ā, ɛ́gɛ́nɛ̄ ācɛ kú Ísrɛ̄lu gē kpó ɛhi kú ikpɔ̄dɛ̄hɔ̄ kú uwá tū ipú aɔ́dā yēŋēē wā ipú Agblīihɔ-nɛ̄hi kú um ā.

²¹N géē je ācɛ ōhī kú uwá yá ācogwɛ́ɛya mɛ́mla ācocɛ̄hɔ̄ kú Agblīihɔ-nɛ̄hi kú um bɛ̄ɛka ācɛ Ulífāyi ā.

²²Ɛ́gɛ́nɛ̄ ɔkpáncō mɛ́mla ɛcɛ ɛ̄yīpɛ̄ nɛ̄ um gáā yá ā gē yɔ̄ piyóó ŋmá ɔfú kú um ā, ɛ́gɔ́ɔmā nɛ̄ aá gáā bá ī lɛ ayááyí, nēé kē gáā mlanyī aá ŋ́ piyóó lɛ á.

²³Eko kú ucɛ kú ɔyā ɛ̄yīpɛ̄ dóódu mɛ́mla ɛ̄cī nɛ̄ aá cíkā ō yúklɔ́ ŋ́ mā, ācɛ kú éwo dóódu géē wā í gbā um ɛ̄gbā Ujerúsālɛm amānyā.”

²⁴Abɔ̄ é í ŋmá abɔ́ɔ bá ī nyɔ̄ ā, é géē má aókwū kú ācɛ nēe yá īkpɛ̄yí olɔfú tá um á bá eyīyɛ̄ɛcɛ kú igelī ā. Aɛ́kɔ̄ nēe gē bá ī kpó aókwū kú uwá lé ā, í gē kwú gbóógbóō ŋ́. Ɔlá nōo ī yi uwā ā, í gē nyī gbóógbóō ŋ́. É géē wɛ ɛbohéyī lɛ odúúdú alɛɛcɛ nēe géē má uwá ā.”