Read idoma AYISÁYA 7 Bible Online

AYISÁYA 7 - idoma bible

AYISÁYA 7

¹Ɛ̄cī éyi, eko nɛ̄ Áhāsi, ɔyí kú Ujótam nōo wɛ ɔyɔ́ɔ́yí kú Usíya ā wɛ ɔcɛ́ kú ācɛ Ujúda ā, anɔ́ɔ Uresín ɔcɛ́ kú Usiríya mɛ́mla Upéka ɔyí kú Uremalíya, ɔcɛ́ kú Ísrɛ̄lu, le pɛ́ tá Ujerúsālɛm kéē í kpɛ́fú tú ācɛ nēe lā abɔ́ɔ ā á. Amáŋ é yá ācɛ kú Ujerúsālɛm ā lé glá ŋ́.

²Eko nēé le ka lɛ ɔcɛ́ kú Ujúda mɛ́mla ācɛ ɔlɛ́ nū ka, ācɛ Usírīya ɔ́ɔ cɛ̄ le pīyatɔ̄há mɛ́mla Ísrɛ̄lu ā, ufi lɛ anú mɛ́mla ācɛ ɔlɛ́ nū kwú. Anɔ́ɔ é gbɔɔ́ ō fīyɛ̄gbúlú gē jíliyē bɛ̄ɛka ɔcí nɛ̄ owu gē jīliyē ipú ūpū ā.

³Anɔ́ɔ Óndú ā da Ayisáya kahíníī, “Kwú Ussíyɛ Ujássūbu, ɔyí uwɔ ú tɔ́ɔkwu cɛ́ɛ́ kú aá nyɔ̄ gaá jīla Áhāsi ɔwɛ. Aá géē má ɔ̄ ɔwɛ kú ɛga nɛ̄ āconīīlī gē bá ā. Abɔ́ɔ wɛ oŋmɛ́yí kú ɔgɔ nɛ̄ éŋkpɔ̄ gē bū ŋmá wā ipú ókpoó kú ɛhícō ā á.

⁴Eko nɛ̄ a lɛ tá abɔ́ɔ, da ɔ́ kóō leyī kwɛcɛ. Ó kē híī lɛ ɔtū plicō ŋ́, ɔdā dóódu kóō híī junwalu lɛ ɔ́ ŋ́. Urésin, ɔcɛ́ kú Usiríya mɛ́mla Upéka ā le cɔ̄nū nɛ̄hi, amáŋ é lɛbɛ̄ɛka ɛfú ō kwɔɔlá ɛpa nɛ̄ ɔlá genyí ŋmá uwá nōo gē tá ódūdū icííci nōó yá ɔdā dúú glá ŋ́ mā.

⁵É kōō le ujɔ̄ tū dúú ɛɛ́.

⁶É klla lɛ ɔ́ ŋmótū ka aá nyɔ̄ í lɛ ɛfú kpó tú Ujúda cɛ́ɛ́ kú aá ɔ́ɔ lɛ uwá ɔtū wuklíicō. Cɛ́ɛ́ ipú ufi kú uwā ɔ́ɔmā, aá ɔ́ɔ nyɔ̄ í kwú ɔyínɔ̄nyīlɔ kú Utábíilu ú cɔcɛ́.

⁷Amáŋ Óndú ā nōo lɔfú fíyɛ́ dúú ā kahíníī, “Ami nōo wɛ Óndú ā ka ɔdā nēé miya ɔ́ɔmā í gáā yá gbógbóō glá ŋ́.

⁸Ɔdíyá āa? Ohígbū koó wɛ Udamáskɔ̄si wɛ ɔlɛ́ ɔtāhɛ̄ kú Usírīya ā ŋ́ nɛɛ? Udamáskɔ̄si í kē lɔfú fíyɛ́ Urésin, ɔcɛ́ ā glá ŋ́. Ɔdā nɛ̄ n lɛ ō ka lɛyíkwu ācɛ kú Ísrɛ̄lu ā wɛ ka ipú iháyí ofɛtá cɛhɔ̄ nōo ī wā ā, é géē yá ācɛ kú Ísrɛ̄lu lé klla í je uwá catāajɛ dúúdú. Nēé gáā lɔfú wɛ éwo kú abɔ̄yī uwā glá ɛ́ɛ́ gɛ ŋ́.

⁹Ācɛ Ísrɛ̄lu í lɔfú fíyɛ́ Usamérīya nōo wɛ ɔlɛ́ ɔtāhɛ́ kú uwā glá ŋ́. Ɔfú lígíí nɛ̄ Usamérīya lɛ ā kē wɛ ɔfú kú ɔcɛ́ kú nū, Upéka. Amáŋ ɔ́dāŋ ka aá í cɛ̄ ɛlā kú um dúúdú glá ŋ́, ń gáā gbō aá ŋmá ífi nōo ī wā glá ŋ́.”

¹⁰Óndú ā klla da Ayisáya kóō da Áhāsi kahíníī,

¹¹“Da ami, Óndú ā, nōo wɛ Ɔwɔicō kú uwɔ ká n̄ lɛ ɔdōcābɔ̄ éyi mafú ga awɔ ka ɛlā nɛ̄ n ka ā, n géē yá ɔ̄ ɔkwɛ̄yi. A lɔfú ka ɔdōcābɔ̄ kóō lɔnɔ nɛ̄hi bɛ̄ɛka ɔdā ō bī ɔ̄ ŋmá ɔ̄gɔ̄lékwū ámāŋ ka icīīcō ɔkpáncō.”

¹²Amáŋ Áhāsi tóohi kahíníī, “Ń gáā dɔɔ̄kā ɔdōcābɔ̄ dúúmā ɛ́ɛ́, nɛ̄ n ge jē Óndú ā má ŋ́.”

¹³Anɔ́ɔ Ayisáya kahíníī, “Aá jāhɔ̄ mɛ́ɛnɛ, ɛjɛ̄ɛ̄jī ācɛ nēe ŋmá ɔkwu kú ɔcɛ́, Udéfīdi ā. Aá tɛtɛ cɛ̄ lɛ ɔtū le wú um ɛɛ́. Aá klla gáā cɛ̄ lɛ ɔtū wú Ɔwɔicō kú um dúú ɛɛ́.

¹⁴Abɔ̄ nōó le lɛ ā, Óndú ā abɔ̄yī nū géē je ɔdōcābɔ̄ lɛ aá. Aá mɔ́ɔ̄, ɔyínɔ̄nyā éyi le ipú yɔ̄ ɛɛ́. Eko nōó lɛ ɔyí ma, é géē hī iyē kú ɔyí ā ka Imánūwɛlu.

¹⁵Ɛ́ɛ́ kú ɔyí ā kóō jɛ̄ kóō géē jé ɔdā olɔhi ŋmá ɔdōbɔ̄bí ā, ó géē yɔ̄ ī lé anɔ̄ kú ijē kú ɛbɛ́ mɛ́mla ɛnwú.

¹⁶Ɛ́ɛ́ ka ɔyí ā kóō géē tá ɔdōbɔ̄bí cɛ́ɛ́ kóō je ɔdōlɔhi ā, é je ajɛ kú aɔ́cɛ́ ɛpa nɛ̄ aá gē yúufi uwā nɛ̄hi ā yíífi. Eko ɔ́ɔmā dúú ā aɔ́cɛ́ ā í kē gáā yēeyī gɛ ŋ́.

¹⁷Óndú ā yɔ̄ ī bī unwalu wā gé lɛ awɔ mɛ́mla ācɛ kú ipɔ́ɔ́nū kú ɔlɛ́ uwɔ ŋmá ɛgiyí ācɛ kú Asiríya. Ó géē wɛ ɛdɔ kú unwalu nɛ̄ ɛdɔ kú nū í kōō yɔ̄ jééjéē ɛ́ɛ́ ŋ́ ŋmíífī nɛ̄ ajɔ̄ɔ̄cɛ́ kú Ísrɛ̄lu je fō ŋmá Ujúda ā.”

¹⁸Eko nɛ̄ ɛ̄cī ɔ́ɔmā gā, Óndú ā géē tɔ́jī í hī aícɔ́ɔja igwú kéē pɛ́ wā wūū ŋmá Íjīpiti bɛ̄ɛka ijū nēe pɛ́ wūū ŋmá abɔ́ɔ ā. Ó klla hī ācɛ Asírīya igwú kéē pɛ́ wā lɛbɛ̄ɛka ɛnwú ā ŋmá ajɛ ɔlɛ́ uwā.

¹⁹É géē wā í mīyɛ ɛga dóódu tābɔ̄, kwu aɔ́pɛ́ mɛ́mla ɛfu mɛ́mla aɔ́gɛ̄cɔ̄, kwu ipú ácí kú ujē mɛ́mla odúúdú ipácí nɛ̄ aɔ́dāajɛ gē lúlé ā.

²⁰Ɛ̄cī nɛ̄ n ka nyā, Óndú ā géē cɛ̄ lɛ ācɛ Asíriya ā kéē lɛ ɔdā dóódu nɛ̄ aá lɛ ā kpó gwu ŋmá ajɛ dúúdú. Kwu ajɛ kú aá, ɔdɛ̄hɔ̄ kú aá mɛ́mla ācɛ kú ɔlɛ́ aá. Cɛ́ɛ́ ó í lɛbɛ̄ɛka ɛ́gɛ́nɛ̄ ɔ̄cowɛ́ɛ́yí gē bī igwu o wɛ́ɛ́yí ī púla īnyīlɛ̄yí, gē wá ɔnwū agba mɛ́mla ɔnwū ikpó ŋmá ācɛ iyē ā.

²¹Ɛ̄cī ɔ́ɔmā, ɔ̄cɛ nōo lɔfú lɛ ɔyí ɛna mɛ́mla aálá ɛpa ōfōōfūnū tū oyēeyī glá ā,

²²Amɛ̄ kú aɛ́bɛ́ ā í ce nɛ̄hi nēe í cɛ̄ lɛ ɔ̄cɛ ɔ́ɔmā í lɛ enyāmɛ̄ nwuné nōo í jɛ̄ ɔ̄ cabá. Ācɛ kɛ́tɛ̄kɛtɛ̄ nēe géē hile ipú ajɛ ā, géē bá ī lé anɔ̄ kú enyāmɛ̄ kú ɛbɛ́ mɛ́mla ɛnwú.

²³Eko ɔ́ɔmā, ɛhɔ̄ kú ufáyin lɔɔlɔhi nōo tɛtɛ gē gwá īkpō ufáyin úlúúlā nɛ̄ ɔ́lá nū lɔfú gbo ije nɛ̄hɛ́ úlā ɛpa cofigwó glá ā, géē je mu ácí ujē mɛ́mla agahāmā trúnyáá.

²⁴Ācɛ géē pɛ́ ga abɔ́ɔ í bī ɔtā mɛ́mla ɔyī nyɔ̄ í tɔ́ɔ́tɛ́. Ohígbū ka odúúdú ajɛ kwú mu ácí mɛ́mla ujē trúnyáá.

²⁵Ɛyí ɛfú nɛ̄ aá tɛtɛ gē hɛ́ɛhɔ̄ ī, lɛ ɔdɛ̄hɔ̄ tū ɔ̄ ā géē je bū ácí mɛ́mla ujē nɛ̄ɛ̄nɛ̄hi nɛ̄ ɔ̄cɛ dúúmā í kōō gáā ga abɔ́ɔ glá gɛ ŋ́. Ó géē je pīya ɛga nɛ̄ aálá mɛ́mla aɛ́na géē bá ī lúúlé ipú nū.”