Read idoma AYISÁYA 8 Bible Online

AYISÁYA 8 - idoma bible

AYISÁYA 8

¹Anɔ́ɔ Óndú āda um kahíníī, “Kwú usiléeti nɛ̄hi ā ú ká ā lɛ ɔkpá tá tū ɔ̄ kplɔkplɔ kahíníī, ‘Umáhá-Ssalál-Hassabasi (ɛ̄nɛ̄ ɛyí nū wɛ, ‘É géē tū aá iyē acígilí, é géē yá aá le fíyaa)

²Anɔ́ɔ n lɛ aíjáalí ɛpa nɛ̄ ɔ̄cɛ lɔfú lɔtūce uwā glá kpó kéē cɛ̄ um ijáalí á. É wɛ Uríya, ɔ̄cogwɛ́ɛya ā mɛ́mla Usekaríya, ɔyí kú Ujɛbɛrɛkíya.

³Anɔ́ɔ n gáā gwutá mɛ́mla ɔnyā um nōo wɛ ɔ̄comɛ́ɛbɛ dúú ā, anɔ́ɔ ó yīipú lɛ ɔyínɔ̄nyīlɔ éyi ma á. Anɔ́ɔ Óndú ā da um kahíníī, “Kwú iyē ú ce ɔ́ ka, Umáhá-Ssalal-Hassabasi.

⁴Ohígbū ka gbɔbu ɛ́ɛ́ ka ɔyí obene ā kóō géē jé ō jikwū ka, ‘Ádām ee’ amáŋ ‘Ɛ́nɛ́m oo’, ɔcɛ́ kú Asírīya géē je agbénú kú Udamáskɔ̄si mɛ́mla Usamérīya kpó nyɔ̄ ɔlɛ́ nū.”

⁵Anɔ́ɔ Óndú ā da um kahíníī,

⁶“Ācɛ ā tá ami, nōo gbonɛnɛ bɛ̄ɛka éŋkpɔ̄ kú Ussílōwa nōó gē pɛ́ ɛmɛɛma ā, nēé bá ī gwéeyē ohígbū Urésin mɛ́mla Upéka, ɔyí kú Urémalíya ā, kéē tá uwā abɔ̄.

⁷Ohígbū ɔ́ɔmā ā, n géē bī Ɔcɛ́nɛ̄hi kú Asírīya mɛ́mla odúúdú aícɔ́ɔja kú nū í wā kwūū í kpɛ́fú tú Ujúda, bɛ̄ɛka ísu kú Uyúfarétīisi nōo gē tá úgbagwú nɛ̄hi ā klla gē cēenyi klá odúúdú okónu nū ā.

⁸Aólɛlā ā géē mīyɛ odúúdú ajɛ Ujúda tābɔ̄ bɛ̄ɛka ɛ́gɛ́nɛ̄ éŋkpɔ̄ gē cēenyi klá ɛbɛɛbɛ, jāā kwu ɔkɔ ā. Amáŋ Ɔwɔicō yɔ̄ pī alɔ (Imánūwɛ̄lu).

⁹Aá le túbá tɔ̄há ipú ufi, aéwo! Aá jāhɔ̄, aéwo nōo bá ɛga oligbó kú ɛcɛ, aá le tútū ɛfú ō kpo, amáŋ aá yúufí. Īī, aá le tútū káā kpɛ́fú, amáŋ aá yúufí.

¹⁰Ojuju kú aá dóódu ā wɛ áncā, ɔdā dúúmā nɛ̄ aá miya ka aá ɔ́ɔ gē yá ā wɛ áncā, ohígbū ka Óndú ā yɔ̄ mɛ́mla alɔ.”

¹¹Óndú ā tū um ukɔ̄ ɔfɔ́ɔ́fú, ka amíyɔ̄ yá ucē nɛ̄ ācɛ ā gē yá ŋ́. Ó da um kahíníī,

¹²“Á híī je odée ka ojuju obɔ̄bí ohígbū ka ācɛ je ɔ́ ɛ́gɔ́ɔmā ā ŋ́. Ɔdā nōo gē tū uwá ufi ā, kóō híī tū uwɔ ufi ŋ́.

¹³Ami nōo wɛ Óndú ā, nōo lɔfú fíyɛ́ dúú ā, í tōō le gbla ɔ̄cɛ dóódu ŋ́ mā, ami wɛ ɔ̄cɛ nɛ̄ a gēe yúufi nū á.

¹⁴Cɛ́ɛ́ n kwú pīya ɔ̄cɛ nōo géē gbō uwɔ. Amáŋ n géē lɛbɛ̄ɛka ɛcɔ̄ nōo tá ajɛ gē hɛ́ ācɛ Ujúda mɛ́mla Ísrɛ̄lu gwónū. N klla géē lɛbɛ̄ɛka ukpa nōo gē kwú ācɛ kú Ujerúsālɛm ā.

¹⁵Ācɛ alɛwa géē lɛ ikpó gbo ɔ́ klla í gwōnū, í je yíifi ŋmá ajɛ. Ukpa ā géē kwú uwá.”

¹⁶Aá nōo wɛ ayíkpó kú um ā, kóō lɛ olɛhɔ̄ nyā mɛ́mla ukɔ́ nɛ̄ Óndú ā tū um ā gbō, klla kwú ɔ̄ tū.

¹⁷Óndú ā kwú eyī kú nū ú tónū ŋmá ɛgiyí ācɛ ɔlɛ́ nū ɛɛ́, nááná, n géē lɔtūce Óndú ā, klla í leyīce ɔ́.

¹⁸Ami mɛ́mla ayí nɛ̄ Óndū ā kpó ga um ā wɛ aɔ́dōcābɔ̄ kú olɛhɔ̄ kú Óndú ā ipú ācɛ Ísrɛ̄lu. Óndú ā nōo lɔfú fíyɛ́ dúú ā lā ɛyí ɛfu kú Usáyɔn.

¹⁹Amáŋ eko nɛ̄ ācɛ á le da uwɔ kahíníī, “Nyɔ̄ ɛgiyí ācogwɛ́bā mɛ́mla ācomɛ́ɛbɛ kú anjɛnú ā, nēe gē kɛlā nwununwunu, klla ī tíifu ā, kéē lɛ ɛlā ka lɛ ācɛ nēe gekwú ɛɛ́ mā lɛ aá.” Aá híī pó ɛlā kú uwā ŋ́. N gbelá ka ācɛ cíkā ō da Ɔwɔicō nēe ī gbā ā ɔ̄kā nɛ. Ɔdí yá nɛ̄ ɔ̄cɛ ī da aókwūmā ɔ̄kā ohígbū ācɛ nōo yēeyī ā.

²⁰Á gēe tá uwá ohi kahíníī, “Áa jāhɔ̄ lɛ ɛlā nɛ̄ Óndū ā gē nwū aá ā. Aá jāhɔ̄ lɛ ācogwɛ́bā mɛ́mla ācomɛ́ɛbɛ anjɛnū á ŋ́, ɔdā dóódu nēé gē ka lɛ aá ā, í wɛ ɔkwɛ̄yi nōo géē yá aá lɔhi glá ŋ́.”

²¹Ācɛ ā géē bá í yɛ ipú ajɛ ā, bá ī jɔ́ɔnɔ, nɛ̄ ɛmiyɛ klla ī yɔ̄ ī ŋmó uwā. Ipú ɛmiyɛ nōo gēe yɔ̄ í ŋmó uwá ā, é géē bá í ka atufú lɛyíkwu ɔcɛ́ kú uwā mɛ́mla Ɔwɔicō kú uwá. Eko nēé ī tíne otábɔ̄ ŋmá ɔkpáncō

²²ámāŋ ka ɛcɛ, é gáā má ɔdā dúúmā gwū unwalu mɛ́mla obū mɛ́mla ákanyā mɛ́mla igbájí tá ŋ́.