Read idoma AYISÁYA 9 Bible Online

AYISÁYA 9 - idoma bible

AYISÁYA 9

¹Akanyā dúúmā í gáā yɔ̄ lɛ ācɛ nēé bá ī móōwē gɛ ŋ́. Ajɛ kú ipɔ́ɔma kú Usébūlɔn mɛ́mla Unáfūtāli ipú Ugálīli nēé tɛtɛ je uwēyī le uwá ā, géē je pīya ajɛ nēé ī lɛ ojīlīma ce ɔ́. Ajɛ ā tá okónu ísu kú Umeditarénīya, lɛyíkwu ɛnɔ̄ɔ̄cī ā ga āyā ɔhá kú Ujɔ́dan á. É hī ɔ̄ ka Ugálílii, ɛga nɛ̄ ācɛ éwɔhá lā ā.

²Ācɛ nēe gē yɛ ipú obū ā lɛ ɔlá ofíyajɛ nɛ̄hi ā má ɛɛ́. Ɔlá ā kē le fíyajɛ klá ācɛ nēe lā ipú ajɛ odobū nɛ̄hi ā.

³Óndú, a lɛ éwo ā nyīla nɛ̄hi, ohígbū uwɔ ā, é kē le éeyē lɛ nɛ̄ɛ̄nɛ̄hi. É gē gwéeyē bɛ̄ɛka ɛ́gɛ́nɛ̄ ācɛ nēe ī ce ɔdɛ̄hɔ̄ gē gwɛ́ɛyē ā. Amáŋ ɛ́gɛ́nɛ̄ ācɛ gē gwéeyē eko nēé gē kɔ iyó nēé wu ŋmá ɔgbɛ́fú ā.

⁴Ohígbū ka iyō ogbɛnú nēé le ce uwá ɔkɔ mla ákpláka kú oje kú oóyá ŋmó kú uwā ā, á lɛ odúúdú nū kpó ca bɛ̄ɛka eko kú ɛfú kú Umídiyan ā.

⁵Ohígbū ka áblákpá ɛfú dóódu nōo gē gwō ajɛ, ɔgbɔ́ ɛfú gligligli ā, mla īlī dóódu nēé le míya oyī ā, é géē je uwa kpó yɔɔlá bɛ̄ɛka anɔ̄ nēé hɛ́ tū ipú ɔlá āa.

⁶Ohígbū ká é lɛ ɔyí éyi ma la alɔ ɛɛ́; é kwú ɔyí éyi ú lɛ alɔ ɛɛ́. Igɛ́mɛ́nti ce ácábɔ̄ kú nū; é kē í hī iyē kú nū ka, Ɔwɔicō Idáagó, Ɔwɔicō nōo lɔfú fíyɛ́ dúú, Ádā ogbéegbé ɛcɛ, Ɔcɛ́ kú ɛbɔ́.”

⁷Oōnyīla kú ajɔ̄ɔ̄cɛ́ mla igɛ́mɛ́nti kú nū gē wɛ ɛbɔ́, ó gāa lɛ ooŋmɛ́yí ŋ́. Ó kē í ce úgāda ɔcɛ́ kú ádā nū, Udɛ́fīdi. Ó gē lɛ ajɔ̄ɔ̄cɛ́ kú nū kwu ajɛ klá í bī ɔ̄ yēŋēē mla ookpaakpa, ŋmá eko nya jāa gbéeko dóódu. Ɔfú kú Óndú a, ɔcɛ́ kú ɛfú ā gáā yá ɛ̄nyā á.

⁸Óndú ā lɛ ɛpɔ̄bí ŋmó ajɔ̄ɔ̄cɛ́ kú Ísrɛ̄lu, mla ayí kú Ujékɔ̄pu ɛɛ́.

⁹Odúúdú ācɛ kú Ísrɛ̄lu, mla odúúdú ācɛ nēé lā Usamérīya a géē jé ka Óndú ā ɔ́ɔ yá ɛ̄nyā á. Abālɔbányā a, é ba ī yá ɔbɔ́ɔ́cɛ klá í gɔ̄ ɛɛ́, klá í ka kahíníī,

¹⁰“Inu kú ubulɔ́kwu ajɛ a má gwōnū ɛɛ́, amáŋ alɔ géē je inu ubulɔ́kwu kú ɛcɔ̄ gwū ɔkwū nū; é kwú ɔcí kú Usíkāmɔ ú tū ɛɛ́, alɔ gē tū ɔcí uloko kwɛyí nū.”

¹¹Óndú ā lɛ aólɛlā kú aá fu kéē wā í kpó ɛfú gwō aá ɛɛ́.

¹²Usírīya ŋmá ɛnɔ̄ɔ̄cī, Ufilístiya ŋmá ɛnɔ̄ɔ̄nɛ̄, é lɛ okónu kú uwá nwūla gáā je Ísrɛ̄lu mulɛ ɛɛ́. Náaná íwɔ́tū kú Óndú ā í kē mɛ ɛ́ɛ́ ŋ́. Ó lɛ abɔ̄ kú nū nandaa, gáā je ōwē lɛ uwá kpɔ́ ɛɛ́.

¹³Ācɛ kú Ísrɛ̄lu í gbɛlá pīyabɔ̄ ŋ́, náaná nɛ̄ Óndú ā nɛ̄ lɔfú fíyɛ́ dúú ā yɔ̄ ī je ōwē la uwá a, é kwúcē wā ɛgiyí Óndú ā ɛɛ́ ŋ́ kpɔ́.

¹⁴Ɛ̄cī ékpónú nɛ̄ Óndú ā géē je ōwē lɛ Ísrɛ̄lu ā, ó kwú odúúdú uwá, kwu aótrɛ̄yí kú uwá u kpó yífi, ŋmá icō wā ajɛ.

¹⁵Íkpɛ́yí kú ācɛ ā, wɛ anyākwɔ́cɛ nɛ̄ ɔwɛ kú uwá bɔ̄bí nɛ̄hi ā, ugbé ā wɛ ācomɛ́ɛbɛ nɛ̄ ɔdā oōnwū kú uwá wɛ ɛ̄kɛ̄mgbɛ̄ á.

¹⁶Ācɛ nēe gē bī Ísrɛ̄lu tá nyā lɛ uwá kpó bī, lɛ uwá kpó nyíleyī.

¹⁷Ohígbū ɔ́ɔmā, Óndú ā í gáā cɛ̄ ka oklóbīya dúúmā kóō kwu ŋ́, Ó kē gaa meyinyi kú anyōkwū mla ayókwū dúúmā ŋ́, ohígbū ka ācɛ ā í jé Ɔwɔicō ŋ́ ma, é kllá bī ɔ́bíipú nɛ̄hi. Ɔdā dóódu nēé gē ka, kllá ī yá ā, wɛ obɔ̄bí. Náaná íwɔ́tū kú Óndú ā í gáā mɛ ɛɛ́ ŋ́ kpɔ́. Ó géē nā abɔ̄ kú nū daa í je ōwē lɛ uwá kpɔ́ ɛɛ́.

¹⁸Ɔ́bíipú kú ācɛ ā géē yi bɛ̄ɛka ɔlá kú ácí úgbá, mla ɔlá kú ūpū nɛ̄hi, nōo gē tá ódūdū kpúmm ā.

¹⁹Ohígbū ka, abɔ̄ Óndú ā nɛ̄ o lɔfú fíyɛ́ dúú ā kwú cɔ̄nū ā, ōwē kú nū nɛ̄ ó je lɛ ācɛ ā, yɔ̄ í yi bɛ̄ɛka ɔla ácí úgbá ā, ipú odúúdú ajɛ ā, é géē je ācɛ dóódu kpó yífi.

²⁰ɔdōlé dóódu nɛ̄ ɔ̄cɛ géē má ipú ajɛ á, ó géē wúla klá anú gbɔɔ́ ō lé, amáŋ ó kē gáā nū ɔ̄ ipú ŋ́. É kllá gbɔɔ́ ō je ayí uwā kpó lé dúú, náaná ɛmiyɛ kú uwá í kē gáā mɛ ŋ́.

²¹Ācɛ kú Umanásɛ mla Ɛ́frem gbɔɔ́ ō kpó ɛfú tū īyī uwā, uwá ɛpɛlɛ́ɛpa klá kwú eyī ī pīya kwu Ujúda, kpó ɛfú ī gwō ɔ̄. Náaná íwɔtū kú Óndú ā í mɛ ɛ́ɛ́ ŋ́ kpɔ́, ó lɛ abɔ̄ kú nū nandaa gáā je ōwē lɛ uwá kpɔ́.