Read idoma ULĪFAYI 1 Bible Online

ULĪFAYI 1 - idoma bible

ULĪFAYI 1

¹Óndú ā le Umósīsi hīgwú ŋmá ipū Áklɔ̄kpīihɔ, ɛga nɛ̄ Óndú ā yɔ̄ ā. Anɔ́ɔ ó le aíne nēe bá nyā kpó lɛ ɔ́.

²Cɛ́ɛ́ kú ācɛ kú Ísrɛ̄lu kéē lɛ tū eko nēé bī ɛya gáā gwó lɛ Óndú ā á. Eko nɛ̄ ɔ̄cɛ dóódu kwú ɛbɛ́ ú gwɛ́ɛya lɛ Óndú ā, ó lɔfú wɛ éyi kú aɛ́na, amáŋ aálá ámāŋ aɛ́wū kú nū.

³Ɔ́dāŋ koó yɔ̄ gē je éyi kú ɛna kú nū gwɛ́ɛya kóō yɔlá dúúdú. Ó géē bī ɔbɛ́ɛna nōó lɛ ɛnyá dóódu iyē kú nū ŋ́. Ó í je ɔ́ lɛ Óndú ā okómpīinu kú Áklɔ̄kpīihɔ, ɛga nɛ̄ Óndú ā yɔ̄ ā, cɛ́ɛ́ kú ɛlā nū kóō le he Óndú ā ɔtū.

⁴Ɔ̄cɛ ā géē kpó abɔ̄ kú nū ce ɛbɛ́ ā ɛyí. Cɛ́ɛ́ é géē mīyɛ ɔdā kú ɛ̄gbā ā bɛ̄ɛka ɛya nēé gwó, nōo kpó íne nōó bīya ā nyɔ̄ ā.

⁵Ó géē ŋmó ɛna ā abɔ́ɔ, iyɔ̄bū Óndú ā. Cɛ́ɛ́ ayínɔ̄nyīlɔ kú Árɔ̄ni, nēe wɛ ācogwɛ́ɛya ā, géē mīyɛ oyí kú ɛbɛ́ ā géē je lɛ Óndú ā. Cɛ́ɛ́ é kwú ɔ̄ ú ce klá odúúdú ɔ́kíka ɛnɛ kú ede ā.

⁶Cɛ́ɛ́ é le ɔkpá kú ɛbɛ́ ā tá ŋmá ɔ̄ iyē, kéē le ɔ́ kpó wá kpɛɛ́kpɛɛ́.

⁷Ɔ̄cogwɛ́ɛya ā géē gwó ɛfú tū ɛyí ede, cɛ́ɛ́ é lɛ ɔlá hɛ́ kwu ɔ́.

⁸É géē kpó ɛbɛ́ nēé wā ā ce ɛyí ɔlá, īkpɛ̄yí mɛ́mla ijē kú ɛbɛ́ ā.

⁹Ɔ̄cɛ ā í kpó aíyíípú kú nū mɛ́mla aíklíkpó kú nū, cɛ́ɛ́ ɔ̄cogwɛ́ɛya nōo yɔ̄ ī gwɛ́ɛya ā, géē kpó odúúdú íyɛ́ɛya ā yɔlá. Ocu kú ɔdōlé nyā gē he Óndú ā ɔtū.

¹⁰Ɔ́dāŋ ka ɔ̄cɛ yɔ̄ ī je álá ámāŋ ka ɛwū, ó í bī ɔbá nōó lɛ ɛcá ŋ́.

¹¹Ó géē ŋmó ɔ̄ ābɔ̄ ɛhícō kú ede ā, ipéyī Óndú ā. Ācogwɛ́ɛya ā géē pīya oyī kú nū kla ɔ́kíka ɛnɛ kú ede ā.

¹²Igbīhi nɛ̄ ɔ̄cɛ ā le ɛbɛ́ ā wá ā, ɔ̄cogwɛ́ɛya nōo yɔ̄ ī gwɛ́ɛya ā géē kpó odúúdú ɛbɛ́ ā mɛ́mla īkpɛ̄yí mɛ́mla ijē kú nū ce ɛyí ɔlá ā.

¹³Amáŋ, ɔ̄cɛ ā í kpó iyíípú mɛ́mla iklííkpó igbīhi kú nū na. Ɔ̄cogwɛ́ɛya í je ɛya ā lɛ Óndú ā, cɛ́ɛ́ ó kwú uwā ú kpó yɔlá ɛyí ede ā. Ocu kú nū gē he Óndú ā ɔtū.

¹⁴Ɔ̄dāŋ ka ɔ̄cɛ yɔ̄ ī je ígbáanɔ gwɛ́ɛya ō yɔlá dúúdú nɛɛ, ígbáanɔ ā í wɛ okóohō ámāŋ ka ɔklɛ́ɛbɛ́tɛ.

¹⁵Ɔ̄cogwɛ́ɛya ā géē bī ɔ̄ wā ɛyí ede ā, lɛ ɔ́ ɔkɔ nya gbiílí, lɛ ɔ́ īkpɛ̄yí fu cáa. Cɛ́ɛ́ é kwú īkpɛ̄yí ā ú yɔlá ɛyí ede ā. É géē pī oyī kú nū klá ákló kú ede ā.

¹⁶Ó géē je īkpɛ̄ɛcɛ kú nū mɛ́mla ɔdā nōo bá ipú nū ā kpó bónū ābɔ̄ ɛnɔ̄ɔ̄cī kú ede ā, ɛga nēé pīya ewo bá ā.

¹⁷Ó géē bī acá kú nū lɛ ipú nū fā tɛ́ɛcɛ. Ó í yá ɛ̄nyā ɔwɛ nɛ̄ acá ā í gáā je fā ŋmá anú ŋ́. Cɛ́ɛ ó kwú ɛjɛ̄ɛ̄jī nū ú kpó yɔlá ɛyí ede ā. Ocu kú ɛya kú ɔdōlé nyā gē he Óndú ā ɔtū.