Read idoma ULĪFAYI 11 Bible Online

ULĪFAYI 11 - idoma bible

ULĪFAYI 11

¹Óndú ā le aíne nēe bá nyā kpó lɛ Umósīsi mɛ́mla Árɔ̄ni lɛ,

²ācɛ kú Ísrɛ̄lu. Ó kahíníī, “Aá lɔfú lé odúúdú aɛ́bɛ́ nēe gē yɛ ajɛ

³nɛ̄ āpīicɛ kú uwā le kɛ̄ɛpa, nēe gē lé ácí mlɛ, gē cē ɔ̄ wā okónu, klla ī lé kpɔ́.

⁴Amáŋ aá híī lé inyankwūlūmī ŋ́. Ó gē lé ácí mlɛ, gē cē ɔ̄ wā okónu, klla ī lé kpɔ́ amáŋ āpīicɛ kú nū í kɛ̄ɛpa ŋ́. Ó wɛ ɛbéelihɔ lɛ aá.

⁵Aá híī lé olicɛ́cɛ́ ŋ́. Ó gē lé ácí mlɛ, gē cē ɔ̄ wā okónu, klla ī lé kpɔ́, amáŋ, ó lɛ āpīicɛ ŋ́. Ó wɛ ɛbéelihɔ lɛ aá.

⁶Aá híī lé iyɛ́jī ŋ́. Ó gē lé ácí mlɛ, gē cē ɔ̄ wā okónu, klla ī lé kpɔ́ amáŋ ó lɛ āpīicɛ ŋ́. Ó wɛ ɛbéelihɔ lɛ aá.

⁷Aá híī lé ókóome ŋ́. Ó lɛ āpīicɛ o kɛ̄ɛpa náaná ā, ó gē lé ácí mlɛ, gē cē ɔ̄ wā okónu, klla ī lé kpɔ́ ŋ́. Ohígbū ɔ́ɔmā, ó wɛ ɛbéelihɔ lɛ aá.

⁸Aá híī lé aɛ́bɛ́ nēe bá nyā ŋ́. Aá kōō híī lɛ abɔ̄ kwu okwú kú uwā ŋ́. É wɛ ɛbéelihɔ lɛ aá.”

⁹“Aɛ́nyā nɛ̄ aá í lé ŋmá ipú aɛ́bɛ́ nēe lā ipú éŋkpɔ̄ á. Ɛbɛ́ dóódu nōo yɔ̄ ipú éŋkpɔ̄, nōo lɛ acá mɛ́mla āpū, aá géē lɔfú lé.

¹⁰Amáŋ, ɛbɛ́ dóódu nōo yɔ̄ ipú éŋkpɔ̄, nōó lɛ acá mɛ́mla āpū ŋ́, aá híī lé ŋ́.

¹¹É wɛ ɛbéelihɔ lɛ aá. Aá híī lé ɛbɛ́ kú uwā, ɛ́ɛ́ nɛ̄ aá géē lɛ abɔ̄ kwu okwū kú uwā ŋ́.

¹²Ɔdā dóódu nōó lɛ acá mɛ́mla āpū ŋ́ nēe lā ipú éŋkpɔ̄, wɛ ɛbéelihɔ lɛ aá.”

¹³Aá híī lé odóódu kú ipú aígbáanɔ̄ nēe bá nyā ŋ́. Aɛ́nyā kē í wɛ ɛbéelihɔ lɛ aá:

¹⁴Ɔgɔ, ucē okwáapa ɛ́gɛ́nɛ̄ ɛdɔ kú uwā dóódu lɛ ā,

¹⁵Ɛdɔ ɔtágláma dóódu,

¹⁶Okokonfí, mɛ́mla okwájɛklá mɛ́mla aígbánēenyi,

¹⁷Ɛdɔ kú ogwugwu dóódu, idangblēnyi, ucē ɛ́gɛ́nɛ̄ ɛdɔ kú uwā lɛ ā,

¹⁸Ugwū enyi, mɛ́mla ɛdɔ kú ēpū dóódu,

¹⁹Omulɛgwá, udɔ́, mɛ́mla ɛ́námbokpó, mɛ́mla okpé. Aá híī lé ŋ́.

²⁰Odúúdú aákpá nēe lɛ efū gē wu, nēe lɛ ikpó fíyɛ́ ɛnɛ, wɛ ɔdēelihɔ lɛ aá.

²¹Amáŋ ipú aákpá nēe lɛ ikpó fíyɛ́ ɛnɛ ā, aá lɔfú lé ɛ̄nɛ̄ ikpó kú uwā fíyɛ́ uwá ɛyí gicō, nēe klla ī tómbili ā.

²²Ipú uwá ā, aá géē lé ɛdɔ efūma dóódu, ɛdɔ átā dóódu, mɛ́mla ɛdɔ íkpaŋ́gā dóódu.

²³Amáŋ, aɔ́dā ɔhá nɛ̄ŋ́cɛ́ nēe ī pi ajɛ dúú ā wɛ ɔdēelihɔ lɛ aá.

²⁴“Ɔ̄cɛ dóódu nōo lɛ iyē kwu okwū kú aɛ́bɛ́ nēe bá abɔ́ɔ géē tēelihɔ jāā gbó ɔ̄nɔ̄ɔ̄nɛ̄.

²⁵Ɔ̄cɛ dúúmā nōo lɛ abɔ̄ kwu ɛga dúúmā kú okwū kú uwā, géē na īlī kú nū, ó kē í tēelihɔ jāā gbó ɔ̄nɔ̄ɔ̄nɛ̄.

²⁶Ɛbɛ́ dóódu nōo lɛ āpīicɛ, nɛ̄ āpīicɛ kú nū í kɛ̄ɛpa ŋ́, nɛ ó kē gē lé ácí mlɛ, gē cē ɔ̄ wā okónu, klla ī lé kpɔ́ ŋ́, wɛ ɛbéelihɔ lɛ aá, ɔ̄cɛ dóódu nōo lɛ abɔ̄ kwu uwá géē je tēelihɔ.

²⁷Odúúdú aɛ́bɛ́ née lɛ apīicɛ ŋ́, nēe lɛ ūkwū wɛ aɛ́béelihɔ lɛ aá. Ɔ̄cɛ dóódu nōo lɛ abɔ̄ kwu okwū kú uwā géē tēelihɔ jāā gbó ɔ̄nɔ̄ɔ̄nɛ̄.

²⁸Ɔ̄cɛ dúúmā nōo lɛ abɔ̄ kwu okwū kú uwā géē na īlī kú nū, ó kē í tēelihɔ jāā gbó ɔ̄nɔ̄ɔ̄nɛ̄.

²⁹Aɛ́nɛ̄ e bá nyā wɛ ɛbéelihɔ lɛ aá, ŋmá ipú aɛ́bɛ́ nēe géē pi yɛ ajɛ ā. Aífú ɛdɔ ɛyɛ́ɛyɛ́yí ā. Aápa ɛdɔ ɛyɛ́ɛyɛ́yí bɛ̄ɛka ufū, ɔbɛ́,

³⁰ábúbīyɛ̄, íkwu mɛ́mla anyínyā ā.

³¹Aɛ́bɛ́ nēe bá nyā wɛ aɛ́béelihɔ lɛ aá. Ɔ̄cɛ dóódu nōo lɛ abɔ̄ kwu okwū kú uwā géē tēelihɔ jāā gbó ɔ̄nɔ̄ɔ̄nɛ̄.

³²Ɔdā dóódu nɛ̄ okwū kú uwá le míya ce ɔ́, eko nēé gekwú ā, í wɛ ɔdēelihɔ. Ó kōō wɛ ɔcí, īlī, ɛcɔ̄, ámāŋ ka ɔdā dóódu. Aá géē je ɔ́ fenyi ipú éŋkpɔ̄, ó géē wɛ ɔdēelihɔ jāā gbó ɔ̄nɔ̄ɔ̄nɛ̄, ɛ́ɛ́ kóō je pīya ɔdā ɔlamu.

³³Ɔ́dāŋ ka okwū kú odóódu kú uwā kōō le míya tá ipú ɛtɛ́, ɔdā dóódu nōo yɔ̄ ipú ɛtɛ́ ɔ́ɔmā ā géē je tēelihɔ. Aá kwú ɛtɛ́ ɔ́ɔmā í ca.

³⁴Ɔdōlé dóódu nɛ̄ ɔ̄cɛ géē lé nēé le éŋkpɔ̄ nōo ŋmá ɛtɛ́ ɔ́ɔmā pīya tū ɔ̄, géē wɛ ɔdēelihɔ. Ɔdā dóódu nɛ̄ ɔ̄cɛ gwá glá nōo yɔ̄ ipú ɛtɛ́ ɔ́ɔmā, í je tēelihɔ.

³⁵Ɔdā dóódu nɛ̄ okwū kú uwā lɛ míya ce ɔ́, ó kōō wɛ acɔ̄lá, ó géē je tēelihɔ. Aá kē í je acɔ̄lá ɔ́ɔmā ca.

³⁶Amáŋ, njɔlɔ kú éŋkpɔ̄ mɛ́mla ɔ̄gɔ̄ nēé bu tá ipú ɛcɔ̄ kóō bī éŋkpɔ̄ ā nōo okwū uwā lɛ iyē kwu í gáā je tēelihɔ ŋ́, amáŋ ɔ̄cɛ ámāŋ ka ɔdā dóódu nēé le iyē kwu okwū kú uwā ipú éŋkpɔ̄ ā, géē je tēelihɔ.

³⁷Ɔdāŋ ka okwū ā gaá ce īkpɔ̄dɛ̄hɔ̄ dóódu nēé gaá nyi ā, īkpɔ̄dɛ̄hɔ̄ ā í gáā je tēelihɔ ŋ́.

³⁸Amáŋ, ɔ́dāŋ keé le īkpɔ̄dɛ̄hɔ̄ ā fenyi ipú éŋkpɔ̄ anɔ́ɔ okwū kú uwā le míya ce ɔ́, īkpɔ̄dɛ̄hɔ̄ ā géē je tēelihɔ.

³⁹Ɔ́dāŋ ka ɛbɛ́ dóódu nɛ̄ aá lɔfú lé ā gekwú, ɔ̄cɛ dóódu nōo lɛ abɔ̄ kwu okwū kú nū, ɔ̄cɛ ɔ́ɔmā géē je tēelihɔ jāā gbó ɔ̄nɔ̄ɔ̄nɛ̄.

⁴⁰Ɔ̄cɛ dóódu nōo lɛ okwū ɛbɛ́ ā lé, ó géē na īlī kú nū, ó kē í tēelihɔ jāā gbó ɔ̄nɔ̄ɔ̄nɛ̄. Ɔ̄cɛ nōo bī okwū ā géē na īlī kú nū, ó kē í tēelihɔ jāā gbó ɔ̄nɔ̄ɔ̄nɛ̄.

⁴¹Aá híī lé aɛ́bɛ́ nɛ̄ŋ́cɛ́ dóódu nōo gē pi yɛ ajɛ ā ŋ́. É wɛ ɔdēelihɔ.

⁴²É kōō lɛ ipú pi yɛ ajɛ oo, ámāŋ kéē ī yɛ ikpó ɛnɛ oo, ámāŋ keé lɛ ikpó alɛwā.

⁴³Aá híī je īyī aá tēelihɔ ŋmá lɛ o lé odóódu kú aɔ́dā nēe bá nyā ŋ́.

⁴⁴Ami, Óndú ā, nōo wɛ Ɔwɔicō kú aá tīihɔ. Ɛ̄nyā yá ɛ́ɛ́ nɛ̄ aá géē je īyī aá tū gā um, cɛ́ɛ́ ká aá géē wɛ ācɛ nēe wɛ ákú um ōfōōfū um á.

⁴⁵Ami nōo wɛ Óndú ā, nōo kpó aá bɛ̄cɛ ŋmá ɔfiyɛ ō cɛ̄ ajɛ Íjīpiti ā, ka n wɛ Ɔwɔicō kú aá. Aá géē tīihɔ ohígbū ka ami abɔ̄yī um tīihɔ.

⁴⁶Aɔ́ɔmā wɛ íne lɛyíkwu aɛ́bɛ́, aígbáanɔ, ɛjɛ̄ɛ̄jī ɔdā nēe lā ipú éŋkpɔ̄ mɛ́mla aɔ́dā oyēeyī dóódu nōo gē pi yɛ ajɛ ɛcɛ ā á.

⁴⁷Aá í jé ɛyɛ́ɛyɛ́yí kú ɔdā nēe wɛ elihɔ mɛ́mla ɔdā o le yēŋēē mɛ́mla ɛyɛ́ɛyɛ́yí kú aɛ́bɛ́ nɛ̄ aá géē lé, mɛ́mla ɛ̄nɛ̄ aá gáā lé ŋ́ mā.