Read idoma ULĪFAYI 13 Bible Online

ULĪFAYI 13 - idoma bible

ULĪFAYI 13

¹Óndú ā le aíne nēe bá nyā kpó lɛ Umósīsi mɛ́mla Árɔ̄ni.

²Ó kahíníī, “Ɔdāŋ́ ka ipí ámāŋ ka ínālēgbé ce ɔ̄cɛ dúúmā ɔkpíyē, ámāŋ iyē kú nū le hɛ́mi, nōó géē je pīya ōcē obɔ̄bi kú ɔkpíyē glá, kéē lɛ ɔ̄cɛ ɔ́ɔmā bī gé lɛ Árɔ̄ni, ācogwɛ́ɛya ā, ámāŋ ayínɔ̄nyīlɔ kú Árɔ̄n.

³Ɔ̄cogwɛ́ɛya ā géē jila ipí ā, ɔ́dāŋ ka ɔnwu kú abɔ̄ kwú pīya ɛnɛ̄hɛ́, nɛ̄ ipí ā le lipú fíyɛ́ ɛga ohile kú ɔkpíyē abɔ̄yī nū ā. Ó le lɛ ā, ayíka ó wɛ ōcē kú agwú nɛ̄, ayíka ó wɛ ɔ̄cɛ oblínyī nɛ̄.

⁴Amáŋ, ɔ́dāŋ ka ipí kú ɔkpíyē ā wɛ ɛnɛ̄hɛ́, noó kē lipú fíyɛ́ ɔkpíyē ɛga ohile ā ŋ́, nɛ̄ ɔnwu kú nū í je pīya ɛnɛ̄hɛ́ ŋ́, ɔ̄cogwɛ́ɛya ā géē gwū ɔwɛ tū ɔ̄cɛ ā ipú inu ɛ̄cī ahāapa.

⁵Ɔ̄cogwɛ́ɛya ā géē jila ipí ā ɛ̄cī ɔ́mahāapa ā, ɔ́dāŋ koó le má ka ipí ā lɛ ɛ́gɛ́nɛ̄ ó tɛtɛ lɛ ā, nōó nyīla fíyɛ́ ŋ́, ɔ̄cogwɛ́ɛya ā klla géē gwū ɔwɛ tū ɔ̄ ipú inu ɛ̄cī ahāapa ɔhá kpɔ́.

⁶Ɔ̄cogwɛ́ɛya ā géē jila ipí ā ɛ̄cī ɔ́mahāapa igbɔhá ā kpɔ́. Ɔ́dāŋ ka ɛga nɛ̄ ōcē ā yɔ̄ ā le kwú turuturu, nōó nyīla ga ɛga ɔhá ŋ́, ɔ̄cogwɛ́ɛya ā géē ka ká ɔ̄ le yēŋēē, ka ipi kú ɔkpíyē ɔlamu icííci nɛ̄. Ɔ̄cɛ ā géē na īlī kú nū cɛ́ɛ́ ó kwú yá yēŋēē.

⁷Amáŋ, ɔ́dāŋ ka ipí ā le nyīla eko nɛ̄ ɔ̄cogwɛ́ɛya le ɔ́ jila, le ka tɛ́ɛcɛ ka ɔ́ɔ le yēŋēē ā, ó klla géē ga ɛgiyí ɔ̄cogwɛ́ɛya ā, kóō lɛ ɔ́ jila kpɔ́.

⁸Ɔ̄cogwɛ́ɛya ā géē jila anú kpɔ́, ɔ́dāŋ ka ōcē ā le nyīla tū ɔ̄ ɔkpíyē. ó le lɛ ā, ɔ̄cogwɛ́ɛya a géē ka ka ɔ́ le tēelihɔ ohígbū ka ipí ā ɔ́ɔ wɛ agwú.

⁹Ɔ́dāŋ ka agwú lɛ ɔ̄cɛ dúúmā kwú, é géē bī ɔ̄cɛ ā wā gé lɛ ɔ̄cogwɛ́ɛya,

¹⁰nōo géē jila anú. Ɔ́dāŋ́ ka ɛga nɛ̄hɛ́ ō mi dúúmā yɔ̄ ipú ɔkpíyē kú nū, nōó kwú ɔnwū kú abɔ́ɔ ú pīya ɛnɛ̄hɛ́, nɛ̄ enyi yɔ̄ ī pɛ́ ɛga nōo mi ā,

¹¹ayíka ó lɛ agwú obɔ̄bí nɛ̄hi ipú ɔkpíyē kú nū. ɔ̄cogwɛ́ɛya ā géē ka ka ɔ́ le tēelihɔ, ó gáā jila anú igbɔhá ɛ́ɛ́ gɛ ŋ́, ohígbū ka ó tá péee koó le tēelihɔ.

¹²Ɔ́dāŋ kú agwú ā le nyīla tū odúúdú iyē kú ɔ̄cɛ ā, ŋmá ɛyí kwu ajɛ, ɛ́gɛ́nɛ̄ ɔ̄cogwɛ́ɛya ā má lɛ glá ā,

¹³ɔ̄cogwɛ́ɛya ā géē jila anú igbɔhá. Ɔ́dāŋ ka ɔ̄cogwɛ́ɛya ā le ɔ́ jila lɔɔlɔhi gɔbū kpɔ́, nōó le má ka ōcē ā mīyɛ odúúdú iyē kú nū tābɔ̄ ɔkwɛ̄yi, ó géē ka k ɔ́ɔ le yēŋēē. Ɔ́dāŋ ka odúúdú ɔkpíyē kú nū ā kwú pīya ɛnɛ̄hɛ́, ɔ̄cɛ ā í kē tēelihɔ ŋ́.

¹⁴Amáŋ, eko nɛ̄ ipí enyeenyi gaá ce ɔ́, ó kwú tēelihɔ.

¹⁵Ɔ̄cogwɛ́ɛya ā géē jila nū kpɔ́, cɛ́ɛ́ ɔ́dāŋ koó le ipí enyeenyi má, ó géē ka tɛ́ɛcɛ kóō le tēelihɔ ohígbū koó wɛ agwú.

¹⁶Amáŋ eko nɛ̄ ipí enyeenyi ā le jé kwú pīya ɛnɛ̄hɛ́ kpɔ́, ɔ̄cɛ ā géē ga ɛgiyí ɔ̄cogwɛ́ɛya ā,

¹⁷nōo géē jila anú. Ɔ́dāŋ ka ipí ā kwú pīya ɛnɛ̄hɛ́ kpɔ́, ayíka ɔ̄cɛ ā le yēŋēē, cɛ́ɛ́ ɔ̄cogwɛ́ɛya ā géē ka tɛ́ɛcɛ ka ɔ̄cɛ ā le yēŋēē.

¹⁸Ɔ́dāŋ ka ɔ̄cɛ dóódu lɛ ínálēgbé nēe kwú jé ɛɛ́

¹⁹nɛ̄ odée nɛ̄hɛ́ ámāŋ ka odée nɔ̄wá mɛ́mla ɛnɛ̄hɛ́ gaá kwú ɛgiyí ínálēgbé ā, ó géē ga ɛgiyí ɔ̄cogwɛ́ɛya.

²⁰Ɔ̄cogwɛ́ɛya ā géē jila anú. Ɔ́dāŋ ka ɛgiyí ínálēgbé ā lɛbɛ̄ɛka ó le lipú fíyɛ́ ɛga ohile kú ɔkpíyē ā, nɛ̄ ɔnwū kú abɔ́ɔ kwú pīya ɛnɛ̄hɛ́, ó géē ka tɛ́ɛcɛ ka ka ɔ̄cɛ ā lɛ agwú. Ó bɛ̄ɛcɛ ŋmá ipú ínálēgbé ā.

²¹Amáŋ, ɔ́dāŋ ka ɔ̄cogwɛ́ɛya ā le ɔ́ jila, nōó le má ka ɔnwū kú abɔ́ɔ í je pīya ɛnɛ̄hɛ́ ŋ́, nɛ̄ ínálēgbé ā í kē lipú fíyɛ́ ɛga ohile kú ɔkpíyē ā ŋ́, nōó le kwú turuturu, ó géē gwū ɔwɛ tū ɔ̄cɛ ɔ́ɔmā ɛ̄cī ahāapa.

²²Ɔ́dāŋ nɛ̄ ipí ā kwú nyīla tū ɔkpíyē ā, ɔ̄cogwɛ́ɛya ā géē ka ka ɔ́ɔ le tēelihɔ, ohígbū koó lɛ ōcē.

²³Amáŋ ɔ́dāŋ koó yɔ̄ ɛga ékpónú nōó nyīla tū ɔkpíyē ohile ā ŋ́, ayíka ofu kú ipí ā nɛ̄, ɔ̄cogwɛ́ɛya ā géē ka ká ɔ́ɔ le yēŋēē.

²⁴“Ámāŋ, eko nɛ̄ ɔlá le ɔkpíyē kú ɔ̄cɛ yi, nɛ̄ eyī nū ā kwú pīya ɛnɛ̄hɛ́ ámāŋ ɔnɔ̄wá mɛ́mla ɛnɛ̄hɛ́,

²⁵ɔ̄cogwɛ́ɛya ā géē jila anú. Ɔ́dāŋ ka ɔnwū kú abɔ́ɔ kwú pīya ɛnɛ̄hɛ́, nɛ̄ ipí ā kwú lipú fíyɛ́ ɛga ohile kú ɔkpíyē ā, ó lɛ ā, agwú bɛ̄cɛ ipú ágbē kú ɔlá nɛ̄ yi ɔ̄cɛ ā abɔ́ɔ á.

²⁶Amáŋ, ɔ́dāŋ ka ɔ̄cogwɛ́ɛya ā le abɔ́ɔ jila, nɛ̄ ɔnwū kú abɔ́ɔ í je pīya ɛnɛ̄hɛ́ ŋ́, nōó lipú fíyɛ́ ɛga ohile kú ɔkpíyē ā ŋ́, ɔ̄cogwɛ́ɛya ā géē gwū ɔwɛ tū ɔ̄ ɛ̄cī ahāapa.

²⁷Ɔ̄cogwɛ́ɛya ā géē jila anú ɛ̄cī ɔ́mahāapa ā kpɔ́. Amáŋ ɔ́dāŋ ká ipí ā yɔ̄ ī nyīla, ó wɛ ōcē kú agwú nɛ̄. Ɔ̄cogwɛ́ɛya ā géē ka tɛ́ɛcɛ ka ɔ̄cɛ le tēelihɔ.

²⁸Amáŋ ɔ́dāŋ kā ɛgiyí ipí ā yɔ̄ ɛga nōó yɔ̄ ā kpɔ́ nōó nyīla ga ɛga ɔhá kú ɔkpíyē ā ŋ́, amáŋ nōó le mi bɛ̄ɛka ohígbū ɔlá nōo yi ɔ̄cɛ ā, ɔ̄cogwɛ́ɛya ā géē ka ká ɔ́ɔ le yēŋēē ohígbū ka ofu ipí kú ɔlá ɔ́ɔ yɔ̄ abɔ́ɔ á.”

²⁹Ɔ́dāŋ́ ka ɔ̄cɛnyā, ámāŋ ka ɔ̄cɛnyīlɔ lɛ ipí ikpɛ̄yí ámāŋ agba kú nū,

³⁰ɔ̄cogwɛ́ɛya ā géē jila anú. Ɔ́dāŋ ka ipí ā le lipú fíyɛ́ ɛga ohile kú ɔkpíyē ā, nɛ̄ ɔnwū kú abɔ́ɔ kwú pīya odo, ó géē ka ka ɔ̄cɛ ā ɔ́ɔ le tēelihɔ. Ó wɛ ōcē agwú kú ɛyí ámāŋ agba ɔ́ɔ yɔ̄ abɔ́ɔ á.

³¹Ɔ́dāŋ ka ɔ̄cogwɛ́ɛya ā lɛ ipí wá ɔ̄cɛ jila le má koó gbɔ̄ɔ̄gɔ̄ fíyɛ́ ɛga ɔkpíyē ohile ā ŋ́, nɛ̄ ɔnwū nobí í yɔ̄ anú ŋ́, ɔ̄cogwɛ́ɛya ā géē gwū ɔwɛ tū ɔ̄cɛ ā ɛ̄cī ahāapa.

³²Ɛ̄cī ɔ́mahāapa ā, ɔ̄cogwɛ́ɛya ā géē jila ipí ā, ɔ́dāŋ koó nyīla ŋ́, nɛ̄ ɛga nōo gē wá ɔ̄ ā, í gbɔɔ̄gɔ̄ fíyɛ́ ɔkpíyē ā ŋ́,

³³ɔ̄cɛ ā géē wá ɔnwū kú nū, í mā ɛga nɛ̄ ipí ā yɔ̄ ā tá. Ɔ̄cogwɛ́ɛya ā géē gwū ɔwɛ tū ɔ̄ ɛ̄cī ahāapa ɔhá kpɔ́.

³⁴Ɛ̄cī ɔ́mahāapa ā, ɔ̄cogwɛ́ɛya ā géē jila ipí ā, ɔ́dāŋ koó nyīla ga ɛgɔhá ŋ́, nōó kē gbɔɔ̄gɔ̄ fíyɛ́ ɛga ohile kú ɔkpíyē ā ŋ́, ɔ̄cogwɛ́ɛya ā géē ka k ɔ́ɔ le yēŋēē. Ó géē na īlī kú nū, cɛ́ɛ́ ó kwú yá yēŋēē.

³⁵Amáŋ, ɔ́dāŋ ka ipí ā le nyīla igbīhi nēé le ka tɛ́ɛcɛ ka ɔ̄cɛ ā ɔ́ɔ le yēŋēē,

³⁶ɔ̄cogwɛ́ɛya ā géē jila anú kpɔ́. Ɔ́dāŋ́ koó le nyīla ga ipú ɔkpíyē ā, ó klla cɛgbá o leyī táajɛ ɔnwū odo ɛ́ɛ́ gɛ ŋ́, ayíka ó le tēelihɔ.

³⁷Amáŋ ɔ́dāŋ ka ɔ̄cogwɛ́ɛya ā lɛ ɔɔ́ jila, nɛ̄ ɔnwū nobí le bū abɔ́ɔ, nɛ̄ ipí ā kwú jé, ɔ̄cogwɛ́ɛya ā géē ka k ɔ́ɔ le yēŋēē.

³⁸Ɔ́dāŋ ka ɔ̄cɛnyā ámāŋ ka ɔ̄cɛnyīlɔ lɛ ɛga nɛ̄hɛ́ ipú okpíyē kú nū.

³⁹Ɔ̄cogwɛ́ɛya ā géē jila ɔ̄cɛ ɔ́ɔmā. Ɔ́dāŋ ka abɔ́ɔ wɛ ɛnɛ̄hɛ́ kú ewo, ayíka ɛ́kpā bɛ̄cɛ iyē kú nū á, ɔ̄cɛ ā le yēŋēē.

⁴⁰Ɔ́dāŋ ka īnyīlɛ̄yí kú ɔ̄cɛ kwú kpó gbɛ́lé ŋmá ɔ̄ ɛyí, iyɔ̄bū ámāŋ ka igbīhī, o fakpá nōó fakpá á, ɔ̄cɛ ɔ́ɔmā le yēŋēē.

⁴¹Ɔ́dāŋ ka īnyīlɛyí kú ɔ̄cɛ le gbɛ́ ŋmá údɔ̄bū kú nū ámāŋ ka igbīhi ɛyí kú nū, ɛyí ō fakpá kú údɔ̄bū nōó lɛ á, amáŋ ó le yēŋēē.

⁴²Amáŋ ɔ́dāŋ ka ɛga nɔ̄wá dóódu le bɛ̄ɛcɛ ɛga nɛ̄ ɛyí fakpá ā, agwú yɔ̄ ī bɛ̄cɛ ɛga nɛ̄ ɛyí fakpá abɔ́ɔ á.

⁴³Ó lɛ ā, ɔ̄cogwɛ́ɛya ā géē jila iyē kú ɔ̄cɛ ā. Ɔ́dāŋ́ ka ipí ā le mi, le tá ɔ́wá klla wɛ ɛnɛ̄hɛ́, ayíka ó lɛbɛ̄ɛka agwú kú ɔkpíyē ā yɔ̄ ī bɛ̄cɛ ɛga nɛ̄ ɛyí fakpá ā abɔ́ɔ á.

⁴⁴Ɔ̄cogwɛ́ɛya géē ka tɛ́ɛcɛ ka ɔ̄cɛ ā lɛ agwú ikpɛ̄yí kú nū.

⁴⁵Olagwú ā géē lɛ áhingílí wiyē klla í mā īnyīlɛ̄yí kú nū tá kóō wá ɔ̄ ŋ́ ɛ́ɛ́ nōó gē leyīkwu ɔ́ ŋ́. Ó géē lɛ odée klá eyī jāā kwu ákpókónu ɛhícō, cɛ́ɛ́ ó géē yɔ̄ ī ka kahíníī, “Ɔdēelihɔ, ɔdēelihɔ!”

⁴⁶Ó géē wɛ ɔ̄cɛ nōo tēelihɔ ɔdā nōo yá nɛ̄ agwú ā yɔ̄ ɔkpíyē kú nū ā. Ó kē í lā eyīyɛ̄ɛcɛ kú ɛga nɛ̄ ācɛ lā ā ŋmá ɛgiyí ācɛ ɔhá.

⁴⁷“Úwɔ́ɔhɔ̄ ámāŋ ka émúká lɔfú yɔ̄ īlī dóódu, ó kōō wɛ īlī nēé hɛ́ ámāŋ ka īlī nēé tá abɔ̄,

⁴⁸ámāŋ īlī ŋmlɛ́ŋmlɛ́, ámāŋ īlī owú, ámāŋ ɔdā dóódu nēé yá ŋmá ɔkpɛ́bɛ́.

⁴⁹Ɔ́dāŋ ka úwɔ́ɔhɔ̄ ámāŋ ɔnɔ̄wá yōōō le mafú ipú īlī ā, ó kóō wɛ ɛdɔ īlī dóódu, ayíka úwɔ́ɔhɔ̄ mɛ́mla émúká nōo ī nyíla yɔ̄ abɔ́ɔ á. É í ma ɔ́ fú lɛ ɔ̄cogwɛ́ɛya ā.

⁵⁰Ɔ̄cogwɛ́ɛya ā géē jila ɔ́ klla í gwū ɔwɛ tū īlī nɛ̄ odée ā yɔ̄ anú ā ɛ̄cī ahāapa.

⁵¹Cɛ́ɛ́ ó lɛ ɔ́ jila ɛ̄cī ɔ́mahāapa ā ɔ́dāŋ ka odée ā le nyīla ipú īlī ā, kwú ɛdɔ kú ɔdā dúúmā nēé gē yá í le wiiyē ā, ayíka ó wɛ ɛdɔ úwɔ́ɔhɔ̄ mɛ́mla émúká nōo ī nyīla ā nɛ. Ɔdā nōo yɔ̄ anú kwú tēelihɔ ɛɛ́.

⁵²Ɔ̄cogwɛ́ɛya cíkā ō lɛ īlī ā kpó tɔ̄ɔ̄lá dúúdú ohígbū koó yɔ̄ ī nyīla.

⁵³Amáŋ ɔ́dāŋ ka ɔ̄cogwɛ́ɛya ā lɛ ɔ́ jila nɛ̄ ōcē ā í nyīla ga ɛga dúúmā ɔhá ŋ́,

⁵⁴ɔ̄cogwɛ́ɛya ā géē tūkɔ́ kéē lɛ ɔdā nɛ̄ émúká mɛ́mla úwɔ́ɔhɔ̄ ā yɔ̄ anú ā na. Ó géē kpó ɔ̄ bá ɛgée ɛ̄cī ahāapa.

⁵⁵Cɛ́ɛ́ ó klla í jila anú kpɔ́. Ɔ́dāŋ ka ɛga nɛ̄ odée ā yɔ̄ ā í je pīya abɔ̄ ɔhá ŋ́, nōó kē nyīla ŋ́ náaná ā, ó le tēelihɔ kpɔ́. É géē je odúúdú īlī ā yɔlá, ó kōō wɛ igbīhi ámāŋ ka iyɔ̄bū nɛ̄ odée ā yɔ̄ á nááná.

⁵⁶Amáŋ ɔ́dāŋ ka ɔ̄cogwɛ́ɛya ā lɛ ɔ́ jila, nɛ̄ abɔ́ɔ kwú cá ɛɛ́, ó géē je abɔ́ɔ híla ŋmá īlī ā ámāŋ ka ɔkpɛ́bɛ́ ā.

⁵⁷Amáŋ ɔ́dāŋ koó kwúcē wā īlī igbɔhá kpɔ́, nōó gbɔɔ́ ō nyīla kpɔ́, óndú īlī ā í je ɔ́ yɔlá.

⁵⁸Amáŋ ɔ́dāŋ koó le īlī ā na, anɔ́ɔ odée ā í yɔ̄ anú gɛ ŋ́, ó géē na īlī ā igbɔ́mpa, cɛ́ɛ́ īlī ā kwú yá yēŋēē.

⁵⁹Ɛ̄nyā wɛ íne kú úwɔ́ɔhɔ̄ mɛ́mla émúká nōo bá īlī nēé bī owú wu, amáŋ īlī nēé tá ɔcí, mɛ́mla īlī kú ɔkpɛ́bɛ́ ā, o yá ɛ́ɛ́ ká ācɛ kéē jé ɔ́dāŋ koó le ɔdōwiyē ō tēelihɔ ámāŋ koó le yēŋēē.