Read idoma ULĪFAYI 14 Bible Online

ULĪFAYI 14 - idoma bible

ULĪFAYI 14

²lɛyíkwu ɛ́gɛ́nɛ̄ é géē yá uculo kú ō je yá ye ŋēē kú ɔ̄cɛ nōo tɛɛ lɛ agwú nɛ̄ é je ōcē ā ŋmó tū ɔ̄ iyē ā a. Ɛ̄cī nēé ka tɛ́ɛcɛ ka ka ōcē ā mɛ ɛɛ́ mā, é géē bī ɔ̄cɛ ā wā gé lɛ ɔ̄cogwɛ́ɛya ā.

³Cɛ́ɛ́ ɔ̄cogwɛ́ɛya ā géē je ɔ̄cɛ ā ga eyīyɛ̄ɛcɛ kú ɔlɛ́ ā, cɛ́ɛ́ ó lɛ ɔ́ jila. Ɔ́dāŋ ka ōcē ā mɛ ɛɛ́,

⁴ɔ̄cogwɛ́ɛya ā géē ka kóō lɛ aígbáanɔ nɛ̄ŋ́cɛ́ nōó lɛ ɛnyá ŋ́ ɛpa kpó tɔ̄há mɛ́mla ɔcí kú usɛ́da, owú ɔgalúlá, mɛ́mla ābɔ̄ kú ɔcí nēé hī ka uháyísɔ̄pu ā.

⁵Anɔ́ɔ ɔ̄cogwɛ́ɛya géē je ɔ́da kéē lɛ éyi kú aígbáanɔ ā ŋmó ipú aklɛ nɛ̄hi nɛ̄ éŋkpɔ̄ oyēŋēē yɔ̄ ipú nū ā.

⁶Ó í je ígbáanɔ oyēeyī ā, ɔcí kú usɛ́da ā, owú ɔgalúlā ā, mɛ́mla ābɔ̄ kú uháyísɔ̄pu ā í kpó wu ipú oyī kú ígbáanɔ kú aflɛ́yí nēé ŋmó ā.

⁷Ó gē mī oyī ā klá ɔ̄cɛ nɛ̄ agwú kú nū mɛ ā igbo ahāapa. Cɛ́ɛ́ ó géē ka tɛ́ɛcɛ ka agwú kú nū mɛ ɛɛ́, kóō le yá yēŋēē ɛɛ́. Ɔ̄cogwɛ́ɛya ā je ígbáanɔ̄ nōo yēeyī ā tá gicō kóō kwú wu ga ipácí.

⁸Ɔ̄cɛ ā géē na īlī kú nū dóódu, ó klla í wā ɔnwū kú nū, í gwīiyē, cɛ́ɛ́ ó kwú yá yēŋēē. Ó lɔfú wā ipú ɔlɛ́ ā, amáŋ ó gáā lā ipú áklɔ̄kpɛ kú nū ŋ́ ɛ̄cī ahāapa.

⁹Ɛ̄cī ɔ́mahāapa ā, ó géē wá odúúdú ɔnwū ɛyí, ɔnwū agba, odúúdú ɔnwū eyī mɛ́mla ɔnwū kú ɛga ɔhá kú nū. Ó géē na īlī kú nū, klla ī gwīiyē, cɛ́ɛ́ ó kwú yá yēŋēē.

¹⁰Ɛ̄cī ɔ́mahatá ā, ó géē bī ɔyí álá ɛpa, nōó lɛ ɛnyá ŋ́ mɛ́mla ɔyí álá nɔ̄nyā kú iháyí éyi nōó lɛ ɛnyá ŋ́, okoolo nɛ̄ŋ́cɛ́ kú umu kú īkpɔ̄dɛ̄hɔ̄ éyi, mɛ́mla anɔ̄ lígíí.

¹¹Ɔ̄cogwɛ́ɛya ā, géē bī ɔ̄cɛ ā mɛ́mla ɔdā nōó kpó wā ga okómpīinu kú Áklɔ̄kpīihɔ, ɛga nɛ̄ Óndú ā yɔ̄ ā.

¹²Anɔ́ɔ ɔ̄cogwɛ́ɛya ā géē je éyi kú omlede ā mɛ́mla anɔ̄ lígíí ā, cɛ́ɛ́ ó kwú ɔ̄ ú gwɛ́ɛya kú íne ō bīya. Ó géē jíla anú iyē iyɔ̄bū Óndú ā, cɛ́ɛ́ kóō wɛ ɛya nōo cɛgbá lɛ Óndú ā.

¹³Ó géē ŋmó omlede ā ɛga nēé gē ŋmó ɛbɛ́ kú ɛya kú íne ō bīya mɛ́mla ákú ɛbɛ́ ō yɔlá dúúdú ā. Ó í yá ɛ̄nyā ohígbū ka ɛya kú ɛpɔ̄bí ō lé ā mɛ́mla ákú íne ō bīya ā wɛ̄ ákú ɔ̄cogwɛ́ɛya ā. Ó kē tīihɔ nɛ̄hi.

¹⁴Ɔ̄cogwɛ́ɛya ā géē je ōhī kú oyī kú ɛya nēé gwó kú ɛpɔ̄bí ō lé ā, lɛ ɔ́ kwu ákpáhɔ̄ abɔ̄lɔ́ná mɛ́mla ocúgbɔ̄ɔdu kú abɔ̄lɔ́ná, mɛ́mla ocúgbɔ̄ɔdu ikpó abɔ̄lɔ́ná kú ɔ̄cɛ ā.

¹⁵Ɔ̄cogwɛ́ɛya ā í je ōhī kú anɔ̄ kú ólīifu ā cɛ́ɛ́ ó lɛ ɔ́ hɛ́ tū ɔtābɔ̄ kú abɔlúfīyē,

¹⁶kwú ayíkābɔ̄ kú abɔ̄lɔ́ná kú nū ú wu anɔ̄ ā, cɛ́ɛ́ ó lɛ ɔ́ mī klá abɔ́ɔ igbahāapa ipéyī Óndú ā.

¹⁷Ó géē je anɔ̄ ōhī nōo hile ɔtābɔ̄ kú nū ā mɛ́mla oyī ōhī, cɛ́ɛ́ ó kwú ɔ̄ ú kwu ákpáhɔ̄ abɔ̄lɔ́ná, ocúgbɔ̄ɔdu abɔ̄lɔ́ná, ocúgbɔ̄ɔdu ikpó kú abɔ̄lɔ́ná kú ɔ̄cɛ nēé ka tɛ́ɛcɛ koó kwú yá yēŋēē ɛ́ɛ́ má.

¹⁸Ó géē je anɔ̄ nōo hile ipú abɔ̄ kú nū ā tū ɛyí kú ɔ̄cɛ ā. Ɔwɛ nyā nōó géē yá uculo kú iyē ō gwu á, cɛ́ɛ́ kéē kwú íne o bīya ú yá ɔ̄cɛ ɔ́ɔmā ɛhi á.

¹⁹Anɔ́ɔ ɔ̄cogwɛ́ɛya ā géē gwɛ́ɛya kú íne ō bīya ā kwɛyí nū, cɛ́ɛ́ ó klla lɛ uculo kú iyē ō gwu ā yá. Igbīhi ɛ̄nyā cɛ́ɛ́ ó lɛ ɛbɛ́ kú ɛya o yɔlá dúúdú ā gwó.

²⁰Igbīhi ɛ̄nyā ā, ó klla lɛ ɛya kú īkpɔ̄dɛ̄hɔ̄ gwó ɛyí ede ā. Ɔwɛ nyā nɛ̄ ɔ̄cogwɛ́ɛya ā géē yá uculo kú iyē ō gwu á, cɛ́ɛ́ ɔ̄cɛ ā kwú yá yēŋēē.

²¹Amáŋ ɔ́dāŋ ka ɔ̄cɛ̄ ā wɛ ɔ̄cɛ ogbɛhá, nōó bī ɔdā nēe bá nyā glá ŋ́, ó géē bī omlede éyi kú ɛya nēé í gwó kú ɛpɔ̄bí ō lé, nēé í jíliyē iyɔ̄bū Óndú ā, nōo wɛ ákú ɔ̄cogwɛ́ɛya ā. Ó géē bī okoolo nɛ̄ŋ́cɛ́ kú umu mɛ́mla anɔ̄ ólīifu lígíí.

²²Ó klla géē bī okóho ɛpa ámāŋ ka oklɛ́bɛ́tɛ ɛpa. Éyi wɛ ákú ɛya kú íne ō bīya, ɔhá ā kē wɛ ákú ɛya o yɔlá dúúdú ā.

²³Ɛ̄cī ɔ́mahātá kú uculo kú iyē o gwu kú nū ā, ó géē bī uwā wā gé lɛ ɔ̄cogwɛ́ɛya ā, okómpīinu kú Áklɔ̄kpīihɔ ā.

²⁴Ɔ̄cogwɛ́ɛya ā géē kpó omlede mɛ́mla anɔ̄ kú ólīifu, cɛ́ɛ́ ó lɛ uwá jíliyē iyɔ̄bū Óndú ā kóō wɛ ɛhi nōo cɛgbá lɛ Óndú ā, nōo wɛ ákú ɔ̄cogwɛ́ɛya ā.

²⁵Ó géē ŋmó omlede ā, cɛ́ɛ́ ó kwú ōhī kú oyī ā ú kwu akpáhɔ̄ abɔ̄lɔ́ná kú ɔ̄cɛ ā, ocúgbɔ̄du abɔ̄lɔ́ná kú nū, mɛ́mla ocúgbɔ̄du abɔ̄lɔ́ná kú ikpó abɔ̄lɔ́ná kú nū.

²⁶Ɔ̄cogwɛ́ɛya ā géē pīya ōhī kú anɔ̄ ā tū ɔtābɔ̄ kú abɔ̄lúfīyē ā.

²⁷Ó géē bī ayíkābɔ̄ kú abɔ̄lɔ́ná ā lɛ ōhī kú anɔ̄ ā mī klá abɔ́ɔ igbāhāapa ipéyī Óndú ā.

²⁸Ɔ̄cogwɛ́ɛya ā géē lɛ ōhī kú anɔ̄ a kwu akpáhɔ̄ abɔ̄lɔ́ná, ocúgbɔ̄ɔdu kú abɔ̄lɔ́ná kú ɔ̄cɛ ā mɛ́mla ocúgbɔ̄ɔdu ikpó kú abɔ̄lɔ́ná kú nū, ɛgɛ́nɛ̄ ó yá oyī kú ɛya nēé gwó kú ɛpɔ̄bí ō lé ā.

²⁹Ɔ̄cogwɛ́ɛya géē je anɔ̄ nōo hile ā pīya tū ɔtābɔ̄ kú nū ā, ó géē lɛ ɔ́ tū ɔ̄cɛ ā ɛyí. Cɛ́ɛ́ ó bī ɔwɛ nyā lɛ uculo kú iyē ō gwu ā yá kwɛyí.

³⁰Ó géē je ɔklɛ́ɛbɛ́tɛ amáŋ okóhō ā gwɛ́ɛya

³¹kú íne ō bīya. Ó géē je aɔ́há mɛ́mla īkpɔ̄dɛ̄hɔ̄ kú ɛ̄gbā kú ɛya ā kpó gwɛ́ɛya o yɔlá dúúdú. Cɛ́ɛ́ ó bī ɔwɛ nyā lɛ uculo kú iyē ō gwu ā yá kwɛyí.

³²Ɛ̄nyā wɛ aíne kú ɔ̄cɛ nōo lɛ agwú nōó gáā má ɔdā ō bī gwɛ́ɛya kú o yá yēŋēē kú nū glá ŋ́ mā ā.

³³Óndú ā da Umósīsi mɛ́mla Árɔ̄ni kahíníī,

³⁴“Eko nɛ̄ aá gā ipú ajɛ kú Ukénan, nɛ̄ n gáā je lɛ aá, kóō wɛ ákú aá ā, nɛ̄ n cɛ̄ lɛ úwɔ́ɔhɔ̄ mɛ́mla émúká ú gaá le yá tū ɔdɔ kú ipú inu ɔlɛ́ aá, ɔdā nɛ̄ aá géē yá ā yɔ̄ á.

³⁵Ɔ̄cɛ nōo lɛ ɔlɛ́ ā géē nyɔ̄ í ka lɛ ɔ̄cogwɛ́ɛya lɛyíkwu ɔda nōó má ipú inu ɔlɛ́ nū ā.

³⁶Ɔ̄cogwɛ́ɛya ā géē ka kéē lɛ ɛjɛ̄ɛ̄jī ɔdā dóódu kpó ga ɛcɛ ŋmá ipú inu ā gbɔbū ɛ́ɛ́ kóō bēhé ga ipú inu gaá má úwɔ́ɔhɔ̄ mɛ́mla émúká ā. Ɔ́dāŋ koó lɛ ā ŋ́, odóódú aɔ́dā nēe bá ipú inu ā í je pīya ɔdēelihɔ. Cɛ́ɛ́ ɔ̄cogwɛ́ɛya ā le bēhé ga ipú inu ā klɔ́dɔ́ɔ́.

³⁷Ó géē jila ɔ́wɔ́ɔhɔ̄ mɛ́mla émúká ā. Ɔ́dāŋ ka úwɔ́ɔhɔ̄ mɛ́mla émúká ā yɔ̄ ī lé ga ipú ɔdɔ ā nɛ,

³⁸ɔ̄cogwɛ́ɛya ā géē bɛ̄cɛ ŋmá inu ā, cɛ́ɛ́ ó lɛ ɔwɛ gwū tū inu ā ɛ̄cī ahāapa.

³⁹Ɔ̄cogwɛ́ɛya ā géē kwúcē wā ɛ̄cī ɔ́mahāpá ā kóō lɛ inu ā jila kpɔ́. Ɔ́dāŋ ka úwɔ́ɔhɔ̄ mɛ́mla émúká ā le nyīla,

⁴⁰Ɔ̄cogwɛ́ɛya āa géē ka kéē lɛ ɛcɔ̄ kú inu nɛ̄ odée ā yɔ̄ ā fu wɛ̄ɛcɛ, kéē klla kwú uwá ú tá ga ɛga o tēelihɔ eyīyɛ̄ɛcɛ kú igelī nɛ̄hi ā.

⁴¹Cɛ́ɛ́ é lɛ odúúdú ɔdɔ ā kla, kwú ɔdā nēé kla ŋmá anú ā í kpó ga ɛga nēé gē kpó imū bá eyīyɛ̄ɛcɛ kú igelī ā.

⁴²Cɛ́ɛ́ é kwú aɛ́cɔ̄ ɔhá ú gwu ɔkwu kú aɛ́nɛ̄ é fu ŋmá ɔdɔ ā, klla lɛ ɔdɔ ā plla igbɔhá kpɔ́.

⁴³Ɔdāŋ ka úwɔ́ɔhɔ̄ mɛ́mla émúká ā gā kpɔ́ igbīhi nēé lɛ ɛcɔ̄ ā fu, lɛ inu ā pla igbɔhá ā.

⁴⁴Ɔ̄cogwɛ́ɛya ā géē nyɔ̄ í jila anú. Ɔ́dāŋ ka úwɔ́ɔhɔ̄ mɛ́mla émúká ā le nyīla tū inu ā nɛɛ, ayíka inu ā kwú tēelihɔ ɛɛ́.

⁴⁵É géē ca inu ā tāajɛ, cɛ́ɛ́ é kwú ɛcɔ̄ kú nū, aɔ́cí kú nū, ɔdā nēé le plla ɔdɔ kú inu ā í kpó bónū ɛga nēé gē kpó imu tū eyīyɛ̄ɛcɛ kú ɔlɛ́ ā.

⁴⁶Ɔ̄cɛ dúúmā nōo le tá inu ā, eko nēé gwū ɔwɛ tū ɔ̄ ā, géē je tēelihɔ jāā gbó ɔ̄nɔ̄ɔ̄nɛ̄.

⁴⁷Ɔ̄cɛ dóódu nōo gwutá ipú inu ā ámāŋ ka o lé ɔdōlé ipú inu ā géē na īlī kú nū.

⁴⁸Amáŋ ɔ́dāŋ ka ɔ̄cogwɛ́ɛya ā gáā lɛ inu ā jila, nōó le má ka úwɔ́ɔhɔ̄ mɛ́mla émúká ā ɔ́ɔ jɛ̄ gɔbū gɛ ŋ́ eko nēé le ɔ́ plla ā, ó géē ka tɛ́ɛcɛ ka inu ā ɔ́ɔ le yá yēŋēē ɛɛ́, ohígbū keé kwú odúúdú émúká ā í kpó kla bónú ɛɛ́.

⁴⁹O gwu inu ā iyē kóō le yá yēŋēē ā, ó géē bī aígbáanɔ̄ nɛ̄ŋcɛ́ ɛpa, ɔ̄cí usɛ́da, owú ɔgalúlā mɛ́mla ābɔ̄ kú uháyísɔ̄pu.

⁵⁰Ó géē je éyi kú aígbáanɔ ɛpa ā ŋmó ipú aklɛ nɛ̄ éŋkpɔ̄ kú nū yɔ̄ péee ā.

⁵¹Ó géē je ɔcí kú usɛ́da ā, mɛ́mla ígbáanɔ nōo yēeyī ā, mɛ́mla owú ɔgalúlā mɛ́mla ābɔ̄ kú uháyísɔ̄pu ā wu ipú oyī kú ígbáanɔ nēé ŋmó ipú aklɛ nɛ̄ éŋkpɔ̄ yɔ̄ anú ā. Cɛ́ɛ́ ó lɛ ɔ́ mī klá inu ā igbahāapa.

⁵²Ó géē bī ɔwɛ ɛ́gɛ́ɛnyā le yá uculo kú iyē ō gwu kú inu ā mɛ́mla oyī kú igbáanɔ ā, éŋkpɔ̄ péee ā, igbáanɔ oyēeyī ā, ɔcí kú usɛ́da ā, ābɔ̄ kú uháyísɔ̄pu mɛ́mla owú ɔgalúlā ā.

⁵³Cɛ́ɛ́ ó lɛ ígbáanɔ nōo yēeyī ā hɛ́tá ga ipácí. Cɛ́ɛ́ ó bī ɔwɛ nyā lɛ uculo kú iyē ō gwu kú inu ā yá ɔkwɛ̄yi, cɛ́ɛ́ inu ā kwú yá yēŋēē.

⁵⁴Aɛ́nyā wɛ aíne kú ōcē ōbɔ̄bí kú ɔkpíyē dóódu á. K wiyē o wú ɔ̄cɛ

⁵⁵mɛ́mla ákú úwɔ́ɔhɔ̄ mɛ́mla émúká kú īlī dúúmā ámāŋ ka inu,

⁵⁶mɛ́mla ákú ɔdā dóódu nōo le hɛ́mi ámāŋ ka ínálégbé á.

⁵⁷Ó gē mafú eko nɛ̄ aɔ́dā nēe bá le tēelihɔ ámāŋ eko nēé kē tēelihɔ ŋ́. Ɛ̄nyā wɛ íne kú agwú mɛ́mla ɔ́wɔ́ɔhɔ̄ mɛ́mla émúká á.