Read idoma ULĪFAYI 15 Bible Online

ULĪFAYI 15 - idoma bible

ULĪFAYI 15

¹Óndú ā le aíne nēe bá ā kpó lɛ Umósīsi mɛ́mla Árɔ̄n

²lɛ ācɛ kú Ísrɛ̄lu ā ka, “Ɔ́dāŋ ka ɔ̄cɛ dóódu le ɛcɔ̄nyā kpó, enyi nōo gē pɛ́ ŋmá agada kú nū wɛ ɔdēelihɔ.

³Ɔ́dāŋ ka enyi nōo yɔ̄ gē pɛ́ ā mɛ ámāŋ koó yɔ̄ í pɛ́ ŋmá agada kú nū kpɔ́. Ó kwú ɔ̄cɛ ā tēelihɔ.

⁴Agōdō dóódu nɛ̄ ɔ̄cɛ ɔ́ɔmā cīcē ámāŋ koó gwutá anú ā kwú pīya ɔdēelihɔ.

⁵Ɔ̄cɛ dúúmā nōo lɛ abɔ̄ kwu agōdō kú nū

⁶ámāŋ cīce ɔdā dúúmā nɛ̄ ɔ̄cɛ ā cīce anú ā, géē na īlī kú nū cɛ́ɛ́ ó lɛ iyē gwā. Ó kē í tēelihɔ jāā gbó ɔ̄nɔ̄ɔ̄nɛ̄.

⁷Ɔ̄cɛ dúúmā nōo lɛ abɔ̄ kwu ɔ̄cɛ nɛ̄ enyi ī pɛ́ ŋmá agada kú nū ā, géē na īlī cɛ́ɛ́ ó lɛ iyē gwā, ó kē í tēelihɔ jāā gbó ɔ̄nɔ̄ɔ̄nɛ̄.

⁸Ɔ́dāŋ ka ɔ̄cɛ nɛ̄ enyi gē pɛ́ ŋmá agada kú nū ā lɛ ahɛ tá klá ɔ̄cɛ dúúmā nōo le yēŋēē, ɔ̄cɛ ɔ́ɔmā í na īlī kú nū, lɛ iyē gwā, cɛ́ɛ́ ó kē í tēelihɔ jāā gbó ɔ̄nɔ̄ɔ̄nɛ̄.

⁹Ɔdā dóódu nɛ̄ ɔ̄cɛ nɛ̄ enyi yɔ̄ ī pɛ́ ŋmá agada kú nū ā cīce anú, í je tēelihɔ.

¹⁰Ɔ̄cɛ dóódu nōo lɛ abɔ̄ kwu ɔdā dúúmā nōó cīce anú í je tēelihɔ jāā gbó ɔ̄nɔ̄ɔ̄nɛ̄. Ɔ̄cɛ dúúmā nōo kwú ɔdā dúúmā nɛ̄ ɔ̄cɛ ā cīce anú ā ú, géē na īlī kú nū klla í gwíiyē, ó kē tēelihɔ jāā gbó ɔ̄nɔ̄ɔ̄nɛ̄.

¹¹Ɔ́dāŋ́ ka ɔ̄cɛ nɛ̄ enyi gē pɛ́ ŋmá agada kú ā í na abɔ̄ ŋ́, nōó le abɔ̄ kwu ɔ̄cɛ ɔhá á, ɔ̄cɛ nōó le abɔ̄ kwu ɔ́ ā gē na īlī kú nū cɛ́ɛ́ ó lɛ iyē gwā, ó kē í tēelihɔ jāā gbó ɔ̄nɔ̄ɔ̄nɛ̄.

¹²Ɛtɛ́ kú ɔmɛ dóódu nɛ̄ ɔ̄cɛ ā lɛ abɔ̄ kwu ɔ́, é í je ɔ́ ca. Ógo kú ɔcí dóódu nōó lɛ abɔ̄ kwu ɔ́, é géē na ɔ́.

¹³Eko nɛ̄ ōcē kú ɔ̄cɛ nɛ̄ ɛnyi gē pɛ́ ŋmá agada ā mɛ, ó gē gbēyī ɛ̄cī ahāapa, cɛ́ɛ́ ó lɛ īlī kú nū kpó na, klla lɛ iyē gwā ipú éŋkpɔ̄ o yēŋēē nōo gē pɛ́, cɛ́ɛ́ ó kwú yá yēŋēē.

¹⁴Ɛ̄cī ɔ́mahātá ā, ó géē bī okóhō ɛpa mɛ́mla ɔklɛ́ɛbɛ́tɛ ɛpa gé lɛ ɔ̄cogwɛ́ɛya ā, okómpīinu kú Áklɔ̄kpīihɔ, ɛga nɛ̄ Óndú ā yɔ̄ ā.

¹⁵Ɔ̄cogwɛ́ɛya ā í je éyi kú uwā gwɛ́ɛya kú íne ō bīya, ɔhá ā wɛ ɛya o yɔlá ā. Ó kē í je ɔhá gwɛ́ɛya kú ɛya o yɔlá dúúdú lɛ Óndú ā. Cɛ́ɛ́ ó bī ɔwɛ nyā le uculo kú iyē ō gwu ā yá kwɛyí.

¹⁶Ɔ́dāŋ ka ɔ̄cɛ dúúmā lɛ iyē tá nōó jégēdēe ŋ́, ó géē gwīiyē, cɛ́ɛ́ ó kē í yɔ̄ tēelihɔ jāā gbó ɔ̄nɔ̄ɔ̄nɛ̄.

¹⁷Īlī dóódu ámāŋ ɔkpɛ́bɛ́ dóódu nɛ̄ iyē nēé tá ā gaá kwu ɔ́, é géē na ɔ́ éŋkpɔ̄, ó kē í wɛ ɔdēelihɔ jāā gbó ɔ̄nɔ̄ɔ̄nɛ̄.

¹⁸Ɔ́dāŋ ka ɔ̄cɛ le gwutá mɛ́mla ɔnyā, uwá ɛpɛlɛ́ɛpa géē gwīiyē, é kē í tēelihɔ jāā gbó ɔ̄nɔ̄ɔ̄nɛ̄.

¹⁹Eko nɛ̄ ɔ̄cɛnyā le nyílá, ó géē tēelihɔ kú nū ā ɛ̄cī ahāapa. Ɔ̄cɛ dóódu nōo lɛ abɔ̄ kwu ɔ́, géē je tēelihɔ jāā gbó ɔ̄nɔ̄ɔ̄nɛ̄.

²⁰Ɔdā dóódu nōó gwutá anú ā, mɛ́mla ɔdā dóódu nōó cīce anú, eko nōó yɔ̄ ī nyílá ā, géē je pīya ɔdēelihɔ.

²¹Ɔ̄cɛ dóódu nōo lɛ abɔ̄ kwu agōdō kú nū géē na īlī kú nū klla í gwíiyē, ó kē í je tēelihɔ jāā gbó ɔ̄nɔ̄ɔ̄nɛ̄.

²²Ɔ̄cɛ dóódu nōo kē lɛ abɔ̄ kwu ɔdā nōó cīce anú ā, géē na īlī kú nū, klla í gwīiyē, cɛ́ɛ́ ó kē í tēelihɔ jāā gbó ɔ̄nɔ̄ɔ̄nɛ̄.

²³Ɔ́dāŋ́ ó kōō wɛ agōdō, ámāŋ ɔdā dóódu nɛ̄ ɔ̄cɛnyā ā cīce anú, eko nɛ̄ ɔ̄cɛ lɛ abɔ̄ kwu ɔ́, ɔ̄cɛ ɔ́ɔmā gē je tēelihɔ jāā gbó ɔ̄nɔ̄ɔ̄nɛ̄.

²⁴Ɔ́dāŋ ka ɔ̄cɛnyīlɔ dúúmā lɛ gwutá mɛ́mla anú eko nōó yɔ̄ ī nyílá ā, ɔ̄cɛ ɔ́ɔmā kwú iyī nū tēelihɔ ŋmá oōnyílá kú ɔnyā ā, cɛ́ɛ́ ɔ̄cɛnyīlɔ ā géē tēelihɔ ɛ̄cī ahāapa. Agōdō dúúmā nēé gwutá anú ā le pīya ɔdēelihɔ.

²⁵Ɔ́dāŋ ka onyílá kú ɔ̄cɛnyā dúúmā le pɛ́ ɛ̄cī alɛwa gla eko kú ōnyílá kú ɔyɔ̄ɔ̄yā kú nū ā, ámāŋ ɔ́dāŋ ka oyī ā yɔ̄ gē pɛ́ gɔbū kpɔ́ fíyɛ́ eko ōnyílá ɔlamu kú nū, ó géē tēelihɔ kpɔ́, ɔdā nōo yá nɛ̄ oyī ā yɔ̄ ī pɛ́ gɔbū ā, ɛ́gɛ́nɛ̄ ó gē lɛ eko kú ōnyílá kú ɔyɔ̄ɔ̄yā kú nū á.

²⁶Agōdō dóódu nōó gwutá, ámāŋ ɔdā dóódu nōó cīce anú eko ɔ́ɔmā kwú pīya ɔdēelihɔ.

²⁷Ɔ̄cɛ dóódu nōo kē lɛ abɔ̄ kwu ɔdā ɔ́ɔmā ā, géē na īlī kú nū klla í gwīiyē, cɛ́ɛ́ ó kē í tēelihɔ jāā gbó ɔ̄nɔ̄ɔ̄nɛ̄.

²⁸Eko nɛ̄ oōnyílá kú nū ā mɛ, ó géē gbēyī ɛ̄cī ahāapa, cɛ́ɛ́ ó kwú yá yēŋēē.

²⁹Ɛ̄cī ɔ́mahātá ā, ó géē bī okóhō ɛpa mɛ́mla ɔklɛ́ɛbɛ́tɛ ɛpa gé lɛ ɔ̄cogwɛ́ɛya ā okómpīinu kú Áklɔ̄kpīihɔ ɛga nɛ̄ Óndú ā yɔ̄ ā.

³⁰Ɔ̄cogwɛ́ɛya ā géē je éyi kú aígbáanɔ ā gwɛ́ɛya kú íne ō bīya. Cɛ́ɛ́ ó kwú ɔhá ā ú gwɛ́ɛya o yɔlá dúúdú lɛ Óndú ā. Cɛ́ɛ́ ó bī ɔwɛ nyā le uculo kú iyē ō gwu yá kwɛyí.

³¹Óndú ā da Umósīsi kóō pi ācɛ Ísrɛ̄lu ahɔ̄ lɛyíkwu ɔdēelihɔ, cɛ́ɛ́ kéē je Áklɔ̄kpīihɔ, ɛga nōó yɔ̄ nōo kwu ɔtāhɛ̄ kú ɛga nēé lā ā nyílá ŋ́. Ɔ́dāŋ keé le yá lɛ ā, é géē je uwá kpó ŋmó.

³²Ɛ̄nyā wɛ íne kú ɔ̄cɛ nɛ̄ enyi gē pɛ́ ŋmá agada kú nū,

³³ɔ̄cɛnyā dúúmā nōo yɔ̄ ī nyílá kú ɔyɔ̄ɔ̄yā, mɛ́mla ɔ̄cɛnyīlɔ dúúmā nōo lɛ iyē kwu ɔnyā nōo yɔ̄ ī nyílá, le tēelihɔ á.