Read idoma ULĪFAYI 17 Bible Online

ULĪFAYI 17 - idoma bible

ULĪFAYI 17

¹Óndú ā da Umósīsi kóō lɛ

²aíne nēe bá nyā kpó lɛ Árɔ̄ni mɛ́mla ayínɔ̄nyīlɔ kú nū mɛ́mla odúúdú ācɛ kú Ísrɛ̄lu ā. Ó kahíníī,

³Ɔ́dāŋ ka ɔ̄cɛ kú Ísrɛ̄lu dóódu lɛ ɛna, ámāŋ omlede, ámāŋ opī ŋmó ipú ɛ́ga nēé lā ā ámāŋ eyīyɛ̄ɛcɛ kú abɔ́ɔ

⁴nōó bī ɔ̄ wā okómpīinu kú Áklɔ̄kpīihɔ, ɛga nɛ̄ Óndú ā yɔ̄ ā ŋ́, ó le íne bīya. Ó le oyī pīya bónū ɛɛ́, é kē gáā je ɔ́ kóō wɛ éyi kú ācɛ ɔlɛ́ Ɔwɔicō gɛ ŋ́.

⁵Ɛyí kú íne nyā wɛ ka, ācɛ kú Ísrɛ̄lu ā géē bī ɛbɛ́ nēé tɛtɛ gē ŋmó ɛcɛ pélúú ā gé lɛ Óndú ā abālɔbányā. É géē bī uwā wā gē lɛ ɔ̄cogwɛ́ɛya ā, okómpīinu kú Áklɔ̄kpīihɔ ā, kéē ŋmó ɔ̄ kú ɛya kú ɛbɔ́ nēé gwó lɛ Óndú ā.

⁶Ɔ̄cogwɛ́ɛya ā géē mī oyī kú nū klá ɛyí ede ā ipéyī Óndú ā, okómpīinu kú Áklɔ̄kpīihɔ ā, klla í je ijē kú nū yɔlá, ká ocu kú nū kóō he Óndú ā ɔtū.

⁷Ācɛ kú Ísrɛ̄lu í gaá pā ɛcí o ŋmá lɛ o ŋmó ɛbɛ́ kú uwā ɛcɛ lɛ ebilíi nōo gbla ɛwū ā ɛ́ɛ́ gɛ ŋ́. Ācɛ kú Ísrɛ̄lu géē lɛ íne nyā tū piyóó ipú ɛcɛ nyā”.

⁸Ó klla da Umósisi kóō da uwá kahíníī, ‘Ɔ̄cɛ kú Ísrɛ̄lu dóódu, ámāŋ éwɔhá nōo bá ipú uwā, nōo gáā gwɛ́ɛya o yɔlá dúúdú ámāŋ ɛdɔ kú ɛya dóódu

⁹lɛ Óndú ā ɛga ɔhá gwū okómpīinu kú Áklɔ̄kpīihɔ ā tá, é gáā je ɔ́ koó wɛ éyi kú ācɛ ɔlɛ́ Ɔwɔicō ŋ́.

¹⁰Ɔ́dāŋ ka ɔ̄cɛ kú Ísrɛ̄lu dóódu ámāŋ éwɔhá nōo yɔ̄ ɔlɛ́ uwā lɛ ɛbɛ́ dúúmā nōo fu oyī bónū ŋmá iyē nū ŋ́ lé, n géē cīgbihi kwu ɔ́, ó kē gáā wɛ éyi kú ācɛ ɔlɛ́ um gɛ ŋ́.

¹¹Oyēeyī kú ɔdā dóódu yɔ̄ ipú oyī kú nū. Ɔ́ɔmā yá ɛ́ɛ́ nɛ̄ Óndú ā ka kéē lɛ odúúdú oyī ā pīya klá ɛyí ede á, o yá ɛ́ɛ́ kéē kwú íne nɛ̄ ācɛ ā bīya í yá uwā ɛhi ā. ā gē yá kéē kpó íne ō bīya yɛ́ɛhi á.

¹²Ɔdā nōo yá ɛ́ɛ́ nɛ̄ Óndú ā da ācɛ kú Ísrɛ̄lu mɛ́mla ācɛ aéwɔhá kéē híī lé ɛbɛ́ dóódu nēé fu oyī bónū ŋmá anú ŋ́ má yɔ̄ abɔ́ɔ á.

¹³Ɔ̄cɛ kú Ísrɛ̄lu dóódu ámāŋ éwɔhá kú ɔlɛ́ uwā, nōo géē tɔ́ɔ́tɛ́ ɛbɛ́ ipácí ámāŋ ɔtɛ́ kú ígbáanɔ, nōó le ɛbɛ́ ámāŋ ka ígbáanɔ̄ ŋmó, ó í fu oyī kú nū bá ajɛ, cɛ́ɛ́ ó lɛ ajɛ gwu klá anú.

¹⁴Oyēeyī kú ɔdā oyēeyī dóódu yɔ̄ ipú oyī kú nū, ohígbū ɔ́ɔmā yá ɛ́ɛ́ nɛ̄ Óndú ā da ācɛ kú Ísrɛ̄lu kéē híī lé ɛbɛ́ dúúmā nēé fu oyī kú nū bónū ŋmá anú ŋ́ má. Ka ɔ̄cɛ dúúmā nōo le lé, é gáā je ɔ́ koó wɛ éyi kú ācɛ ɔlɛ́ nū gɛ ŋ́.

¹⁵Ɔ̄cɛ dóódu nōo lɛ ɛbɛ́ nōo gekwú lé, ó kōō wɛ ɔ̄cɛ Ísrɛ̄lu, ámāŋ éwɔhá, ó géē na īlī kú nū, klla í gwīiyē, ó kē í tēelihɔ jāā gbó ɔ̄nɔ̄ɔ̄nɛ̄, ɛ́ɛ́ kóō í je yá yēŋēē.

¹⁶Amáŋ ɔ́dāŋ koó na īlī kú nū ŋ́, nōó ke gwīiyē ŋ́, ó géē bī unwalu kú nū ce iyī nū ɛyi!”