Read idoma ULĪFAYI 18 Bible Online

ULĪFAYI 18 - idoma bible

ULĪFAYI 18

¹Óndú ā da Umósīsi kóō

²le ka lɛ ācɛ kú Ísrɛ̄lu kahíníī, “Ami wɛ Óndú ā, nōo wɛ Ɔwɔicō kú aá á.

³Aá híī gbla ucē kú ācɛ kú Íjīpiti, ɛga nɛ̄ aá tɛtɛ lá gbɔbū ā ŋ́, ámāŋ ákú ācɛ Ukénan, ɛga nɛ̄ n yɔ̄ ī kpó aá nyɔ̄ abālɔbányā ŋ́.

⁴Aá lɛyítáajɛ lɛ aíne kú um, cɛ́ɛ́ ká aá yá ɔdā nɛ̄ n tū aá ukɔ́ nū ā. Ami wɛ Óndú ā, nōo wɛ Ɔwɔicō kú aá á.

⁵Aá yɛce aíne mɛ́mla uce nɛ̄ n tū aá ukɔ́ kú aá yá ā. Ɔ́dāŋ ka aá gē yá lɛ ā, aá géē nya oyēeyī kú aá tá. Ami ā wɛ Óndú ā á.”

⁶Óndú ā le aíne nēe bá nyā kpó lɛ ācɛ Ísrɛ̄lu. Aá kóō híī cikpó ɔmáapú aá dóódu ŋ́.

⁷Ā híī je uwēyī lɛ ádā uwɔ o ŋmá lɛ ō cikpó ɛ́nɛ́ uwɔ ŋ́.

⁸Ā híī je uwēyī lɛ ádā uwɔ o ŋmá lɛ o cikpó ɔnyā nū ɔhá dóódu ŋ́.

⁹Ā híī cikpó ɔyínɛ́ uwɔ nɔ̄nyā ámāŋ ɔyí ádā uwɔ nɔ̄nyā ŋ́. É kōō bī ɔ̄ jɛ̄ ɛga éékpó mɛ́mla awɔ ámāŋ keé bī ɔ̄ jɛ̄ ɛga éékpó mɛ́mla uwɔ ŋ́.

¹⁰Ā híī cikpó ɔyínɔ̄nyā kú ɔyí uwɔ ŋ́. Ɔda ɛ́gɔ́ɔ́mā géē wɛ ɔdūwēyī gā uwɔ̄.

¹¹Ā híī cikpó ɔyí ádā uwɔ nɔ̄nyā ŋ́. Ó kē wɛ ɔyínɛ́ abɔ́yī uwɔ dúú.

¹²Ā híī cikpó ɔyínɛ́ ádā uwɔ nɔ̄nyā ŋ́, ohígbū koó wɛ ɔmáapú ádā uwɔ ajaajɛ.

¹³Ā híī cikpó ɔyínɛ́ kú ɛ́nɛ́ uwɔ nɔ̄nyā ŋ́. Ɔmáapú ɛ́nɛ́ uwɔ ajaajɛ yɔ̄ abɔ́ɔ á.

¹⁴Ā híī cikpó ɔ̄nyā ɔmáapú ádā uwɔ nɔ̄nyīlɔ ŋ́, ohígbū ka ɔnyā abɔ̄yī nū ā wɛ ɔmáapú ádā nɔ̄nyā dúú.

¹⁵Ā híī cikpó ɔ̄nyā ɔyí uwɔ ŋ́.

¹⁶Ā híī cikpó ɔnyā ɔyínɛ́ uwɔ ŋ́, ɔnyā ɔyínɛ́ uwɔ yɔ̄ abɔ́ɔ á.

¹⁷Ā híī cikpó ɔyínɔ̄nyā ámāŋ ka ɔyɔ́ɔ́yí nɔ̄nyā kú ɔnyā dúú nɛ̄ a gē cikpó nū ŋ́. É lɔfú wɛ ɔmáapú uwɔ glá, cɛ́ɛ́ ɔ́ɔmā kwú pīya ɔmáapú uwɔ nɛ̄ a cikpó nū abɔ́ɔ á.

¹⁸Ā híī je ɔyínɛ́ kú ɔnyā uwɔ nɔ̄nyā pīya ɔnyā uwɔ, eko nɛ̄ ɔnyā uwɔ yēeyī ŋ́.

¹⁹Ā híī cikpó ɔnyā dúúmā eko nōó yɔ̄ ī nyílá kú ɔyɔ̄ɔ̄yā kú nū ŋ́. Ohígbū ka iyē kú nū le tēelihɔ.

²⁰Ā híī cikpó ɔnyā kú ɔ̄cɛ ɔhá ŋ́, ɔ́ɔmā géē je uwɔ tēelihɔ

²¹Aá híī je ɔyí aá dóódu gwɛ́ɛya o yɔlá dúúdú lɛ icɛ̄bɔ̄ nēé hī ka Umɔ́lɛ̄ki ā ŋ́. Ɔ́ɔmā gē je uwēyī lɛ Ɔwɔicō, nōo wɛ Óndú ā.

²²Ɔ̄cɛnyīlɔ dúúmā kóō híī cikpó ɔ̄cɛnyīlɔ ɔ́mpānū ŋ́. Ucē ɛ́gɔ́ɔmā í he Ɔwɔicō ɔtū ŋ́.

²³Ɔ̄cɛnyīlɔ dúúmā kóō híī cikpó ɛbɛ́ ŋ́, ɛ́ɛ́ nɛ̄ ɔ̄cɛnyā dúúmā gē cɛ̄ kú ɛbɛ́ dúúmā kóō cikpó nū ŋ́. Ɔdā ɛ́gɛ́nyā gē jē ɔ̄cɛ tēelihɔ.

²⁴Aá híī jɛ īyī aá tēelihɔ ŋmá o yá odóódu kú aɔ́dā nēe bá nyā ŋ́. Ohígbū ka ɛ́gɔ́ɔmā nɛ̄ ācopɛ̄cí nēe tɛtɛ lā ajɛ nyā gbɔbū lɛ aá ā, nɛ̄ ami nōo wɛ Óndú ā yɔ̄ gē nū hī lɛ aá, yá lɛ nēé je iyī uwā tēelihɔ á.

²⁵Ucē nēé yá ā kwú ajɛ ā ú tēelihɔ, ohígbū ɔ́ɔmā, n yɔ̄ ī yá ajɛ ā italā klla yɔ̄ ī yá kú ajɛ ā kóō tá ācɛ nēe lā abɔ́ɔ ā bónū ŋmá abɔ́ɔ.

²⁶É le odúúdú ɔdēelihɔ nēe bá ā mɛ́mla aɔ́dōōbɔ́bí nɛ̄hi yá, anɔ́ɔ é kwú ajɛ ā ú tēelihɔ á. Amáŋ aá híī yá aɔ́dā nēe yá ā ŋ́. Odúúdú aá, ó kōō wɛ ācɛ Ísrɛ̄lu ámāŋ aéwɔhá nēe lā ipú aá, géē lɛ aíne kú ami nōo wɛ Óndú ā tū piíí,

²⁸Cɛ́ɛ́ kú Óndú ā kóō híī nū aá ŋmá ipú ajɛ ā ŋ́, ɛ́gɛ́nɛ̄ ó nū ācopɛ̄cí nēe tɛtɛ lā ipú nū ā.

²⁹Ɔ̄cɛ dóódu nōo lɛ odóódu kú ɔdēelihɔ nēe bá nyā yá, í gáā wɛ éyi kú ācɛ ɔlɛ́ ami nōo wɛ Óndú ā ɛ́ɛ́ gɛ ŋ́.

³⁰Anɔ́ɔ ā kahíníī, “Aá lɛ aíne nɛ̄ n je ā tū cɛ́ɛ́ kú aá híī yá ɛdɔ kú ucē nɛ̄ ācɛ nēe lā ajɛ ā gbɔbū lɛ aá yá ā ŋ́. Aá híī je iyī aá tēelihɔ oŋmá lɛ o yá ɛdɔ kú ucē elihɔ nēe bá ā ŋ́. Ami wɛ Óndú ā, nōo wɛ Ɔwɔicō kú aá á.”