Read idoma ULĪFAYI 20 Bible Online

ULĪFAYI 20 - idoma bible

ULĪFAYI 20

¹Óndú ā da Umósīsi kóō

²Le ka lɛ ācɛ kú Ísrɛ̄lu ā kahíníī, “Ɔ̄cɛ kú Ísrɛ̄lu dóódu, ámāŋ éwɔhá nēe bá ɔlɛ́ aá, kwú ɔyí nū dóódu ú lɛ ɛcí nēé hī ka Umɔ́lɛ̄ki ā kéē bī ɔ̄ le yá ɛdɔ kú úklɔ́ dúúmā eko nēé gē gbō ɔ̄ ɛ̄gbā, ójīla kú ācɛ Ísrɛ̄lu géē tɛ́ɛ́cɔ̄ klá anú cɛ́ɛ́ kóō gekwú.

³Ami abɔ̄yī um géē héyī kwu ɔ̄cɛ ɔ́ɔmā. Ó klla gáā wɛ éyi kú ācɛ ɔlɛ́ um ɛ́ɛ́ gɛ ŋ́. Ohígbū koó kwú ɔyí nū ú gwɛ́ɛya lɛ Umɔ́lɛ̄ki, cɛ̄ lɛ Áklɔ̄kpīihɔ kú um ā kwú tēelihɔ. Ó klla le uwēyī je lɛ iyē ōtīihɔ kú um.

⁴Amáŋ ɔ́dāŋ ka ācɛ kú ajɛ ā lɛ eyī gwū ɔdā nōó yá ā tá, nēé ŋmó ɔ̄ ŋ́,

⁵ami abɔ̄yī um géē héyīkwu ɔ̄cɛ ɔ́ɔmā mɛ́mla ācɛ ɔlɛ́ nū, mɛ́mla odúúdú ācɛ nēé pīya tɔ̄há mɛ́mla anú, kéē cɛ̄ɛ̄lā kú um gɛ ŋ́, nyɔ̄ gaá gbɔɔ́ ō gbā umɔ́lɛ̄ki ɛ̄gbā ā. É í gáā wɛ éyi kú ācɛ ɔlɛ́ um ɛ́ɛ́ gɛ ŋ́.

⁶“Ɔ́dāŋ ka ɔ̄cɛ dúúmā i tá ɛga ācogwɛ́bā nyɔ̄ í le ɛbā gwó, ámāŋ koó le tá ɛgiyí aɔ́hɛ kéē nwū ɔ̄ ɛlā, n géē bɛ́yíkwu ɔ́. Ó kē gáā wɛ éyi kú ācɛ ɔlɛ́ um ɛ́ɛ́ gɛ ŋ́.

⁷Aá lɛ iyī aá tīihɔ, ohígbū ka ami, Óndú ā nōo wɛ Ɔwɔicō kú aá á tīihɔ.

⁸Aá lɛ íne kú um tū, ohígbū ka ami nōo wɛ Óndú ā, abɔ̄yī um yá aá tīihɔ.”

⁹Óndú ā klla lɛ aíne nēe bá nyā kpó lɛ uwá kpɔ́. “Ɔ̄cɛ dúúmā nōo lɛ ɛcá cá ádā nū ámāŋ ka ɛ́nɛ́ nū, é géē ŋmó ɔ̄. Ɔ̄cɛ ɔ́ɔmā ā bī ikwū gē lɛ iyī nu á.

¹⁰“Ɔ́dāŋ ka ɔ̄cɛnyīlɔ éyi le ikpó kú ɔnyā kú ɔ̄cɛ Ísrɛ̄lu ɔhá dóódu ce, é géē kpó ɔ̄cɛ ɔ́ɔmā mɛ́mla ɔnyā ā ŋmó

¹¹Ɔ̄cɛ nōo le ikpó ɔnyā ádā nū ce, le uwēyī je lɛ ádā nū ɛɛ́. É géē kpó anú mɛ́mla ɔnyā ádā nū ā ŋmó. Ɛfiyɛ kú ikwū kú uwā ce īyī uwā ɛyí

¹²Ɔ́dāŋ ka ɔ̄cɛ dúúmā le ikpó ɔnyā ɔyí nū ce, é géē kpó uwá ɛpɛlɛ́ɛpa ŋmó. Ɛfiyɛ kú ikwū kú uwā géē ce iyī uwā ɛyí

¹³Ɔ́dāŋ ka ɔ̄cɛnyīlɔ dúúmā le ikpó kú ɔ̄cɛnyīlɔ ɔ́mpānū ce, ɔdēelihɔ nēé yá á. É géē kpó uwá ɛpɛlɛ́ɛpa ŋmó. Ɛfiyɛ kú ikwū kú uwā ce iyī uwā ɛyí

¹⁴Ɔ́dāŋ ka ɔ̄cɛ le ɛ́nɛ́ mɛ́mla ɔyí nū nɔ̄nyā lɛ ɔnyā nū, é géē kpó uwā ɛtɛ́trɛ́ɛtá yɔlá dúúdú. Ohígbū ka ɔdā uwēyī nɛ̄hi nēé yá á. Aá híī yá ɔdā ɛ́gɔ́ɔmā ipú aá ŋ́.

¹⁵Ɔ́dāŋ ka ɔ̄cɛ le ikpó ɛbɛ́ ce ɛ́gɛ́nɛ̄ é gē cikpó ɔnyā ā, é géē kpó anú mɛ́mla ɛbɛ́ ā ŋmó

¹⁶Ɔ́dāŋ ka ɔ̄cɛnyā dúú kwú iyī nū ú táajɛ lɛ ɛbɛ́ kóō lɛ ikpó nū ce ɛ́gɛ́nɛ̄ ɔ̄cɛ ī cikpó ɔnyā ā. É géē kpó ɔnyā ā mɛ́mla ɛbɛ́ ā ŋmó. Ɛfiyɛ kú ikwū kú uwā ce iyī uwā ɛyí.”

¹⁷Ɔ́dāŋ ka ɔ̄cɛ le ɔyínɛ́ nū nɔ̄nyā, ámāŋ ɔyí ádā nū nɔ̄nyā lɛ ɔnyā, aá géē je uwēyī lɛ uwá ipéyī odúúdú ācɛ, cɛ́ɛ́ é lɛ uwá kpó nū ŋmá ipú ójīla kú ācɛ Ísrɛ̄lu. Ó í móōwē kú ɔdā nōó yá ā, ohígbū koó le ikpó ɔyínɛ́ nū nɔ̄nyā ce.

¹⁸Ɔ́dāŋ ka ɔ̄cɛ le ikpó ɔnyā nōo yɔ̄ ī nyílá kú ɔyɔ̄ɔ̄yā kú nū ce, aá géē nū uwā ɛpɛlɛ́ɛpa ŋmá ipú aá. Ohígbū ka uwá le íne kú iyē ō tū yēŋēē bīya.

¹⁹Ɔ́dāŋ ka ɔ̄cɛ le gwutá mla ɔmáapú ádā nū ámāŋ ɔmáapú ɛ́nɛ́ nū nɔ̄nyā, uwá ɛpɛplɛ́ɛpa géē móōwē kú ɔdōbɔ̄bí nɛ̄hi nēé yá ā.

²⁰Ɔ́dāŋ ka ɔ̄cɛ dúúmā le ikpó ɔnyā ɔmáapú ádā nū ce, ó le uwéyī je lɛ ɔmáapú ádā nū ɛɛ́. Uwá ɛpɛlɛ́ɛpa géē móōwē kú nū. É gáā ma ɔyí ŋ́ gbóógbóō ipú ɛcɛ nyā.

²¹Ɔ́dāŋ ka ɔ̄cɛ mīyɛ ɔnyā ɔyínɛ nū le ɔ́ lɛ ɔnyā nū, ó le ɔdēeliho yá ɛɛ́, klla le uwēyī je lɛ ɔyínɛ́ nū ā. É gáā ma ɔyí ŋ́ jāā gbéeko nēé í kwú.”

²²Óndú ā kahíníī, “Aá géē lɛ odúúdú aíne kú um nyā tū, cɛ́ɛ́ kú ajɛ kú Ukénan nɛ̄ n yɔ̄ ī kpó aá nyɔ̄ anú ā kóō híī bɔ̄bí lɛ aá ŋ́.

²³Aá híī yá ucē kú ācɛ nɛ̄ n gē nū bɛ̄cɛ hīla aá nyā ŋ́. Ucē obɔ̄bí nɛ̄hi nēé yá ā cɛ̄ le ɔtū kú uwā wá um nɛ̄hi.

²⁴Amáŋ, n le okónu ce ka n géē je ajɛ olɔhi o yá ɔdɛ̄hɔ̄ nɛ̄hi nyā lɛ aá kóō wɛ ákú aá ā, n géē je ɔ́ lɛ aá. Ami wɛ Óndú ā, nōo wɛ Ɔwɔicō kú aá á. N le aá fō tá ɛyɛ́ɛyɛ́yí hɛ̄ ācɛ nēe bá ā tá.

²⁵Aá géē jé ɛyɛ́ɛyɛ́yí kú ɛbɛ́ mɛ́mla aígbáanɔ nēe wɛ ɛ́béelihɔ mɛ́mla aɛ́nɛ̄ o le yēŋēē. Aá kóō híī lé aɛ́bɛ́ ámāŋ ka aígbáanɔ nēe wɛ ɛ́béelihɔ lɛ aá ŋ́. N le ka tɛ́ɛcɛ ka é wɛ ɛ́béelihɔ lɛ aá. Ɔ̄cɛ dúúmā nōo le odóódu kú uwā lé géē je tēelihɔ.

²⁶Aá géē wɛ ācɛ otīihɔ, kú aá wɛ ācɛ ɔlɛ́ um ofōōfū um, ohígbū ka ami Óndú ā tīihɔ, n klla lɛ aá fō ɛyɛ́ɛ́yí hī ācɛ ohile tá, cɛ́ɛ́ ká āā wɛ kú um ofōōfūnū.”

²⁷Ɔ̄cɛnyīlɔ, amáŋ ɔ̄cɛnyā dóódu nōo gē gwɛ́ɛbā klla gē yá ɔhɛ, é géē tá ɛcɔ̄ klá anú kéē lɛ ɔ́ ŋmó. Ɛfiyɛ kú ikwū kú nū géē ce ɔ́ ɛyí.”