Read idoma ULĪFAYI 21 Bible Online

ULĪFAYI 21 - idoma bible

ULĪFAYI 21

¹Óndú ā da Umósīsi kóō ka lɛ ayínɔ̄nyīlɔ kú Árɔ̄ni nēe wɛ ɔ̄cogwɛ́ɛya ā kahíníī, “Ɔ̄cogwɛ́ɛya dúúmā í gá ā je iyī nū tēelihɔ oŋmá lɛ o nyɔ̄ í yá uculo kú ɛyíkwū eko nɛ̄ ɔmáapú nū gekwú ŋ́.

²Ayíka ádā uwā, ɛ́nɛ́ uwa, ɔyí uwa nɔ̄nyīlɔ, ɔyí uwa nɔ̄nyā,

³ámāŋ ɔyí uwa nɔ̄nyā, nōó lɛ ɔbá ŋ́, nōo yɔ̄ ɔlɛ́ uwa nɛ.

⁴É gáā je iyī uwa tēelihɔ eko nɛ̄ ohilí uwā gekwú ŋ́.

⁵Ɔ̄cogwɛ́ɛya dóódu í gáā wā ɛyí kú nū ámāŋ ɔnwū agba, ámāŋ pi ína dóódu tū ɔkpíyē kú nū, kóō mafú koó yēkwu ŋ́.

⁶É géē wɛ ācɛ otīīhɔ lɛ Ɔwɔicō kú uwā. É gáā je uwēyī lɛ iyē kú Ɔwɔicō kú uwá ŋ́. Ohígbū kú é gē je ɔdōlé kú ɛ̄gbā gwɛ́ɛya gā um á. Ó le lɛ ā, é géē tīihɔ.

⁷Ɔ̄cogwɛ́ɛya dóódu í gáā lɛ ɔnyā nōo tɛtɛ wɛ akwuna ámāŋ ɔnyā nōo tɛtɛ le ɔ̄cɛnyīlɔ jé ɛɛ́, ámāŋ ɔnyā nōo tɛtɛ lɛ ɔbá gbɔbū nēé tá ŋ́. Ohígbū ka ɔ̄cogwɛ́ɛya ā tīihɔ.

⁸Ācɛ ā géē je ɔ̄cogwɛ́ɛya ā ka ācɛ o tīihɔ. Ohígbū keé gē gwɛ́ɛya gā um. Ami nōo wɛ Óndú ā, nōo je aá tīihɔ ā, n kē tīihɔ.

⁹Ɔ́dāŋ ka ɔyínɔ̄nyā kú ɔ̄cogwɛ́ɛya dúúmā kwú pīya akwuna. Ó le uwēyī je lɛ ádā nū ɛɛ́. É géē je ɔyínɔ̄nyā ɔ́ɔmā yɔlá dúúdú.”

¹⁰“É le anɔ̄ pīya tū otrɛ̄yí kú ācogwɛ́ɛya ā ɛyí, klla kwú abɔ̄ ú ce ɔ́ ɛyí kóō lɛ ɔdōwiyē kú ācogwɛ́ɛya ā wiiyē ɛɛ́. Ohígbū ɔ́ɔmā, ó gáā híla úwé kú nū ámāŋ mabɔ̄ ɛyí kú nū tá kwiicō kóō híī fíyɛ́ ɔ̄ ŋ́ nɛɛ ŋ́, nōo í mafú koó gē yēekwu ŋ́.

¹¹Ó gáā ga inu ɛgiyí okwū dúúmā ŋ́. Ó kōō wɛ okwū kú ádā nū ámāŋ ákú ɛ́nɛ́ nū.

¹²Ɛ́ɛ́ nōó géē bɛ̄cɛ, ŋmá ipú Áklɔ̄kpīihɔ ā kóō je Áklɔ̄kpīihɔ kú Ɔwɔicō kú nū tēelihɔ ŋ́. Ohígbū ka anɔ̄ ihɔ kú Ɔwɔicō kú nū yɔ̄ ɔɔ́ ɛyí.

¹³Ó géē lɛ ɔnyā nōó jé ɔ̄cɛnyīlɔ jéjéé ɛ́ɛ́ ŋ́ mā.

¹⁴Ó gáā lɛ ɔnyā okwū, amáŋ ɔnyā nɛ̄ ɔbá nū tá ɔ̄, nōo le tēelihɔ ŋ́, ámāŋ ka akwuna ŋ́. Amáŋ ó géē lɛ ɔyípɔ̄ncɛ́nyā nōó je ɔ̄cɛnyīlɔ jéjéé ɛ́ɛ́ ŋ́ mā, ŋmá ipɔ́ɔma kú ācɛ ɔlɛ́ nū.

¹⁵Ó lɛ ā ŋ́, ayípɛ̄ ɔlɛ́ nēe cíkā ō tīihɔ ā, géē je pīya ācɛ o tēelihɔ. Ami wɛ Óndú ā á, n le ɔ́ fō tá céé kóō wɛ otrɛ̄yí kú Ācogwɛ́ɛya.”

¹⁶Óndú ā da Umósīsi kóō

¹⁷le ka lɛ Árɔ̄ni kahíníī, “Áyááyí kú uwɔ dúúmā nōo le nyɔ́nyí í gáā gwɛ́ɛya kú ɛ̄gbā kú ɔdōlé ɛ́dɔ dúúmā gā um ŋ́. Íne nyā í yɔ̄ jāā gbéeko ɛcɔ̄bū nōo ī wā ā.

¹⁸Ɔ̄cɛ dúúmā nōo lɛ ɔ́nyí iyē í gáā túblá ɛyí ede ajaajɛ ámāŋ gwɛ́ɛya gā um ŋ́. Ɔ̄cɛ dúúmā nōo le eyī pu, le ikpó ce, ámāŋ le ɛdɔ kú ɔ́nyí dóódu iyē,

¹⁹ɔ̄cɛ nɛ̄ ikpó ámāŋ abɔ̄ kú nū le ŋmó tíiyē,

²⁰ɔ̄cɛ dúúmā nōo wɛ oligwū, ámāŋ ima, ámāŋ ɔ̄cɛ nōo lɛ eyī éyi, ámāŋ ōcē kú ɔkpíyē, ámāŋ okwápī í gáā gwɛ́ɛya kú ɛ̄gbā kú ɔdōlé gā um ŋ́.

²¹Ɔ̄cɛ ipɔ́ɔma kú Árɔ̄ni dóódu nōo le nyɔ́nyí í gáā gwɛ́ɛya gā um ŋ́.

²²Ɔ̄cɛ ɛ́gɔ́ɔmā lɔfú lé ɔdōlé nēé le gwɛ́ɛya gā um, kwu ɔdōlé kú ɛya ɛ̄nɛ̄ o tīihɔ mɛ́mla ɛ̄nɛ̄ o tīihɔ fíyɛ́ dúú ā.

²³Amáŋ, abɔ̄ ó le nyɔ́nyí ā, ó gáā túbla ukɔ́tin kú igá kú ɛga otīihɔ ā ŋ́ ámāŋ ka otúblá ede ā ŋ́. Ó gáā nyílá ɔ́dā otīīhɔ nēe bá nyā iyē ŋ́. Ohígbū ka ami nōo wɛ Óndú ā yá uwá tīihɔ á.”

²⁴Ɛ̄nyā wɛ ɔdā nɛ̄ Umósīsi ka lɛ Árɔ̄ni mɛ́mla ayínɔ̄nyīlɔ kú nū mɛ́mla odúúdú ācɛ kú Ísrɛ̄lu á.