Read idoma ULĪFAYI 22 Bible Online

ULĪFAYI 22 - idoma bible

ULĪFAYI 22

¹Óndú ā da Umósīsi

²kóō le da Árɔ̄ni mɛ́mla ayínɔ̄nyīlɔ kú nū ā kahíníī, “Aá híī juwēyī lɛ iyē ōtīihɔ kú um ŋ́. Ohígbū ɔ́ɔmā, aá le ojīlīmā ce ɔdā ɛ̄gbā ōtīihɔ kú ɛya nɛ̄ ācɛ kú Ísrɛ̄lu gē je gā um ā. Ami wɛ Óndú ā á.

³Ɔ́dāŋ ka ɔ̄cɛ dúúmā kú ipɔ́ɔma kú uwɔ le tēelihɔ, anɔ́ɔ ó le túblá ɔdā ɛ̄gbā kú ɛya nɛ̄ ācɛ kú Ísrɛ̄lu je gā um ā, ó gáā yúklɔ́ ɛgiyí ede kú um gbóógbóō ɛ́ɛ́ gɛ ŋ́. Íne nyā ā géē yɔ̄ jāā gbō eko ɔ̄bū nōo gē wā ā. Ami wɛ Óndú ā á.”

⁴Ɔ̄cɛ dóódu kú ipɔ́ɔma kú Árɔ̄ni nōo lɛ agwú ámāŋ nōo gē tíyē ŋmá agada icííci, í gáā lé ɔdōlé otīihɔ kú um ā ŋ́, gbéeko nōó lɛ iyē gwu le yá yēŋēē. Ɔ̄cogwɛ́ɛya dóódu géē je tēelihɔ ɔ́dāŋ nōó lɛ abɔ̄ kwu ɔdēelihɔ bɛ̄ɛka okwū ámāŋ yɔ̄ ī tíyē icííci ŋmá agada,

⁵ámāŋ ɔ́dāŋ koó le abɔ̄ kwu ɛbɛ́ ámāŋ ka ɔ̄cɛ nōo le tēelihɔ dúúmā ā.

⁶Ɔ̄cogwɛ́ɛya dóódu nōo kwú tēelihɔ, géē tēelihɔ jāā gbó ɔ̄nɔ̄ɔ̄nɛ̄. Eko nyā nááná ā, ó kōō gáā lé ɔdōlé ōtīihɔ dúúmā ŋ́ jāā gbéeko nōó le iyē gwā.

⁷Eko nɛ̄ ɛnɔ lɛ tá ajɛ ɛɛ́, ó kwú yá yēŋēē. Ó géē lé ɔdōlé otīihɔ, nōo wɛ ákú nū ā.

⁸Ó gáā lé ɛbɛ́ dúú nōo gekwú abɔ̄yī nū ámāŋ ka ɛ̄nɛ̄ ɛbɛ́ obɔ̄bí le ɔ́ ŋmó ŋ́. Ó géē je ɔ́ tēelihɔ. Ami wɛ Óndú ā á.

⁹“Odúúdú ācogwɛ́ɛya ā géē lɛ aíne nyā a tū. Ɔ́dāŋ koó lɛ ā ŋ́, é géē lɛ́pɔ̄bí cɛ́ɛ́ é gekwú, ohígbū keé tá kóō lɛyítáajɛ lɛ aíne ōtīihɔ ā. Ami wɛ Óndú ā á, n le uwá yá tīihɔ.”

¹⁰“Ācogwɛ́ɛya ā ōfōōfū uwā géē lé ɔdōlé otīihɔ dúúmā á. Ɔ̄cɛ ɔhá dóódu í gáā lé ŋ́, kwu ɔ̄cɛ nōo lā ɔlɛ́ ɔ̄cogwɛ́ɛya ámāŋ ka ɔ̄cɛ nōó le tá ɔlɛ́ ī gbā ijē lɛ ɔ́ ā.

¹¹Amáŋ, ɔfiyɛ kú ɔlɛ́ ɔ̄cogwɛ́ɛya ā, noó lá ije kú nū, ámāŋ nēé ma ɔlɛ́ nū ā, géē lé ɔdōlé nɛ̄ ɔ̄cogwɛ́ɛya gē mīyɛ ā.

¹²Ɔyínɔ̄nyā kú ɔ̄cogwɛ́ɛya nōo lɛ ɔbá nōó wɛ ɔ̄cogwɛ́ɛya ŋ́ mā, í gáā lé ɔdōlé otīihɔ nyā a ŋ́.

¹³Amáŋ ɔnyōkwū mɛ́mla ɔnyā nɛ̄ ɔbá nū tá ɔ̄, nōó lɛ ɔyí ŋ́, nōo le cīgbīhi wā í lā ɔlɛ́ ádā nū, géē lé ɔdōlé otīihɔ nɛ̄ ɔ̄cogwɛ́ɛya gē miyɛ ā.

¹⁴“Ɔ́dāŋ ka ɔ̄cɛ nōó wɛ ipɔ́ɔma kú ɔlɛ́ ɔ̄cogwɛ́ɛya ŋ́, lɛ ɔdōlé otīīhɔ nyā a lé icííci, nōó jé ŋ́. Ó géē cíla ulé nū lɛ ɔ̄cogwɛ́ɛya fíyɛ́ ɛga ofu ŋmá ofɛhɔ̄.

¹⁵Ɔ̄cogwɛ́ɛya ā í gáā je ɛya otīīhɔ tēelihɔ ŋ́,

¹⁶o ŋmá lɛ ō cɛ̄ lɛ ɔ̄cɛ nōó cíkā ō lé ɔdōlé ōtīihɔ ŋ́ mā kóō le lé ŋ́. Ɛ̄nyā géē cɛ̄ lɛ ɔ́ lɛpɔ̄bí, nōo géē cɛ̄ lɛ uwá yá ɔ̄ italā. Ami wɛ Óndú ā á. Ami ā yá ká ɛya nēé gē gwó ā kóō tīihɔ á.”

¹⁷Óndú ā da Umósīsi kóō

¹⁸le aíne nyā kpó lɛ Árɔ̄ni mɛ́mla ayínɔ̄nyīlɔ kú nū, mɛ́mla odúúdú ācɛ kú Ísrɛ̄lu. Ó kahíníī, “Ɔ́dāŋ ka ɔ̄cɛ Ísrɛ̄lu dóódu ámāŋ ka éwɔhá nōo lā ajɛ kú ācɛ Ísrɛ̄lu, lɛ ɔdā ɛ̄gbā kú ɛya o yɔlá dúúdú bī wā, ó kōō wɛ ákú oji ō cɛ̄ lɛ Óndú ámāŋ ɛya o je ŋmá ɔtū kú nū, ɛbɛ́ ā kóō híī lɛ ɛnyá dúúmā ŋ́.

¹⁹Ɛ́ɛ́ ka Óndú ā kóō géē mīyɛ, ó géē wɛ ɔbá kú ɛdrɔ́ kú ɛna dúúmā nōó lɛ ɛnyá dúúmā ŋ́ mā.

²⁰Ɔbá kú ɛbɛ́ nōó lɛ ɛnyá dúúmā iyē ŋ́ mā nɛ̄ Óndú ā í mīyɛ ŋmá abɔ̄ kú aá á.

²¹Eko nɛ̄ ɔ̄cɛ dúúmā géē bī ɔdā kú ɛya gé lɛ Óndú ā, ó kōō wɛ ákú oji ō cɛ̄ lɛ Óndú ā ámāŋ ákú o je ŋmá ɔtū kú nū, ɛbɛ́ ā í gáā lɛ ɛnyá dúúmā iyē kú nū ŋ́, ɔ́dāŋ koó tíne kú Óndú ā kóō mīyɛ ɛya kú nū.

²²Ɛbɛ́ dóódu nɛ̄ eyī kú nū le pu, ámāŋ nōo lɛ ipí, ámāŋ nōo le gbiíkwá, aá híī bī ɔ̄ wā ɛyí ede gaá gwɛ́ɛya lɛ Ɔwɔicō ŋ́.

²³Ɛna amáŋ ɛwū dóódu nɛ̄ ikpó amáŋ abɔ̄ kú nū le fíyɛ́ ɔhá, aá lɔfú je ɔ́ gwɛ́ɛya o je ŋmá ɔtū lɛ Óndú ā glá, ámāŋ é gáā mīyɛ ɛ́gɔ́ɔmā kú ɔdā kú ɛya kú oji ō cɛ̄ lɛ Óndú ā glá ŋ́.

²⁴Ɛbɛ́ dóódu nɛ̄ īkpāpī kú nū le ca, ámāŋ keé lɛ ɔ́ búdá, aá híī je ɔ́ gwɛ́ɛya lɛ Óndú ā ipú ajɛ kú aá ŋ́.

²⁵Aá je ɛbɛ́ dúúmā nɛ̄ aá lá ŋmá ɛgiyí aéwɔhá ā le gwɛ́ɛya kú ɔdōlé lɛ Óndú ā ŋ́. Ɛbɛ́ ɛ́gɔ́ɔmā lɛ ɛnyá iyē, n̄ kē gáā mīyɛ ŋ́.

²⁶Óndú ā da Umósīsi kahíníī,

²⁷“Eko nēé le ɔyí ɛna, álá, ámāŋ ɛwū ma. Ó géē yɔ̄ mɛ́mla ɛ́nɛ́ nū ɛ̄cī ahāapa. Ɔŋmá ɛ̄cī ɔ́mahātá gɔbū ā, Óndú ā lɔfú mīyɛ anú kú ɔdā kú ɛya o yɔlá dúúdú glá mɛ́ɛ́nɛ.

²⁸Áa híī ŋmó ɛ́nɛ́ ɛna mɛ́mla ɔyí nū, ámāŋ ka álá mɛ́mla ɔyí nū ámāŋ ka ɛwū mɛ́mla ɔyí nū ɛ̄cī ékpónú ŋ́.

²⁹Eko nɛ̄ aá gē gwɛ́ɛya kú ahínyá nēé gē tá Óndú ā, aá géē yɛce aíne kú nū ā, cɛ́ɛ́ kéē mīyɛ ɔdā kú ɛya ŋmá abɔ̄ kú aá.

³⁰Aá kwú ɛbɛ́ ā ú lé ícíícɛ nɛ̄ aá gwɛ́ɛya ɔ́ɔmā, aá híī cɛ̄ lɛ odóódu kú nū kóō hile gbɔ́ɔ̄cī ŋ́. Ami wɛ Óndú ā á.”

³¹“Óndú ā kahíníī, “Aá lɛyítáajɛ lɛ aíne kú um. Ami wɛ Óndú ā á.

³²Aá híī juwēyī lɛ iyē otīihɔ kú um ā ŋ́. N tíne kú ācɛ kéē cɛ̄ ka n tīihɔ. Ami wɛ Óndú ā nōo le aá tīihɔ á.

³³Ami kpó aá bɛ̄cɛ ŋmá ajɛ kú Íjīpiti, cɛ́ɛ́ ká n̄ wɛ Ɔwɔicō kú aá á, ami wɛ Óndú ā á.”