Read idoma ULĪFAYI 24 Bible Online

ULĪFAYI 24 - idoma bible

ULĪFAYI 24

¹Óndú ā da Umósīsi

²kóō ka lɛ ācɛ kú Ísrɛ̄lu kahíníī, “Aá lɛ anɔ̄ oyēŋēē kú ólīifu bī wā ohígbū ō tū agege kú Áklɔ̄kpīihɔ ā. Cɛ́ɛ́ kú ɔlá kóō yɔ̄ gē cɛ̄ ipú Áklɔ̄kpīihɔ ā ojigógó. Kéē yá kóō yɔ̄ í cɛ̄ eko dóódu.

³Árɔ̄ni géē lɛ ɔlá kwu ɔ́ ɔ̄nɔ̄ɔ̄nɛ̄ dóódu kóō yɔ̄ ī cɛ̄ jāā gbɔ́ɔ̄cī iyɔ̄bū Óndú ā, eyīyɛ̄ɛcɛ kú ukɔ́tin iyɔ̄bū kú ɛga nikpati kú Ɛka háyi ā, nōo háyi ɛga nōo tīihɔ fíyɛ́ dúú ā. Aá géē lɛ íne nyā tū jāā gbéeko nōo ī wā a.

⁴Árɔ̄ni géē leyīkwu agege nōo cɛyí ɔdā ō le agege ce ɔ́ kú ugóolu (oje ɔdɔ) á. Ó klla í má kóō yɔ̄ ī cɛ̄ eko dóódu ipéyī Óndú ā.”

⁵Aá lɛ umu miya cɛ́ɛ́ aá lɛ igbō igwɛ́ɛpa yá

⁶Aá lɛ igbō ā hɛ́ ɔgba ɛpa. Ɛhīlī kóō bá ɔgba éyi, ɛhīlī ɔhá kóō bá ɔgba ɔhá, ɛyí utébulu kú ugóolu (oje ɔdɔ) abɔ̄ɔ̄bɔ̄yī nū nōo háyi iyɔ̄bū Óndú ā.

⁷Aá lɛ ɔtulalī umuumu fú tū ɔgba éyééye kóō wɛ ɛya kú ɔdōlé nēé gwó lɛ Óndú ā. Kóō kwɛyí igbo nēé le gwɛ́ɛya ā.

⁸Ɛ̄cī Usábáti dóódu, Árɔ̄ni géē kpó igbō ā bá ɛyí utébulu iyɔ̄bū Óndú ā piyóó, kwɛyí ācɛ Ísrɛ̄lu kóō wɛ ɛka nōo yɔ̄ piyóó.

⁹Igbō nyā wɛ ákú Árɔ̄ni mɛ́mla ipɔ́ɔma kú nū. É géē lé igbō ā ɛga otīihɔ ā, ohígbū ka ɛ̄nyā wɛ ɛga otīihɔ kú ɔdōlé nēé le gwɛ́ɛya lɛ Óndú ā, kóō wɛ ákú ācogwɛ́ɛya ā.

¹⁰Ɔyínɔ̄nyīlɔ éyi yɔ̄ nɛ̄ ádā nū wɛ ɔ̄cɛ Íjīpiti, nɛ̄ ɛ́nɛ́ nū wɛ ɔyínɔ̄nyā kú Ísrɛ̄lu. Iyē kú ɛ́nɛ́ nū lé ka Ussɛlōmiti, ɔyínɔ̄nyā kú Udíbri, nōo ŋmá ipɔ́ɔma kú Udáni ā. Ó le tá ɛcɛ ipú ācɛ kú Ísrɛ̄lu. Anɔ́ɔ anú mɛ́mla ɔ̄cɛ kú Ísrɛ̄lu éyi lɛ ikpɛ́lā yá ipú ɛga nɛ̄ ācɛ Ísrɛ̄lu lā ā á.

¹¹Ɔyínɔ̄nyīlɔ kú ɔyínɔnyā kú Ísrɛ̄lu nyā ā bī iyē Ɔwɔicō abɔ̄ɔ̄bɔ̄yī nū ā le ɛcá cá. Anɔ́ɔ é le ɔ́ bī wā ɛgiyí Umósīsi.

¹²Anɔ́ɔ é kwú ɔ̄ ú tá ijaló, yɔ̄ ī gbēyī ɔdā nɛ̄ Óndú ā géē da uwá kéē yá mla anú ā.

¹³Óndú ā da Umósīsi kahíníī,

¹⁴“Áa kwú ɔ̄cɛ ɔ́ɔmā ú ga ɛcɛ ŋmá ipú ɛga nɛ̄ aá lā ā, cɛ́ɛ́ ɛjɛ̄ɛ̄jī ācɛ nēe pó abɔ̄ ó cɛ̄ɛ̄cā ā géē kpó abɔ̄ ce ɔ́ ɛyí kéē lɛ ijáalí cɛ̄ tū ɔ̄ kóō le ɛpɔ̄bí lé. Cɛ́ɛ́ odúúdú ójīla ā lɛ ɛcɔ̄ tá klá anú, kéē lɛ ɔ́ ŋmó.

¹⁵Cɛ́ɛ́ a le ka lɛ ācɛ kú Ísrɛ̄lu ka, ɔ̄cɛ dóódu nōo lɛ ɛcá cá Ɔwɔicō géē móōwē nū.

¹⁶É géē ŋmó ɔ̄. Ɔ̄cɛ kú Ísrɛ̄lu dóódu ámāŋ éwɔhá nōo lā ipú ācɛ kú Ísrɛ̄lu, nōo lɛ ɛcá cá Ɔwɔicō, odúúdú ācɛ kú ajɛ ā géē tá ɛcɔ̄ klá anú, í je ɔ́ ŋmó.”

¹⁷“Ɔ̄cɛ dóódu nōo lɛ ɔ̄cɛ ŋmó, é géē je ɔ́ ŋmó

¹⁸Ɔ̄cɛ dóódu nōo lɛ ɔdāajɛ kú ɔ̄cɛ ɔhá ŋmó, ó géē je ɔdāajɛ ɔhá cíla ulé nū. Íne ā wɛ ka, oyēeyī kóō kwɛyí oyēeyī.”

¹⁹Ɔ̄cɛ dóódu nōo lɛ ɔ̄cɛ ɔhá yá ágbe, é géē yá ɔ̄ ɛdɔ kú ágbe éékpó nōó yá ɔ̄cɛ ɔ́ɔmā dúú.

²⁰Ɔ́dāŋ́ koó le ɔ́ ikpokwú éyi cē nɛɛ, é géē cē ikpokwú kú nū éyi dúú. Ɔ́dāŋ koó le ɔ́ eyī éyi pu, é kē í pu ɔ́ eyī éyi dúú. Ɔ́dāŋ́ koó lɛ ɔ́ ayīnu éyi fu, é géē fu ɔ́ ayīnu éyi dúú. Ɛdɔ ágbe dóódu nōó yá ɔ̄, é géē yá ɔ̄ kwɛyí nū

²¹Ɔ̄cɛ dúúmā nōo le ɔdāajɛ kú ɔ̄cɛ ɔhá ŋmó, ó géē je ɔhá kwɛ́yí nū. Amáŋ ɔ̄cɛ dúúmā nōo lɛ ɔ̄cɛ ŋmó, é géē je ɔ́ ŋmó.

²²Íne nyā gē gbō odúúdú aá, kwu ācɛ kú Ísrɛ̄lu, ámāŋ ka éwɔhá nēe lā ipú aá ā, ohígbū ka ami wɛ Óndú ā, nōo wɛ Ɔwɔicō kú aá ā.”

²³Eko nɛ̄ Umósīsi lɛ ɛlā nyā ka lɛ ācɛ kú Ísrɛ̄lu kwɛyí ā, é kwú ɔ̄cɛ ā ú ga ɛcɛ ŋmá ipú ɔlɛ́, gaá le ɛcɔ̄ tá klá anú lɛ ɔ́ ŋmó. Ācɛ kú Ísrɛ̄lu bī ɔwɛ nyā le ɔdā nɛ̄ Óndú ā tū Umósīsi ukɔ́ kú nū ā yá jīla.