Read idoma ULĪFAYI 25 Bible Online

ULĪFAYI 25 - idoma bible

ULĪFAYI 25

¹Óndú ā le ɛlā ka lɛ Umósīsi ɛyí ɛfu kú usáyínāyi ā kóō

²le ka lɛ ācɛ kú Ísrɛ̄lu ā kahíníī, “Eko nɛ̄ aá gā ipú ajɛ nɛ̄ n gáā je lɛ aá ā. Aá géē lɛ ojīlīmā ce um oŋmá lɛ ō mabɔ̄ ajɛ tá cíí, nɛ̄ aá í gáā hɛ́hɔ̄ anú ŋ́, iháyí ahāapa.

³Iháyí ɛhīlī, aá géē hɛ́hɔ̄ anú klla í nyi, í cē īkpɔ̄dɛ̄hɔ̄ kú aá.

⁴Amáŋ iháyí ɔ́mahāapa ā géē wɛ iháyí kú omlɛ́nyɔ́ dúúdú kú ajɛ ā, iháyí nēé kwú tū Óndú ā abɔ̄. Aá gáā nyi ɔdā dúú tū ajɛ ā iháyí ɔ́ɔmā ŋ́, ɛ́ɛ́ nɛ̄ aa géē gwó ābɔ̄ kú ɔcí ufáyin tū ɔ̄ ŋ́.

⁵Aá kōō híī nyɔ̄ gaá ce igbodí igwu ŋmá ajɛ kú aá ŋ́. Aá híī nyɔ̄ gaá tú īkpō ufáyin kú aá bá ŋmá ɔcí ufáyin nɛ̄ aá glá ābɔ̄ nū yá ŋ́ mā ŋ́. Ohígbū koó wɛ iháyí kú omlɛ́nyɔ́ kú ajɛ ā dúúdú.

⁶Nááná nɛ̄ aá hí ajɛ ā ŋ́ eko kú omlɛ́nyɔ́ ā, ó géē yá ɔdōlé lɛ aá, aɔ́fiyɛ kú aá, ācɛ olufa kú aá, aéwɔhá nēe lā mla aá,

⁷aɛ́bɛ́ kú ɔlɛ́ aá mɛ́mla aɛ́bɛ́ ácí kú aá. Aá lɔfú lé ɔdā dúú nōo bū ŋmá ajɛ ā glá.

⁸Óndú ā klla kahíníī, “Aá gbaáluka iháyí ahāapa ɛga ahāapa, odúúdú nū í wɛ iháyí ofɛpa cahāanɛ.

⁹Cɛ́ɛ́ ɛ̄cī ɔ́migwó kú ɔyā ɔ́mahāapa ā, ɛ̄cī nēé gē gwɛ́ɛya kú íne ō bīya ā, aá lɛ ɔ̄cɛ éyi tɛ̄hɔ̄ kóō lɛ opo tá odúúdú ajɛ ā.

¹⁰Aá bī ɔwɛ ɛ́gɛ́nyā lɛ iháyí ɔ́mofɛpa cigwó ā fō tá, nɛ̄ aá géē ka tɛ́ɛcɛ lɛ odúúdú ācɛ nēe lā ipú ajɛ ā, keé le hɛ́tá ɛɛ́. Odúúdú agbénú nēé kpó lá kpɛ́mm ā, é í je uwá kpó kwúcē igbīhi lɛ ācɛ nēe lɛ aflɛ́yí ā, ámāŋ ka ayááyí kú ɔ̄cɛ ā. Ɔ̄cɛ dúúmā nēé je lá ɔfiyɛ ā géē kwúcē igbīhi ga ipɔ́ɔ́nū kú nū.

¹¹Iháyí ɔ́mofɛpa cigwó ā, aá gáā nyi ɔdā dóódu tū ɛhɔ̄ kú aá ŋ́. Ɛ́ɛ́ nɛ̄ aá gēe cē inana kú ɔdɛ̄hɔ̄ kú aá ŋ́. Ɛ́ɛ́ nɛ̄ aá géē tú ikpó kú ɔcí dúúmā nɛ̄ aá gwó ābɔ̄ nū ŋ́ mā bá ŋ́.

¹²Odúúdú iháyí ā géē wɛ iháyí otīihɔ lɛ aá. Aɔ́dā nēe bū ŋmá ajɛ ā abɔ̄yī uwā ā ōfōōfū uwā ā nɛ̄ aá gaá lé á.

¹³Ipú iháyí ɔ́ɔmā ā, odúúdú agbénú nɛ̄ ācɛ kpó ce aá abɔ̄ ā, aá géē je uwá kpó cīgbīhi lɛ aóndú uwā.

¹⁴Ohígbū ɔ́ɔmā eko nɛ̄ aá kwú ajɛ ú lá lɛ ɔ̄cɛ kú Ísrɛ̄lu ɔ́mpa aá, ámāŋ ka aá le ajɛ lá ŋmá abɔ̄ ɔ̄cɛ dúúmā, aá híī yá iyī aá ŋmó ŋ́.

¹⁵Aá géē ka ɔ́lá kú nū oŋmá áluka kú iháyí nɛ̄ ajɛ ā géē lɔfú yá ɔdɛ̄hɔ̄ glá ā gaá kwu gbɔbū lɛ iháyí kú ohabɔ̄ ajɛ tá ɔhá ā.

¹⁶Ɔ́dāŋ ka iháyí nōo hile gbɔbū le iháyí kú ohabɔ̄ odée tá ā lɛwa, ɔlá kú ajɛ ā géē nwuné. Ɔ́gāŋ nɛ̄ iháyí ā kē le lígíí, ɔ́lá kú nū géē lɛ lígíí. Ohígbū ka ɔ́lá kú ajɛ nēe yɔ̄ í je lá nyā ŋmá ɔdɛ̄hɔ̄ nɛ̄ ɔ̄cɛ ce ŋmá ajɛ ā glá nɛ n.

¹⁷Aá híī hɛ́ ɔ̄cɛ kú Ísrɛ̄lu ɔ́mpa aá lé ŋ́. Aá yúufi Ɔwɔicō.”

¹⁸“Aá lɛyítáajɛ lɛ odúúdú íne kú Óndú ā, kú aá lɛ odúúdú nū yá jila, cɛ́ɛ́ kú aá lā ɛbɔ́ ipú ajɛ ā.

¹⁹Ajɛ ā géē yá īkpɔ̄dɛ̄hɔ̄ lɛ aá, aá kē í lé ɔdā dóódu nɛ̄ aá dɔɔ̄kā ō lé ā, aá klla í lā ɛbɔ́.

²⁰Amáŋ, ɔ́dāŋ ka ɔ̄cɛ éyi lɛ ɔ̄kā kú ɔdā nōó géē yɔ̄ ī lé ɛplá eko kú iháyí ɔ́mahāapa ā nēé ī nyi ɔdɛ̄hɔ̄ dóódu ŋ́ mā da.

²¹Ami Óndú ā géē hɔ́hā ce ajɛ ā cɛ́ɛ́ ó géē yá ɔdɛ̄hɔ̄ nɛ̄hi iháyí ɔ́mɛhīlī ā nōo lɔfú bī aá iháyí ɛpa.

²²Eko nɛ̄ aá lɛ ɔdɛ̄hɔ̄ nyi iháyí ɔ́mahātá ā, nááná, aá géē bā ī lé ɔdɛ̄hɔ̄ nɛ̄ncɛ̄ kú aá nɛ̄ aá cē iháyí ɔ́mɛhīlī ā kpɔ́. Aá kē í lɛ ɔdōlé jāā gbéeko nɛ̄ aá géē cē ɔdɛ̄hɔ̄ nɛ̄ aá nyi iháyí ɔ́ɔmā ā.

²³Aá gáā je ajɛ ā lá lɛ ɔ̄cɛ piyóó ŋ́, ohígbū ka ajɛ ā í wɛ ákú aá ŋ́. Ó wɛ ákú ami nōo wɛ Ɔwɔicō ā nɛ. Aá kē lɛbɛ̄ɛka éwɔhá nēé jɛga lɛ aá ká aá hɛ́hɔ́ ipú ajɛ ā nɛ n.

²⁴Eko nɛ̄ aá kwú ajɛ ú lá, ɛga kú óndú ajɛ ā kóō lɔfú lá ɔdāyīnū cīgbīhi glá ā cíká ō yɔ̄.

²⁵Ɔ́dāŋ ka ɔ̄cɛ kú Ísrɛ̄lu kwú gbɛhá, anɔ́ɔ ó tíne ó kwú ajɛ kú nū ú lá á. Ɔmáapu nū nōo kwu ɔ́ ajaajɛ ā géē lá ajɛ ā cīgbīhi lɛ ɔ́.

²⁶Amáŋ ɔ́dāŋ ka ɔ̄cɛ dúúmā nōó lɛ ɔmáapú nōo í lá ajɛ cīgbīhi ŋ́, ɔ̄cɛ ā lɔfú je gbagbénú ɛ̄cī éyi glá, nōó lɔfú lá ɔdāyīnū cīgbīhi glá.

²⁷Ɔ́dāŋ koó lɛ ā, ó í cíla ɔ̄cɛ nōo lá ajɛ ā okónu kú ije nōo í kwɛyí eko nōo hile kéē je ajɛ cīgbīhi lɛ óndú nū ā piíí. Cɛ́ɛ́ ó mīyɛ ajɛ kú nū cīgbīhi.

²⁸Amáŋ ɔ́dāŋ koó má ije jɛ̄ nōó ī lá ajɛ ā cīgbīhi ŋ́, ó géē yɔ̄ abɔ̄ kú ācɛ nōo lá ā jāā gbéeko kú ajɛ ō je cīgbīhi lɛ óndú nū. É géē je ɔ́ cīgbīhi lɛ ɔ̄cɛ nōo lɛ abɔ̄ɔ̄bɔ̄yī nū ā.

²⁹Ɔ́dāŋ ka ɔ̄cɛ kwú ɔlɛ́ nū nōo yɔ̄ ipú igelī nēé le igá cē tū ɔ̄ ā ú lá. Ó lɛ íkwu ō lá ɔdā iyī nū cīgbīhi ɛplá iháyí odunkwulu ŋmá ɛ̄cī nēé lá ajɛ ā glá.

³⁰Amáŋ, ɔ́dāŋ koó lá ɔ̄ cīgbīhi ɛplá iháyí éyi ā glá ŋ́, ó gáā lɛ íkwu ō lá ɔlɛ́ ā cīgbīhi glá gɛ ŋ́. Cɛ́ɛ́ ɔlɛ́ ā kwú pīya ɔdā kú ukpɛ́ kú agbénū kú ɔ̄cɛ nōo lā mɛ́mla ayááyí kú ɔlɛ́ nū. É gáā je ɔ́ cīgbīhi eko kú ɔdā ō je cīgbīhi lɛ óndú nū ā ŋ́.

³¹Amáŋ aɔ́lɛ́ nēe bá aípɔ́lɛ́ nēé cē igá tū uwā ŋ́ mā, é géē je uwā bɛ̄ɛka ajɛ kú ipácí ā. Ɔ̄cɛ nōo tɛtɛ lɛ ā lɔfú lá ɔdāyīnū cīgbīhi glá, é kē í kpó uwā cīgbīhi eko nēé gē je ɔdā cīgbīhi lɛ óndú nū ā.

³²Amáŋ, ayí kú Ulífāyi ā lɛ íkwu kéē lá odée kú uwā cīgbīhi eko dóódu glá ipú aígelī nēé je lɛ uwá ā.

³³Ɔ́dāŋ ka ɔ̄cɛ Ulífāyi éyi kwú inu ɔlɛ́ nū nōo yɔ̄ ipɔ́lɛ́ ā ú lá, anɔ́ɔ ó fūla anú ŋ́ má. É géē je ɔlɛ́ ā cīgbīhi lɛ ɔ́ ipú iháyí kú ɔdā ō je kwúcē igbīhi lɛ óndú nū ā. Ohígbū ka ɔlɛ́ nɛ̄ ācɛ kú Ulífāyi lɛ ipú igelī ā wɛ ákú uwā piyóó ipú ācɛ kú Ísrɛ̄lu.

³⁴Amáŋ ajɛ ɔlamu nōo yɛ igelī kú uwā jīla tá ā, é gáā je ɔ́ lá gbóógbóō ŋ́. Ó wɛ agbénú kú uwā piyóó.”

³⁵Ɔ́dāŋ ka ɔ̄cɛ kú Ísrɛ̄lu ɔ́mpā uwɔ, nōo lā kwu uwɔ ā kwú gbɛɛhá anɔ́ɔ ó kē tá iyī nū abɔ̄ glá gɛ ŋ́ má, aá géē tá ɔ̄ abɔ̄ ɛ́gɛ́nɛ̄ aá gē tá ācocɛ̄hɔ̄ kú olufa abɔ̄ ā. Cɛ́ɛ́ kóō lɔfú yɔ̄ ī lā kwu uwɔ ajaajɛ glá

³⁶Ā híī lɛ ije tá ije nɛ̄ aá le kplá uwá ā ŋ́ ámāŋ kéē gbā fíyɛ́ ɛ̄nɛ̄ aá le kplá uwá ā ɔkwu ŋ́.

³⁷Aá híī lɛ ije cɛyí ije lɛ ācɛ nɛ̄ aá le kplá uwá ā ŋ́. Aá kē lé itene ŋmá ɔdōlé nɛ̄ aá ī je lá lɛ uwá ŋ́.

³⁸Ɛ̄nyā wɛ íne kú Óndú ā, nōo wɛ Ɔwɔicō kú aá, nōo kpó aá bɛ̄cɛ ŋmá ajɛ kú Íjīpiti, nōo je ajɛ kú Ukénan lɛ aá, cɛ́ɛ́ kóō wɛ Ɔwɔicō kú aá ā á nɛ.

³⁹Ɔ́dāŋ ka ɔ̄cɛ Ísrɛ̄lu nōo lā kwu uwɔ ā, kwú gbɛhá, nōó kwú iyī nū ú ce aá abɔ̄, aá gáā cɛ̄ lɛ ɔ́ yúklɔ́ kú ɔfiyɛ ŋ́.

⁴⁰Ó géē lā mla aá bɛ̄ɛka ɔ̄coyúklɔ́ olufa lɛ aá ā jāā gbéeko iháyí kú ɔdā o je cīgbīhi lɛ óndú nū ā.

⁴¹Eko ɔ́ɔmā ā, aá géē mā anú mɛ́mla ayí nū tá ga ɔlɛ́ uwā, ga ipú agbénú kú ádáádā nū.

⁴²Ācɛ kú Ísrɛ̄lu ā wɛ aɔ́fiyɛ kú Óndú ā nɛ. Ó kpó uwā bɛ̄cɛ ŋmá ajɛ kú Íjīpiti, é gáā je īyī uwá lá bɛ̄ɛka ɔfiyɛ ɛ́ɛ́ gɛ ŋ́.

⁴³Aá híī yá ɔ̄cɛ kú Ísrɛ̄lu ɛ́gɔ́ɔmā bɔ̄bí ŋ́. Amáŋ aá lɛyítáajɛ lɛ Ɔwɔicō kú aá.

⁴⁴Ɔdāŋ ka aá cɛgbá aɔ́fiyɛ, aá lɔfú lá ŋmá ipú aéwo nēe lā kwu aá yɛ jīla tá ā.

⁴⁵Aá lɔfú lá ayí kú aéwɔhá nēe lā ipú aá. Ɛdɔ ayí dóódu nɛ̄ uwá ma ipú ajɛ kú aá ā, géē wɛ agbénú kú aá.

⁴⁶Aá géē mā uwā tá kéē wɛ úgwū kú ayí aá, nēé géē cɛ̄ aá ɛhɔ̄ ɛ́gɛ́nɛ̄ é géē yēeyī gaá kwu lɛ ā. Amáŋ, aá gáā lɔnɔ lɛ ɔ̄cɛ kú Ísrɛ̄lu ɔ́mpá aá klla yá uwā ōwē ŋ́.

⁴⁷Ɔ́dāŋ ka éwɔhá éyi nōo lā mla aá kwú gbagbénú, ɛ́ɛ́ nɛ̄ ɔ̄cɛ Ísrɛ̄lu ɔ́mpa aá kwú gbɛɛhá, anɔ́ɔ ó kwú iyī nū ú ce éwɔhá ā abɔ̄ bɛ̄ɛka ɔfiyɛ ā ámāŋ ka ɔ̄cɛ éyi ŋmá ipɔ́nū ɔlɛ́ éwɔhá ā.

⁴⁸Igbīhi nōó kwú iyī nū ú je lá ā, ó lɛ íkwu ō lɛ iyī nū fūla glá. Ɔyínɛ́ nū nɔ̄nyīlɔ lɔfú fūla anú glá,

⁴⁹Amáŋ ɔmáapu ádā nū mɛ́mla ɔmáapu ɛ́nɛ́ nū géē fūla anú, amáŋ eko nōó lɛ ije tútū jɛ̄, ó géē fūla iyī nū.

⁵⁰Ó géē kā mɛ́mla ɔ̄cɛ nōó je iyī nū ce ɔ́ abɔ̄ ā, cɛ́ɛ́ é í ka áluka kú iháyí kú eko nōó je iyī nū cābɔ̄ ŋmá ā kwu eko kú ɔdā ō je cīgbīh lɛ óndú nū ā. Ó géē ka ɔ́lá kú ɔdā nēé í lɛ fūla anú ā ŋmá ulé nēé gē gbā lɛ ācocɛ̄hɔ̄ ā.

⁵¹Ɔ́dāŋ koó hile iháyí alɛwa nɛɛ, ɛ́gɛ́nɛ̄ é miya ɔ́ lɛ ā, ó géē gbá ije kóō fūla kú nū lɛ ɔ̄cɛ ā.

⁵²Amáŋ ɔ́dāŋ ka iháyí nōo hile ā í lɛ ɛwa ŋ́, ó géē ka ɔ́ mɛ́mla anú, cɛ́ɛ́ ó lɛ ije ōhī gbā ŋmá anú ŋmá ɛ́gɛ́nɛ̄ iháyí nōo hile ā lɛ ā,

⁵³bɛ̄ɛka ɔdā nōó yɔ̄ gē yúklɔ́ olufa kú iháyí iháyí ā. Ɔkpani nū í gáā yá ɔ̄ ōwē ŋ́.

⁵⁴Ɔ́dāŋ keé hɛ́ ɔ̄ tá ipú ɔwɛ dóódu nēe bá ā ŋ́, é géē hɛ́ anú mɛ́mla aíkonó kú nū tá ɛpléeko kú iháyí kú o je ɔdā cīgbīhi lɛ óndú nū nōo ī wā ā.

⁵⁵Ɔ̄cɛ Ísrɛ̄lu í gáā wɛ ɔfiyɛ piyóó glá ŋ́. Ohígbū ka ācɛ kú Ísrɛ̄lu wɛ aɔ́fiyɛ kú Óndú ā. Anú kpó uwā bɛ̄cɛ ŋmá ajɛ kú Íjīpiti á. Ami wɛ Óndú ā, nōo wɛ Ɔwɔicō kú aá a.