Read idoma ULĪFAYI 27 Bible Online

ULĪFAYI 27 - idoma bible

ULĪFAYI 27

¹Óndú ā da Umósīsi kahíníī,

²“Le ka lɛ ācɛ kú Ísrɛ̄lu ā ka ɔ́dāŋ keé kwú ɔ̄cɛ ú lɛ Óndú ā kóō yá jīla kú okónu nēé ce ā, é géē fūla ɔ̄cɛ ɔ́ɔmā glá, ŋmá lɛ ō cílá ije nōo yɔ̄ nyā ā.

³Ɔ̄cɛ nōo ŋmá iháyí ofu ga iháyí ofɛtá ā, ije kú nū géē wɛ īkpō ije nɛ̄hɛ́ ofɛpa cigwó.

⁴Ɔ́dāŋ ka ɔ̄cɛ ā wɛ ɔ̄cɛnyā, ó géē wɛ īkpō ije nɛ̄hɛ́ ofu cigwó.

⁵Ɔ́dāŋ ka ɔ̄cɛ ā wɛ iháyí ɛhɔ̄ ga iháyí ofu, ije kú nū géē wɛ īkpō ije nɛhɛ̄ ofu. Ɔ́dāŋ koó wɛ ɔ̄cɛnyā ije kú nū géē wɛ īkpō ije nɛ̄hɛ́ igwó.

⁶Ɔ́dāŋ ka ɔ̄cɛ ā wɛ ɔyā éyi ga iháyí ɛhɔ̄, ije kú nū géē wɛ īkpō ije nɛ̄hɛ́ ɛhɔ̄. Ɔ́dāŋ koó wɛ ɔ̄cɛnyā, ije kú nū géē wɛ īkpō ije nɛ̄hɛ́ ɛtá.

⁷Ɔ́dāŋ ka ɔ̄cɛ ā wɛ iháyí ofu ɛtá gɔbū. Ije kú nū géē wɛ īkpō ije nɛ̄hɛ́ igwɛ́ɛhɔ̄. Ɔ́dāŋ koó wɛ ɔ̄cɛnyā ije kú nū géē wɛ īkpō ije nɛ̄hɛ́ igwó.

⁸Ɔ́dāŋ ka ɔ̄cɛ nōo cokónu ā le gbɛhá nōó má ije nyā gbā ŋ́. Ó géē bī ɔ̄cɛ éyi gé lɛ ɔ̄cogwɛ́ɛya ā, ɔ̄cogwɛ́ɛya ā ké í tá ije kú īkpɛ̄yí kú ɔ̄cɛ ɔ́ɔmā wā ajɛ lɛ ɔ́, ɛnɛ ó géē lɔfú gbā glá ā.”

⁹“Ɔ́dāŋ ka okónu nōó ce ā wɛ ɛbɛ́ nēé gē le gwɛ́ɛya lɛ Óndú ā glá, ɔdā dóódu nɛ̄ ɔ̄cɛ ɔ́ɔmā je ā tīihɔ.

¹⁰Ó gáā je ɔdā dúúmā fūla anú ŋ́, ɛ́ɛ́ nōó í je ɔ́ fūlabɔ̄ ŋ́, ɛ́ɛ́ nōó gē je ɛbɛ́ obɔ̄bí fūla olɔhi ámāŋ je ɛbɛ́ olɔhi fūla obɔ̄bí ŋ́. Ɔ́dāŋ koó kwú ɛbɛ́ éyi ú kwɛyí ɛbɛ́ ɔhá, ɛbɛ́ ɛpɛlɛ́ɛpa ā kwú pīya ákú Óndú ā ɛɛ́.

¹¹Ɔ́dāŋ ka okónu nōó ce ā wɛ ɛbéelihɔ nēé nōó lɔhi ō je gwɛ́ɛya lɛ Óndú ā ŋ́ nɛɛ, ɔ̄cɛ ɔ́ɔmā géē bī ɛbɛ́ ā gé lɛ ɔ̄cogwɛ́ɛya ā.

¹²Ɔ̄cogwɛ́ɛya ā géē jila anú ɔ́dāŋ koó lɔhi, ámāŋ koó bɔ̄bí. Ɔdā nɛ̄ ɔ̄cogwɛ́ɛya ka ā, nōó wɛ á.

¹³Amáŋ ɔ́dāŋ koó dɔɔ̄kā ō fūla anú nɛɛ, ó géē lɛ ije ofu ŋmá ipú ofɛhɔ̄ ce ɛyí ɔ́lá nū.

¹⁴“Ɔ́dāŋ ka ɔ̄cɛ kwú inu kú nū ú lɛ Óndú ā, ɔ̄cogwɛ́ɛya ā géē tá ɔ́lá nū ā kwu ɛ́gɛ́nɛ̄ ó lɔhi ámāŋ koó bōbí lɛ ā. Ɛ́gɔ́ɔmā nɛ̄ ɔlá nū géē wɛ á.

¹⁵Ɔ́dāŋ ka ɔ̄cɛ nōo je inu ā lɛ Óndú ā dɔɔ̄kā ō fūla anú, ó géē cíla ulé nú klla í lɛ ije ofu ŋmá ipú ofɛhɔ̄ ce ɛyí nū.

¹⁶“Ɔ́dāŋ ka ɔ̄cɛ kwú ajɛ kú úgwū kú nū ú lɛ Óndú ā, ɔlá kú nū géē wɛ ɛ́gɛ́nɛ̄ áluka ɔdɛ̄hɔ̄, nɛ̄ ɔ̄cɛ géē nyi tū ɔɔ̄ glá ā. Ó géē gbā īkpō ije nɛ̄hɛ́ igwó kú ajɛ nōo géē yá īkpɔ̄dɛ̄hɔ̄ ukílōgram ofu glá ā.

¹⁷Ɔ́dāŋ kó kwú ajɛ ā ú lɛ Óndú ā bōōbū nɛ̄ iháyí kú ɔdā o je cīgbīhi lɛ óndú nū ā gaá yɛ, ó géē gbā odúúdú ije nōo wɛ ɔ́lá nū ā.

¹⁸Ɔ́dāŋ koó je ajɛ ā lɛ Óndú ā igbīhāajɛ, ɔ̄cogwɛ́ɛya ā géē hɛ́ ɔ́lá nū ɛ́gɛ́nɛ̄ ije kú iháyí nōo hile kú ajɛ ō cīgbīhi lɛ óndú nū kú igbɔhá ā lɛ ā, cɛ́ɛ́ ó lɛ ɔ́lá ā tú wāajɛ.

¹⁹Ɔ́dāŋ ka ɔ̄cɛ nōo je ajɛ ā lɛ Óndú ā dɔɔ̄kā kóō fūla anú. Ó géē cíla ulé nú klla í lɛ ije ofu ŋmá ipú ofɛhɔ̄ ce ɛyí nū.

²⁰Ɔ́dāŋ koó kwú ajɛ ā ú lá lɛ ɔ̄cɛ ɔhá, nōó fūla ɔ́ ŋmá ɛgiyí Óndú ā gbɔbū ŋ́. É gáā lɛ íkwu ō fūla anú igb ɔhá ɛ́ɛ́ gɛ ŋ́.

²¹Ɛpléeko kú ɔdā ō je cīgbīhi lɛ óndú nū kú iháyí ɔhá ā, ó géē je pīya ákú Óndú ā piyóó. Ó géē wɛ ákú ācogwɛ́ɛya ā.”

²²Ɔ́dāŋ ka ɔ̄cɛ kwú ajɛ nōó lá ā ú lɛ Óndú ā,

²³ɔ̄cogwɛ́ɛya ā géē hɛ́ ɔlá nū, ɛ́gɛ́nɛ̄ eko nōo hile ɛ́ɛ́ kú iháyí kú ɔdā ō je cīgbīhi lɛ óndú nū ā kóō yá ā lɛ ā. Ɔ̄cɛ ā géē cíla ije ā ícíícɛ ɔ́ɔmā. Ije ā géē wɛ ákú Óndú ā.

²⁴Eko kú iháyí kú ɔdā ō je cīgbīhi lɛ óndú nū ā, é géē je ajɛ ā cīgbīhi lɛ ɔ̄cɛ nēé lá ŋmá abɔ̄ nū aflɛ́yí ā ámāŋ ka ayááyí nū.

²⁵Ɔ́lá kú odúúdú aɔ́dā nēe bá nyā géē wɛ ɛ́gɛ́nɛ̄ é ī hɛ́ ɔ́lá kú Áklɔ̄kpīihɔ kú Óndú ā lɛ ā.

²⁶Ɔyí aflɛ́yí kú ɛbɛ́ ɔlɛ́ dóódu wɛ ákú Óndú ā, nōo wɛ Ɔwɔicō ā, ohígbū ɔ́ɔmā, ɔ̄cɛ dúúmā kóō je ɔ́ lɛ Óndú ā kóō wɛ ɔdā ɛhi ɛ́ɛ́ gɛ ŋ́. Ó kōō wɛ ɔyí ɛna ámāŋ ɔyí álá, ámāŋ ka ɔyí ɛwū, ó wɛ ákú Óndú ā.

²⁷Amáŋ é géē fūla ɔyí aflɛ́yí kú ɛbɛ́ ɔlɛ́ nōo wɛ ɛbéelihɔ dóódu mla ɔlá kú Áklɔ̄kpīihɔ ā. Cɛ́ɛ́ é lɛ ije ofu ŋmá ipú ofɛhɔ̄ ce ɔ́láā ɛyí. Ɔ́dāŋ keé hīla anú ŋ́, é géē je ɔ́ lá lɛ ɔ̄cɛ ɔhá ɔ́lá ɔlamu.

²⁸Ɔdā dóódu nɛ̄ ɔ̄cɛ kwú lɛ Óndú ā dúúdú, ɔ̄cɛ dúúmā í gáā fūla anú ŋ́. Ó kōō wɛ ɔ̄cɛ ɔlamu, ámāŋ ɛbɛ́ ámāŋ ajɛ. Ó wɛ ákú Óndú ā piyóó.

²⁹Kwu ɔ̄cɛ ɔlamu nēé kwú lɛ Óndú ā piyóó, é gáā hīla anú ŋ́, é géē je ɔ̄cɛ ɔ́ɔmā ŋmó.

³⁰Éyi ŋmá ipú igwó kú odúúdú ɔdɛ̄hɔ̄, mɛ́mla īkpɔ̄cí kú ajɛ ā wɛ ákú Óndú ā.

³¹Ɔ́dāŋ ka ɔ̄cɛ dúúmā dɔɔ̄kā ō fūla odóódu kú nū, ó gé cíla ulé nū, ɛ́gɛ́nɛ̄ ɔlá nū lɛ ā. Ó klla í lɛ ije ofu ŋmá ipú ofɛhɔ̄ ce ɛyí ɔ́lá ā.

³²Éyi ŋmá ipú igwó kú odúúdú ɛbɛ́ ɔlɛ́ kú aá ā wɛ ákú Óndú ā. Eko nɛ̄ aá géē gbo aɛ́bɛ́ ā áluka ā, éyi ŋmá ipú igwó kú uwā wɛ ákú Óndú ā.

³³Óndú kú ɛbɛ́ ā í gáā jila ɔ́ kóō má ɛyɛ́ɛyɛ́yí kú obɔ̄bí mɛ́mla olɔhi kú ɛbɛ́ ā ŋ́, ɛ́ɛ́ nēé kōō je ɔ́ fūlabɔ̄ ŋ́. Ɔ́dāŋ koó kōō kwú ɔ̄ ú fūlabɔ̄ mla ɛbɛ́ ɔhá, ó lɛ ā, aɛ́bɛ́ ɛplɛ́ɛpa ā géē wɛ ákú Óndú ā, cɛ́ɛ́ é kē je ɔ́ fūla glá gɛ ŋ́.

³⁴Ɛ̄nyā wɛ íne nɛ̄ Ɔwɔicō je lɛ Umósīsi ɛyí ɛfu kú Usáyínāyi á.