Read idoma ULĪFAYI 3 Bible Online

ULĪFAYI 3 - idoma bible

ULĪFAYI 3

¹Ɔ́dāŋ́ ka ɔ̄cɛ dúúmā gāá je odée gwɛ́ɛya kú olétɔ̄há mɛ́mla ɛbɔ́ nɛɛ, ó géē wɛ ɔbá ɛna nōó lɛ ɛnyá dúúmā ŋ́.

²Ɔ̄cɛ ā géē kpó abɔ̄ kú nū ce ɔ́ ɛyí, cɛ́ɛ́ é lɛ ɛna á ŋmó okómpīinu kú Áklɔ̄kpīihɔ kú Ɔwɔicō. Ayínɔ̄nyīlɔ kú ɔ̄cogwɛ́ɛya ā géē mī oyī kú ɛna ā klá ɔ́kíka ɛnɛ kú ede ā.

³Ó géē je ɛgiyí ɛbɛ́ nēe bá nyā lɛ Óndú ā: odúúdú ijē mɛ́mla iyíipú nū.

⁴Íkplí mɛ́mla ɛga olɔhi fíyɛ́ dúú kú anyī ā.

⁵Ācogwɛ́ɛya ā géē je aáyā nēe bá nyā yɔlá mɛ́mla ɛya o yɔlá dúúdú ā. Ocu kú ɛya kú ɔdōlé nyā gē he Óndú ɔtū á.

⁶Ɔ́dāŋ́ ka álá ámāŋ ka ɛwū nēé bī wā kú ɛya kú olétɔ̄há mɛ́mla ɛbɔ́ á nɛɛ, ó lɔfú wɛ ɔbá ámāŋ ɔnyā glá. Amáŋ ó gáā lɛ ɛnyá dúúmā ŋ́.

⁷Ɔ́dāŋ́ ka ɔ̄cɛ éyi lɛ álá bī wā í le gwɛ́ɛya nyā á nɛɛ,

⁸ó géē kpó abɔ̄ kú nū ce ɔ́ ɛyí, cɛ́ɛ́ é lɛ ɔ́ ŋmó okómpīinu kú Áklɔ̄kpīihɔ kú Ɔwɔicō ā. Ācogwɛ́ɛya ā géē mī oyī kú nū klá ɔ́kíka ɛnɛ kú ede ā.

⁹Ɛgiyí ɛbɛ́ nēe bá nyā géē wɛ ákú Óndú ā: ijē kú nū, ugbé mɛ́mla útūgbé kú nū, mɛ́mla odúúdú ijē nōo klá iyíípú kú nū ā,

¹⁰íkplí mɛ́mla ijē kú íkplí ā, mɛ́mla ɛga olɔhi fíyɛ́ dúú kú anyī kú nū ā.

¹¹ɔ̄cogwɛ́ɛya ā géē je ɛjɛ̄ɛ̄jī ɛ̄nyā yɔlá ɛyí ede kóō wɛ ɛya kú ɔdōlé lɛ Óndú ā.

¹²Ɔ́dāŋ́ ka ɛwū nɛ̄ ɔ̄cɛ ā je á nɛɛ,

¹³ó géē kpó abɔ̄ kú nū ce ɔ́ ɛyí. Cɛ́ɛ́ é lɛ ɔ́ ŋmó okómpīinu kú Áklɔ̄kpīihɔ kú Ɔwɔicō ā. Ācogwɛ́ɛya ā géē mī oyī kú nū klá ɔkíká ɛnɛ kú ede ā.

¹⁴Ó géē je ɛgiyí ɛbɛ́ nēe bá nyā kéē wɛ ɔdōlé kú Óndú ā: odúúdú ijē nōo klá iyíipú kú nū ā,

¹⁵íkplí mɛ́mla ijē kú nū mɛ́mla ɛga olɔhi fíyɛ́ dúú kú anyī ā.

¹⁶Ɔ̄cogwɛ́ɛya ā géē je ɛjɛ̄ɛ̄jī ɛ̄nyā yɔlá ɛyí ede ā kóō wɛ ɔdōlé nɛ̄ ocu kú nū gē he Óndú ā ɔtū. Ódúúdú ijē ā wɛ ákú Óndú ā.

¹⁷Ɔ̄cɛ kú Ísrɛ̄lu dóódu í gáā lé ijē ámāŋ oyī kú ɛbɛ ŋ́. Ɛ̄nyā wɛ íne nɛ̄ ācɛ kú Ísrɛ̄lu géē le tū piyóó, ɛga dóódu nēé lā.