Read idoma ULĪFAYI 4 Bible Online

ULĪFAYI 4 - idoma bible

ULĪFAYI 4

¹Óndú ā da Umósīsi kahíníī,

²“Le ka lɛ ācɛ kú Ísrɛ̄lu ā ka, ɔ́dāŋ ka ɔ̄cɛ dúúmā lɛ íne bīya, ŋmá lɛ ō yá ɔdā nɛ̄ Óndú ā je íne kéē híī yá ŋ́ mā, nōó jégēdē bīya íne ā ŋ́. Ɔdā nōó géē yá ā bá yɔ̄ á,”

³Ɔ́dāŋ́ ka otrɛ̄yí kú ācogwɛ́ɛya le íne bīya nōo yá kéē lɛ ācɛ ā ŋmɛ́pɔ̄bí á nɛɛ, ó géē bī ɛdrɔ́ kú ɔbá ɛna, nōó lɛ ɛnyá ŋ́, gwɛ́ɛya kú íne nōó bīya ā lɛ Óndú ā.

⁴Ó géē bī ɔbá ɛna ā wā Okómpíinu kú Áklɔ̄kpīihɔ ā iyɔ̄bū Óndú. Ó géē kpó abɔ̄ kú nū ce ɔ́ ɛyí, cɛ́ɛ́ é lɛ ɔbá ɛna ā ŋmó abɔ́ɔ, ipéyī Óndú ā.

⁵Otrɛ̄yí kú ācogwɛ́ɛya ā géē hɛ́ oyī kú ɛbɛ́ ā wā ipú Áklɔ̄kpīihɔ ā.

⁶Ɔ̄cogwɛ́ɛya ā géē lɛ ayíkābɔ̄ kú nū wu oyī kú ɛna ā, cɛ́ɛ́ ó lɛ ɔ́ mī klá ukɔ́tin kú ede ā, igbo ahāapa.

⁷Ó í lɛ ōhī kú oyī ā kwu aájī kú ede kú ɔtulalī umuumu nōo yɔ̄ ipú Áklɔ̄kpīihɔ ā. Ó géē pīya ohile kú oyī ā tū ɔkwu kú ede kú ɛga o yi odée ɔlá ɛyí nū ā. Ede nyā yɔ̄ okómpīinu kú Áklɔ̄kpīihɔ kú Óndú ā.

⁸Ó kpó odúúdú ijē kú ɔbá ɛna kú ɛya nōó gwó kú íne nōó bīya ā ŋmá anú, mɛ́mla ijē nōo klá iyíipú ā,

⁹íkpli kú nū mɛ́mla ijē kú nū ā, mɛ́mla ɛga olɔhi fíyɛ́ dúú kú anyī ā.

¹⁰(Bɛ̄ɛka ɛ́gɛ́nɛ̄ é gē wā ŋmá ipú kú ɔbá ɛna kú ɛya nēé gwó kú ɛbɔ́ ā). Ɔ̄cogwɛ́ɛya ā géē je ɔ́ yɔlá ɛyí ede kú ɛya o yɔlá dúúdú ā.

¹¹Amáŋ, ó géē kpó ɔkpá kú nū, odúúdú ícɛ̄bɛ́ kú nū, īkpɛ̄yí kú nū, aíkpó kú nū mɛ́mla iyíipú kú nū, mɛ́mla ajīlīpú kú nū dúú.

¹²Ó géē kpó odúúdú nū ga iyɛ̄ɛcɛ kú ɛga nēé lā ā, ɛga oyēŋēē nēé gē pīya ewo bónū ā. Cɛ́ɛ́ ó kwú ɔ̄ ú kpó yɔlá ɛyí ɛfɔ́lá abɔ́ɔ.

¹³Ɔ́dāŋ́ ka odúúdú ójīla kú ācɛ kú Ísrɛ̄lu ā le íne kú Óndú ā bīya, nēé le ɛpɔ̄bí kú íne éyi kú Óndú ā nēé bīya ā lé, nēé jégēdē ŋ́,

¹⁴eko nɛ̄ ɔkwu kú íne nēé bīya ā gā ɛcɛ, ójīla ā géē bī ɛdrɔ́ kú ɔbɛ́ɛna kú ɔdā ɛ̄gbā kú ɛya kú íne nēé bīya ā. É géē bī ɔ́bɛ́ɛna ā wā ipú Áklɔ̄kpīihɔ ā ɛga nɛ̄ Óndú ā yɔ̄ ā.

¹⁵Cɛ́ɛ́ odúúdú anyākwɔ́cɛ kú ācɛ kú Ísrɛ̄lu ā géē kpó abɔ̄ ce ɛna ā ɛyí ipēyī Óndú ā, cɛ́ɛ́ é lɛ ɔ́ ŋmó abɔ́ɔ.

¹⁶Otrɛ̄yí kú ācogwɛ́ɛya ā géē bī ōhī kú oyī kú ɛna ā ga ipú Áklɔ̄kpīihɔ ā.

¹⁷Ɔ̄cogwɛ́ɛya géē lɛ ayíkābɔ̄ kú nū wu ipú oyī ā, cɛ́ɛ́ ó lɛ ɔ́ mī klá iyɔ̄bū ukɔ́tin ā igbo ahāapa.

¹⁸Ó géē lɛ ōhī kú oyī ā kwu ajī kú ede kú ɔtulalī umuumu nōo yɔ̄ ipú Áklɔ̄kpīihɔ ā. Cɛ́ɛ́ ó kwú oyī ohile ā ú pīya tū ɛháajɛ kú ede nēé gē yi odée ɔló ɛyí nū ā, nōo yɔ̄ okómpīinu kú Áklɔ̄kpīihɔ ā.

¹⁹Ó géē kpó odúúdú ijē kú ɛna ā ŋmá ipú nū, í je ɔ́ yɔlá ɛyí ede ā.

²⁰Ó géē yá ɔdā éékpó mɛ́mla ɔbɛ́ɛna nyā ɛ́gɛ́ ɔdā nōó yá mla ɔbɛ́ɛna nēe gē gwu íne nēé bīya ā. Ɔwɛ ɛ́gɛ́nyā nōó géē le gwɛ́ɛya kóō je yɛ́ɛhi kú íne nɛ̄ ācɛ ā bīya á. Cɛ́ɛ́ é kwú yá uwā ɛhi.

²¹Ó géē je ɔbɛ́ɛna ā ga eyīyɛ̄ɛcɛ kú ɔlɛ́ ā, cɛ́ɛ́ ó kwú ɔ̄ í yɔlá abɔ́ɔ ɛ́gɛ́nɛ̄ ó je ɔbɛ́ɛna kú íne ō bīya ā yɔlá ā. Ɛ̄nyā wɛ ɛya nēé gwó kóō kpó íne nɛ̄ ójīla bīya ā nyɔ̄ á.

²²“Eko nɛ̄ otrɛ̄yí kú ācɛ lɛ íne bīya, nēé le ɔ́ ŋmɛ́pɔ́bí kóō bīya éyi kú íne kú Óndú ā, nōó jégēdē ŋ́.

²³Ɔ́dāŋ́ keé le íne nōó bīya ā mafú lɛ ɔ́, iyɛ́ɛya kú ɛ̄gbā nōó géē bī wā ā wɛ, opī nōó lɛ ɛnyá dúú ŋ́.

²⁴Ó géē lɛ abɔ̄ ce opī ā ɛyí, klla í ŋmó ɔ̄ ābɔ̄ ɛhícō kú ede, ɛga nēé gē ŋmó ɛbɛ́ kú ɛya ō yɔlá, ipéyī Óndú ā. Ɛ̄nyā wɛ ɛya nēé gwó kóō kpó íne nɛ̄ ɔ̄cɛ bīya ā nyɔ̄ á.

²⁵Ɔ̄cogwɛ́ɛya ā géē lɛ ayíkābɔ̄ kú nū wu oyí kú ɛbɛ́ ā, lɛ ɔ́ kwu aájī kú ɔ́kíkā ɛnɛ kú ede kú ɛya o je yɔlá ā. Cɛ́ɛ́ ó kwú oyī ohile ā ú pīya tū ɔkwu kú ede ā.

²⁶Ó géē je odúúdú ijē kú nū ā yɔlá ɛyí ede ā, bɛ̄ɛka ɛ́gɛ́nɛ̄ ó gē je ijē kú ɛbɛ́ kú ɛya kú olétɔ̄há mɛ́mla ɛbɔ́ ā. Ɔwɛ ɛ́gɛ́nyā nɛ̄ ɔ̄cogwɛ́ɛya ā, géē gwɛ́ɛya kú íne nɛ̄ otrɛ̄yí ā bīya ā. Cɛ́ɛ́ é kwú íne nōó bīya ā ú yá ɔ́ ɛhi.

²⁷“Ɔ́dāŋ́ ka ofllajɛ lɛ íne bīya, anɔ́ɔ é lɛ ɔ́ ŋmɛ́pɔ̄bī kú íne éyi kú Óndú nōó jégēdē bīya ŋ́ mā,

²⁸eko nēé le da ɔ́ ka íne nōó bīya á, ó géē bī ɔnyā ɛwū nōó lɛ ɛnyá ŋ́, kóō wɛ ɔdā ɛ̄gbā kú ɛya kú nū.

²⁹Ó géē lɛ abɔ̄ kú nū ce ɛwū ā ɛyí. Cɛ́ɛ́ ó lɛ ɔ́ ŋmó ɛhícō kú ede ā, ɛga nēé gē ŋmó ɛbɛ́ ɛ̄gbā kú ɛya ō yɔlá ā.

³⁰Ɔ̄cogwɛ́ɛya ā géē lɛ ayíkābɔ̄ kú nū wu ōyī kú ɛbɛ́ ā, lɛ ɔ́ kwu aájī nēe kwu ɔ́kíkā kú ede ā, cɛ́ɛ́ ó kwú oyī ohile ā ú pīya tū ɔkwu kú ede ā.

³¹Ó géē kpó odúúdú ijē kú nū ā, ŋmá anú, ɛ́gɛ́nɛ̄ é kpó ŋmá ɛbɛ́ kú ɛ̄gbā kú ɛya kú olétɔ̄há ā. Cɛ́ɛ́ ó géē je ɔ́ yɔlá ɛyí ede, kóō ocu kú nū kóō he Óndú ā ɔtū. Ɔ̄cogwɛ́ɛya ā géē bī ɔwɛ ɛ́gɛ́nyā le gwɛ́ɛya kú íne nɛ̄ ɔ̄cɛ ā bīya ā. Cɛ́ɛ́ é kwú íne nōó bīya ā í yá ɔ̄ ɛhi.

³²Ɔ́dāŋ́ ka ɔ̄cɛ ā lɛ álá bī wā kú ɔdā ɛ̄gbā kú ɛya kú íne ō bīya nɛɛ, ó í wɛ ɔnyā álá nōó lɛ ɛnyá ŋ́.

³³Ó géē lɛ abɔ̄ kú nū ce ɔ́ ɛyí, cɛ́ɛ́ ó lɛ ɔ́ ŋmó ɛhīcō kú ede ā, ɛga nēé gē ŋmó ɛbɛ́ kú ɛya ō je yɔlá ā.

³⁴Ɔ̄cogwɛ́ɛya ā géē lɛ aíkābɔ̄ kú nū wu ōhī kú oyī ā, cɛ́ɛ́ o lɛ ɔ́ kwu aájī nēe yɔ̄ ɔ́kíka kú ede ā. cɛ́ɛ́ ó kwu ohile kú oyī ā ú ce tū ɔkwu kú ede ā.

³⁵Ó géē kpó odúúdú ijē kú nū, ɛ́gɛ́nɛ̄ é kpó ijē ŋmá ipú kú álá nēé ŋmó kú ɛya kú olétɔ̄há ā. Cɛ́ɛ́ ó le ɔ́ kpó yɔlá tɔ̄há mɛ́mla ɔdōlé ɛ̄gbā kú ɛya nēé je lɛ Óndú ā. Ɔ̄cogwɛ́ɛya ā géē bī ɔwɛ nyā le gwɛ́ɛya kú íne nɛ̄ ɔ̄cɛ ā bīya ā. Cɛ́ɛ é kwú íne nōó bīya ā í yá ɔ̄ ɛhi.