Read idoma ULĪFAYI 5 Bible Online

ULĪFAYI 5 - idoma bible

ULĪFAYI 5

¹É géē gwɛ́ɛya kú ínobīya ohígbū aɔ́dā nɛ̄ bá nyā. Ɔ́dāŋ́ keé lɛ ɔ̄cɛ dúúmā hīīgwú kóō wā í lɛ ijáalí cɛ̄ ɔnɛ̄pɔ̄. Anɔ́ɔ ó wā í lɛ ijáalí cɛ̄ kú ɔdā nōó má ŋ́ ámāŋ ka ɛ̄nɛ̄ ó pó ŋ́ má. É géē yá ɔ̄ italā.

²Ɔ́dāŋ́ ka ɔ̄cɛ dúúmā í jégēdē ŋ́, lɛ abɔ̄ kwu ɔdēelihɔ dúúmā, lɛbɛ̄ɛka okwū kú ɛbɛ́, ɔ̄cɛ ɛ́gɔ́ɔmā kwú īyī nū tēelīhɔ. Ó kē lɛ ɛpɔ́bí lé ɔkwɔɔkwu nōó le ɔdā nōó yá ā jé ā.

³Ɔ́dāŋ ka ɔ̄cɛ dúúmā í jégēdē ŋ́, lɛ abɔ̄ kwu ɔdēelihɔ kú ɔlɛɛcɛ dóódu, ɛdɔ ɔdēelihɔ dúúmā, ó le ɛpɔ̄bí lé ɔkwɔɔkwu nōó le ɔdā nōó yá ā jé ā.

⁴Ɔ́dāŋ ka ɔ̄cɛ lɛ okónu icííci ce ipéyī Ɔwɔicō, kóō yá olɔhi o, kóō yá ɔdōbɔ̄bí, ɛ́gɛ́ dúú nōó lɛ, ó le ɛpɔ̄bí lé ɔkwɔɔkwu nōó le ɔdā nōó yá ā jé ā.

⁵Eko nɛ̄ ɔ̄cɛ ā lɛ ɛpɔ̄bí lé, ó géē ka ɔdōbɔ̄bí nōó yá ā tɛ́ɛcɛ.

⁶Ó géē bī ɔnyā ɛwū ámāŋ ɔnya álá wā gé lɛ Óndú ā kóō wɛ ɔdā ɛ̄gbā kú ɛya kú íne nōó bīya ā. Ɔ̄cogwɛ́ɛya ā géē gwɛ́ɛya kú íne nɛ̄ ɔ̄cɛ ā bīya ā.

⁷Amáŋ, ɔ́dāŋ ka ɔ̄cɛ ā í má álá ámāŋ ka ɛwū ŋ́, ó géē bī okóohō ɛpa ámāŋ ɔklɛ́ɛbɛ́tɛ ɛpa gé lɛ Óndú ā. Cɛ́ɛ́ kóō wɛ ɔdā ɛ̄gbā ō gwɛ́ɛya kú íne ō bīya. Éyi wɛ ákú íne ō bīya, ɔhá kē wɛ ákú ɛya o yɔlá dúúdú.

⁸Ó géē bī uwā wā gé lɛ ɔ̄cogwɛ́ɛya ā. Cɛ́ɛ́ ɔ̄cogwɛ́ɛya ā kwú okóohō ā ú gwɛ́ɛya kú íne ō bīya ā aflɛ́yí. Ó géē je ɔ́ ɔkɔ nya gbiíli, amáŋ ó gáā fu īkpɛ̄yí kú nū ŋmá ɔkɔ kú nū ŋ́.

⁹Cɛ́ɛ́ ó lɛ oyī kú nū ōhī mī klá áklō kú ede ā. Ó géē pīya oyī ohile ā tū ɔkwu kú ede ā. Ɛya nyā gē kpó íne nɛ̄ ɔ̄cɛ ā bīya ā bónū.

¹⁰Ó géē je ɔklɛ́bɛ́tɛ ā gwɛ́ɛya o yɔlá ɛ́gɛ́nɛ̄ íne kú nū lɛ ā. Ɔwɛ nyā ā, nɛ̄ ɔ̄cogwɛ́ɛya ā géē gwɛ́ɛya kú íne nɛ̄ ɔ̄cɛ ā bīya ā á. Cɛ́ɛ́ é kwú íne nōó bīya ā ú yá ɔ̄ ɛhi.

¹¹Amáŋ, ɔ́dāŋ ka ɔ̄cɛ ā í má abɔ̄ ō je okóohō ɛpa ámāŋ ka oklɛ́ɛbɛ́tɛ ɛpa ā ŋ́, ó géē bī okoolo kú umu éyi kóō wɛ ɔdā ɛ̄gbā kú ɛya kú íne nōó bīya ā. Ó gáā lɛ anɔ̄ kú ólīifu, ámāŋ ka ɔtulālī umuumu dóódu tū ɔ̄ ŋ́. Ohígbū ka ɛya kú íne ō bīya nōó wɛ á, ó wɛ ɛya kú ikpɔ̄dɛ̄hɔ̄ ŋ́.

¹²Ó géē bī ɔ̄ gé lɛ ɔ̄cogwɛ́ɛya ā. Ɔ̄cogwɛ́ɛya ā géē lɛ abɔ̄ fú ɔ̄ omōōmu kú ɛya kú ōblatū nēé je lɛ Óndú ā. É kē í je ɔ́ yɔlá ɛyí ede kóō wɛ ɛya o yɔlá dúúdú. Ó wɛ ɛya kú íne ō bīya bónū.

¹³Ɔwɛ nyā nɛ̄ ɔ̄cogwɛ́ɛya ā géē gwɛ́ɛya kú íne nɛ̄ ɔ̄cɛ ā bīya ā á. Cɛ́ɛ́ é géē je íne nōó bīya ā yá ɔ̄ ɛhi. Umu nōo hile ā wɛ ákú ɔ̄cogwɛ́ɛya ā, ɛ́gɛ́nɛ̄ ó lɛ mla ɛya kú īkpɔ̄dā ā.

¹⁴Óndú ā le aíne nēe bá nyā kpó lɛ Umósīsi.

¹⁵“Ɔ́dāŋ́ ka ɔ̄cɛ dúúmā í jé ŋ́ tá ō je ɔdā ōtīihɔ nōó cíkā ō je lɛ Óndú ā lɛ ɔ́, ó le íne bīya. Ó géē bī omlede ámāŋ opī nōó lɛ ɛnyá ŋ́ gé lɛ Óndú ā kóō wɛ ɛ̄gbā kú ɛya kú ɛpɔ̄bí ō lé. Ɔlá kú nū géē wɛ oje nɛ̄hɛ́, ɛ́gɛ́nɛ̄ ɔ́lá kú nū Áklɔ̄kpīihɔ cíkā ō lɛ ā.

¹⁶Ó géē cíla ulé kú ɔdā otīihɔ nōó je lɛ Óndú ā ŋ́ mā piíí. Ó klla géē gbā ɛga ofu ŋmá ipú ofɛhɔ̄ kú nū. Ó géē je ɔ́ lɛ ɔ̄cogwɛ́ɛya ā, cɛ́ɛ́ ɔ̄cogwɛ́ɛya ā kwú ɛbɛ́ ā ú gwɛ́ɛya kú íne nɛ̄ ɔ̄cɛ ā bīya. Cɛ́ɛ́ é kwú íne nōó bīya ā í yá ɔ́ ɛhi.

¹⁷Ɔ́dāŋ ka ɔ̄cɛ dúúmā í jégēdē ŋ́ le íne kú Óndú ā bīya, nááná nōó jé ŋ́ mā, ó le ɛpɔ̄bí lé kpɔ́. Ó géē cílá ulé kú ɔdā nōó yá ā.

¹⁸Ó géē bī omlede ámāŋ opī nōó lɛ ɛnyá ŋ́, gé lɛ ɔ̄cogwɛ́ɛya ā kú íne nōó bīya ā. Ɔ̄cogwɛ́ɛya ā géē gwɛ́ɛya kú íne ō bīya ā, cɛ́ɛ́ é kwú íne nōó jégēdē ŋ́ bīya ā ú yá ɔ̄ ɛhi.

¹⁹Ɛ̄nyā wɛ ɛya nēé gwó kú íne kú Óndú ā nōó bīya ā.