Read idoma UJƐRƐMÍYA 1 Bible Online

UJƐRƐMÍYA 1 - idoma bible

UJƐRƐMÍYA 1

¹Ɔ̄cɛ eyī yɔ̄ nɛ̄ iyē kú nū lé ka Ujeremíya. Ó kē wɛ ɔyí kú Uhílikíya, nōo wɛ éyi kú ācogwɛ́ɛya nēe ŋmá igelī nɛ̄ŋcɛ́ nēé hī ka Anátɔ̄tu ipú ajɛ kú Ubénjamini ā. Ɔdā nēé tá tū ipú ɔkpá nyā ā wɛ ɛlā nɛ̄ Ujeremíya ɔ́ɔmā ka āa.

²Óndú ā kɛlā lɛ Ujeremíya aflɛ́yí ipú iháyí igwɛ́ɛtá nɛ̄ Ujosíya, ɔyí kú Ámɔ̄ri, lé ɔcɛ́ kú Ujúda ā.

³Óndú ā kɛlā lɛ ɔ́ igbɔhá kpɔ́, eko nɛ̄ ɔyí kú Ujosíya, Ujɛhóyākim, ce ɔcɛ́ kú Ujúda ā. Igbīhi ɛnyā, Óndú ā klla kɛlā lɛ ɔ́ igbɔhá kpɔ́ igbalɛwa jāā ga ipú iháyí ɔ́migwóléyi nɛ̄ Usɛdɛkíya, ɔyí kú Ujosíya ce ɔcɛ́ ā. Ipú ɔyā ɛhɔ̄ kú iháyí ɔ́ɔmā ā nēé kpó ācɛ kú Ujerúsālɛm ɔfiyɛ ga ajɛ kú aéwɔhá á.

⁴Ujeremíya kahíníī, “Óndú ā da um kahíníī,

⁵‘N jé uwɔ gbɔbū ɛ́ɛ́ nɛ̄ n yá uwɔ tá ipú ɛ́nɛ́ uwɔ á. Gbɔbū ɛ́ɛ́ nɛ̄ ɛ́nɛ́ uwɔ ma uwɔ ā, n lɛ uwɔ fu ɛɛ́. N lɛ uwɔ fu ká ā wɛ ɔ̄comɛ́ɛbɛ lɛ odúúdú ācɛ kú aéwo.

⁶Anɔ́ɔ n kahíníī, “Woó Óndú ā! Awɔ abɔ̄yī uwɔ nōo wɛ Ɔwɔicō ā, leyī yɛ ɔ́ cɛ́ɛ́ kú ā má ɔ̄, a kē jé ka n wɛ ɔyípɛ̄ nōó jé ō kɛlā dóódu ŋ́.”

⁷Amáŋ Óndú ā da um kahíníī, “Ā híī ka ka anúɔ wɛ ɔyípɛ̄ ŋ́. Amáŋ a géē ga ɛgiyí odúúdú ācɛ nɛ̄ n géē tū uwɔ ɛhɔ̄ fu uwá ā. Ɛlā dúúmā nɛ̄ n da uwɔ ka ā da uwá ā, nɛ̄ a kē í ka lɛ uwá á.

⁸Ā híī yúufi uwā ŋ́, a kē jé ka n yɔ̄ pī uwɔ cɛ́ɛ́ kú um gbō uwɔ. Ami nōo wɛ Óndú ā ka lɛ ā á.”

⁹Anɔ́ɔ Óndú ā le abɔ̄ kú nū nā daa gāá kwu um okónu. Ó da um kahíníī, ‘Mɔ́ɔ̄, n kwú ɛlā kú um ú tá uwɔ okónu ɛɛ́.

¹⁰Ujeremíya, ícɛ nyā n lɛ íkwu je ga uwɔ lɛyíkwu odúúdú aéwo mɛ́mla ajɔ̄ɔ̄cɛ́. N le uwɔ fu ká ā fu uwá ɔkwu ŋmá ajɛ, ká ā klla wúla uwá tāajɛ. N le uwɔ fu ká ā kpó uwá yíífi, ká ā klla lɛ uwá bī wāajɛ. N klla fu uwɔ ká ā gwó uwā, ká ā klla yá kéē jɛ̄ bɛ̄ɛka ɔcí ā.’

¹¹Igbīhāajɛ Óndú ā gaá da um kahíníī, ‘Ujeremíya, ɔdí nɛ̄ a yɔ̄ ī má ā?’ Anɔ́ɔ n da ɔ́ ka n yɔ̄ ī má ābɔ̄ kú ɔcí nɛ̄é hī ka álmɔ̄ndu ā.”

¹²Anɔ́ɔ Óndú ā da um kahíníī, ‘Á má ɛbɛ lɔhi. Ɔ́ɔmā mafú ka n leyīkwu ɛcɛ gɛɛɛ ká n yá kú ɛlā kú um kóō le yá jīla.”

¹³Óndú ā klla gaá le ɛlā ka gā um igbo ɔ́mpa kahíníī, ‘Ɔdí nɛ̄ a yɔ̄ ī má āa?’ Anɔ́ɔ n tóohi kahíníī, “N má ɛ̄hī nōo ce ɔlá le nwula tɔ́ɔtɛ́ leyī pīya kwu ɛgɔhá ŋmá ɛhícō. Ó kē yɔ̄ ī wú juújuú.”

¹⁴Anɔ́ɔ Óndú ā da um kahíníī, ‘Ɛyí kú ɔ́ɔmā wɛ ka é géē wā ŋmá ipú ajɛ kú aéwɔhá éyi nōo yɔ̄ ajɛ kú ɛhícō ā, gaá kpó odúúdú ācɛ kú ajɛ Ujúda ā yíífi.

¹⁵Ó géē lɛ ā ohígbū ka um yɔ̄ ī hī odúúdú aéwɔhá nēe lā ɛhícō ā igwú. Odúúdú uwā géē pɛ́ wā. Ɔnyɔɔnyɛ kú aéwo ā kē í je akpa kú ɔcɛ́ kú nū kwaajɛ Okómpinu kú igá kú Ujerúsālɛm. É kē í gaá cīíbɔm tū ɔdɔ kú Ujerúsālɛm ā biílí klla í kpɛ́fú tú odúúdú aígelī ɔhá kú ajɛ Ujúda ā.

¹⁶N géē kɛpɔ̄ tū ācɛ ɔlɛ́ um, ohígbū ɔ́bíipú nēé bī ŋmá lɛ ō je igbīhi ce kwu um ā. É gē gwɛ́ɛya lɛ aɛ́cí, klla ī gbā aójibó nēé bī abɔ̄ kú uwā le yá ā ɛ̄gbā.

¹⁷Amáŋ Ujeremíya, awɔ ā kóō cāŋjɛ ká ā le tútū. Cɛ́ɛ́ ká ā nyɔ gaá lɛ odúúdú ɛlā nɛ̄ n gē ka gā uwɔ ā da uwá. Ā híī yúúfi uwā ŋ́, ámaŋ́ n géē tū uwɔ ufi nɛ̄hi ipéyī uwā.

¹⁸Má ɔ̄ɔ, ícɛ nyā, n géē lɔfú tū uwɔ iyē í gbō uwɔ nɛ̄ a í lɛbɛ̄ɛka igelī nēé ce igá tū ɔ̄ɔ̄, mɛ́mla ákanaba nēé yá ŋmá oje mɛ́mla ɔdɔ nēé bī oje udɔ le gwó ā. Odúúmā ká aɔ́cɛ́ kú Ujúda, aígabɔ̄ kú Ujúda, ācogwɛ́ɛya kú Ujúda ámaŋ́ ka odúúdú ācɛ kú Ujúda í gáā fū uwɔ iyē ŋ.

¹⁹É géē nuunu tá uwɔ mm, amáŋ é gáā yá uwɔ lé glá ŋ́. Ohígbū ka ami nōo wɛ Óndú ā yɔ̄ pī uwɔ ká n̄ hɛ́ uwɔ tá.’”