Read idoma UJƐRƐMÍYA 10 Bible Online

UJƐRƐMÍYA 10 - idoma bible

UJƐRƐMÍYA 10

¹Ācɛ kú Ísrɛ̄lu, aá jāhɔ̄ lɛ ɛlā nɛ̄ Óndú ā yɔ̄ ī ka lɛ aá ā.

²Ó kahíníī, “Aá híī yá ucē mɛ́mla aúculo kú aéwɔhá ŋ́. Aá híī lɛbɛ̄ɛka aéwɔhá ā ká aá bá gē yúúfi aɔ́dōyéyījii nɛ̄ aá ī má ɔkpáncō ā ŋ́.

³Uculo kú aéwɔhá ā nēé ī bī le gbā Ɔwɔicō ɛ̄gbā ā í tīile dúúmā ŋ́. Ācɛ le tá ipú ūpū nyɔ̄ gaá lɛ ɔcí hɛ́ wāajɛ kéē gbā ojibó ŋmá anú. Ɔ̄cogbɔ̄cí bī ɔdu ō gbɔ̄cí kú nū lɛ ojibó ā gbā.

⁴É bī oje nɛ̄hɛ́ mɛ́mla ugóolu le ɔ́ yíifa. É klla bī aikwúsa lɛ ɔ́ hɛ́ kwú ajɛ, cɛ́ɛ́ kóō míya gwōnū ŋ́.

⁵Aíkpékwīja kú ɛcí kú uwā ɔ́ɔmā lɛbɛ̄ɛka aɔ́dā nēé í yá le kwu ɛhɔ̄ kú abafú kó ō tū aígbáanɔ ufi ā nɛ. É kɛlā glá ŋ́. Ācɛ gē kpó uwā yɛ, ohígbū ké ē yāwu abɔ̄yī uwā glá ŋ́. Aá híī yúúfi uwá ŋ́, ohígbū ka é yá aá ɔdōbɔ̄bí dúúmā glá ŋ́. É kē yá ɔdōōlɔhí lɛ aá glá ŋ́.”

⁶Óndú, ɔ̄cɛ dúúmā í yɔ̄ bɛ̄ɛka awɔ á ŋ́, A lɔfú nɛ̄hi, ācɛ kē jé uwɔ ŋmá lɛ ɛ́gɛ́nɛ̄ a lɔfú iyē nɛ̄hi lɛ āā.

⁷Awɔ wɛ ɔcɛ́ kú odúúdú aéwo á. Odúúdú ācɛ cíkā ō je ojīlīmā ga uwɔ. Ohígbū ka awɔ cíkā nēé ī le ojīlīmā ce uwɔ á. Odúúmā kú ācɛ ojéeyī mɛ́mla aɔ́cɛ́ kú aéwo kú odúúdú ɛcɛ nyā í tōō le gbla awɔ ŋ́.

⁸Odúúdú uwā wɛ aɔ́dāhá mɛ́mla aólíla. Aɛ́cí nēé gbā ŋmá ɔcí ā í nwū uwā ɔdā otīile dúúmā glá ŋ́.

⁹Ācoyúklábɔ̄ gbā aíkpékwīja nēe bá ā á. Ogbɔ̄cí le aíkpékwīja ā gbā, Onɔwá kē le oje nɛhɛ́ ŋmá Utásīisi mɛ́mla ugóolu ŋmá Ufási ma plā uwá. Cɛ́ɛ́ é klla le aílī nēe gbɔɔ́lá klla héyīfuuú kpó gɔ́ wū uwá iyē.

¹⁰Amáŋ, Óndú ā wɛ Ɔwɔicō abāābɔ̄yī nū á. Anú wɛ Ɔwɔicō nōo yēeyī á. Anú kē wɛ ɔcɛ́ piyóo klla ŋmá eko tá eko á. Eko dúúmā nōó le cɔ̄nū, odúúdú ɛcɛ gē jíliyē. Aéwo ā í kē lɔtū bī ícɔ̄nū kú nū háyi glá ŋ́.

¹¹Aá le da ācɛ nēe ī pā ɛcí ā kahíníī, “Ó wɛ aɛcí ā yá ɛcɛ ā mɛ́mla ɔkpáncō ā ŋ́. É géē je kpó yíífi ŋmá ɛháajɛ ŋmá ɔkpáncō mɛ́mla ipú ɛcɛ dúúdú.

¹²Óndú ā bī ɔfú kú nū yá ɛcɛ nyā á. Anú bī íjéeyī kú nū je ɛcɛ kwaajɛ kli á. Ó kē bī ɔdōōjé kú nū le ɔkpáncō nāŋ́da klá icō ɛga nɛ̄ ó yɔ̄ ā.

¹³Eko nōó lɛ ɔ́da je, cɛ́ɛ́ kú éŋkpɔ̄ nōo yɔ̄ ɔkpáncō ā[4] gbɔɔ́ ō tá úgbagwú. Ó gē bī ojuja wā ŋmá odúúdú aɛ́ga nɛ̄ ɛcɛ tá kwɛjī ā. Ó yá ká ɔwɔ kóō límanya abɔ̄ ɔwɔ ā yɔ̄ ī yā ā, klla ī bī owu wɛ̄ɛcɛ ŋmá ɛga nōó ī kpó ɔ̄ tū ā.

¹⁴Amáŋ odúúdú ācɛ wɛ olíla, é klla jé ɔdā dúúmā ŋ́. Aɛ́cí ā le uwēyī je lɛ ācɛ nēe ī yá ojibó kú uwā ā. Ohígbū ka aɛ́cí nēé yá ŋmá oje ā í wɛ ɔdā ɔkwēyi ŋ́. É kē yēeyī ŋ́.

¹⁵É le ile dúúmā ŋ́, é kē wɛ ɔdā nɛ̄ ācɛ cíkā ō leyī gwū uwā bónū. É géē je kpó yíífi, eko nɛ̄ Óndú ā gē kɛpɔ̄ tú uwā ā.

¹⁶Ɔwɔicō kú Ujékɔ̄pu, nōo lé ka Óndú ā nōo lɔfú fíyɛ́ dúú ā í lɛbɛ̄ɛka aɛ́cí ā ŋ́. Anú yá ɔdā dóódu á. Ó kē le ācɛ Ísrɛ̄lu ā fu kéē wɛ ācɛ ɔlɛ́ nú abɔ̄yī nū.

¹⁷Ācɛ kú Ujerúsālɛm, aólɛlā le íbɔm cē tū aá ɛɛ́. Aá lɛ iyó ká aá kpó túbá.

¹⁸Óndú ā ka anúɔ géē nū aá bɛ̄cɛ ŋmá ipú ajɛ nyā. Ó géē yá ká aá móōwē nɛ̄hi, jāā gbéeko nɛ̄ ɔ̄cɛ dúúmā kú aá í hile gɛ ŋ́. Abɔ̄ Óndú ā ka lɛ á.

¹⁹Ācɛ kú Ujerúsālɛm jikwū tá ɛcɛ kahíníī, “Ɔnɔ nɛ̄ alɔ bá ī jé ā nwuné nɛ̄hí. Ágbe kú alɔ nyā í gē jé ŋ́. Alɔ gbɛlá ka ōcē kú alɔ ā wɛ ɔdā nɛ̄ alɔ géē lɛ ɔtū lé glá.

²⁰Aáklɔ̄kpīlī kú alɔ kwú gblífi ɛɛ́. Aɔ́ŋgbá nēé bī uwā kwú ajɛ ā kwú kpó hɛ́ ɛɛ́. Ayí alɔ dóódu ā le pɛ́ ī yɛ ɛɛ́. Ódúúmā kú uwā í yɔ̄ nōo gē pi áklɔ̄kpɛ kú alɔ ā kwu ajɛ igbɔhá gɛ ŋ́.”

²¹N tóohi kahíníī, “Aótrɛ̄yí kú alɔ wɛ aólíla. É da Óndú ɔ̄kā kóo bī uwā jé ɔwɛ ŋ́. Ɔ́ɔmā yá ɛ́ɛ nēé gwōnū dúúdú, nēé kē je ācɛ ɔlɛ́ alɔ kpó fíyákátā ā yɔ̄ á.

²²Jāhɔ̄, é le ɔ̄kā bī wā ɛɛ́, Ācɛ éwo éyi nōo kwu ɛhícō bá ī yúuya nɛ̄hi bá ī wā kwuuu. Aícɔ́ɔja kú uwā géē je aígelī nɛ̄hi kú Ujúda pīya ipú alácɛ̄, ɛga nɛ̄ aéwo ipácí géē lā.”

²³Óndú, n jé ka ɔ̄cɛ dúúmā í wɛ ɔkpáni kú oyēeyī kú nū ŋ́. Ɔ̄cɛ dúúmā í lɛ ɔfú ō yá ɛ́gɛ́nɛ̄ nɛ̄ oyēeyī gáā lɛ ā ŋ́.

²⁴Óndú, bī italā lɛ ācɛ ɔlɛ́ uwɔ pīya tá ɔwɛ ɛ́gɛ́nɛ̄ ɔ̄cogbāálá gē bī itali le nū aálá tá ɔwɛ ā. Amáŋ a híī yá ɔ̄ nɛ̄hi fíyɛ́ abɔ̄ ŋ́. A kē híī bī ícɔ̄nū le yá alɔ italā ŋ́. Ohígbū ka ɔ́ɔmā géē kpó alɔ ŋmó dúúdú.

²⁵Óndú cɔ̄nū lɛyíkwu aéwo nēé jé uwɔ ka awɔ wɛ Ɔwɔicō ā ŋ́, nēé klla ī gbā uwɔ ɛ̄gbā ŋ́ mā. É kwú alɔ nēe wɛ ācɛ ɔlɛ́ uwɔ í kpó ŋmó, kwú alɔ í kpó yíífi dúúdú. É klla kwú ajɛ ɔlɛ́ alɔ ú tá alácɛ̄ ɛɛ́.”