Read idoma UJƐRƐMÍYA 11 Bible Online

UJƐRƐMÍYA 11 - idoma bible

UJƐRƐMÍYA 11

¹Óndú ā da ami nōo wɛ Ujeremíya kahíníī,

²“Jāhɔ̄ lɛ ɔdā nɛ̄ aá cíkā ō yá ká aá lɛ ɛka nɛ̄ um gbo mɛ́mla ā tū ā. Cɛ́ɛ́ a le da ācɛ kú Ujúda mɛ́mla ācɛ nēe lā Ujerúsālɛm ā.

³Da uwá ka ami, Óndú ā, nōo wɛ Ɔwɔicō kú Ísrɛ̄lu ā, le okónu tá le ɔ̄cɛ dúúmā nōó lɛyítáajɛ lɛ ɔdā nōó cíkā ō yá kóō lɛ ɛka nyā tū ā ŋ́ mā.

⁴Ɛka nyā wɛ ɛka piíí nɛ̄ n gbo mɛ́mla aádáádā uwā eko nɛ̄ n kpó uwā bɛ̄cɛ ŋmá Íjīpiti ā á. Ajɛ Íjīpiti kwɔ́lá tū uwā iyē ɛ́gɛ́nɛ̄ ɔlá kú útuló gē kwɔ́lá tū oje í je ɔ́ ja ā. N da uwá kéē lɛyítáajɛ ga um kéē klla yá ɔdā dóódu nɛ̄ n da uwá kéē yá ā. N da uwá ka ɔ́dāŋ ka é bá ī yá lɛ ā, é géē wɛ ācɛ ɔlɛ́ um, n kē í wɛ Ɔwɔicō kú uwā.

⁵Cɛ́ɛ́ n kē í yá okónu nɛ̄ n ce lɛ aádáádā uwá, ka n géē je ajɛ nōo lɔhi lɛ ɔdɛ̄hɔ̄ mɛ́mla ɔdāajɛ ā lɛ uwá. Ajɛ ā nēé kē lā anú ícɛ nyā á.” Anɔ́ɔ ami nōo wɛ Ujeremíya ā tóohi ka, “Abɔ̄ ó lɛ á, Óndú.”

⁶Anɔ́ɔ Óndú ā da um ka amiyɔ̄ nyɔ̄ ga odúúdú aígelī nɛ̄hi kú Ujúda mɛ́mla aúláyi kú Ujerúsālɛm, kā amiyɔ̄ tɔ́ɔna lɛ ācɛ ā kahíníī, “Aá jāhɔ̄ lɛ ɔdā nɛ̄ aá cíkā ō yá ká aá lɛ ɛka nɛ̄ um gbo mɛ́mla aá ā tū, ká aá lɛyítáajɛ lɛ ɔ́ ā.

⁷Oŋmá eko nɛ̄ n bī aádáádā aá bɛ̄cɛ ŋmá Íjīpiti ā jāā gaá kwu ícɛ nyā, n húmáyī pi aá ahɔ̄ eko dóódu, ka aá lɛyítáajɛ gā um.

⁸Amáŋ aá mɛ́mla aádáádā aá í jāhɔ̄, ɛ́ɛ́ nɛ̄ aá gē lɛyítáajɛ ga um ŋ́. Ikɔkɔ ɔ́ɔmā, ɔnyɔ̄ɔnyɛ ká aá yɔ̄ ī yá ɔdā nɛ̄ ɔtū olɔfú mɛ́mla ɔtū obɔ̄bí kú nū da ɔ́ kóō yá ā. Aá kē le okónu nɛ̄ alɔ ce ā tū ŋ́. Ohígbū ɔ́ɔmā, n géē yá odúúdú aá italā nēé miya ipú okónu ō ce ā.”

⁹Anɔ́ɔ Óndú ā klla da um kpɔ́ kahíníī, “Ācɛ kú Ujúda mɛ́mla ācɛ nēe lā Ujerúsālɛm ā bá ī tū ujɔ̄ tū um.

¹⁰É kwúcē gaá gbɔɔ́ ō yá ɛdɔ ɔ́bíipú nɛ̄ aádáádā uwá yá ā ɛɛ́. É tá ō yá ɔdā nɛ̄ n ka ā, klla bá ī pā aɛ́cí kú aéwɔhá ā. Kwú ācɛ Ísrɛ̄lu mɛ́mla ācɛ Ujúda le ɛka nɛ̄ n gbo mɛ́mla aádáádā uwā ā ú tēelihɔ ɛɛ́.

¹¹Ohígbū ɔ́ɔmā, ami nōo wɛ Óndú ā gē ka ka n géē yá kéē móōwē nɛ̄hi, nēé kē gáā kwu ŋmá anú glá ŋ́. Eko ɔ́ɔmā, eko nēé ī jikwū klá um kú otábɔ̄, n gáā tá uwā ohi ŋ́.

¹²Cɛ́ɛ́ ācɛ kú Ujúda mɛ́mla ācɛ nēe lā Ujerúsālɛm géē nyɔ̄ ɛgiyí aɛ́cí nēé gē gwɛ́ɛya lɛ uwá ā, nyɔ̄ í jikwū klá uwá kéē tá uwā abɔ̄. Amáŋ aɛ́cí ɔ́ɔmā í gáā lɔfú hɛ́ uwā tá eko nɛ̄ unwalu gā ā glá ŋ́.

¹³Aɛ́cí nɛ̄ ācɛ kú Ujúda gē pā ā lɛwa ɛ́gɛ́nɛ̄ aígelī nɛ̄hi kú uwā lɛwa lɛ a ā. Ācɛ kú Ujerúsālɛm lɛ aéde otūwēyī alɛwa gwó úláyi dóódu lɛ ɛcí nēé hī ka Ubáalu ā kéē gwɛ́ɛya lɛ ɔ́.

¹⁴Óndú ā klla kahíníī, “Ujeremíya, ā gbɔ̄ɔkɔ gā um ohígbū ācɛ nēe bá ā, ɛ́ɛ́ nɛ̄ a gē jikwū, ī yeyīnyinyi tá um ohígbū uwā ŋ́. Ohígbū ka eko dúú nēé bá ipú unwalu, nēé lɛ um hīgwú, ń gáā jāhɔ̄ lɛ uwá ŋ́.”

¹⁵Óndú ā klla kahíníī, “Ācɛ nēe he um ɔtū ā í lɛ íkwu dúúmā ō wā ipú Agblīihɔ-nɛ̄hi kú um ā ŋ́, ohígbū ka é bá ī yá ucē obɔ̄bí nɛ̄hi. É gbɛlá ka aá géē bī oji nēé ī hɛ́ ā[5] ámāŋ aɛ́bɛ́ nēé ī le gwɛ́ɛya ā le ci uwá ō je yíífi glá nɛɛ?

¹⁶Ami nōo wɛ Óndú ā tɛtɛ ka aá nēe wɛ ācɛ ɔlɛ́ um ā lɛbɛ̄ɛka ɔcí kú ólīifu, nōo wɛ ɛ̄mɛ̄mɛ̄ klla ī gwá ikpō lɔhi nɛ̄hi ā. Amáŋ abālɔbányā, n géē gbo akpáabana klá uwá, í tū ɔlá klá ɔcí ā, í je aábɔ̄ kú nū kpó yɔlá dúúdú.

¹⁷Ami wɛ Óndú ā nōo lɔfú fíyɛ́ dúú á. Ācɛ Ísrɛ̄lu mɛ́mla ācɛ Ujúda, aá lɛbɛ̄ɛka ɔcí nɛ̄ um tū á. Amáŋ n le ɔ́da je kéē lɛ aá kpó yíífi ɛɛ́. Ó lɛ ā ohígbū ka aá lɛ um yá cɔ̄nū mla ɔdōbɔ̄bí nɛ̄ aá yá ŋmá lɛ ɛya nɛ̄ aá bá ī gwo lɛ Ubáalu ā.”

¹⁸Óndú ā le da um lɛyíkwu ujɔ̄ nɛ̄ aólɛlā kú um bá ī tū tū um, kéē ŋmó um ā.

¹⁹N lɛbɛ̄ɛka ɔyí omlede nōo ī yɛce óndú nū cīīī, í jé kēé bī anúɔ nyɔ̄ gáā ŋmó ŋ́ mā. Ń jé ka ami nēé bá í tū ujɔ̄ kpɛ́mm ā tū um ā ŋ́. É bá ī ka ka. “Alɔ lɛ ɔ́ ŋmó eko nōó wɛ ɔyípōklóbīya ā, ɛ́gɛ́nɛ̄ é gē hɛ́ ɔcí wā ajɛ, eko nɛ̄ ó yɔ̄ ī gwá īkpō kpɔ́ ɛ́ɛ́ mā. Ālɔ̄ lɛ ɔ́ ŋmó, cɛ́ɛ́ ka ɔ̄cɛ dúúmā kóō klla blakwu ɔ́ igbɔhá ɛ́ɛ́ gɛ ŋ́.”

²⁰Anɔ́ɔ n gbɔ̄ɔkɔ kahíníī, “Óndú, nōo lɔfú fíyɛ́ dúú ā, a gē hɛ́pɔ̄ kpaakpa. A gē jila ɔtū mɛ́mla odo kú ɔ̄cɛ má. N kwu ɛpɔ̄ kú um ú tū uwɔ abɔ̄ ɛɛ́. Ohígbū ɔ́ɔmā, n kē jé ka n í má uwɔ géē gwō ācɛ nēe bá nyā ɔ́ci.

²¹Ācɛ kú Ánatɔ̄ɔtu tíne kéē lɛ um ŋmó. Anɔ́ɔ é da um ka, aá géē je um ŋmó. ɔ́dāŋ ka amíyɔ̄ yɔ̄ ī cɛ̄hɔ̄ kú Óndú ā lɛ aá kpɔ́.

²²Anɔ́ɔ Óndú ā nōo lɔfú fíyɛ́ dúú ā kahíníī, “N géē ŋmó uwā ɛpɔ̄bí, í yá uwá italā. É géē kpó ayípōklóbīya kú uwa ŋmó ɔgbɛ́fú. Ɛmiyɛ í je ayí uwā kpó ŋmó.

²³N le eko tū nɛ̄ n géē kpó ācɛ Ánatɔ̄ɔtu yíífi. Eko nɛ̄ eko ɔ́ɔmā ga, odúúmā kú uwā í gáā hile ŋ́.”