Read idoma UJƐRƐMÍYA 12 Bible Online

UJƐRƐMÍYA 12 - idoma bible

UJƐRƐMÍYA 12

¹Ujeremíya da Óndú ā kahíníī, “Óndú, eko dúúmā nɛ̄ n lɛ ɔ̄kā da uwɔ nɛɛ, ɛlā nɛ̄ a gē ka ā, kē ī wɛ ɔkwɛ̄yi eko dóódu á. Nááná n géē da uwɔ ɔ̄kā lɛyíkwu ɔwɛ nɛ̄ a gē hɛ́pɔ̄ kú uwɔ ā. Ɔdíyá nōó gē lɔhi lɛ ācobɔ̄bíipú ā dúú āa? Ɔdíyá nɛ̄ ācɛ nēé lɛ ɔkwɔ̄ɔ̄kwɛ̄yi ŋ́ mā gē má abahi dúú ā?

²A gē leyíkwu uwā lɔɔlɔhi lɛbɛ̄ɛka aɔ́cí nēé le tū, nēe le ɛgba tá tū ipú ajɛ, le jɛ̄ klla le īkpō gwá ā. É bī okónu kú uwā gē ka olɔhi kú uwɔ piyóó, amáŋ ákú ɔ̄kwɛ̄yi ā, é lɛ ɛla wu uwɔ ɔkwɔ̄ɔ̄kwɛ̄yí ŋ́.

³Amáŋ Óndú, a jé um. A má ɔdā nɛ̄ n gē yá ā, klla jé ɛ́gɛ́nɛ̄ ɔtū kú um lɛ lɛyíkwu uwɔ ā. Lɛ ācɛ nēe ī yá ɔdōbɔ̄bí nēe bá nyā kpó nyɔ̄ abɔ̄fú bɛ̄ɛka aálá nēé ī pi nyɔ̄ gáā hɛ́ ɔkɔ ā. Lɛ uwá tútū jāā gbéeko nēé kpo uwā ŋmó.

⁴Eko nyá nɛ̄ ajɛ kú ɔlɛ́ alɔ géē ŋmíkpākplā gāá kwu āa? Aácí kē le kpó ŋmɔ́lá ɛbɛɛbɛ ipú ajɛ ɔlɛ́ alɔ. Aɛ́bɛ́ mɛ́mla aígbáanɔ le pɛ́ kwú ŋmá ajɛ ká alɔ, ohígbū ɔ́bíipú kú ācɛ ɔlɛ́ alɔ ɛɛ́. Ācɛ ā klla bá gē ka ka Ɔwɔicō ɔ́ má ɔdā nɛ̄ aá bá ī yá ā ŋ́.”

⁵Anɔ́ɔ Ɔwɔicō da Ujeremíya kahíníī, “A le kweyī inya mla alɛɛcɛ, ɛjɛ kē le jɛ̄ uwɔ. Ó lɛ ā a lɔfú kweyī inya mla aɔ́nya glá āa? Ɔ́dāŋ́ ka a gē gwōnū ega nōo tá ɛcɛ péee, ó lɛ ā abɔ̄ a géē yá lɛ ipú ūpū nōo tá okónū ísu kú Ujɔ́dan āa?

⁶Kwu aɔ́máapú abɔ̄yī uwɔ, ācɛ kú ipú inu kú uwɔ piíí ā, lɛ ibīyāajɛ yá tū uwɔ ɛɛ́. É nyɔ̄ í le pīya tū ipú ācɛ bá ī kpɛ́fú tú uwɔ. Aá lɔtūce uwá ŋ́, náāná nēé ī kɔkɔ olɔnyɛ ā.”

⁷Óndú ā kahíníī, “N tá ācɛ ɔlɛ́ um, Ísrɛ̄lu ɛɛ́. N klla lɛ igbīhi ce kwu éwo nɛ̄ n fu kóo wɛ ákú um ā ɛɛ́. N kwú ācɛ nēe he um ɔtū ā í kpó bá abɔ̄ kú aólɛlā kú uwā ɛɛ́.

⁸Ācɛ ɔlɛ́ um nɛ̄ n fu ā, kwú eyī ú pīya ī bɛ́yíkwu um. É bá ī yá ucē lɛyíkwu um bɛ̄ɛka ɛ́gɛ́nɛ́ ágábá gē tōoji lɛyíkwu ɛbɛ́ ipú ūpū ā. Ohígbū ɔ́ɔmā, ɔtū uwā gbɔɔ́ ō wú um.

⁹Ācɛ kú um nɛ̄ n fu ā, lɛbɛ̄ɛka ígbáanɔ ucē nɛ̄ aúcē ɔhá le kɔ̄ klá ɔɔ́ bá ī tū ɔ̄ ɔkɔ́ ŋmá āyā dóódu ā tū um. Lɛ aɛ́bɛ́ ipácí ā hīgwú wā kéē wā í lé ɛbɛ́ kú okwū kú ācɛ ɔlɛ́ um ā dúú.

¹⁰Aɔ́cɛ́ kú aéwɔhá kwú ajɛ olɔhi kú ɔlɛ́ um ā ú tá alácɛ bɛ̄ɛka ígbíli ā, ɛ́gɛ́nɛ̄ ācogbāálá gē kpó aɛ́bɛ́ kú uwā gaá je ɛhɔ̄ kú ɔcí ufáyin da tū ajɛ mla ikpó, ī je ɔɔ́ yíífi ā.

¹¹É kwú ɔ̄ ú pīya ipú alácɛ. Ó kē tá alácɛ iyɔ̄bū um lɛbɛ̄ɛka ɛ́gɛ́nɛ̄ ɔ̄cɛ gē yékwú ā. Odúúdú ajɛ ā kwú tá alácɛ amāŋ́ ɔ̄cɛ dúúmā í lɛ ɛlá wu ɔ́ ŋ́.

¹²Aícɔ́ɔja o wúla ɔdā tāajɛ bá ɛfu dóódu kú ipú ígbíli bá ī pɛ́ wā kéē kpó ācɛ yíífi ɛɛ́. N le ācɛ tū kéē wā í lɛ ɛfú kpó tá uwā, cɛ́ɛ́ kéē kwú ɔdā dóódu kú ajɛ ā ú kpó yíífi. Ɔ̄cɛ dúúmā í gáā lā ɛbɔ́ ipú ajɛ ā ɛ́ɛ́ gɛ ŋ́.

¹³Īkpɔ̄dɛ̄hɔ̄ nɛ̄ ācɛ ɔlɛ́ um nyi á, amáŋ eko o cē ɔdɛ̄hɔ̄ ā, ácáácí nēé má á. É yúklɔ́ lɔfú nɛ̄hi, amáŋ é má ɔdā dúúmā ŋ́má úklɔ́ ā ŋ́. Ɔnū nɛ̄ n cɛ̄ nɛ̄ɛ̄nɛ̄hi lɛyíkwu uwá ā, yá ɛ́ɛ́ nɛ̄ ɔdɛ̄hɔ̄ kú uwā í yá ŋ́ má.”

¹⁴Óndú ā kahíníī, “N lɛ ɛlā éyi nɛ̄ n gáā ka lɛyíkwu aéwɔhá nēe lā kwu ācɛ ɔlɛ́ um Ísrɛ̄lu ā. Ācɛ nēe gwō tū ipú ajɛ nɛ̄ n je lɛ ācɛ Ísrɛ̄lu ā. N géē fu ācɛ obɔ̄bíipú ɔ́ɔmā ɔkwu ŋmá ajɛ ɔlɛ́ uwā, ɛ́gɛ́nɛ̄ ɔ̄cɛ gē fu ácí ŋmá ajɛ ā. N kē í nya ācɛ Ujúda nēe lā ipú uwā tá ŋmá ipú uwā.

¹⁵Amáŋ eko nɛ̄ n kwú aéwɔhá ā ɔkwu ú fu ŋmá ajɛ ā, n géē ményinyi uwā. N kē í kpó aéwɔhá ā kwúcē ga ipú ajɛ kú ɔnyɔɔnyɛ kú ɔlɛ́ nū.

¹⁶Ɔ́dāŋ́ ka é géē mīyɛ ɔwɛ nɛ̄ ācɛ ɔlɛ́ um gē gbā um ɛ̄gbā ā mɛ́mla ɔtū ékpónú glá, nēé klla í bī um le gbɛka, ɛ́gɛ́nɛ̄ é tɛtɛ nwū ācɛ ɔlɛ́ um kéē gbo Ubáalu ā, cɛ́ɛ́ é kwú pīya ācɛ ɔlɛ́ um kpaakpa.

¹⁷Amáŋ ɔ́dāŋ ka éwɔhá dúúmā í lɛyítáajɛ gā um ŋ́, n géē fu ɔ́ ɔkwu ŋmá ajɛ dúúdú, klla í je ɔ́ yíífi. Ami Uyáwɛ, nōo wɛ óndú aá ā kɛlā nyā á.”