Read idoma UJƐRƐMÍYA 13 Bible Online

UJƐRƐMÍYA 13 - idoma bible

UJƐRƐMÍYA 13

¹Ɔdā nɛ̄ Óndú ā da um ka amíyɔ̄ yá ā yɔ̄ á. Ó ka amíyɔ̄ gāá lɛ īlī nɛ̄hɛ́ ōyɔ́ɔgɔndu lā kú amíyɔ̄ kwú ɔ̄ ú yɔ́ɔgɔndu. Amáŋ ó da um ka amíyɔ̄ lɛ ɔ́ wu éŋkpɔ̄ ŋ́.

²Anɔ́ɔ n nyɔ̄ í le lá klla kwú ɔ̄ ú yɔ́ɔgɔndu á.

³Óndú ā kɛlā gā um igbɔhá kahíníī,

⁴“Nyɔ̄ ga okónu ísu kú Uyúfrētīisi ā ká ā gāá kwu īlī ā ú kpó tayínū ipú ɔ̄gɛ̄cɔ̄ abɔ́ɔ.”

⁵Anɔ́ɔ n le yɛ gáā kwú ɔ ú tayínū ɔ̄gɛ̄cɔ̄ abɔ́ɔ, kwu Uyúfrētīisi ajaajɛ.

⁶Igbīhāajɛ nɛ̄ ɛ̄cī alɛwa gaá le yɛ ā, Óndú ā da um ka amíyɔ̄ nyɔ̄ í lɛ īlī ā kpó ŋmá abɔ́ɔ.

⁷Anɔ́ɔ n kwú cigbīhi le tá abɔ́ɔ ā. Eko nɛ̄ n lɛ yɛ ga ɛga nɛ̄ n kpó ɔ̄ tayínū ā, n má ka īlī ā kwú gbaáhingílí. Ó klla lɔhi ɛ́ɛ́ gɛ ŋ́.

⁸Anɔ́ɔ Óndú ā kɛlā gā um igbɔhá kahíníī,

⁹“Ɔdā nyā cābɔ̄ ɛ́gɛ́nɛ̄ n géē je ɔbɔ́cɛ kú ācɛ Ujúda mɛ́mla ɔbɔ́cɛ nɛ̄hi kú ācɛ Ujerúsālɛm ā cē ɔkɔ́ ā.

¹⁰Ācobɔ̄bíipú nēe bá nyā tá kéē lɛyítáajɛ ga um. É húmáyī yá ikpɛ̄yí olɔfú gē yá ɔdā ɔtūuwā piyóó, É klla nyɔ̄ í bá ī pā aɛ́cí ɔhá. Ohígbū ɔ́ɔmā, é géē je uwá gbliífi bɛ̄ɛka ɛ́gɛ́nɛ̄ īlī ōyɔ́ɔgɔndu nyā je bīya, í lɔhi ɛ́ gɛ ŋ́ mā.

¹¹Ɛ́gɛ́nɛ̄ īlī ā gbo uwɔ ohí kli ā, ɛ́gɔ́ɔmā nɛ̄ n yá ācɛ kú Ísrɛ̄lu mɛ́mla Ujúda kéē bá um píyɔ́ɔ́ lɛ á. N yá ɔ́ɔmā cɛ́ɛ́ kéē wɛ ācɛ ɔlɛ́ um. Cɛ́ɛ́ kéē cɛ̄ ga um lóofu, nɛ̄ ācɛ géē cɛ̄tra um klla je ojīlīma gā um. Amáŋ é tá ō lɛyítáajɛ gā um.

¹²Ɔwɔicō da um kahíníī, “Ujeremíya, le ka lɛ ācɛ kú Ísrɛ̄lu ka ami, Uyáwɛ, nōo wɛ Ɔwɔicō nɛ̄ Ísrɛ̄lu ī gbā ā, kéē lɛ eje tū mu odúúdú ɔjá kú ejé ā. É géē tóohi ka aá ɔ́ɔ tɛtɛ jé ka ɛ́ɛ cíkā ō le ejé tū odúúdú ɔjá kú ejé mu.

¹³Cɛ́ɛ́ a da uwá ka, ami nōo wɛ Uyáwɛ ā, géē yá kú odúúúdú ācɛ kéē le ejé gwá cɛɛnyi, cɛ́ɛ́ ó le uwá kwú lɔɔlɔhi. Kwu aɔ́cɛ́ nēe ŋmá ipɔ́ɔma kú Udɛ́fīdi ā, mɛ́mla ācogwɛ́ɛya, kwu ācomɛ́ɛbɛ mɛ́mla odúúdú ācɛ kú Ujerúsālɛm ā.

¹⁴Cɛ́ɛ́ n gbɔɔ́ ō lɛ odúúdú uwá, kwu aádā mɛ́mla aɛ́nɛ́ mɛ́mla ayí, ɛyí gbo ɔhá lɛbɛ̄ɛka ɛ́gɛ́nɛ̄ ɔ̄cɛ gē ca aɔ́já kú ejé klá īyī uwā ā. N gáā mɛ́nyinyi ɔ̄cɛ dúúmā kú uwā ɛ́ɛ́ nɛ̄ n géē pi ɔtū ɔ̄cɛ dúúmā ŋ́, ɛ́ɛ́ nɛ̄ ɔdā dóódu ī ci um ŋmá ō kpó uwā yíífi ŋ́.”

¹⁵Ācɛ kú Ísrɛ̄lu, Ɔwɔicō lɛ ɛlā ka ɛɛ́. Aá lɛ ɔbɔ́ɔcɛ kpó bá ajɛ ká aá jāhɔ̄ lɛ ɔ́.

¹⁶Aá wóofu Uyáwɛ, nōo wɛ Ɔwɔicō kú aá ā. Aá le yá ɛɛ́ kóō tū ajɛ odobū wā ɛgiyí aá, nɛ̄ aá géē lɛ ikpó gba ajɛ ɛyí ɛfu. Aá yá lɛ ā ŋ́ ó géē je eyī nɛ̄ aá leyīce ā pīya obū nɛ̄hi kpímmm.

¹⁷Ɔ́dāŋ́ ka aá jāhɔ̄ ŋ́, n géē jikwū ipíípú tayīnū ohígbū obɔ́cɛ kú aá. N géē jikwū nɛ̄ɛ̄nɛ̄hi nɛ̄ agīje kú um kē í pɛ́ ohígbū ka é kwú ācɛ kú Ɔwɔicō ú kpó kwú ɔfiyɛ ga ajɛ ewɔhá ɛɛ́.

¹⁸Óndú ā da um kahíníī, “Le da ɔcɛ́ ā mɛ́mla ɛ́nɛ́ nū kéē gā ajɛ ŋmá ɛyí aákpa kú ɔcɛ́ kú uwā, ohígbū ka aɔ́fulā kú uwā lɔɔlɔhi ā géē kpó mīya wā ajɛ ŋmá uwā ɛyí[6]

¹⁹Aólɛlā lɛ íbɔm cē tū odúúdú aígelī nɛ̄ŋ́cɛ́ kú ɛháajɛ kú Ujúda ā, nɛ̄ ɔ̄cɛ dúúmā í gáā bū ga ipú uwā ɛ́ɛ́ nɛ̄ ɔ̄cɛ dúúmā ī bɛ̄cɛ ŋ́. É kwú odúúdú ācɛ kú Ujúda ā í kpó ɔfiyɛ ga ajɛ éwɔhá ɛɛ́.”

²⁰Ācɛ kú Ujerúsālɛm aá má ɔ̄, aólɛlā kú aá bá ī wā ŋmá ɛhícō. Ācɛ neé kpó tū aá abɔ̄ ā bá iní? Ācɛ kú aá nɛ̄ aá gē yá ɔbɔ́cɛ kú uwā nɛ̄hi a bá iní?

²¹Ɔdí nɛ̄ aa géē ka, eko nɛ̄ ācɛ nɛ̄ aa gbɛlá ka ɛ́ɛ wɛ oklóbīya aá ā, lɛ ɛfú kpó gwū aá, lɛ aá yálé kllá kwú pīya ɔcɛ́ kú aá. Aá géē bá ī jé ɔnɔ bɛ̄ɛka ɔnyā nɛ̄ ɔma lɛ ɔ́ kwú ā.

²²Ɔ́daŋ́ ka, aá lɛ ɔ̄kā da, ɔdā nōo yá ɛɛ́ nɛ̄ odúúdú ɔdā nēe bá nyā gē yá aá ɛɛ́, nēé kwú aá ba ajɛ, abɔ̄fú gē yá aá ōwē á, ó wɛ ohígbū obɔ̄bi kú aá nɛ̄, ohígbū ka aá bīya íne klla yá obɔ̄bí nɛ̄hi.

²³Ɔ̄cɛ dúúmā je ɔkpíyē kú nū pīyabɔ̄ ga ɛnɛ̄hɛ́ ámāŋ onōbí glá āa? Ɛjɛ je ína kú nū nya ŋmá iyī nū iyē glá āa? Ɔ́dāŋ́ kéē yá ɔ́ɔmā glá, ayíka aá nēé gē yá ɔdā dúúmā ɔhá gla ɔdōbɔ̄bí yá glá ŋ́ mā, géē kllɔcɛ́ ká aá yá aɔ́dā nēe le kpaakpa.

²⁴Óndú ā géē pa aá hīla bɛ̄ɛka ácí nɛ̄ owu gē je kpó ga ɛga dóódu ā.

²⁵Ó le ka ɛɛ́, ka ɛ̄nyā ɔ́ɔ géē wɛ oŋmɛ́yí mɛ́mla ukpɛ̄ ká aá á. Ɛ̄nyā wɛ ɔdā nōó ka anúɔ géē yā mla aá á, ohígbū ka aá kwú mlanyī nū klla lɛ ɔtū kpó ce ɔwɔ ɛ̄kɛ̄mgbɛ̄ ɔhá ā.

²⁶Óndú ā abɔ̄yī nū géē je aá tóohɛ́ɛwa klá í kpó uwēyī tū aá ɛyí.

²⁷Ohígbū ka, Óndú ā má aá abɔ̄ nɛ̄ aá bá ī yá ɔdā nōo ī tū ɔ̄ íwɔ́tū nɛ̄hi ā. Ó má aá, abɔ̄ aá bá ī pā ɛcí klla bá ī yá icɛ̄bɔ̄ ɛyí ɛfu mɛ́mla ipú ácí ā. Ucē bɛ̄ɛka ɔ̄cɛ ō yúnwū ɔnyā klla ī da ɔnyā ɔ́mpa nū ɛlā kóō cikpó nū āa. Ācɛ kú Ujerúsālɛm, ákú aá mɛɛ. Eko nyá nɛ̄ aá kē í le yēŋēē kpɔ́ ɛɛ́ gɛ?