Read idoma UJƐRƐMÍYA 14 Bible Online

UJƐRƐMÍYA 14 - idoma bible

UJƐRƐMÍYA 14

¹Ujeremíya ka Óndú ā ɔ́ɔ da anúɔ ɛlā lɛyíwu ɔwɔ o hɛ́ɛnɔ nɛ̄hi kahíníī,

²“Ācɛ kú Ujúda gwutá ajɛ ipú ɔtūnōbí, Ujerúsālɛm kē yɔ̄ ī jikwū kéē wā í tá ɔ̄ abɔ̄.

³Aólɔdu ā le aíkonó kú uwá tɛ̄hɔ̄ nyɔ̄ í tíne éŋkpɔ̄. É le tá obugā ā, é má éŋkpɔ̄ ŋ́. É kwú ɔjá ú wā ɔlɛ́ áncā. Ɔtū kú uwā le bīya, ó klá yá uwā eyījii. Anɔ́ɔ é kwú abɔ̄ ú pīya klá eyī ipú uwēyī

⁴Ohígbū ka ɔwɔ í yá ŋ́, ajɛ a kwú ŋmó. Aɔ́glɛ́ɛjí ā bá ī du ōcē ipú odo, klá lɛ abɔ̄ pīya klá eyī ipú ɔtūnōbí.

⁵Īkpɛ̄ɛnū kú ipú ácí ā, le kwu hɛ̄ ɔyí nū obene ā tá, ohígbū ká ácí ī yɔ̄ nōó gē lé ŋ́.

⁶Ijakī kú ipú ácí ā háyi ɛyí ɛfu lɛ ígblɛ́nyī playi ɛcɛ yɔ̄ ī fu owu kpoó kpoó bɛ̄ɛka ɔgwú kú ipú ácí a. Eyī kú uwā í mɛ́ɛbɛ́ gɛ ŋ́, ohígbū kéē má ɔdōlé lé ɛɛ́ gɛ ŋ́.

⁷Ācɛ ɔlɛ́ um jikwū klá um, kahíníī, “Nááná nɛ̄ íne nɛ̄ alɔ bīya kōō cīijáalí tū alɔ. Óndú, tá alɔ abɔ̄ ɛ́gɛ́nɛ̄ a ce okónu lɛ ā. Alɔ kwúcē ŋmá ɛgiyí uwɔ igbalɛwa ɛɛ́.

⁸Awɔ wɛ ɔ̄cɛ ékpónú nɛ̄ ācɛ Ísrɛ̄lu leyīyōce á. Awɔ kē wɛ ɔ̄cɛ nōo gē nya alɔ tá ŋmá ámíyā ɛ̄cī éyi á, Ɔdíyá nɛ̄ a í yá bɛ̄ɛka ugbɔga ɛyiyí alɔ āa? Ɔdíyá nɛ̄ a lɛbɛ̄ɛka ugbɔga nōo wā í bū ɔlɛ́ alɔ nɛ̄ ó lɛ gbo otú ékpónú ŋ́ mā?

⁹Ɔdíyá nɛ̄ a klla kwú pīyeyī bɛ̄ɛka ɔ̄cɛ nɛ̄ ɛlā ī yá ɔ̄ igbledū āa? Bɛ̄ɛka aícɔ́ɔja nēé lɔfú dúúmā kóō tá ācɛ abɔ̄ ŋ́ māa? Ɔkwɛyí nɛ̄, Óndú, ā yɔ̄ mla alɔ. Alɔ wɛ ācɛ kú uwɔ nɛ̄, ā cē ɔkwu kwu alɔ ŋ́.

¹⁰Anɔ́ɔ Óndú ā kahíníī, “Ohígbū ācɛ nēe bá nyā, ó he uwá ɔtū ō kwinya ŋmá ɛgiyí um nɛ̄hi, é kwú īyī uwā tū glá ŋ́. Ohígbū ɔ́ɔmā, ɔtū í he um lɛyī kwu uwá ŋ́. N géē blakwu ɔdā obɔ̄bí nēé yá a, klá í yá uwā italā ohígbū íne nē é bīya ā.”

¹¹Óndú ā klla da um kahíníī, “Ā da um ká amíyɔ̄ tá ācɛ nēe bá nyā abɔ̄ ŋ́.

¹²Ɔ́dāŋ́ ka é kōō lɛ okónu gwū nááná, ń gáā pó ikwū ō je kú otábɔ̄ kú uwā a ŋ́. Ɔ́dāŋ́ kéē gwɛ́ɛya ō pá ɔlá dúúdú mɛ́mla ɛya kú īkpɔ̄dā ga um nááná, ó gáā he um ɔtū ŋ́ kpɔ́. Ikɔkɔ ɔ́ɔmā, n géē kpó uwá yíífi ɔgbɛ́fú mɛ́mla ōcē mɛ́mla ɔkpɛtā.”

¹³Anɔ́ɔ n kahíníī, “Óndú nōo lɔfú fíyɛ́ dúú, a jé ka ɔ̄comɛ́ɛbɛ ā yɔ̄ ī da ācɛ ā ka ɛfú ámāŋ ɔkpɛtā ɔ́ɔ́ gáā yɔ̄ gɛ ŋ́, ohígbū ka a lɛ okónu ce ɛɛ́, é ka, ɛbɔ́ ofōōfūnū gáā yɔ̄ ipú ajɛ kú alɔ á.”

¹⁴Amáŋ, Óndú ā tá ohi kahíníī, “Ācomɛ́ɛbɛ ā bá ī bī iyē kú um lɛ kɛ̄mgbɛ̄. Ń tū uwā ɛhɔ̄ ɛ́ɛ́, nɛ̄ n gē je ɔ́da dúúmā lɛ uwá ɛ́ɛ́, nɛ̄ n gē kɛlā dúúmā lɛ uwá ŋ́. Ɛbɛ nēé má nēé gē ka tɛ́ɛcɛ ɔ́ɔmā, í ŋmá ɛgiyí um ŋ́. Ɛbɛ nēé má ā wɛ ɛ̄kɛ̄mgbɛ̄, é kē wɛ ɛlá ōgbo kú ɔtū kú uwá áncā nɛ̄.

¹⁵Ami Óndú ā géē da uwɔ, ɔdā nɛ̄ n gáā yá ācomɛ́ɛbɛ ɔ́ɔmā, nɛ̄ ń tū uwá ɛhɔ̄ ŋ́ nááná, nēé gē bī iyē kú um gē lɛ kɛlā, klla ī ka ka ɛfú mɛ́mla ɔkpɛtá ɔ́ɔ́ gáā wā í klá ajɛ ā gɛ ŋ́. N géē cɛ̄ lɛ ɔkpɛtā mɛ́mla ɛfú kpó uwā ŋmó.

¹⁶Odúúdú ācɛ nēe jāhɔ̄ lɛ uwá, é kē í kpó uwá ŋmó, nōo kē wɛ ɔdā nōo cíkā lɛ uwá ā. É tá aókwū kú uwā ɛcɔ̄ táipú úlíyi kú Ujerúsālɛm, ohígbū ka ācɛ ípɔ́ɔnū kú uwā nēe cíkā o nyi okwū uwā kē le pɛ́kwú eko ɔ́ɔmā ɛɛ́. Ɔ̄cɛ o nyi okwū uwā í gáā yɔ̄ ŋ́.

¹⁷Ujeremíya kahíníī, Óndú ā lɛ ɔ́da je ga um ka amiyɔ́ nyɔ̄ í ka lɛ ācɛ ɔdā nɛ̄ a bī lɛyíkwu odúúdú aɔ́dā nēe bá ā. Agīje géē cēenyi ŋmá um eyī, otú mɛ́mla ɔlɛ́ɛnɔ, ohígbū ka é le ágbe o ŋmó ɔ̄cɛ yá ācɛ éwo kú ɔlɛ́ um ɛɛ́.

¹⁸Eko nɛ̄ n kwú bɛ̄cɛ ā, N má okwu kú ācɛ ɔlɛ́ um nɛ̄ ɛfú lé ā bá ajɛ ɛbɛɛbɛ. Eko nɛ̄ n le tá igelī nɛ̄hi ā, ɔkpɛta le uwá kpó gbɛɛ̄mā. Ācomɛ́ɛbɛ mɛ́mla ācɛ ogwɛ́ɛya ā bá ī yá óbé ije kú uwā. Amáŋ uwá abɔ̄yī uwā í jé ɔdā nōo yɔ̄ ī yá ā ŋ́.”

¹⁹Óndú, ā tá alɔ, ācɛ Ujúda ā piyóó nɛɛ? A gē wɔ́tū ācɛ kú Usáyɔn ā nɛɛ? Ɔdíyá nɛ̄ a yá alɔ ágbe nɛ̄hi nyā, nōó gáā jé glá ŋ́ ma? Alɔ leyī táajɛ ká ɛbɔ́, amáŋ ɔdā olɔhi dúúmā í wā ɛgiyí alɔ ŋ́. Alɔ leyī táajɛ kéē lɛ alɔ hɛ́tá, ikɔkɔ ɔ́ɔmā, ɔnɔ mɛ́mla ífi, mɛ́mla ágbe wā í ce alɔ á.

²⁰Óndú, alɔ le íne kú uwɔ bīya ɛɛ́. Alɔ géē lɛ okónu cē íne nɛ̄ alɔ mɛ́mla aádáádā alɔ bīya ā gā uwɔ.

²¹Óndú, blakwu okónu nɛ̄ a ce ā, ká ā leyī gwō alɔ bónū gɛ ŋ́. Ā híī je uwēyī lɛ ācɛ Ujerúsālɛm, ɛgiyí akpa kú ɛgahi kú uwɔ ā gɛ ŋ́ A je okónu nɛ̄ a ce mla alɔ ā bīya gɛ ŋ́.

²²Ɛcí kú aéwɔhá ā í bī ɔwɔ gē lɛ alɔ glá ŋ́. Ɔkpáncō ɔlamu í yá ká ɔwɔ ká ō yá glá ŋ́. Alɔ leyī kpóce uwɔ ɛɛ́, Óndú, Ɔwɔicō kú alɔ. Ohígbū ka awɔ ya ɔdā nēe bá nyā á.