Read idoma UJƐRƐMÍYA 15 Bible Online

UJƐRƐMÍYA 15 - idoma bible

UJƐRƐMÍYA 15

¹Anɔ́ɔ Óndú ā da um kahíníī, “Ɔ́dāŋ ka Umósīsi mɛ́mla Usámūwɛ̄lu abɔ̄yī uwa háyi amānyā bá ī gbɔ̄ɔkɔ ga um nááná, N gáā ményinyi ācɛ nēe bá nyā ŋ́. Lɛ uwá nū ŋmá amānyā, kéē nyɛ̄ɛ̄ ŋmá eyī kú um.

²Eko dúúmā nēé lɛ ɔ̄kā da uwɔ, ɛga nēé géē nyɛ̄ɛ̄ nyɔ̄ ā, da uwá ka, amíyɔ̄ kahíníī, “Ōcē kē í kpó ācɛ ōhī kú uwā ŋmó. Abɔ̄ nēé ge nyɔ̄ ā, ācɛ ōhī, ɛfu géē je uwá kpó ŋmó. Abɔ̄ nēé géē nyɔ̄ ā, ɔkpɛtā géē je uwá kpó ŋmó. Abɔ́ɔ nēé géē nyɔ̄ á, é géē kpó ācɛ ohile ā kéē wɛ aálagbá kú ɛfú nyɔ̄ ajɛ éwɔhá.

³Ami nōo wɛ Óndú ā le ka ka ɔdā nōo bɔ̄bí nɛ̄hi ɛnɛ géē yá uwā. Ɛfú géē lé uwā. Ewo géē yɔ̄ ī pi okwū kú uwā ajɛ. Aígbáanɔ í bá ī lé ɛbɛ́ okwū kú uwā. Aɛ́bɛ́ obɔ̄bí kú ipácí í je ohile kú okwū kú uwā a kpó lé.

⁴N géē je uwá pīya ɔdā ufi mɛ́mla ɔdā ihilɛ ipú eyī kú odúúdú ācɛ kú ɛcɛ, ohígbū ɔdā nɛ̄ ɔyí kú Uhesekáya ɔyínɔ̄nyīlɔ kú Umanásɛ yá Ujerúsālɛm eko nōó wɛ ɔcɛ́ kú Ujúda ā.

⁵Óndú ā kahíníī, “Ɔ̄nyɛ géē ményīnyinyi aá a, ācɛ Ujerúsālɛm, ɔnyɛ géē yá ɔtūnōbí ohíbū aá āa? Ɔ̄nyɛ géē háyi ɔlɛ́ aá gbojī, géē da aá ɔ̄kā abɔ̄ aá ba lɛ āa?

⁶Aá tá um, lɛ igbīhi cē kwu um ɛɛ́. Ohígbū ɔ́ɔmā, n lɛ abɔ̄ kú um nāńdaa lɛ aá ca tāajɛ. Ohígbū ka ɛ̄jɛ̄ ō kwú íwɔ́tū kú um tū le jɛ um ɛɛ́.

⁷N le ācɛ kú igelī nɛ̄ŋcɛ́ dóódu kú ajɛ ā kpó tɛ́ɛcɔ̄ gē lɛ ofúlutu bɛ̄ɛka ácí ā. N lɛ aá yíífi, ācɛ ɔlɛ́ um, n lɛ ayí aá kpó ŋmó, ohígbū ka aá kwu ŋmá ɔwɛ obɔ̄bí kú aá ā tá ŋ́.

⁸Anyōkwū alɛwa nēe bá ipú ajɛ ká aá ā lɛwa fíyɛ́ ɔjɛ kú ísu á. N lɛ ayípōklóbīya kú ɔlɛ́ aá kpo ŋmó eko kú ɔyipɛ aóklóbīya kú uwā, klá yá ka uwá ká é móōwē. N lɛ uwá kpó ŋ́mó igbledū ipú ufí, ámíyā mɛ́mla ɔnɔ ō jé.

⁹Ɛ́nɛ́ nɛ̄ ayí nū ahāapa le pɛ́kwú ɛ̄cī ékpónú ā yɔ̄ ī hɛ́kwú ohígbū ikwū ō je ɛɛ́. Otú lɛ ɔ́ bī ɔlɛ́ɛnɔ. Uwēyī lɛ ɔ́ kwu ɛɛ́. Ācɛ ohile ká aá ā, n géē cɛ̄ lɛ aólɛlā kú aá je aá kpó ŋmó. Ami, Óndú ā lɛ ɛlā ka ɛɛ́.”

¹⁰Anɔ́ɔ ó kahíníī, “Ɔtū yɔ̄ ī wú um nɛ̄hi. Ɔdíyá nɛ̄ ɛ́nɛ́ um ma um wā ipú ɛcɛ nyā āa? Ń yɔ̄ ī gbapɔ̄ yɔ̄ ī táafú mɛ́mla ācɛ dóódu ipú ajɛ ā ŋ́. N kplá ɔ̄cɛ dúúmā ije ɛ́ɛ́ nɛ̄ ɔ̄cɛ dúúmā ī lɛ ije kplá um ŋ́, nááná é ba ī lɛ um pīya olɛlá.

¹¹Óndú, odúúdú ɛlā nēe yɔ̄ ī kpóce um ā ká ō lɛ um kwú, ɔ́dāŋ ka ń gbā uwɔ ɛ̄gbā kpaakpa ŋ́, ɔ́dāŋ ka ń gbɔ̄ɔkɔ gā uwɔ ohígbū aólɛlā kú um, eko nēé bá ipú unwalu mɛ́mla ákanya ŋ́.

¹²Ɔ̄cɛ dúúmā í ce oje abɔ̄ gla ŋ́, ofíyɛ́ dúú ā, oje kú ācɛ ɛhícō nēe yá mla udɔ ā.

¹³Óndú ā da um kahíníī, “N géē tū aólɛlā wā í je agbénú kú odúúdú ācɛ ɔlɛ́ um ā kpó, cɛ́ɛ́ ká n̄ lɛ italā yá uwā ohígbū íne nēé bīya ipú ajɛ ā.

¹⁴N géē yá uwā ké ē cɛ̄ aólɛlā kú uwā ɛhɔ̄ ipú ajɛ nēé jé ɔdā dúúmā ohígbū nū ŋ́ mā a. Ohígbū ka ɔnū mɛ́mla íwɔ́tū kú um ā lɛbɛ̄ɛka ɔlá nōo gē yi piyóó ā.”

¹⁵Anɔ́ɔ n kahíníī, “Óndú blakwu um, cɛ́ɛ́ ká ā tá um abɔ̄, ká n̄ lɛ ɔ́ci gwō ācɛ nēe bá i yá um ŋmó ā. Ā lɔ́tū lé mla uwá jāā gbéeko nēé kwú um u ŋmó gɛ ŋ́. Bla ka, ohígbū iyē kú uwɔ, nēé bá ī cá um ɛcá á.

¹⁶A le ɛlā ka gā um, n kē jāhɔ̄ lɛ ɛlā dóódu nāa ka gā um ā. N wɛ ákú uwɔ nɛ̄, Óndú, Ɔwɔicō nōo lɔfú fíyɛ́ dúú. Ɛlā kú uwɔ wɛ omōōmu ɔtū kú um mla éeyē.

¹⁷Ń gē bī eko kú um nyɔ̄ í cīce yɛhɛ mla ācɛ áncā ŋ́, ɛ́ɛ́ nɛ̄ n jé ɔnyɛ mla ācɛ ɔhá ŋ́. Ipú ɛyí o tá ajɛ lɛ ɛlā kú uwɔ ā, n klá kú um ofōōfū um le cɔ̄nū nɛ̄hi táajɛ.

¹⁸Ɔdíyá nɛ̄ n géē yɔ̄ ī móōwē piyóó āa? Nɛ̄ ágbe kú um ā í gē jé ŋ́ mā a? Ā tíne o lɛ um já kwu ɔwɛ bɛ̄ɛka ɔkpá nōo ge je ŋmó ɔnɔ̄ ā nɛɛ?”

¹⁹Anɔ́ɔ Óndú ā tá um ohi kahíníī, “Ɔ́dāŋ ka a kwúcē, n géē mīyɛ awɔ cīgbīhi. A í wɛ ɔ̄cocɛ̄hɔ̄ kú um igbɔhá kpɔ́ ɛɛ́. Ikɔkɔ o yɔ̄ ī mīyɛ ɛlā ɛflɛ́ɛfu mla ɛlā olíla ā, a géē yɔ̄ í tɔ́ɔna kú ɛhɔ̄ okpaakpa, a klla í wɛ ɔ̄comɛ́ɛbɛ igbɔhá kpɔ́ ɛɛ́. Ācɛ a í pɛ́ wā ɛgiyí uwɔ, á gāa cɛgbá o ga ɛgiyí wā ŋ́.

²⁰N géē je uwɔ yá ɔdɔ kú oje udɔ, uwá géē nuunu tá uwɔ, amáŋ é gáā fu uwɔ iyē, yá uwɔ lé glá ŋ́. N géē yɔ̄ mla awɔ, klla í lɛ uwɔ tū ɛbɔ́ ŋmá ɛgiyí uwā.

²¹N géē hɛ uwɔ tá ŋmá abɔ̄ ɔfú kú ācɛ obɔ̄bíipú ā. Ami Óndú ā lɛ ɛlā ka ɛɛ́.”