Read idoma UJƐRƐMÍYA 16 Bible Online

UJƐRƐMÍYA 16 - idoma bible

UJƐRƐMÍYA 16

¹Igbɔhá, Óndú ā kɛlā gā um kahíníī,

²“A híī lɛ ɔnyā ɛ́ɛ́ nɛ̄ a gē ma ayí dúúmā ɛga ɛ́gɛ́nyā ŋ́.

³N géē ka ga uwɔ, ɔdā nōo géē yá ayí nēé ma amānyā mɛ́mla aɛ́nɛ́ uwā mɛ́mla ádā uwā a.

⁴Ōcē obɔ̄bí géē je uwá kpó ŋmó, ɔ̄cɛ dúúmā í gáā yɔ̄ nōo ge jikwū uwā ɛ́ɛ́ nōo ge kpó okwū kú uwá nyi ŋ́. Okwū kú uwá géē tīkwū klá ajɛ bɛ̄ɛka ɛmī ɛna ā. É géē kpó uwā ŋmó ɔgbɛ́fú, ámāŋ ɛmiyɛ géē kpó uwā ŋmó. Okwū kú uwā géē wɛ ɔdolé kú aígbáanɔ kú ɔkpáncō mɛ́mla aɛ́bɛ́ kú ipú ácí.

⁵Ā bēhé ga ipú inu dúúmā nēé bá ī jikwū okwū klá yēkwu ŋ́. Ā yá ɔtūnōbí kú ɔ̄cɛ dúúmā ŋ́. N klla gáā hɔ́hā ce ācɛ ɔlɛ́ um kéē lɛ ɛbɔ́, mɛ́mla ihɔtū mɛ́mla eyīnyinyi ɛɛ́ gɛ ŋ́.

⁶Kwu aólɔdu mɛ́mla aólɛhá géē pɛ́ kwú ipú ajɛ ā. Ɔ̄cɛ dúúmā í gáā kpó uwā nyi, ɛ́ɛ́ nɛ̄ ɔ̄cɛ dúúmā gē yēkwu kú uwá ŋ́. Ɔ̄cɛ dúúmā í gāa lɛ īlī ekwu wiiyē ɛ́ɛ́ nēé ge púla ɛyí kú ekwu ō yɔ̄ ŋ́.

⁷Ɔ̄cɛ dúúmā í gáā lé klla gwá mla ɔ̄cɛ dúúmā nɛ̄ ɔ̄cɛ ɔlɛ́ nū gekwú kóō tá ɔ̄ ɔtū lé ŋ́. Ɔ̄cɛ dúúmā í gáā pi ɔtū nū, tá ɔ̄ ń ŋmá ŋ́, ó kōō wɛ ɛ́nɛ́ nū mɛ́mla ádā nū kwú á.

⁸Ā bēhé ga ipú inu dúúmā nɛ̄ ācɛ bá i lé ucɛ ŋ́. Ā cīce mla uwá ɛ́ɛ́, nɛ̄ a gē lé gē gwá mla uwá ŋ́.

⁹ Jāhɔ̄ ká ā pó ɔdā nɛ̄ ami, Óndú, nōo lɔfú fíyɛ́ dúú, Ɔwɔicō kú Ísrɛ̄lu gē ka ā. N géē gwū éeyē ō gwó mɛ́mla ijē ō gwó kú uculo kú ɔ̄nya ō lɛ ŋmá ɛgiyí aá. Ācɛ amānyā géē lā géē yēeyī kéē bī eyī kú uwá le má ɛ̄nyā.

¹⁰“Eko nɛ̄ a lɛ odúúdú ɛlā nyā da uwá, é géē da uwɔ ɔ̄kā ɔdā nōo yá ɛɛ́, nɛ̄ alɔ géē móōwē í jé ɔnɔ nɛ̄hi nyā a. É géē da uwɔ ɔ̄kā íne nēé bīya mɛ́mla ɔdōbɔ̄bí nyá nēé yá lɛyíkwu Óndú Ɔwɔicō kú uwā ā.

¹¹Ā géē da uwá kahíníī, Óndú ā ka, ‘Aaádáádā aá kwúcē ŋmá ɛgiyí um, nyɔ̄ ī gbɔ̄ɔkɔ, klla gbā ɔwɔ ɔhá ɛ̄gbā. É lɛ igbīhi ce kwu um, é kllá lɛyítáajɛ lɛ ɛlā nɛ̄ n gē nwū ā ŋ́.

¹²Amáŋ aá yá ɔdōbɔ̄bí fíyɛ́ aádáádā aá. Odúúdú ācɛ obɔ̄bí mɛ́mla ācɛ oyíkpɛ̄yí olɔfú ā, aá kllá lɛyítáajɛ gā um ŋ́.

¹³Ohígbū ɔ́ɔmā, n géē je aá tɛ́cɔ̄ ŋmá ipú ajɛ kú aá nyā ga ipú ajɛ nɛ̄ aá, amáŋ ka aádáádā aá í jé ɔdā dúúmā lɛyíkwu ɔ́ jéjée ɛɛ́ ŋ́ ma. Abɔ́ɔ, aá gē gbā ɔwɔ kú éwɔhá ɛ̄gbā kwu otú kwu ɛnɔ, N gáā méyīnyinyi aá ŋ́.’”

¹⁴Óndú ā kahíníī, “Eko géē wā nɛ̄ ācɛ í gáā bī um gbɛka ka amíyɔ̄ wɛ, Ɔwɔicō oyēeyī nɛ̄ ɔ́ɔ bī ācɛ kú Ísrɛ̄lu bɛ̄cɛ ŋmá ajɛ kú Íjīpiti ā ɛ́ɛ́ gɛ ŋ́.

¹⁵Amáŋ é géē bī n gbɛka ka, amíyɔ̄ wɛ Ɔwɔicō oyēeyī nɛ̄ ɔ́ɔ bī ācɛ kú Ísrɛ̄lu bɛ̄cɛ ŋmá ajɛ kú ɛhícō mɛ́mla ipú odúúdú éwo nɛ̄ n pa uwá hīla nyɔ̄ ā. N géē kpó uwā cīgbīhi wā ewo kú ɔlɛ́ uwā, wā ipú ajɛ nɛ̄ n je lɛ aádáádā uwā a. Ami Óndú ā lɛ ɛlā ka ɛɛ́.”

¹⁶Óndú ā kahíníī, “N géē tū ācɛ okwébényi alɛwa ɛhɔ̄ wā ka e lɛ ācɛ a kpó. N klá i tū aófītɛ́ alɛwa ɛhɔ̄ wā kéē tá ɔtɛ́ ācɛ nēe ba ɛyí ɛfu mɛ́mla ipú ɔ̄gɔ̄ ɛcɔ̄ dóódu a.

¹⁷N yɔ̄ ī má ɔdā dóódu nēé bá ī yá ā. Ɔdā dúúmā nēé bá ī yá í tayínū ŋmá eyī kú um ŋ́. Íne dúúmā nēé bīya í gla um eyī ŋ́.

¹⁸N géē yá kéē cílá ulé kú íne nēé bīya mɛ́mla óbíipú nēé bī ā ɔ́klá ɛpa. Ohígbū kéē kwu ajɛ kú um ú tēelihɔ o ŋmá lɛ aɔ́wɔ mɛ́mla aɛ́cí ɛ̄kɛ̄mgbɛ̄ ohile nēé yēeyī ŋ́, nēé kpó bá ipú ajɛ ɔlɛ́ um ā.”

¹⁹Óndú, awɔ gē gbō um kllá i je ɔfú gā um á. A gē tá um abɔ̄ eko kú unwalu. Odúúdú éwo ā géē pɛ ŋmá ɛga dóódu kú ɛcɛ wā í da uwɔ kahíníī, “Aádáádā alɔ a í lúgwū ɔdā dúúmā gwū aɛ́cí ɛ̄kɛ̄mgbɛ̄ tá ŋ́. É kē wɛ ɔdā dúúmā gwū icɛ̄bɔ̄ tá ŋ́.

²⁰Ɔ̄cɛ ɔlamu lɔfú yá ɔwɔ lɛ iyīnū glá āa? Ehée ɔ́dāŋ ka ɔ̄cɛ lɛ ɔwɔ yá lɛ iyīnū, ɔ́ɔmā í wɛ ɔwɔ ɛ́ɛ́ gɛ ŋ́ má.”

²¹Ohígbū ɔ́ɔmā, Óndú ā kahíníī, “Igbɛ ékpónú, piyóó, n géē yá ka odúúdú éwo ā kéē le lɔfú mɛ́mla íkwu kú um jé. É í jé ka amíyɔ̄ wɛ Óndú á.”