Read idoma UJƐRƐMÍYA 17 Bible Online

UJƐRƐMÍYA 17 - idoma bible

UJƐRƐMÍYA 17

¹Óndú ā kahíníī, “Ācɛ kú Ujúda, é bī ɔdōtɔ́kpá ō lɛ ɔkɔ́ oje le íne nɛ̄ aá bīya ā tá ajɛ. É klla kē bī ɔdā o lɛ ɔkɔ́ olɔfú le ɔ́ pi tū ipú ɔtū ká aá. É kē klla le ɔ́ tá tū ɔ́kíka kú ede ká aá.

²Ayípɛ̄nɛ̄ŋcɛ́ kú ɔlɛ́ uwā gē nyɔ̄ ī gbā ɛ̄gbā ɛyí ede nēé fu céé lɛ iyī uwā mɛ́mla ɛcɔ̄ kú ɔwɔnɔ̄nyā kú uwā nēé hī ka Ássera ɔkwu ɔcí ɛ̄mɛ̄ɛ̄mɛ̄ dóódu mɛ́mla ɛyí kú aɛ́fu.

³Mla ɛyí ɛfu mɛ́mla ɛga opéee kú ajɛ ā. N géē yá ka aólɛlā kú aá kéē lɛ agbénú kú aá kpó, ohígbū ínōbīya kú aá ipú odúúdú ajɛ ā.

⁴Ajɛ nɛ̄ n je lɛ aá ā, aá géē ma ɔ̄ tá lɛ ācɛ ɔhá. N géē yá aá ká aá gbā aólɛlā kú aá ɛ̄gbā ipú ajɛ nɛ̄ aá jé ɔdā dúúmā lɛyíkwu ɔ́ ŋ́ ma. Ohígbū ka, ɔnu kú um lɛbɛ̄ɛka ɔlá nɛ̄ ó gē nyí ŋ́ mā.”

⁵Óndú ā kahíníī, “N géē ŋmó ɔ̄cɛ dúúmā nōo kwúcē hɛ um tá ɛpɔ̄bí, n klla géē ŋmó ɔ̄cɛ dúúmā nōo lɛ ɔtū kpó ce ɔ̄cɛ, mɛ́mla ɔfú kú abɔ̄ kú nū ɛ̄pɔ̄bí dúú.

⁶Ɔ̄cɛ ɔ́ɔmā lɛbɛ̄ɛka ácí kú ígbíli, nōo ge jɛ̄ ipú igbíli gē je ŋmɔ́la tū ajɛ ɔnɔ̄ ā. Amáŋ ajɛ ka ɔmā nɛ̄ ɔdā dúúmā í jɛ̄ anú glá ŋ́ mā, ɔdā olɔhi dúúmā í gáā yá lɛ ɔ́ ŋ́.

⁷Amáŋ n géē yá ɔdā olɔhi lɛ ɔ̄cɛ dúúmā nōo lɛ ɔtūce um ā.

⁸ Ɔ̄cɛ ɛ́gɔ́ɔmā lɛbɛ̄ɛka ɔcí nōo kwu okónu ɔkpá, yɔ̄ ī jɛ ā nɛ̄. Ɔcí nōo gē tá ɛgba gā ipú éŋkpɔ̄ ɔkpá ā nɛ. Ó gáā yúufi eko nɛ̄ ɔnɔ̄ le fa ŋ́. Ohígbū ka ēpū kú nu, i gáā ŋmó, wúla ŋ́. Amáŋ o géē wɛ ɛ̄mɛ̄ɛ̄mɛ̄ piyóó. Eko dúúmā nɛ̄ ɔwɔ í yá ŋ́, ó lɛ ɛlá wu ɔɔ́ ŋ́, o yɔ̄ ī gwá ikpō piyóó.

⁹Ɔtū kú ɔ̄cɛ ge plá ɔ̄cɛ fíyɛ́ ɔdā dóódu á. Ó bɔ̄bí nɛ̄hi, ɔnyɛ géē jé ɔtū kú ɔ̄cɛ glá?

¹⁰ Ami, Óndú ā le ɛlá nɛ̄ ɔ̄cɛ gē gbo ipú ɔtū kú nū ā jila, klla le ɔ́ jámá kú um jé ɛlá nēé ī gbo ā. N géē yá mla ɔnyɔ̄ɔnyɛ ɛ́gɛ́nɛ̄ o lā lɛ ā mɛ́mla ɛ́gɔ́dā nōó i yá ā.”

¹¹Ɔ̄cɛ dúúmā nōo gē lɛ ije, ɔwɛ nōó le kpaakpa ŋ́, lɛbɛ̄ɛka ígbáanɔ nōo ge hɛ́ ayí, nōo wɛ anú tá ŋ́ má. Eko nōó gáā jɔ́nyɛ kú oyēeyī kú nū ā, cɛ́ɛ́ agbénú ā mɛ. Igbīhāajɛ ā, ācɛ í má ka ɔ́ɔ wɛ olíla nɛ.

¹²Agblīihɔ-nɛ̄hi kú alɔ ā lɛbɛ̄ɛka, akpa kú ɔcɛ́ nōo lɛ ɛgahi nɛ̄hi ā, ó kwu ɛga nōo licō fíyɛ́ dúú ā, ŋmá eko nēe gwó ɔ̄ ā.

¹³Óndú, awɔ nɛ̄ ācɛ Ísrɛ̄lu lɛ ɔtū ce á. Uwēyī géē kwú odúúdú ācɛ nē e kwu ŋmá ɛgiyí uwɔ nōo wɛ Óndú ā. Uwá géē bī táajɛ ɛ́gɛ́nɛ̄ iyē nēé tá tū ipú úmúlá gē nya ŋmá ajɛ ā. Ohígbū kéē lɛ igbīhi ce kwu uwɔ Óndú ā, nōo lɛbɛ̄ɛka njɔlɔ kú éŋkpɔ̄ olɔhi nōo ī hɛ́ ɔ̄cɛ ijēenyi ā.

¹⁴Óndú, lɛ um hɛ́tá cɛ́ɛ́ ká n̄ le lɔfú iyē dúúdú. Lɛ um hɛ́tá cɛ́ɛ́ ká n̄ lā ɛbɔ́ cííí. Awɔ nɛ̄ n gē cɛ̄tra á.

¹⁵Ācɛ gē da um kahíníī, “Ufi nɛ̄ Óndú ā ge tū alɔ ɔ́ɔmā yɔ iní gɛ? Óndú ā kóō wā í yá ɔ̄ mɛɛ ŋ́.”

¹⁶Amáŋ Óndú, ó wɛ ami da uwɔ ka ā bī ífi mɛ́mla ámíyā wā í klá uwá ŋ́. Ń gē gbɔ̄ɔkɔ ohígbū eko kú unwalu a lɛ uwá ŋ́. Óndú ā jé ɛ̄nyā, a jé ɔdā nɛ̄ n ka ā.

¹⁷Ā híī je pīya ɔdā ō tū um ufi ŋ́, ohígbū ka awɔ wɛ ɛga otayínū ɛbɔ́ kú um, eko dúúmā nɛ̄ n lɛ unwalu lɛ á.

¹⁸Lɛ uwēyī kpó tū ācɛ nē gē yá um ŋmó ā ɛyí, amáŋ Óndú, lɛ um nyatá. Lɛ uwá ipú gbogodo ipú ufi, amáŋ ā tū um ufi ŋ́. Lɛ ámíyā bī wā í klá uwá ká ā kwú uwā ú kpó yíífi ŋmá ajɛ dúúdú. Lɛ uwá ca tāajɛ nyɛŋɛnyɛŋɛ.

¹⁹Anɔ́ɔ Óndú ā da um kahíníī, “Ujeremíya, nyɔ̄ gāá lɛ ɛhɔ̄ nyā cɛ̄ tɛ́ɛcɛ okónu igá kú ɔlɛ́ ācɛ nē é hī ka Ubɛ́njamīn ā, Okómpinu, nɛ̄ ɔcɛ́ kú Ujúda gē bū ga ɛcɛ klla ī bū wā inu ā. A klla í ŋmá abɔ́ɔ gāá cɛ̄hɔ̄ ā lɛ odúúdú ācɛ okónu igá kú Ujerúsālɛm ā.

²⁰Le ka lɛ aɔ́cɛ́ mɛ́mla odúúdú ācɛ kú Ujúda mɛ́mla odúúdú ācɛ nēe lā Ujerúsālɛm ā, mɛ́mla odúúdú aɛ́nɛ̄ e géē bēhé igá nyā a, kahíníī, “Aá jāhɔ̄ lɛ ɛlā nɛ̄ um ka a.

²¹ Ká lɛ uwá ka, ɔ́dāŋ ka oyēeyī kú uwā he uwá ɔtū, ayíka kéē híī bī iyó dúúmā ɛ̄cī Usábāti ā ŋ́. É híī bī ɔdā dúúmā bēhé igá kú Ujerúsālɛm ā ɛ̄cī Usábāti ŋ́.

²² Ɛ́ɛ́ nēé gē bī ɔdā dúúmā bɛ̄cɛ ŋmá ɔlɛ́ uwā ɛ̄cī Usábāti ā ŋ́. É gáā yúklɔ́ ɛ̄cī Usábāti ā ŋ́, é géē le ɔ́ tū, kó ō wɛ ɛ̄cī otīhɔ lɛ Óndú ā ɛ́gɛ́nɛ̄ n je ɔ́da lɛ aádáádā uwā ā.

²³Aaádáádā uwā í jāhɔ̄ gā um, ɛ́ɛ́, nēé gē pó ɛlā kú um ŋ́. Ikɔkɔ ɔ́ɔmā, é yíīkpɛ̄yí olɔfú tú um. É gáā jāhɔ̄ ga um ɛ́ɛ́, nēé gē klɔcɛ́ ɔdā dúúmā ŋmá ɛgiyí um ŋ́.

²⁴Le ka lɛ ācɛ nēe bá nyā kéē lɛyítáajɛ lɛ odúúdú íne kú um. É gáā bī iyo dúúmā bēhé wɛ̄ɛcɛ ŋmá Ujerúsālɛm ɛ̄cī Usábāti ŋ́. É géē lɛ ɛ̄cī Usábāti ā tū ɛ̄cī otīhɔ lɛ Óndú ā, é gáā yúklɔ́ dúúmā ipú ɛ̄cī ɔ́ɔmā ŋ́.

²⁵Cɛ́ɛ́ aɔ́cɛ́ mɛ́mla aígabɔ̄ kú uwá géē bēhé wā Ujerúsālɛm ā. É klla kē í lɛ ɛdɔ íkwu kú ɔcɛ́ ɛdɔ nɛ̄ Údéfīdi lɛ ā. Uwá mɛ́mla ācɛ kú Ujúda mɛ́mla ācɛ Ujerúsālɛm bú ipú úgbɔ́ɔnya mɛ́mla ɔnya ō ce. Igelī nɛ̄hi kú Ujerúsālɛm kē mu mla ācɛ piyóó.

²⁶Ācɛ géē wā ŋmá igelī kú Ujúda mɛ́mla ipɔ́lɛ́ nɛ́ncɛ nēe yɛ Ujerúsālɛm jīla tá ā. É géē wā ŋmá ipú ajɛ kú Ubénjamin, ŋmá ikpɛ́fu, ɛyí ɛfu, mɛ́mla ɛháajɛ kú Ujúda. E géē bī ɛya oyi ɔlá dúúdú, kú īkpɔ̄dā, ɔtulalī mɛ́mla ɛya kú ahínyá ō tá wā ipú Agblīihɔ-nɛ̄hi kú um.

²⁷Amáŋ é géē lɛyítáajɛ gā um, klla í lɛ ɛ̄cī Usábāti kú um tū, kóō wɛ ɛ̄cī otīhɔ. É gáā bī iyó dúúmā bēhé igá kú Ujerúsālɛm ɛ̄cī ɔ́ɔmā ŋ́. Ohígbū ka ɔ́dāŋ kéē lɛ iyō kpó bēhé wā ipú igá kú Ujerúsālɛm, ɛ̄cī ɔ́ɔmā, n géē je odúúdú ɔwɛ kú igá kú Ujerúsālɛm a kpó tū ɔlá. Ɔlá ā kē i je agblɔ̄cɛ́ kú Ujerúsālɛm ā yi tāajɛ, nɛ̄ ɔ̄cɛ dúúmā í gáā mí ɔlá ɔ́ɔmā glá ŋ́.”