Read idoma UJƐRƐMÍYA 18 Bible Online

UJƐRƐMÍYA 18 - idoma bible

UJƐRƐMÍYA 18

¹Ujeremíya ka Óndú ā ɔ́ɔ kɛlā lɛ anúɔ kahíníī,

²“Le tá ɔlɛ́ ɔ̄comɛtɛ́ ā. Eko nē a le tá abɔ́ɔ ā, n géē da uwɔ ɛlā nɛ̄ a géē ka lɛ ācɛ ā.”

³Anɔ́ɔ n le yɛ tá abɔ́ɔ á. N má ɔ̄comɛtɛ́ ā yɔ̄ ī mɛtɛ́ ɛyí akā nɛ̄ ó gē lɛ ɔmɛ ce ɔ́ ī pīya ɔ́ eyī kóō ma ɛtɛ́ ā.

⁴Eko dúúmā nɛ̄ ɛtɛ́ dúúmā ī ma lɔhi ŋ́ nɛɛ, ɔ̄comɛtɛ́ ā kwú ɔ́ ú ca, cɛ́ɛ́ ó kwú ɔmɛ kú nū í ma ɛtɛ́ ɔhá ɛ́gɛ́nɛ̄ o he ɔ́ ɔtū ā.”

⁵Anɔ́ɔ Óndú ā da um ka n̄ da ācɛ Ísrɛ̄lu kahíníī,

⁶“Ācɛ Ísrɛ̄lu, n lɔfú ō yá ɔdā nōo he um ɔtū mla aá, ɛ́gɛ́nɛ̄ ɔ̄comɛtɛ́ ge yá mla ɔmɛ ā. Aá bá ipú abɔ̄ kú um, ɛ́gɛ́nɛ̄ ɔmɛ gē yɔ̄ ipú abɔ̄ kú ɔ̄comɛtɛ́ ā.

⁷N lɔfú ka n géē je éwo amáŋ ajɔ̄ɔ̄cɛ́ éyi fu ŋmá ajɛ, je ɔ́ catāajɛ, klla í je ɔ́ yíífi.

⁸Amáŋ, ɔ́dāŋ ka ācɛ éwo ɔ́ɔmā mabɔ̄ ɔdōbɔ̄bí nēé ī yá ā tá. N gáā yá ɔdōbɔ̄bí nɛ̄ n ka ka n̄ géē yá uwā ā ɛ́ɛ́ gɛ ŋ́.

⁹Abɔ̄ ó lɛ dúú á ɔ́dāŋ nɛ̄ n ka n géē gwó éwo ámāŋ ajɔ̄ɔ̄cɛ́ dúúmā gicō, klla í bu ɔ́ tū á.

¹⁰Ɔ́dāŋ nɛ̄ ācɛ éwo ɔ́ɔmā í lɛyítáajɛ gā um ŋ́, klla bá ī yá ɔdōbɔ̄bí, ń gáā yá ɔdōlɔhi nɛ̄ n ka n géē yá lɛ uwá ā ɛ́ɛ́ gɛ ŋ́.”

¹¹“Ohígbū ɔ́ɔmā, Ujeremíya, nyɔ̄ í le ka lɛ ācɛ kú Ujúda mɛ́mla ācɛ nēe lā Ujerúsālɛm ā, ka n yɔ̄ ī yá ojuju obɔ̄bí lɛyíkwu uwá klla yɔ̄ ī tútū o yá uwā unwalu. Lɛ da uwá kéē mā ucē ɔ́bíipú ō yá tá, cɛ́ɛ́ kéē gbɔɔ́ ō yá ucē okpaakpa.

¹²É géē tá uwɔ ohi ka “Ehée, Ā kpó īyī uwɔ owu bónū ŋ́. Alɔ géē bá ī yá ɔdā nɛ̄ alɔ gbɛ́lá ō yá ā. Odúúdú alɔ géē yá ɔdā nɛ̄ ɔtū olɔfú mɛ́mla ɔtū obɔ̄bí kú alɔ da alɔ ka alɔ yá ā.”

¹³Anɔ́ɔ Óndú ā kahíníī, “Lɛ ɔ̄kā da odúúdú aéwo ā, ɔ́dāŋ ka é pó ka éwo dóódu ɔ́ɔ yá ɛdɔ ɔdōbɔ̄bí nɛ̄hi nɛ̄ Ísrɛ̄lu ɔ́ɔ yá nyā jéjée ɛɛ́.

¹⁴Ébú gē ŋá ŋmá icō ɛfu ápɛ́tácɔ̄ kú Ulɛ́bānɔn ā jéjée ɛɛ́? Ɔkpá ohīlaŋdɔ́ nōo ī pɛ́ ŋmá ɛyí ɛfu kú Uhɛ́mɔn ā ŋmó jéjée ɛɛ́?

¹⁵Náaná ācɛ ɔlɛ́ um kwú ɛlā um í gwō, bá í lɛ ɔtulalī kwu ɔlá lɛ aɛ́cí nēé lɛ ile dúúmā ŋ́ mā. É le nyíleyī ŋmá ɔwɛ nēé cíkā ō yɛ ā ɛɛ́. É yɛce ɔwɛ kú íkée ā ɛ́ɛ́ gɛ ŋ́. Ɔwɛ nɛ̄ ó cílatū ŋ́ mā nēé gē yɛ á.

¹⁶Ohígbū ɔ́ɔmā, é géē je ajɛ ɔlɛ́ uwā wúlātāajɛ, í je ɔ̄ tá alácɛ̄. Ó í wɛ ɔdā nōo í cɛ̄ lɛ ācɛ í bá ī tɔ́cɔ́ ohígbū nū, nɛ̄ ācɛ géē bá í leyī gwō ɔ̄ bónū piyóó. Odúúdú ācɛ nēe géē wā í yɛ pi ɔ̄ɔ̄ ā, ó géē yá uwā eyījii nēé ī yɔ̄ ī mīyɛ̄yí jigijigi.

¹⁷N géē cɛ̄ lɛ aólɛlā kú uwā fíyá ācɛ ɔlɛ́ um ákátā bɛ̄ɛka ɛ́gɛ́nɛ̄ owu gē tá ŋmá ɛnɔ̄ɔ̄nɛ̄ gē kpó úmúlá ā. N géē cīgbīhi kú um kwu uwá, í klla gáā tá uwā abɔ̄ eko nɛ̄ ámíyā géē yá uwā ŋ́.”

¹⁸Anɔ́ɔ ācɛ ā kahíníī, “Alɔ lɛ ujɔ̄ tū ká alɔ lɛ ɔdā éyi yá Ujeremíya. Ācogwɛ́ɛya bá nēe géē bá ī tū alɔ ukɔ́ eko dóódu. Alɔ lɛ ācojéeyī eko dóódu nēe géē nwū alɔ ɛlā. Ācomɛ́ɛbɛ ɔhá kē bá nēé géē bá ī cɛ̄hɔ̄ kú Óndú ā lɛ alɔ eko dóódu. Ālɔ̄ lɛ ɛlā kpó ce ɔ́. Ālɔ̄ kē híī jāhɔ̄ lɛ ɛlā nōó gē ka ŋ́.”

¹⁹Anɔ́ɔ n lɛ ɔkɔ gbā kahíníī, “Óndú, pó ɛlā nɛ̄ n gē ka ā, cɛ́ɛ́ káā jāhɔ̄ lɛ ɛlā nɛ̄ aólɛlā kú um bá ī ka lɛyíkwu um ā.

²⁰É gē lɛ obɔ̄bí cíla ulé kú olɔhi ŋ́. Blakwu ɛ́gɛ́nɛ̄ n wā ɛgiyí uwɔ gáā kɛlā ohígbū uwā ā, cɛ́ɛ́ káā híī yá mla uwá ipú ícɔ̄nū kú uwɔ ŋ́ mā. Amáŋ é lɛ ukpa kpla táajɛ gbēyī um, kéē lɛ um kwú.

²¹Ohígbū ɔ́ɔmā, Óndú, abālɔbányā, yá ka ɔkpɛtá kóō lɛ ayí kú ɔlɛ́ uwā kpó ŋmó. Yá kéē bī ɔkpacaŋ́gelī lɛ uwá kpó ŋmó. Ācɛnyā kú uwá ka é kwú pīya anyōkwū, ayí uwā kéē kwú pɛ́ gekwú dúú. Ōcē obɔ̄bí kóō lɛ ācɛnyīlɔ ā kpó ŋmó. Ayípōklóbīya kú uwā kée kwú pɛ́ gekwú ɔgbɛ́fú.

²²Lɛ ācɛ o lɛwa nɛ̄hi tū wā í kwú ɔlɛ uwā ú wúlatāajɛ igbledū, nɛ̄ íbáā gē dɛ̄ ipú aɔ́lɛ́ uwā. Kóō le lɛ ā ohígbū kéē lɛ ɔ̄gɔ̄ bu tá gā um ká n̄ míya tá ɔ́, klla lɛ ukpa kpla táajɛ gā um kóō lɛ um kwú ɛɛ́.

²³Amáŋ Óndú ā jé odúúdú ujɔ̄ nēé tū gáā ŋmó um ā. Ā híī je ɔ́bíipú kú uwā ā yá uwā ɛhi ŋ́. A kē híī je ínōbīya kú uwā yá uwā ɛhi ŋ́. Lɛ uwá bīyatāajɛ, cɛ́ɛ́ ká ā bī ícɔ̄nū kú uwɔ le yá mla uwá.”