Read idoma UJƐRƐMÍYA 19 Bible Online

UJƐRƐMÍYA 19 - idoma bible

UJƐRƐMÍYA 19

¹Óndú ā da um ka amíyɔ̄ nyɔ̄ í lɛ ɔjá nēé ma ŋmá ɔmɛ éyi lá. O klla da um ka amíyɔ̄ lɛ aóhī kú aótrɛ̄yí kú ācɛ ā, mɛ́mla aóhī kú aótrɛ̄yí kú ācogwɛ́ɛya ā kpó tū ɔkwu.

²Cɛ́ɛ́ ká ālɔ̄ le bū okómpinu kú Ákánjɔ̄, bɛ̄cɛ ga ɔpɛ́ kú Uhínɔm. Ka abɔ́ɔ nɛ̄ amíyɔ̄ ɔ́ɔ géē cɛ̄hɔ̄ nóō tū um ā tɛ́ɛcɛ á.

³Anɔ́ɔ Óndú ā da um ka amíyɔ̄ ka kahíníī, “Aɔ́cɛ́ kú Ujúda mɛ́mla ācɛ nēe lā Ujerúsālɛm ā, aá jāhɔ̄ lɛ ɛlā nɛ̄ ami, Óndú ā, nōo lɔfú fíyɛ́ dúú, nōo wɛ Ɔwɔicō kú Ísrɛ̄lu ā lɛ ō ka ā. Ɛdɔ ámíyā nɛ̄ n géē cɛ̄ lɛ ɔ́ yá amānyā í fíyɛ́ abɔ̄, nōo géē yá ɔ̄cɛ dóódu nōo géē pó ā eyījii.

⁴N géē yá lɛ ā ohígbū ka ācɛ ā nyɛ̄ɛ̄ hɛ̄ um tá, klla lɛ amānyā tēelihɔ abɔ̄ é bá ī gwɛ́ɛya lɛ aɛ́cí kú aéwɔhá ā. Kwu ācɛ ā, kwu aádáádā uwā mɛ́mla aɔ́cɛ́ kú Ujúda ā í jé ɔdā dúúmā lɛyíkwu aɛ́cí ɔ́ɔmā ŋ́. É ŋmó ācɛ nēé yá ɔdōbɔ̄bí dúúmā ŋ́ alɛwa amānyā.

⁵É klla lɛ ikpɛ̄cí gwó lɛ ɛcí nēé hī ka Ubáalu, cɛ́ɛ́ kéē kpó ayí uwā gwɛ́ɛya oyi ɔlá dúúdú lɛ ɔ́. Ń je ɔ́da lɛ uwá kéē yá ɔdā ɔ́ɔmā ŋ́ ɛ́ɛ́ nɛ̄ ɛlá kú nū kōō gē wā ipú ɔtū kú um ŋ́.

⁶Ohígbū ɔ́ɔmā, eko géē wā nēé gáā hī amānyā ka ɔpɛ́ kú Utɔ́fɛ̄ɛti ámāŋ ɔpɛ́ kú Uhínɔm ɛɛ́ gɛ ŋ́. Amáŋ, é géē hī amānyā ka ɔpɛ́ nēé ī hɛ́ ācɛ ā ɔkɔ nɛ̄hi.

⁷Amānyā, n géē yá ka odúúdú ojuju kú ācɛ Ujúda mɛ́mla ācɛ kú Ujerúsālɛm ā kóō le pīya áncā. N géē cɛ̄ lɛ aólɛlā kú uwā yá uwá lé klla í kpó uwā ŋmó ɔgbɛ́fú amānyā. N kē í yá kú aígbáanɔ nēe ī wu icō ā mɛ́mla aɛ́bɛ́ ipácí kéē kwú aókwū kú uwā kpó lé.

⁸N géē je igelī wúlātāajɛ dúúdú, nōó géē wɛ ɛbɛ ohéyī nɛ̄ ācɛ géē bá ī tɔ́ɔcɔ́ ohígbū n̄u. Ɔ̄cɛ̄ dúúmā nōo gáā yɛ pī ɔ̄, okónu í gāa hɛ́ ɔ̄ɔ̄ ŋ́, ó klla í yɔ̄ ī leyī tónū.

⁹Aólɛlā a gēe cīíbɔm tū igelī ā kéē kpó ācɛ kú igelī ā ŋmó. Íbɔm nɛ̄ aólɛlā ā gāa cē tū uwā ā géē bɔ̄bí nɛ̄hi, nɛ̄ ācɛ nēe bá igelī nɛ̄hi ā géē bá ī cē īyī uwā lé klla gē bá ī kpó ayí uwā lé.”

¹⁰Anɔ́ɔ Óndú ā da um ka amíyɔ̄ lɛ ɔjá ā ca iyɔ̄bū ācɛ nēe wā abɔ́ɔ mla um ā.

¹¹Ó klla ka amíyɔ̄ da uwá ka anúɔ Óndú nōo lɔfú fíyɛ́ dúú ā kahíníī, “Ɛ́gɛ́nɛ̄ ɔjá kú ɔmɛ nyā ca klá ajɛ nōó tōō gllayá gɛ ŋ́ mā, ɛ́gɔ́ɔmā nɛ̄ n géē je ācɛ nēe bá nyā mɛ́mla igelī kú uwā yíífi á. Ācɛ géē kpó aókwū kú uwā nyi ɔpɛ́ kú Utɔ́fɛ̄ɛti, ohígbū ka ɛga ɔhá dúúmā í yɔ̄ nēé gē kpó aókwū ā nyi gɛ ŋ́.

¹²Ɛ́gɛ́nɛ̄ n yá Utɔ́fɛ̄ɛti ā, ɛ́gɔ́ɔmā nɛ̄ um géē yá Ujerúsālɛm nyā mɛ́mla ācɛ nēe lā ipú nū á.

¹³É gē yi ɔtulalī ɔlá lɛ uwā, lɛ aínyílɔ́wɔ ā, klla gē lɛ ejé fu ajɛ lɛ aɛ́cí kú aéwɔhá ā, ɛyí aínu nēe bá ipú Ujerúsālɛm mɛ́mla agblɔ̄cɛ́ kú aɔ́cɛ́ kú Ujúda. Odúúdú aínu ɔ́ɔmā géē wɛ ɔdā nōo tēelihɔ bɛ̄ɛka Utɔ́fɛ̄ɛti ā.”

¹⁴Anɔ́ɔ n nyɛ̄ɛ̄ ŋmá Utɔ́fɛ̄ɛti, ɛga nɛ̄ Óndú ā tū um ɛhɔ̄ nyɔ̄ í cɛ̄ ɛhɔ̄ nyā ā. N nyɔ̄ gāa háyi ipú Agblīihɔ-nɛ̄hi kú Óndú ā klá lɛ ɛhɔ̄ nyā cɛ̄ tɛ́ɛcɛ lɛ odúúdú ācɛ ā.

¹⁵N da uwá ka Óndú ā nōo lɔfú fíyɛ́ dúú ā, nōo wɛ Ɔwɔicō kú Ísrɛ̄lu ā ɔ́ɔ ka anúɔ géē yá ka ámíyā nɛ̄ anúɔ ka koó í yá Ujerúsālɛm ā, koó le yá Ujerúsālɛm mɛ́mla odúúdú aígelī nɛ̄ŋ́cɛ́ nēe kwu ɔ́ ajaajɛ ā. Ó ka anúɔ géē yá lɛ ā ohígbū ka uwá bá ī yá īkpɛ̄yí olɔfú, klla tá ō jāhɔ̄ lɛ ɔda nɛ̄ anúɔ gē ka ā.”