Read idoma UJƐRƐMÍYA 20 Bible Online

UJƐRƐMÍYA 20 - idoma bible

UJƐRƐMÍYA 20

¹Upássɔ, ɔ̄cogwɛ́ɛya, nōo wɛ otrɛ̄yí kú ācogbāajɛ kú ipú Agblīihɔ-nɛ̄hi ā, le ɛhɔ̄ nɛ̄ Ujeremíya yɔ̄ ī cɛ̄ ā pó kwɛyí.

²Anɔ́ɔ ó le ɔ́dā je kéē lɛ Ujeremíya gɔ́, cɛ́ɛ́ kéē kwú agbá ú kwu ɔ́ wāajɛ ɛgiyí okómpinu kú Ubénjamīn kú ɛhícō kú Agblīihɔ-nɛ̄hi ā.

³Oŋmɔ́cí nū, igbīhi nɛ Upássɔ le Ujeremíya hɛ́tá ŋmá agbá ā, Ujeremíya da ɔ́ kahíníī, “Óndú ā í hī uwɔ ka Upássɔ ŋ́. Amáŋ iyē nɛ̄ Óndú ā je ga uwɔ ā lé ka, ‘Ɔdōtūufi le yɛ ɔ́ jīla tá biílí.’

⁴Ohígbū ɔ́ɔmā, Óndú ā abɔ̄yī nū kahíníī, “N géē je awɔ abɔ̄yī uwɔ pīya ɔdōtūufi lɛ īyī uwɔ, mɛ́mla ɔdōtūufi lɛ aóklóbīya uwɔ. A kē í má abɔ̄ aólɛlā kú uwā í kpó odúúdú uwā ŋmó ɔgbɛ́fú. N géē je odúúdú ācɛ kú Ujúda kpó tū abɔ̄ kú ɔcɛ́ kú Ubábīlɔn. Ó géē je ācɛ ōhī kú uwā kpó aɔ́fiyɛ ga Ubábīlɔn, ó kē í kpó ācɛ ohi ŋmó.

⁵N klla í yá ka aólɛlā kú ācɛ igelī nyā kéē kwú odúúdú agbénú kú uwā mɛ́mla ɔdā ōtiile dúú nēé lɛ ŋmá úklɔ́ kú uwā kwu ákú aɔ́cɛ́ kú Ujúda dúú ā kpó abɔ̄fú ga ubábīlɔn.

⁶Upássɔ, ákú uwɔ ā, é géē kpó awɔ mɛ́mla aíkonó kú uwɔ bɛ̄ɛka aɔ́fiyɛ ā gaajɛ Ubábīlɔn. A géē kwú abɔ́ɔ, é kē í nyi uwɔ abɔ́ɔ. É géē nyi uwɔ abɔ́ɔ mɛ́mla odúúdú aóklóbīya uwɔ nɛ̄ a húmáyī kā uwā ɛ̄kɛ̄mgbɛ̄ ā.”

⁷Ujeremíya kahíníī, “Óndú, a lɛ um plla, n kē cɛ̄ gā uwɔ lɛ um plla ɔkwɛ̄yi. Abɔ̄ a lɔfú fíyɛ́ um ā, abɔ̄ kú uwɔ kē le fíyɛ́ ákú um ɛɛ́. Odúúdú ācɛ bá ī cokónu gbɛdɛɛ tú um. É klla bá ī ya um okónu eko dóódu.

⁸Eko dúúmā nɛ̄ n gē kɛlā nɛɛ, n gē lɛ ɔkɔ cɛyí ī tɔ́ɔna gē ka, Ífi, ífi, ācɛ o yá ɔdābɔ̄fú lɔfú wā ɛga dóódu ipú ajɛ ā, ɔdā dóódu géē je kpó yíífi ipú ajɛ ā. Ācɛ̄ gē yá um okónu klla ī dɛ̄gba tū um eko dóódu, ohígbū ka n gē bī ɛlā kú Óndú ā lɛ tɔ́ɔna lɛ uwá.

⁹Ekoōhī n gē da iyī um ka n kōō híī hiiyē kú Óndú ā gɛ ŋ́, ká n̄ klla kɛlā kwɛyí nū ɛ́ gɛ ŋ́. Amáŋ eko ɔ́ɔmā, ɛlā kú uwɔ kē ī tū um ájuka, n géē ka ɔ́ pií. Ń klá okónu tū ɔ̄ glá ŋ́.

¹⁰N pó abɔ̄ ɛjɛ̄ɛ̄jī ācɛ dóódu bá ī kɛlā tū aɔ́mpa uwā ahɔ̄, klla bá gē kahíníī, “Ācɛ bá ipú ufiifu ɛga dóódu. Ālɔ̄ lɛ ɛlā tū ce ɔ́. Ālɔ̄ lɛ ɔ́ kpɛ́pɔ̄.” Kwu aóklóbīya um nááná ā bá ī yɔ̄ ī leyī táajɛ ká n̄ le nyíleyī ŋmá ɔwɛ kú Óndú ā. É bá gē kahíníī, “Ekōhī alɔ lɔfú plla anú glá, cɛ́ɛ́ ká ālɔ̄ lɛ ɔ́ kwú, kú ālɔ̄ lɛ ɔ́ci gwō ɔ̄.”

¹¹Amáŋ, Óndú ā yɔ̄ pi um, ī nuunu gā um bɛ̄ɛka ɔ̄cokpɛ́fú nɛ̄hi nɛ̄ ɔ̄cɛ dúúmā í lɔtū túblla anú glá ŋ́ mā a. Ohígbū ɔ́ɔmā odúúdú ācɛ nēe gē tíne ō yá um ŋmó ā géē gwōnū í lɛ okónu nya ajɛ. É kē gáā yá um lé glá ŋ́. Uwēyī géē kwú uwá piyóó, ohígbū kéē gáā yá ɔdā nɛ̄ é gē tíne ō yá ā glá ŋ́. Ācɛ í gáā mlanyī uwēyī nōo gáā kwú uwā ā gbóógbóō ŋ́.

¹²Amáŋ, Óndú, awɔ nōo lɔfú fíyɛ́ dúú ā, gē jé ācɛ má cɛ́ɛ́ kú ā jé ɔtū kú ɔ̄cɛ nōo le kpaakpa á. A jé ɔdā nōo yɔ̄ ɔtū mla odo kú ācɛ. N kwú ɛlā kú um í tū uwɔ abɔ̄ ɛɛ́. Ohígbū ɔ́ɔmā, n tíne ō má ka a lɛ ɔ́ci gwo ācɛ ā gā um mɛ́ɛnɛ.

¹³Aá gwííjē, ka aá cɛ̄tra Óndú ā, ohígbū ka anú nya aógbɛhá tá ŋmá abɔ̄ kú ācobɔ̄bíipú nēe bá yɔ̄ ī piya uwá tū ā á.

¹⁴Á géē yɛ í cɛ̄ lɛ eyī kú ɛ̄cī nēé ma um ā nyā fúlufúlu ŋ́. Eyī yá um kú ācɛ ké ē bla kwu ɛ̄cī nɛ̄ ɛ́nɛ́ um ma um ā dɛ̄ɛ̄ ŋ́! Eyī yá um kú ācɛ kéē kwú mlanyī ɛ̄cī nɛ̄ ɛ́nɛ́ um ma um ā, kéē kōō blakwu ɔ́ gɛ ŋ́.

¹⁵Lɛ okónu tá lɛ ɔ̄cɛ nōo bī ɔ̄kā gē lɛ ádā um ka, é le ɔyínɔ̄nyīlɔ ma lɛ ɔ́ āa.

¹⁶Óndú ā kóō híī ményinyi ɔ̄cɛ ɔ́ɔmā ŋ́ ɛ́gɛ́nɛ̄ ó ményinyi aígelī nɛ̄hi ŋ́, anɔ́ɔ ó je uwá kpó yíífi ŋmá ajɛ ā. Ɔ̄cɛ ɔ́ɔmā ka o pó íbá kú ɔnɔ nɛ̄ ācɛ géē yɔ̄ ī jé ɔ̄cɔ̄ɔ̄cī, mɛ́mla íbá nɛ̄ ācɛ géē yɔ̄ ī dɛ̄ ka ɛfú ō kpó ɔlɛ́ɛnɔ.

¹⁷Ɔ̄cɛ ɔ́ɔmā cíkā ō gekwú ohígbū ka ó ŋmó um ipú kú ɛ́nɛ́ um gbɔbū kóō ma um ŋ́. Cɛ́ɛ́ kú ipú kú ɛ́nɛ́ um géē yɛ í kwú pīya únóji kú um.

¹⁸Ɔdíyá nēé kōō ma um ā mɛ́ɛ̄? Ohígbū kú n wā í lɛ unwalu mɛ́mla ɔtūnōbí nyā mɛ́mla oōkwú ipú uwēyī nɛɛ?”