Read idoma UJƐRƐMÍYA 21 Bible Online

UJƐRƐMÍYA 21 - idoma bible

UJƐRƐMÍYA 21

¹Eko eyī Usedekíya, ɔcɛ́ kú Ujúda lɛ Upássɔ, ɔyí kú Umalkíya mɛ́mla Usefaníya, ɔyí kú Umaaséya, ɔ̄cogwɛ́ɛya ā, tɛ̄hɔ̄ fú um. Anɔ́ɔ Ɔwɔicō kē le ɛlā ka gā um lɛyíkwu ɔ́ á.

²Usesekíya tɛ̄hɔ̄ ā kahíníī, “Kócōō lɛ ɛlā ka lɛ Ɔwɔicō lɛ alɔ, ohígbū ka ɔcɛ́ kú Ubábīlɔn, Unebúkádinēsa le aícɔ́ɔja kú ɔlɛ́ nū kpó wā gáā gbɔɔ́ ō kpɛ́fú tú alɔ ɛɛ́. Ekōhī Óndú ā géē ya éyi kú úklɔ́ idáagó kú nū ā lɛ alɔ, nōo géē yá kú Unebúkádinēsa kóō nyɛ̄ɛ̄ hɛ̄ alɔ tá abɔ̄fú.”

³Anɔ́ɔ n da ācɛ nɛ̄ ɔcɛ́ tɛ̄hɔ̄ fu um ā kahíníī,

⁴“Aá nyɔ̄ gáā da Usedekíya ka Uyáwɛ, nōo wɛ Ɔwɔicō nɛ̄ Ísrɛ̄lu gē gbɛ̄ɛ̄gbā ā kahíníī, ‘Usedekíya, n géē je aícɔ́ɔja kú uwɔ nēe bī aíyɛ́fú bá ī kpɛ́fú ā tá ɔcɛ́ mɛ́mla aícɔ́ɔja kú Ubábīlɔn ā pīyeyī lɛyíkwu uwɔ. N kē géē kpó odúúdú aícɔ́ɔja kú uwɔ ā mɛ́mla ákú aólɛlā bēhé tɔ̄há wā ipú igelī nyā.

⁵N géē bī odúúdú ɔfú kú um le kpɛ́fú tá uwɔ ohígū ka n le cɔ̄nū mla ánya nɛ̄ɛ̄nɛ̄hi lɛyíkwu uwɔ.

⁶N géē bī ōcē obɔ̄bí nɛ̄hi lɛ kpó odúúdú ācɛ mɛ́mla aɛ́bɛ́ nēe lā igelī nyā ā ŋmó.

⁷Amáŋ awɔ nōo wɛ Usedekíya ā mɛ́mla aígabɔ̄ kú ɔlɛ́ uwɔ mɛ́mla ācɛ nēe géē wi ŋmá ɛfú, ɔkpɛtá mɛ́mla ōcē obɔ̄bí ā, n géē cɛ̄ lɛ Unebúkádinēsa, ɔcɛ́ kú Ubábīlɔn ā, mɛ́mla aólɛlā kú aá nēe tíne ō ŋmó aá, kóō lɛ aá kpó kwú. Unebúkádinēsa í ŋmó awɔ mɛ́mla ācɛ ā. Ó gáā ményinyi ɛ́ɛ́ nōó gē ma abɔ̄ odúúmā kú aá tá ŋ́. Ami nōo wɛ Uyáwɛ ā le ka ɛɛ́.

⁸Anɔ́ɔ Ɔwɔicō da um ka amíyɔ̄ da ācɛ ā kahíníī, “Aá jāhɔ̄. Ami nōo wɛ Ɔwɔicō ā ge je ɛga lɛ aá ká aá je oyēeyī ámāŋ ka ikwū.

⁹Ɔ̄cɛ dúúmā nōo klá ipú igelī nɛ̄hi nyā kpɔ́, ɛfú géē lé ɔ́, ámáŋ ka ɔkpɛtā mɛ́mla ōcē obɔ̄bí géē ŋmó ɔ́ɔ̄. Amáŋ ɔ̄cɛ dúúmā nōo le bɛ̄cɛ ŋmá ipú igelī nɛ̄hi nyā, gáā cɔ̄nyā lɛ ācɛ kú Ubábīlɔn, nēe bá í cīíbɔm tū igelī nɛ̄hi nyā abālɔbányā ā, é kē gáā ŋmó ɔ̄ ŋ́. Ikɔkɔ ikwū ā, ó géē wi.

¹⁰Ami nōo wɛ Ɔwɔicō ā kwu abɔ̄ kú igelī nyā ú kwu ɔtū ka ń gáā yá olɔhi lɛ ɔ̄ gɛ ŋ́, amáŋ n géē je ɔ́ yíífi. N géē je ɔ́ tá abɔ̄ ɔcɛ́ kú Ubábīlɔn, ó kē í je ɔ́ yɔlá tū ajɛ.”

¹¹Ɔwɔicō klla da um ka amíyɔ̄ da ipɔ́ɔ́nū kú ɔlɛ́ ɔcɛ́ kú Ujúda ā kahíníī, “Aá pó ɛlā nɛ̄ Ɔwɔicō gē ka ā.

¹²Ācɛ ípɔ́ɔ́nū kú ɔlɛ́ Udéfīdi eee! Aá yá ka aá hɛ́pɔ̄ kpaakpa ɛ̄cī dóódu. Aá lɛ ācɛ nēé gē pīyatū ā hɛ́tá ŋmá abɔ̄ kú ācɛ nēe gē pīya uwá tū ā. Ɔ́dāŋ́ ka aá yá lɛ a ŋ́, ɔdōbɔ̄bí nɛ̄ aá gē yá ɔ́ɔmā géē yá ká n̄ cɔ̄nū nɛ̄ɛ̄nɛ̄hi nōo gáā loō mɛ ŋ́ bɛ̄ɛka ɔlá nɛ̄hi nōo ī yi nōó tōō nyí ŋ́ mā.

¹³Ācɛ̄ Ujerúsālɛm, aá nēe lā icō kú ɔpɛ́ nyā, ɛyí ɛfu nōo kwu ajɛ kpátáā ā. A gē ka ka ɔ̄cɛ dúúmā ɔ́ gáā kpɛ́fú tá aá glá ɛ́ɛ́, nɛ̄ ɔ́ gē ca igá kú aá tāajɛ glá ŋ́. Amáŋ, n géē bɛ̄yíkwu aá.

¹⁴Ami nōo wɛ Ɔwɔicō ā, géē yá aá ōwē ohígbū ɔdā nɛ̄ a yá ā. N géē je ūpū kú ɔlɛ́ aá[7] tɔ̄lá. Ɔlá ā kē í je ɔdā dóódu nōo yɛ ɔlɛ́ aá tá biílí ā yi tā ajɛ dúúdú.