Read idoma UJƐRƐMÍYA 22 Bible Online

UJƐRƐMÍYA 22 - idoma bible

UJƐRƐMÍYA 22

¹Igbɔhá, Ɔwɔicō lɛ ɛhɔ̄ tū um kpɔ́. Ó kahíníī, “Nyɔ̄ ga agblɔ̄cɛ́ kú ɔcɛ́ Ujúda cɛ́ɛ́ ká ā gáā lɛ ɛhɔ̄ nyā cɛ̄ abɔ́ɔ.

²Da ɔcɛ́ kú Ujúda, nōo cɔcɛ́ kwɛyí Udéfīdi ā ka, anū mɛ́mla aígabɔ̄ kú ɔlɛ́ nū mɛ́mla ɛjɛ̄ɛ̄jī ācɛ Ujúda nēe gē wā ipú agblɔ́cɛ́ nyā ā,

³ka ɔdā nɛ̄ ami nōo wɛ Uyáwɛ ā ka ā yɔ̄ á. ‘Aá hɛ́pɔ̄ kpaakpa, kú aá klla yá ucē okpaakpa. Aá hɛ́ ācɛ nēé gē pīyatū ā tá ŋmá abɔ̄ kú ācɛ nēe gē yá uwā ŋmó ā. Aá yá ācɛ aéwɔhá nēe wɛ aúgbɔga ɔlɛ́ aá ámāŋ ayí okwū, ámāŋ anyōkwū ɔdōbɔ̄bí dúúmā ŋ́. Aá kē híī ŋmó ācɛ nēé yá ɔdā obɔ̄bí dúúmā ŋ́ mā amānyā ŋ́.

⁴Ɔ́dāŋ́ ka aá cɛ̄ lɛyítáajɛ lɛ ɛlā nɛ̄ n ka nyā, ayíka aɔ́cɛ́ nēe ŋmá ipɔ́ɔma kú Udéfīdi nēe gē cɔcɛ́ kwɛyí Udéfīdi mɛ́mla aígabɔ̄ mɛ́mla ācɛ ɔlɛ́ uwā géē bá ī ce aúgbɔ́ɔnya mɛ́mla aɔ́nya bēhé aókómpinu kú agblɔ̄cɛ́ nyā á.

⁵Amáŋ ɔ́dāŋ ka aá lɛyítáajɛ lɛ ɛlā nɛ̄ n ka nyā ŋ́, n gbo īyī um ɛka ka, agblɔ̄cɛ́ nyā géē je gblífi gaá tá alácɛ̄.”

⁶Ohígbū ka ami nōo wɛ Ɔwɔicō ā ka agblɔ̄cɛ́ kú ɔcɛ́ kú Ujúda he um ɔtū bɛ̄ɛka Ugílɛ̄di mɛ́mla ɛfu kú Ulɛ́bānɔn nēe hɛ́yīfuuú mɛ́mla ácí mɛ́mla ɔcí cɔɔɔ́ ā. Nááná n géē je ɔ́ yíífi nōó í je pīya áncā bɛ̄ɛka ígbíli ámāŋ ka aígelī nēe tá alácɛ̄ ā.

⁷“N géē tū ācɛ ɛhɔ̄ gaá je agblɔ́cɛ́ ā wúlatāajɛ. Ɔnyɔɔnyɛ kú ācɛ ā í bī iyúklɔ́ kú nū gaá kpó ɔcí ulóko nɛ̄ aá le fīyɛ̄ aínu kú aá ā hɛ́, klla í je uwā kpó tɔ̄lá.

⁸Ācɛ aéwɔhá alɛwa géē wā í yɛ gla igelī nɛ̄hi nyā. Cɛ́ɛ́ é géē bá í da īyī uwā ɔ̄kā ka ‘Ɔdí yá nɛ̄ Ɔwɔicō ca igelī nɛ̄hi nyā tāajɛ ɛ́gɛ́nyā āa?’

⁹Ohi nēé ī tá īyī uwā ā géē wɛ ka, ‘Ohígbū ka é nyɛ̄ɛ̄ hɛ̄ ɛka nɛ̄ Uyáwɛ, Ɔwɔicō nɛ̄ uwā ī gbɛ̄ɛ̄gbā ā, cē mla uwā tá, klla nyɔ̄ í bá ī gbā aɛ́cí ɛ̄gbā.’

¹⁰Aá híī jikwū kú ɔcɛ́ nōo gekwú ɛɛ́ mā, ɛ́ɛ́ nɛ̄ aá géē yēkwu kú nū ŋ́. Amáŋ aá jikwū nɛ̄ɛ̄nɛ̄hi, ohígbū ɔcɛ́ nēé kwú ɔfiyɛ bī nyɔ̄ ajɛ aéwɔhá ā. Ohígbū koó gáā pīyɛyí ŋmá abɔ́ɔ wā ɔlɛ́ ī má ajɛ kú ɔlɛ́ ádā nū gbóógbóō ɛɛ́ gɛ ŋ́.

¹¹Ɔwɔicō kɛlā lɛyíkwu ɔyí kú Ujosíya, ɔcɛ́ kú Ujúda, nōo lé ka Ussálum,[8] nōo lé ɔcɛ́ kú Ujúda kwɛyí ádā nū ā. Eko ɔ́ɔmā é le ɔ́ kwú ŋmá Ujérúsālɛm. Ó ka, ‘ó gáā pīyɛyí gbóógbóō ɛ́ɛ́ gɛ ŋ́.

¹²Ó géē kwú ipú ajɛ nēé kwú ɔ̄ nyɔ̄ ɔ́ɔmā. Ó klla gáā má ajɛ kú Ujúda ɔhá ɛ́ɛ́ gɛ ŋ́.’

¹³Ɔ̄cɛ nōo gē bī ɔ̄cɛ opīyatū gwó ɔlɛ́ nū, nōo klla ī bī ɔwɛ nɛ̄ ó le kpaakpa ŋ́ gwó inīcō ce ɔ́ ā le jī ɛɛ́. Ɔ̄cɛ ɔ́ɔmā nōo ī yá ācɛ ɔlɛ́ nū kéē yúklɔ́ áncā, nōó cíla uwá ulé kú úklɔ́ nēé yá ā ŋ́ má le jī ɛɛ́.

¹⁴Ɔ̄cɛ ɔ́ɔmā kahíníī, “N géē gwō agblɔ̄cɛ́ lɛ īyī um nōo géē lɛ aínicō nēe lɔwá nɛ̄hi.” Ó lɛ aúwíndo yá tū ɔ̄, lɛ ɔcí Usɛ́da kpó gbā bá ɔdɔ kú nū, klla lɛ ɛwó nɔwa plā ɔdɔ nú yōōō.

¹⁵É da uwɔ ka aɔ́lɛ́ nɛ̄hi ō gwó lɛ aɔ́cí Usɛ́da alɛwa gbā tū ɔ̄ ā kwú fíyɛ́ ákú ācɛ ɔhá ā nɛɛ? Ádā uwɔ ī má lé klla má gwá nɛ̄hi. Ohígbū koó hɛ́pɔ̄ klla yá ɔdā okpaakpa ā, ó kē í lɔhi lɛ ɔ́.

¹⁶Ó gē cɛ̄pɔ̄ aógbɛhá. Ohígbū ɔ́ɔmā ɔdā dóódu gē yá lɔhi lɛ ɔ́. Ɔ́ɔmā wɛ ɛyí ō jé ami nōo wɛ Ɔwɔicō má áā?

¹⁷Amáŋ awɔ ā ī leyīkwu ɔdā klla ī lɛ ɔtū kwu itene ɛ̄kɛ̄mgbɛ̄ ō lé ōfōōfūnū. A gē ŋmó ācɛ nɛ̄ ó yá ɔdōbɔ̄bí dúúmā ŋ́. A klla pīya ācɛ tū, ī lɔnɔɔtū lɛ uwá.”

¹⁸Ohígbū ɔ́ɔmā, Ɔwɔicō kɛlā nyā lɛyíkwu ɔyí kú Ujosíya, Ujɛhóyākim, nōo wɛ ɔcɛ́ kú Ujúda ā. “É gáā yēkwu kú nū ŋ́. Aɔ́máapú nū í gáā jikwū nū ŋ́ mā aa, ācɛ nōo wɛ ɔcɛ́ kú uwā ā í gáā jikwū nū ŋ́.

¹⁹É gē pi okwū kú nū ajɛ kpūuulū gáā tá tónū eyīyɛcɛ kú igá kú Ujerúsālɛm bɛ̄ɛka ɛ́gɛ́nɛ̄ é géē yá okwū ijakī ā.”

²⁰Ujeremíya da ācɛ kú Ujerúsālɛm kahíníī, “Aá nyɔ̄ Ulɛ́bānɔn gáā dīíbáā. Aá dɛ̄gba ŋmá ipú ajɛ kú Ubássan. Aá dīíbáā ŋmá ɛyí aɛ́fu kú Umówābu ohígbū ka é kwú odúúdú ācɛ nēe ī tá aá abɔ̄ ā í yálé ɛɛ́.

²¹Ɔwɔicō kahíníī, “N kɛlā lɛ aá eko nōó lɔhi lɛ aá ā, amáŋ aá ka aá jāhɔ̄ pó ɛlā kú um ŋ́. Aá kē húmáyī tá ō lɛyítáajɛ gā um ŋmífi nɛ̄ aá wɛ ɔyípɛ̄nɛ̄ŋ́cɛ́ ā.

²²Ohígbū ɔ́bíipú kú aá owu géē kpó aótrɛ̄yí ká aá nyɔ̄, é kē géē kpó ācɛ nɛ̄ aá he uwá ɔtū, nēe ī tá aá abɔ̄ ā kpó kwú ga ɔfiyɛ. É géē yá aá ɛflɛ́ɛfu klla í je uwēyī lɛ aá ohígbū odúúdú ɔ́bíipú nɛ̄ aá bī ā dúú.

²³Aá lā ɛbɔ́ cíí ipú agblɔ́cɛ́ nēé lɛ aɔ́cí Usɛ́da nēé kpó ŋmá Ulɛ́bānɔn ā gwó ɔ̄ ā. Amáŋ, aá géē jikwū klla í tíifu nɛ̄hi, eko nɛ̄ aá gē jé ɔnɔ nɛ̄hi bɛ̄ɛka ɔnyā nɛ̄ ɔmā lɛ ɔ́ kwú ā.”

²⁴ Óndú ā kɛlā lɛ Ujɛhóyācin, ɔcɛ́ kú Ujúda, nōo wɛ ɔyí kú Ujɛhóyākim, ɔcɛ́ kú Ujúda ā. Ó kahíníī, “Ɔ́dāŋ́ ka ami wɛ Ɔwɔicō nōo yēeyī á, ɔ́dāŋ nɛ̄ awɔ nōo wɛ Ujɛhóyācin kōō wɛ ɔká kú ɔcɛ́ nɛ̄ n le bá abɔ̄lɔ́ná kú um nááná, n géē hɛ́ uwɔ ŋmá abɔ́ɔ tónū.

²⁵N klla géē je uwɔ lɛ ācɛ nɛ̄ a gē yúúfi uwá ā, nēe ī tíne ō ŋmó uwɔ ā. N géē je uwɔ lɛ Unebúkádinēsa, ɔcɛ́ kú Ubábīlɔn mɛ́mla aícɔ́ɔja kú nū.

²⁶N géē kpó awɔ mɛ́mla ɛ́nɛ́ uwɔ ga ajɛ éwɔhá ɛga nēé ma odúúmā kú aá ŋ́ mā. Aá ɛpɛlɛ́ɛpa kē í kwú abɔ́ɔ.

²⁷Eyī ajɛ ɔlɛ́ aá, Ujúda, géē yɔ̄ ī yá aá, amáŋ áa gáā má ɔ̄ gbóógbóō ɛ́ɛ́ gɛ ŋ́, ohígbū ka aá gāa pīyɛyí wā ɔlɛ́ ɛ́ɛ́ gɛ ŋ́.

²⁸N da ɔ̄kā kahíníī, “Ujɛhóyācin nyā kwú yá bɛ̄ɛka ɔjá nōo kwú ca, nēé kwú tá tónū, nɛ̄ ɔ̄cɛ dúúmā í tíne nū ɛɛ́ gɛ ŋ́ mā nɛɛ? Ɔdíyá nēé kpó anú mɛ́mla ayí nū gaajɛ ewɔhá, nɛ̄ uwá í jé jéjée ɛ́ɛ́ ŋ́ mā?”

²⁹Ajɛ kú Ujúda eee! Jāhɔ̄ ka a pó ɛlā nɛ̄ Óndú ā ka á. Ó kahíníī,

³⁰“Ami nōo wɛ Uyáwɛ ā keē lɛ ɔ́ tá tāajɛ lɛ Ujɛhóyācin ka ó lɛ ayí dúúmā ŋ́. Lɛ ɔ́ tá koó wɛ ɔ̄cɛ nōó yá lɔhi eko kú nū ŋ́. Ohígbū koó gáā lɛ ayí dúúmā nēe géē lé ɔcɛ́ kú Ujúda bɛ̄ɛka aádáádā nū Udéfīdi ā ɛ́ɛ́ gɛ ŋ́.