Read idoma UJƐRƐMÍYA 23 Bible Online

UJƐRƐMÍYA 23 - idoma bible

UJƐRƐMÍYA 23

¹Igbɔhá Ɔwɔicō klla kahíníī, “Aótrɛ̄yí kú ācɛ ɔlɛ́ um nēe gē pa ācɛ ɔlɛ́ um hīla, klla í kpó uwā yíífi ā le jí ɛɛ́. É lɛbɛ̄ɛka ācogbāálá, nēe ī kpó aálá nēé cíkā ō leyíkwu ā yíífi ā.

²Ohígbū ɔ́ɔmā, ami, Uyáwɛ, nōo wɛ Ɔwɔicō nɛ̄ Ísrɛ̄lu gē gbɛ̄ɛ̄gbā ā da ācɛ nēe gē gbō ācɛ ɔlɛ́ um ā ka aá leyīkwu ācɛ ɔlɛ́ um ŋ́. Aá kwú ācɛ ɔlɛ́ um í nū klá ɛcɛ, klla lɛ uwá pahīla bɛ̄ɛka aálá. N géē héyītū aá, í yá italā ohígbū ɔdōbɔ̄bí nɛ̄ aá yá ɔ́ɔmā.

³Ami abɔ̄yī um géē kpó ohile kú ācɛ ɔlɛ́ um bɛ̄ɛka aálá nēe le pahīla ā ŋmá ipú odúúdú aéwo nɛ̄ n pa uwá hīla nyɔ̄ āa. Cɛ́ɛ́ n lɛ uwá kpó kwúcē wā ipú ajɛ ɔlɛ́ uwā. É kē géē ma ayí alɛwa klla í nyīla lɛwa nɛ̄hi.

⁴Ami nōo wɛ Ɔwɔicō ā ka n géē fu aótrɛ̄yí nēe géē gbō uwā, nēe klla géē leyīkwu uwá. É gáā yúúfi ɛ́ɛ́ nɛ̄ ɔdā dúúmā gē tū uwá ufí ɛ́ɛ́ gɛ ŋ́. Odúúmā kú uwā í kē gáā bī ŋ́. Óndú ā lɛ ɛlā ka ɛɛ́.

⁵Ɛ̄cī éyi géē wā, nɛ̄ ami nōo wɛ Ɔwɔicō ā géē fu ɔ̄cɛ okpaakpa éyi ŋmá ɔkwu kú Udéfīdi lɛbɛ̄ɛka ɛ́gɛ́nɛ̄ ābɔ̄ gē lū ŋmá ɔcí ā. N géē je ɔ́ cɔcɛ́ nōó géē bī íjééyī le gbō uwá. Ó géē hɛ́pɔ̄ kpaakpa klla í yá ɔdā okpaakpa ipú ajɛ ā.

⁶Eko nōó í cɔcɛ́ ā, Ujúda géē lɛ onyatá, Ísrɛ̄lu kē í lā ɛbɔ́. É géē hī iyē nū lé ka, ‘Ɔwɔicō gē hɛ́pɔ̄hi lɛ alɔ á.’

⁷Ohígbū ɔ́ɔmā, ɛ̄cī éyi géē wā, nɛ̄ ɔ́dāŋ nɛ̄ ācɛ ī gbō ɔkpá, é gáā ka, ‘Ɔ́dāŋ́ nɛ̄ Ɔwɔicō nōo kpó ācɛ Ísrɛ̄lu bɛ̄cɛ ŋmá Íjīpiti ā yɔ̄’ gɛ ŋ́.

⁸Amáŋ é géē ka ka ɔ́dāŋ́ nɛ̄ Ɔwɔicō nōo kpó ācɛ Ísrɛ̄lu bɛ̄cɛ ŋmá ajɛ kú ɛhícō mɛ́mla ipú odúúdú aéwo, nōo nū uwā nyɔ̄ ā yɔ̄.’ Cɛ́ɛ́ eko ɔ́ɔmā, é géē lā ipú ajɛ kú ɔlɛ́ uwā.

⁹Eko nɛ̄ n lɛ ɛlá gbo lɛyíkwu ācomɛ́ɛbɛ ā, ɔtū kú um kwú bīya, cɛ́ɛ́ odúúdú ikpokwú kú iyē kú um kwú wi ŋmá ɔhá. Ɛ́gɛ́nɛ̄ Ɔwɔicō lɛ ā mɛ́mla ɛdɔ ɛlā otīihɔ nōo ka ā cɛ̄ gā um yɔ̄ ī túgagá lɛbɛ̄ɛka ɔ̄cɛ ogwéjé nɛ̄ ejé lɛ ɔ́ kwú ā.

¹⁰Ācɛ lɛwa ipú ajɛ ā, nyɛ̄ɛ̄ hɛ̄ Ɔwɔicō tá gaá bá ī pā ɛcí. Okónu nɛ̄ Ɔwɔicō tá ā cɛ̄ lɛ ajɛ ā le ŋmíkpākplā. Aácí kē le kpó ŋmó. Ācomɛ́ɛbɛ ā bá ī yá ucē obɔ̄bí, klla ī bī ɔfú kú uwá ī yá ɔdā nōo le kpaakpa ŋ́.

¹¹Ɔwɔicō kahíníī, “Kwu ācogwɛ́ɛya mɛ́mla ācomɛ́ɛbɛ ā í yá ucē kú Ɔwɔicō ŋ́. N le uwá kwú bá ī yá ucē ɔ́bíipú ipú Agblīihɔ-nɛ̄hi ā abɔ̄yī nū.

¹²Ohígbū ɔ́ɔmā, ami nōo wɛ Ɔwɔicō ā géē cɛ̄ lɛ ámíyā í yá uwā eko nɛ̄ n géē yá uwā italā ā. Ó géē lɛbɛ̄ɛka ɔ̄cɛ nōo yɔ̄ ī yɛ ɔwɛ nōo lɛ ɛtrɔ ipú obū ā. N kē ī cɛ̄ lɛ ɔ́ plá uwá gwōnū.

¹³Ó lɛ ɔdōbɔ̄bí nɛ̄hi eyī nɛ̄ n má ācomɛ́ɛbɛ kú Usamérīya bá ī yá. É gē bī iyē kú ɛcí nēé hī ka Ubáalu ā lɛ mɛ́ɛbɛ, klla le ācɛ ɔlɛ́ um kpó nyíleyī.

¹⁴Amáŋ ɔdōbɔ̄bí nɛ̄hi nɛ̄ n má ācomɛ́ɛbɛ kú Ujerúsālɛm ā bá ī yá ā wɛ ɛbɛ ohéyī. É bá gē cikpó anyā nēe wɛ anyā uwā ŋ́, klla bá ī kɛ̄mgbɛ̄. É ī cɛ̄tra ācɛ nēe ī yá ɔdōbɔ̄bí ā. Ohígbū ɔ́ɔmā ɔ̄cɛ dúúmā í cɛ̄ pīyabɔ̄ ŋmá obɔ̄bí nōō ī yá ā ŋ́. Ohígbū ɔ́ɔmā uwá mɛ́mla odúúdú ācɛ Ujerúsālɛm lɛbɛ̄ɛka ācɛ Usɔ́dɔm mɛ́mla ācɛ Ugomóra ā.”

¹⁵Abɔ̄ ó le lɛ ā, ami nōo wɛ Ɔwɔicō, nōo lɔfú fíyɛ́ dúú ā ka n géē je ɔda ohɔ́nɔ lɛ uwá lé. N klla gē je éŋkpɔ̄ ōŋmɔ́cɛ lɛ uwá gwá. N géē yá uwá lɛ ā ohígbū ka, ācomɛ́ɛbɛ ā yá nɛ̄ ācɛ bá ī yá ucē ɔ́bíipú ā ɛbɛɛbɛ ipú ajɛ ā á.”

¹⁶Ɔwɔicō nōo lɔfú fīyɛ̄ dúú ā kahíníī, “Aá jāhɔ̄ lɛ ɛhɔ̄ nɛ̄ ācomɛ́ɛbɛ ā gē cɛ lɛ aá ŋ́. É gē cɛ̄ lɛ aá gē lɛ eyīyōce ɛ̄kɛ̄mgbɛ̄. Ɛbɛ nēé ī má ā ŋmá ɛlá nēé gbo ipú odo kú uwā ā. Ó wɛ ami kɛlā lɛ uwá ā ŋ́.

¹⁷É bá ī ka lɛ ācɛ nēe tá ō lɛyítáajɛ gā um ā ka ɔdā dóódu ɔ́ɔ géē lɔhi lɛ uwá. É klla ī da odúúdú ācɛ nēe gē yá īkpɛ̄yí ōlɔfú ā ka ɔdōbɔ̄bí dúúmā í gáā yá uwā ŋ́.”

¹⁸Amáŋ ami nōo wɛ Ɔwɔicō ā ka odúúmā kú ācomɛ́ɛbɛ nyā í háyi ipú ójīla kú um ɔkpáncō jééjéē ɛ́ɛ́ ŋ́, ɛ́ɛ́ nɛ̄ ó kóō pó ɛlā kú um klla jɛ́yí nū ŋ́. Odúúmā kú uwā í kē jāhɔ̄ kéē pó ɛlā kú um jééjéē ɛ́ɛ́ ŋ́.

¹⁹Óndú ā géē cɔ̄nū dā ācobɔ̄bíipú nɛ̄hi bɛ̄ɛka ɛ́gɛ́nɛ̄ owu nɛ̄hi gē kpó odée ā.

²⁰Ɔnū nɛ̄ Ɔwɔicō í cɛ̄ ā í gáā mɛ ŋ́, jāā gbéeko nōó lɛ ɔdā nōo bī ɔtū ō yá ā yá kwɛyí. Igbīhāajɛ ā, aá géē jɛ́yí ɔdā nyā péee.

²¹Ń tū ācomɛ́ɛbɛ nēe bá nyā ɛhɔ̄ ŋ́, náaná é bá ī hápápá nyɔ̄ gaá cɛ̄hɔ̄. Ń ka ɛlā dúúmā lɛ uwá ŋ́, náaná é ba ī ka ɛbɛ nēé ka aá ɔ́ɔ má.

²²Amáŋ ɔ́dāŋ ka é háyi ójīla kú um ɔkpáncō nɛɛ, é géē yɛ í lɛ olɛhɔ̄ kú um cɛ̄ lɛ ācɛ ɔlɛ́ um. É kē í yɛ í lɛ uwá pīyabɔ̄ ŋmá ɔdōbɔ̄bí nēé ī yá ā, mɛ́mla ucē ɔ́bíipú kú uwā.

²³N wɛ Ɔwɔicō nōo yɔ̄ ɛbɛɛbɛ̄, kwu ajaajɛ mɛ́mla ɛga oligbó.

²⁴Ɔ̄cɛ dúúmā í tayínū ɛga dúúmā nɛ̄ n gáā má ɔ glá ŋ nɛɛ ŋ́? N yɔ̄ ɛbɛɛbɛ ɔkpáncō mɛ́mla ɛcɛ.

²⁵N pó ɛlā nɛ̄ ācomɛ́ɛbɛ nēe gē bī iyē um kɛ̄mgbɛ̄ ā gē ka ka amíyɔ̄ tū aá ɛhɔ̄ ipú ɔ̄na ā.

²⁶Eko nyá nɛ̄ ācomɛ́ɛbɛ ɛ̄kɛ̄mgbɛ̄ nyā géē bá ī gbɛlá ɛ̄kɛ̄mgbɛ̄ gaá kwu ā?

²⁷É gbɛlá ka ɔ̄na nēé bá í nā ī ka lɛ ācɛ ɔlɛ́ um ā géē yá kéē kwú ɛlā um gwō, ɛ́gɛ́nɛ̄ aádáádā uwá je ɛlā um gwō nyɔ̄ gaá bá ī pā ɛcí nēé hī ka Ubáalu ā.

²⁸Ɔ̄comɛ́ɛbɛ nōo lɛ ɔ̄na nā, kóō ka ka anúɔ nɔ̄na. Amáŋ ɔ̄comɛ́ɛbɛ nɛ̄ um lɛ ɛlā ka lɛ ɔ́, kóō kē kɛlā kú um ā tɛ́ɛcɛ kpaakpa. Ohígbū ka igbóngbō wɛ ɛyɛ́ɛ́yí hɛ̄ īkpīgwu tá.

²⁹Ɛlā nɛ̄ um ka gē yi lɛbɛ̄ɛka ɔlá ā. Ó klla lɔfú lɛbɛ̄ɛka omútāgā, nōo gē ca aɛ́cɔ̄ nyɛŋɛnyɛŋɛ ā.

³⁰Ohígbū ɔ́ɔmā ami nōo wɛ Ɔwɔicō ā ka n gē bɛ́yíkwu odúúdú ācomɛ́ɛbɛ nēe gē kpó ɛlā ŋmá ɛgíyī ɔ́mpā uwā nēé gbɛlá ka ɔ́ cíkā ō pó ɛlā ŋmá ɛgiyí um, bá ī ka ka olɛhɔ̄ kú um ā.

³¹N gē bɛ́yíkwu ācomɛ́ɛbɛ nēe gē kɛlā ɛ̄kɛ̄mgbɛ̄ kú abɔ̄yī uwā, gē ka ka ami ɔ́ɔ ka á ā.

³²N gē bɛ́yíkwu ācomɛ́ɛbɛ nēe gē ka ɔna ɛ̄kɛ̄mgbɛ̄ tɛ́ɛcɛ ā. É gē ka ɔ̄na ɛ̄kɛ̄mgbɛ̄ nēe bá ā cāā lɛ ācɛ ɔlɛ́ um, í kōō lɛ ayínu da ɔ́ ŋ́. Anɔ́ɔ é ī kpó uwā nyíleyī á. Abɔ̄ nɛ̄ ń tū uwā ɛhɔ̄, ɛ́ɛ́ nɛ̄ n kōō ī je ɔ́da lɛ uwá ŋ́ mā, é tīile dúúmā lɛ ācɛ ɔlɛ́ um glá ŋ́.”

³³Anɔ́ɔ Ɔwɔicō kahíníī, “Ujeremíya,eko nɛ̄ ācɛ nēe bá nyā, ámāŋ ācomɛ́ɛ́bɛ, ámāŋ ka ācogwɛ́ɛya ā lɛ ɔ̄kā da uwɔ ka, ‘Ɔdí wɛ ɛlā nɛ̄ Ɔwɔicō ka āa?’ Da uwá ka, ‘Aá wɛ unwalu kú Ɔwɔicō á. Ó kē í kpó aá tá bónū’.

³⁴Ɔ́dāŋ́ ka ɔ̄comɛ́ɛbɛ, ámāŋ ɔ̄cogwɛ́ɛya, ámāŋ ɔ̄cɛ ɔhá dóódu kú ācɛ ɔlɛ́ um le ka ka, ‘Ɛlā nɛ̄ Ɔwɔicō ka ā,’ n géē yá ɔ̄cɛ ɔ́ɔmā mɛ́mla ɔlɛ́ nū italā.

³⁵Ikɔkɔ ɔ́ɔmā ɔdā nɛ̄ ɔnyɔ̄ɔnyɛ kú aá í bá ī ka lɛ aɔ́mpā nū mɛ́mla aɔ́máapú nū wɛ ka, ‘Ɔdí wɛ ohi nɛ̄ Ɔwɔicō tá ā?’ Amāŋ ka, ‘Ɔdí nɛ̄ Ɔwɔicō ka ā?

³⁶Amáŋ aá híī lɛ okónu hɛ́ ‘Ɛlā nɛ̄ Ɔwɔicō ka ā’ igbɔhá ɛ́ɛ́ gɛ ŋ́. Ohígbū ka ɛlā okónu kú ɔnyɔ̄ɔnyɛ kú aá nɛ̄ aá gē ka ka ɔ́ɔ wɛ ɛlā nɛ̄ Ɔwɔicō ka ā á. Anɔ́ɔ aá lɛ ɛhɔ̄ kú ami, Ɔwɔicō nōo yēeyī ā, Uyáwɛ, nōo lɔfú fíyɛ́ dúú klla wɛ Ɔwɔicō nɛ̄ aá gē gbɛ̄ɛ̄gbā ā gbájí á.

³⁷Ujeremíya, ɔdā nɛ̄ aá ī da ɔ̄comɛ́ɛbɛ ā wɛ ka, ‘Ohi nyā nɛ̄ Ɔwɔicō tá um ā?’ Amāŋ, ‘Ɔdí nɛ̄ Ɔwɔicō da um ā?’

³⁸Ó lɔfú ka ka, ‘Ɛlā nyā nɛ̄ Ɔwɔicō ka á.’ Ó le lɛ ā, a da ɔ́ ka abɔ́ɔ ó le ka ka ‘Ɛlā nyā nɛ̄ Ɔwɔicō ka á ā’ nááná nɛ̄ n da ɔ́ kóō híī ka ŋ́ mā,

³⁹n géē je ɛlá gwō hɛ́ uwɔ tá dúúdú, klla í je aá, mɛ́mla igelī nyā nɛ̄ n je lɛ aádáádā ā kpó nū ŋmá ɛgiyí um.

⁴⁰N kē í je uwēyī nōo í kwú aá piyóó lɛ aá. Uwēyī ɔ́ɔmā í kē gáā nyɛ̄ɛ̄ ŋmá aá īkpɛ̄yí gbóógbóō ŋ́.”